عارفة اني ملخبطة أوي... بس ساعات بتيجي على الواحد أيام كدة... و بيكون مش عارف يعمل أي حاجة و لا عارف يفكر في أي حاجة. و يحس ان الدنيا خلاص لازم تنتهي لو ناوية تستمر بالشكل دة!!! دة اللي أنا كنت حاساه ... أو ممكن أقول كمان اني " مازلت" حاساه شوية
بس اللي يسعد جدا جدا و لا اعتقد ان ممكن يكون فيه حاجة تسعد أكتر منه ... هو لما تحس إن بجد ربنا سامعك
أصله هو اللي خلقك :)
و هو اللي عارفك كويس أوي ..
يمكن عارفك أكتر من نفسك كمان
و هو الوحيد اللي عارف اللي جواك و اللي انت حاسه بجد
و مهما حاولت تقول للناس.. أو تحسسهم باللي انت حاسه... مش هيقدروا يفهموك للدرجة دي..
حتى لو كانوا أقرب الناس في الدنيا دي كلها ليك
أنا لسة فعلا ملخبطة شوية... بس حسيت حاجة غريبة أوي النهاردة فحسيت اني عايزة أكتبها...
دايما كان أ\ عمرو خالد بيقول (و عجلت إليك ربي لترضى) ... خدها شعارك في رمضان "أو حتى في حياتك عموما"
كنت بحب الجملة دي أوي و فاكرة إني حاسة بيها و مستشعراها... بس الحقيقة إني اكتشفت اني مكنتش حساها أوي كدة
امبارح كنت في قمة الانهيار، و كنت طول اليوم في صمت أشبه للموت ... كنت حاسة فعلا إن الأكسجين مش قابل يقرب مني ... كنت حاسة بخنقة فظيعة....... الحمد لله على كل حال
بس فجأة لقيتني بفتكر الجملة البسيطة دي... اللي رغم بساطتها غالية جدا جدا في المعنى
(و عجلت إليك ربي لترضى) :)
لقيتني حساها أوي ، و مش قادرة أفكر في حاجة غيرها
فكرت إن فعلا ربنا هو اللي هيساعدني، و هو فاتحلنا بابه طووووووول الوقت ، بس إحنا اللي مش بنخبّط
أو يمكن بنخبّط ساعات..لكن بس بنحسس على الباب بس، مش بنخبّط بجد بقوة يعني
المهم إني قررت ألجأ لربي بقلب جامد أكتر من الأول... و يارب يتقبل مني و يعيننا كلنا
بس الجميل أوي... و الغريب جدا بالنسبة لي....... هو إني استمريت بالاحساس دة (و عجلت إليك ربي لترضى ) و كان قلبي بيعيدها طول اليوم من غير ما أحس.... بس كل شوية أفتكر الرسالة دي و أجدد نيتي تاني... لغاية ما رحت صلاة التراويح النهاردة، و كانت مفاجئتي :)
هي يمكن تكون بسيطة لكل الناس، بس أنا الموضوع وصلني بطريقة تانية خالص
خلال الصلاة "بعد ما أخدت شعاري الجديد بيوم " :) لقيت الامام -جزاه الله عنا خير الجزاء- بيقرأ الآية دي " و عجلت إليك ربي لترضى".
. . . . . . . . .
و لقيتني في حالة لخبطة و ذهول !!! مش عارفة المفروض أحس بإيه بالضبط خالص!!! يعني هي الآية دي في
السورة دي معادها الليلة دي تقرأ في التراويح؟؟؟
مشاعر كتيرة أوي حسيتها بجد في لحظة قراءة الآية دي... كنت طايرة من الفرحة لدرجة إني ابتسمت في الصلاة :) و انا حتى مش عارفة ينفع كدة و لا لأ. بس أنا في الحقيقة كنت حاسة اني عايزة "أنط و أطير" من الفرحة :) مش أبتسم بس
كمان حسيت بزعل جامد أوي... و بجد مكنتش عارفة المفروض أضحك لأن ربنا بعتلي الرسالة دي عشان يقوللي انه بجد قريب مني، و انه عارف اللي بفكر فيه، و عارف إني حسيت بالآية دي أوي و هاخدها طريقي؟؟! و لا المفروض أبكي لأن ربنا موجود و حقيقي قريب مننا دايما و احنا اللي وحشين و بننساه؟؟
حسيت إني عاوزة أسجدله في لحظتها و أقولله سامحني. بجد محتاجالك أوي. و مش عارفة الطريق. الرياح جامدة أوي و مسحت آثار الطريق اللي كان مرسوم.. و مش باقي منه غير شوية علامات خفيفة. يارب خد بإيدنا و متسيبناش في الدنيا دي لوحدنا أبدا
كان فيه خواطر تانية جتلي النهاردة :) بس هحاول أكتبها كمان شوية ان شاء الله
7 comments:
موضوع تحفة بجد
جيه في وقته
كنت محتاجاه فعلا
ربنا يكرمك يارب وينفع بيكي
ويدلنا كلنا عالطريق
آاااامين
فلسطينية الهوى... بجد اتبسطت أوي بتعليقك :) بجد أوي
يارب أكون مفيدة في أي حاجة بكتبها. ادعولي :)
اولا انا عايزة اشكرك على تعليقك عندي و بجد فرحني ان المدونة عجبتك.مش عارفة ليه انا محسيتش انك بتجاملي و ان الكلام من قلبك بجد...و كل سنة و انت طيبة..و مدونتك رقيقة اوي..والبوست هايل يخلي الواحد يفكر كتير..صدقيني كلام القلب بيوصل للقلب..بجد بوست رائع..
اشكرك تاني..و بارك الله فيك
سبحان الله
انا بصراحه مش لاقي كلام يتقال
ربنا يرزقنا الخير
بس انا واثق انك كده على الطريق الصح
ربنا يوفقك
it's gr8 to feel God's bless inside uuself...sometimes i feel it all of a sudden esp in keyam el lelil but really it's a gr8 sign =)...when u feel the love of God as u said our creator who knows us more than our selves...
God bless u more dear =)
سلام عليكم :)
آسفة جدا جدا على التأخر في الرد.
نقطة مية:
أنا اللي فرحني جدا ان البوست دة عجبك، و ربنا يتقبل مننا كلنا ان شاء الله
و فعلا اي كلام لو لم يكن من القلب، عمره ما هيوصل للناس و لا هيأثر فيهم :) كلامك كمان جميل اوي و يأثر في الناس. نورتي البلوج
Sunshine:
Thank you so much for your comment.
Yes, it's a great feeling... specially when u r sad& feeling u really need Allah's help and no one's else.
May Allah bless you too, dear sister.
Ya rab yataqabbal Ramadan from all of us. and.... thanks a lot for visiting my blog, I'm really glad :) & ya rab tetkarrar ;)
و لو
من غير مجاملة :)أكتر حد بيسعدني جدا جدا تعليقه (طبعا بعد أعز صاحبتين عندي :D )
بجد ربنا يسعدك دايماو يعزك، و يرزقك بالناس اللي تساعدك و تسعدك طول الوقت :)
حضرتك شايف اني كدة على الطريق الصح؟؟! أتمنى كلنا نكون على الطريق الصح لأني مش حاسة اني عارفة الاقي طريقي واضح
كل سنة و حضرتك طيب. و شرفتني بتعليقك في البلوج طبعا. في انتظار بوست جديد منك، و في انتظار زيارات أخرى ان شاء الله
Post a Comment