Friday, January 16, 2009

خواطـر مبعثرة. حاجات كتير


أمـــي فلســطين..بقلبي دوما



لما بسمع أخبار فلسطين الحبيبة كل يوم بحس أحاسيس كتيرة أوي
كلنا كدة طبعا
بس إحساس مرعب و انت "بتتفرج"وبس
و بتشوف حصيلة الشهداء و الجرحى..و بتقول في سرّك يااااه.دة كدة كمان يومين هيكملوا الألف. يااااه دة كدة ألفين

و نبدأ نتعود على الأخبار و كأنها حقيقة واقعة

ساعات كتير بتفرج و أنا في إيدي حتة بيتزا أو ساندويتش
بتكسف من نفسي أوي لما أحوّل على قناة الأخبار
هو أنا باكل؟؟؟ بهزر؟؟؟
بس بلاقيني برد على نفسي و أقول إن مش فيه حاجة أصلا أعملها

مش عارفة :(

إحساس وحش أوي
و مفزع أوي لما بفكر إن ممكن في يوم من الأيام إحنا يحصل فينا كدة

بستحقر نفسي كتير لما بفكر إني زعلانة و مهمومة من شوية مشاكل صغيرة و لا حتى هم كبير. هو دة ييجي جنب اللي هم فيه إيه أساسا؟؟؟

بس برجع و أقول إننا بشر
وطبيعي أي حد جواه هم أو تعب من حقه إنه يحزن شوية.دي نفسية جوانا

بزعل ساعات لما بلاقيني بدعي لنفسي جـــامد،أو حتى للي بحبهم. و إن يارب ربنا ييسر الأمورو إن يارب يزيل عني الهم و الحزن....و مش بدعيلهم أد ما بدعي لنفسي
بس برجع و أقول إن كمان دة طبيعي أعتقد :(. يعني مش أعتقد إن الناس الكويسة بتدعي للفلسطينيين و تنسى نفسها. مش كدة؟؟؟


قريب شفت "في التلفزيون" مظاهرة وفيها صور للأطفال الملايكة دول اللي اتقتلوا.و لقيت واحد شبه ابن حد من اخواتي جداااا !! ساعتها قلبي اتنفض جامد أوي

ياااااه على الإحساس دة. يارب عمره ما يحصل لنا أبدا
بس يارب الأول يبطل يحصل لهم
بحس إني مش مفيدة خالص ومش بإيدي حاجة أعملها. بحس كتير إنه قمة الأنانية لما أفكر في نفسي ساعات و أنساهم

بس فعلا

مش شايفة حاجة ممكن تتعمل أكتر

.............................................................................................................


مــــرة أخرى


ساعات قليلة و يأتي

لم أعد أحتمل الانتظار

مر وقت طويل مذ رأيته آخر مرة.. في كل مرة يدور شريـط الأحداث بتلك الطريقة حتى يأتي


أود لو أخبره كم اشتقت إليه.. لكني أكتفي باحتضانه و أنا مبتسمة

كالطفـــلة أتبعه أينما ذهب و أنا صامتة... حتى يبدأ في فتح حقائبه فأذهب لمساعدته


في كل مرة يأتي، يلزمنا أياما حتى نعتاد عليه

كالطفلة حقا. . . أجدني أرقبه في كل خطواته، في كل لفتاته، همساته، جلسته، ابتسامته، صوته و هو يضحك، حتى طريقة سيره


يضحكني كثيرا عندما يرد على هاتف المنزل! فدائــما ما يخدع المتصلين أيا كانوا... حتى إن كانوا هم أقاربنا و يعرفونه. له طرقه الفريدة في خداع الجميع و المزاح معهم...و دوما ما ينتهي الموقف بضحك الطرفين


أسعــد كثيرا عندما أشعر وجوده بالبيت، حتى إن لم نكن نتحدث... لكنه إحساس بالراحة و الدفء أفتقدهم كثيرا


أستمتع باللعب بين خصلات شعره و هو مسترخ على الأريكة يشاهد التلفاز. أسعد كثيرا لابتسامته حينها و هو يخاطبني بأسماء أحبها

كثيرا ما يخبرني من حولي أني أتعامل مع من أحبهم كما أتعامل مع القطط :). لكنــي لا أشعر ذلك كثيرا في الحقيقة



يمضي وقت طويل حتى نعتاد عليه و على عاداته، و ما أن نبدأ في الاعتياد عليه... حتى يفاجئنا بقرار الرحيل مرة أخرى


لكل من في نفس موقفه... أود لو أن أصرخ و أخبرهم جميعا بأن الاستمتاع بتلك اللحظات التي نكون فيها معا لا يعوضه أي شيء آخر مهما كان


أبي. . . اقترب وقت رحيلك مرة أخرى.... كم سأشتــاق إليك


.............................................................................................................



حلم الطفولة إلى الأبد



إني أفرد إيديا الاتنين جنبي و أغمض عيني و أقف في مكان فيه هوا و كأني بطير

. . . . . . . . . . . .

نفسي أحســـها أوي أوي أوي


نفس الحركة اللي في فيلم "تيتانيك"؟ أيوة تقريبا :). بس أنا مش عايزة كدة عشان الفيلم خـــالص

دة إحساس بحبه من و أنا صغيرة أوي

بحب الأماكن المرتفعة أوي

يمكن بعشقها كمان


و بحب أحس نسمات الهوا و هي بتستقبلني برقة فتحسسني بالراحة و تخليني أبتسم


من فتـــرة شفت إعلان بتاع مسلسل تركي. في الإعلان جايبين الراجل واقف فوق مكان عالي و فـــــارد دراعاته

يـــــــاااااااااااااااااه.... حسيت إني بطير معاه

عايزة أبقى مكانه أوي أوي. أعمل زيــه

و أغمض عيوني و أحس بالهوا حواليا في كل مكان

. . . . . . . . .

و أحس إني فعلا بطير..كل اللي حواليا هو السمــاو بس


الدنيا صعبة أوي،و قاسية أوي.... ما بنصدق لما بنلاقي حاجة ترجع لنا الإحساس دة و لو حتى لوقت صغير أوي


................................................................................................................


لا أعرف


أحيانا كثيرة هذه الأيام... يغيم على حياتي الحزن، أفقد توازني، أنكسر، و يزداد ذلك الإحساس حتى أشعر و كأنني بالفعل أغرق


ورغم ذلك

دومـــا بداخلي صراع شديد. فأنا لن أظل على هذه الحال كثيرا. أظل أقنع نفسي بذلك. أظل في ذلك الصراع طوال الوقت... لكني لا أستطيع الوصول إلى شعاع الضوء الذي يتحدثون عنــه

يرفض الحزن أن يغادر بابي و لو ألحيت عليه بالرحيل

يرفض أن يترك الابتسامة معي

لست أطلبها لآخر العمر لأنها في النهاية مجرد"دنيا". لكني أحتاجها فقط لبضع لحظات أخرى

يرفض الحزن أن يلبي رغبتي


عنـــدي أمل و ثقة كاملة في أن يوما أفضل سيأتي

لكني أنتظر كثيرا...و لا أدري أضل طريقه أم اختفى بين طرقات الحياة لا يفكر في المجيء قريبـا

بداخلي الكثير و الكثير

و أحاول الخروج من دائرة الحزن، لكني لست متأكدة أني أستطيع،و إن بذلت الكثير من مجهودي


.................................................................................................................


حبيبتي


حبيبتي

أشتاق إليك كثيرا

لــم أستخدم تلك الكلمة "حبيبتي" مع العديد من الأصدقاء

فلها مكانة خاصة، و معنى خاص، و لا أدرى بالفعل كيف يقولها البعض لكل من يلقونهم

هـــي عندي لها معنى كبير جدا


ما زلت أتذكر ملامح وجهك بالطبع، ابتسامتك، عيونك و أنت حزينة

مازلت أتذكر الكثير من ذكرياتنا معا

لكــن الحياة بدورها تنسينا دائما


فتأتي لحظات فيها أنساكي قليلا

أو أنسى يوم افترقنا

لــم أنسى يوما آخر حديث لنا أو ما حدث لي بعد آخر حديث عندما حدثت أختك

لكن.... أحيانا ننسى كم الفراق صعب


نحاول التشبث بمعان بالحياة و أشياء مادية...و ننسى أهمية العلاقات الإنسانية

أعترف

كثيرا ما أنساها بالفعل

و لا يذكرني بها إلا أشياء قليلة......و ذكــــراكي


لو يعلــم الناس ما نشعره عندما يفارقنا حبيب

لو يشعرون ذلك الشعور قبل فراقه

كثيرا ما نقصر في حقوق من حولنا

نحبهم لكن أمورا أخرى أقل أهمية تشغلنا عنهم

حتى نعلم يوما كم كنــا خاطئين عندما تخلينا بتلك السهولة عنهم، أو حتى لم نتخلى..... لكـــن ابتعدنا كثيرا ظنا منـــا أن ما نفعله هو الأصح


يفكر البعض في أن الرحيل و البعض عن من يحبونهم"هو أفضل لمن يحبون"!!! و هم لا يعرفون مدى الألم الذي يشعره من يحبهم بعد فراقهم

عندمـــا يبدلون الأدوار و يظنون أن من حقهم التفكير بعقل الآخر،و كأنهم يعرفون تفكيره، فينسحبون بكل بساطة....ظنــا منهم أن ذلك أفضل

أفضل لمن في الحقيقة؟؟؟ لا أعرف

فأنا لا أجد أحد الطرفين في راحة من قرار فراق أبدا

كثيـــرا ما يتشاجر الأصدقاء، لكنهم بكل بساطة يقررون الابتعاد

لا يعرفون مدى خسارتهم

و لــن يعرفوها إلا عندما يفترقون بالفعل


حبيبتـــــي

رحمــك الله

لم ألق صديقة مثلك منذ سنين

و أعرف أن إيجاد شخصا يحبنا و نحبه بالفعل، و نثق فيه أيضا... ليس بالهين أبدا


عندما تجد ذلك الشخص... أرجوك

لا تدعه يرحل أبدا

حاول بكل الوسائل ألا تخسره

فلن تعرف يوما معنى الخسارة أوطعمها حتى تخسره


..............................................................................................................

بـــكرة إن شاء الله هيبقى أحلى


أنا عارفة كدة كويس

بس كل اللي ربنا عايزه مننا


إننا مش نفقد الأمل

و إننا نحاول. مش بس نقول وخلاص

يارب كل الناس تبقى أحسن و أسعد

24 comments:

lyssandra said...

يفكر البعض في أن الرحيل و البعض عن من يحبونهم"هو أفضل لمن يحبون"!!! و هم لا يعرفون مدى الألم الذي يشعره من يحبهم بعد فراقهم


عندمـــا يبدلون الأدوار و يظنون أن من حقهم التفكير بعقل الآخر،و كأنهم يعرفون تفكيره، فينسحبون بكل بساطة....ظنــا منهم أن ذلك أفضل


أفضل لمن في الحقيقة؟؟؟ لا أعرف


فأنا لا أجد أحد الطرفين في راحة من قرار فراق أبدا

====================

لو عرفتي أفضل لمن ابقي قوليلي

:(

هاجي وقت تاني لما أكون أحسن شوية

سلام يا فراشه

sakayar said...

أيوة سلامو عليكم ورحمة الله
اختنا الفراشة
ايييييييه البوست الطويل ده؟؟؟
ههههه
الطبيعي الواحد يقول ايه البوست الجميل ده بس انا قلت أغير شوية
ربنا يسعدكم ويعزكم
ونبدأ في الرد على استفساراتكم وأسئلتكم وناخد اول تليفون
-------------------------

أمـــي فلســطين..بقلبي دوما

أخبار فلسطين واللي بيحصل فيها أمر محزن بشتى أنواع الحزن ... وتكراره فعلا وعدم تغير اخبار فلسطين للدرجة اللي جيلنا هيقسم فيها انه من يوم ما اتولد وهي نفس الاخبار لكن بتتنوع
كل ده جعلنا ممكن ناكل بيتزا واحنا ادام التي في بنتفرج ع الاخبار دي او بناكل فيشار ونعيط وكإننا بنتفرج على فيلم رومانسي البطل بيموت ف آخره .... بجد شيء محزن ... لكنه واقع
أليم


ولو شاء الله لانتصر منهم ولكن ليبلو بعضكم ببعض

-------------------------------

مــــرة أخرى

أسلوب جميل في التعبير لدرجة أشعرتني انك بتتكلمي عن طفل انتي امه وليس عن أب انت ابنته
ربنا يجمعنا بمن نحب ويرضى عنا جميعاً ولا يفرقنا أبداً ... ولو فهمت صح ... يبقى يروح ويرجع بألف سلامة
------------------------------

حلم الطفولة إلى الأبد

دي حالة مرضية اسمها السكاكة المتحمسة في الانيرجيزر ... أيوة هي كده
أصلها عندي انا كمان ههه
بس انا بحب افرد دراعاتي كده وبعدين انط ... مش افضل واقف ف الهوا بس ... بس لما أنط لتحت يبقى فيه ميا علشان اعمل تششششش ... مش انزل على صخرة واعمل تك أيييي .... ربنا يسعدكم

الدنيا صعبة أوي،و قاسية أوي.... ما بنصدق لما بنلاقي حاجة ترجع لنا الإحساس دة و لو حتى لوقت صغير أوي

الذي خلق الموت والحياة ليبلوكم أيكم أحسن عملاً
*****************
أم حسبتم أن تدخلوا الجنة ولما يأتكم مثل الذين خلوا من قبلكم ؟؟ مستهم البأساء والضراء وزلزلوا حتى يقول الرسول والذين ءامنوا معه متى نصر الله؟؟ ألا إن نصر الله قريب
خلي الآيات دي في دماغك دايما وانتي هتلاقي الحياة سهلة جداً وكل حاجة فيها تعدي علشان بس نشم ريحة الجنة
وافتكري ان الحياة يا حسنات بتزيد وسيئات بتقل ... يا سيئات بتزيد وحسنات ضايعة
--------------------------------

لا أعرف

ارجعي للآيات اللي فاتت ... ربنا يسعدك ويباركلك في عمرك وحياتك
---------------------------------

حبيبتي

حبيبتك لواحدك ماليش دعوة انا ... انا ممكن انضرب فيها
يااارب تكون ف مكان اجمل من اللي احنا فيه ويجمعكم ببعض في الجنة ان شاء الله بعد عمر طويل ويارب يسعدها بنجاحك ف الدنيا وف لقاكم ف الاخرة على حب من الله
--------------------------------

بـــكرة إن شاء الله هيبقى أحلى

أنا عارفة كدة كويس
بس كل اللي ربنا عايزه مننا

إننا مش نفقد الأمل
و إننا نحاول. مش بس نقول وخلاص
يارب كل الناس تبقى أحسن و أسعد

الخاتمة الأفضل للبوست
------------------------
تحياتي أسعدكم الله وأعزكم
وطبعاً مش هعتذر عن الاطالة ... انتو السبب هه
تحياتي ليكم

صمت المشاعر said...

جميل اووي البوست دا كلمات واسلوبك مميز اووي


تقبلي مروري اختي الكريمه

Banota said...

دى طبيعة الأنسان .ز مش معنى أننا بندعى لنفسنا ولأصحابنا أننا غلط .. لكن الصح أننا ندعى لنفسا واصحابنا وأخونا فى فلسطين .. كلامك ده فكرنى بموقف حصلى اول امبارح .. كنت قاعدة بتفرج على التليفزيون وأنا باكل وزعلانة أوى بقى على موقف تافهة حصلى .. بصيت لاقيت أخبار عن اللى بيحصل فى غزة .. حسيت أنى فى نعمة فعلاً وأن المشاكل اللى أنا فيها متجيش حاجة قدام اللى بيحصل عندهم هناك .. ربنا يصبر كل واحد على مشكلتة .. ويصبر أهالى غزة .. ويزيح عنهم أيادى المغتاليين لحقوقهم يارب أمين .. البوست كان جميل أوى .. بس طويل حبة
يلا بالتوفيق ياهبة انشاء الله

fashkool said...

اهلا بيك على صفحات مدونتى .. نورتينى .. اعتقد انك جيت عندى قبل ذلك
يا بنيتى الحكايات عن فلسطين تفطر القلب كما ان احداث فيلم تيتانيك حالمه ورومانسيه .. ولا يهمك افردى ايدك وطيرى ..
تحياتى

وحـــــــــــى القلم (Just a tear) said...

(أمـــي فلســطين..بقلبي دوما)
(لا أعرف)
(حبيبتى)
نفسى اعرف يا بوبه ازاى بتارودك نفس الافكار اللى بتراودنى فى نفس الفترات؟؟؟
بجد شئ غريب!!!!
(مــــرة أخرى)
ربنا يجمعكوا دائما على خير وحتى لو ذهب لفتره فهو فى قلبك مارحش بعيد
(بـــكرة إن شاء الله هيبقى أحلى)
إن شاء الله بإذن الله طول ما انتى مش هتستسلمى ان شاء الله الافضل قادم
شويه دردشه بقى :-))
ايه اخبارك ؟
غيبه بقالك فتره ليه انا والله متابعه على طول وقلقانه على غيابك بس مهروسه فى الامتحانات
يارب تكونى بخير

همسات دافئه said...

ممكن تعمليلى ادد أو تبعتيلى ميلك
hamasat.daf2a@hotmail.com

a Dreamer with feet on the Floor said...

Dear. I enjoy reading U as my Theory that i reached after my experiences that ( we R what we think)

and through Ur words I can Say .. U R a very Special Mind and a very special Soul.
that Ur words Expresses not only ur Feelings but it is calling ours as well.
wish U R allwayes so Human. and so smart.

hasona said...

هذا يعني أنك عندك الكثير والكثير

القلم السكندري said...

بصراحة كل موضوع ف دول محتاج بوست لوحده

قلمك معبر.. وجميل



تقبلي مروري

salma mohamed said...

السلام عليكم
عزيزتي هبة,اسفة جدا على غيبتي عن التعليق لا عن القراءة,
بالنسبة لفلسطين فهي في قلبنا كلنا ولو اننا فعلا مقصرين اوي في حقها,بس ياريب يجيب كل دعوة صادقة ليها.
بالنسبة لسفر بباكي فده اكيد امر فرضته عليه الحياة,ربنا ما يحرمكوا منه,وبكرة يتلم شملكوا بيه ويكون في وسطكه,
اما بقى بقيت الخواطر فانا بحس بكتير منها وكانك بتوصفي اللي جوايا,فاللي انتي قولتيه وصف للجوايا خطتيه انتي بايدك,
ربنا يجعلنا واياك آملين دايما في الاحسن,لكن يارب ما تتوه السعادة وهي في طريقها لينا.

Wish I were a Butterfly ... said...

Lyssandra,

أكيد مش كان قصدي ادايقك كدة
:(
بجد عمر ما كان قصدي إني بكتابتي ادايق حد...خصوصا لو حد غالي علي يا ليسا

مش عارفة طبعا هو أفضل لمن
هومجرد إحساس بيحسوه و بس
ساعات فيه ناس بتستمتع بطعم الألم دة. مش عارفة ازاي

سلام يا جميلة

hasona said...

كنت أتمني أن كل منها علي حدة
فكل موضوع منهم جدير بأن يكون رسالة في حد ذاته

لأننا مررنا بحالات نفسية كتيرة ومتغيرة ونحن نقرأئه

تحياتي

Wish I were a Butterfly ... said...

Sakayar,

وعليكم السلام ورحمة الله
تغيير لذيذ :). و فعلا أنا بشفق على الناس اللي قررت تقرأ :). بس كمان بشكرهم ألف مرة على اهتمامهم بأنهم يقرؤا فعلا
ربنا يكرمك يا فندم

أمي فلسطين
صعب أوي المثال اللي قلته دة. بس عندك حق
:(
............
مرة أخرى

شكرا لحضرتك
بتمنى فعلا الناس تحس بالموضوع..مش بابايا شخصيا، لكن فيه كتيــــر بيستسهلوا أوي انهم يعيشوا في بلد تاني بعيد عن أسرتهم الصغيرة ويشوفوا كدة أحسن لهم ولأسرتهم.
بحس إن اجتماعنا مع بعض أهم من أي حاجة تانية
فهمت صح لا تقلق :). يارب يروح ويرجع بالسلامة ان شاء الله
..............

حلم الطفولة إلى الأبد
:)))
دي حالة عويصة أوي
بس تشششش في الآخر؟؟؟
أنا لأ خالص
بحب إحساس الطيران نفسه.حالة إنك حاسس نفسك فعلا بتطير. مش هتلمس حاجة برجليك... انت ف الهوا و بس
:)

شكرا على نصيحتك
كل ما أفتح البلوج باقرأ الكلمتين دول و الآيات.يارب أقدرفعلا أطبقهم دايما جوايا لأن من غير الايمان الكامل بيهم مش هعرف أعيش صح

بجد جزاك الله كل الخير. ربنا يتقبل منك
.....................

حبيبتي
أيوة طبعا هي حبيبتي و بس:)
مش تقلق.. بطوط مش هتفهمك غلط أبدا إن شاء الله
ربنا يسعدكوا و يجمعكوا على خير قريب

آميــــن. هي صاحبتي فعلا وحشتني أوي أوي
......................
إذا كانت الخاتمة الأفضل للبوست فأتمنى أن تكون خاتمة حياتك أفضل منها ألف مرة

شكرا مرة تانية للمجهود دة :).تحياتي

Wish I were a Butterfly ... said...

صمت المشـاعر

شكرا ليكي على ذوقك يا جميلة
:)
تقبلت مرورك طبعا و سعدت بيه

Wish I were a Butterfly ... said...

Bannouta,

طويل حبتين مش حبة
:)
معلش بأة.لما بييجي الكلام

عندك حق
كل ما نفكر في مشاكلنا المفروض نفكر في اللي عندهم مشاكل اكبر مننا عشان نحمد ربنا

الحمدلله على كل حال
ربنا يزيل عنك الهم يا منمن يا جميل

Wish I were a Butterfly ... said...

Fashkool,

حــــاضر
:)
أول ما أقدر صدقني هافرد جناحي و أطير
و مش هستنى حد كمان يمكن
:)

شكرا لحضرتك

Wish I were a Butterfly ... said...

وحي القلم الحبيبة

أمي فلسطين.... يمكن عشان معظمنا المفروض يكون جواه نفس الإحساس دة
لا أعرف.... نفس الكلام غالبا
:)
حبيبتي.... لأن إحنا الاتنين جربنا نفقد حد عزيز علينا
فعارفين الطعم دة أكتر يمكن

بابايا لسة مش سافر كل دة...كل شوية يأجل سفره تاني و تالت الحمدلله
شكرا ليكي على سؤالك و على كل اهتمامك
ربنا يخليكي :)و يخليلك حبايبك يا جميلة
بجدشكرا

Wish I were a Butterfly ... said...

همسات دافئة

شكرا على اهتمامك يا شيمو

هضيفك حاضر إن شاء الله
أنا الميل بتاعي هتلاقيه حاجة متعليقة بالأحلام والطموح وكدة يعني
:)

فرحانة اوي برجوعك تاني للتدوين

Wish I were a Butterfly ... said...

Dreamer,

Thank you
:)

but... what did u mean by "we r what we think"? How did u apply it here? I'm really not sure I get it.

Thank you for ur thoughtfulness. Best wishes for u too. :)

Wish I were a Butterfly ... said...

hasona,

ربما
:)


بداخل كل منا الكثير و الكثير
لكن مش كل وقت بنقدر نخرج اللي جوانا من أفكار و أحاسيس على شكل كلمات
شكرا لحضورك و تعليقك في مدونتي مرة أخرى :)

Wish I were a Butterfly ... said...

القلم السكندري

شكرا لحضرتك
:)
الصراحة مش تزعل أكيد. بس اللي حصل إن الأفكار كلها جت مع بعضها المرة دي

نورت المدونة بتعليقك

Wish I were a Butterfly ... said...

Salma Mohammed,

إن شاء الله مش هتتوه السعادة وهي في طريقها لينا، و لو تاهت يا ستي هانبقى ندور عليها
إن شاء الله تلاقي في كل خطوة في حياتك
:)
مش تعتذري لأن مفيش حاجة بجد
ربنا يكون في عونك يا جميلة

يشرفني إني أكون بوصف اللي جواكي
:)
عشان انت من البنات القليلة اللي جميلة أوي من جوة
و رقيقة وحساسة:). يارب تفضلي كدة علطول
آميــــن على كل دعائك:). شكرا ليكي
افتكريني في دعائك يا سلمى

Wish I were a Butterfly ... said...

Hasona,

معلش
أنا كمان كنت أتمنى والله
:)
خصوصا إن فيه ناس ممكن تقرأ كلامي و ساعتها هتتعب من كتر القراءة

أنا عارفة إن فعلا الموضوعات متغيرة تماما و مش ليها علاقة ببعض. بس معلش استحملني...دة تدويني،و كله جه فجأة من غير ترتيب
بس لقيتني حاسة إني عايزة أكتبه
أعتذر لو كان دايقك تقلب المواضيع...و أشكرك جدا على نصيحتك