كفاية

بابايا مسافر النهاردة بالليل... :(

مش عارفة. أنا بقيت أكره الفراق دة أوي أوي، و مش حاسة إني مستعدة أواجهه كل شوية

أكيد الحمدلله إنه موجود و عايش و كل حاجة.. الحمد لله ألف مرة..... بس مش كفاية كدة؟

مش كفاية سفر و كفاح في بلاد يحس فيها بالغربة.. و إحنا كمان حاسين هنا بالغربة من غيره

دقات قلبي حاسة إنها كل شوية تسرع كل ما وقت سفره يقرّب...

و جاية من الشغل تعبانة و متضايقة عشان مشتغلتش كويس النهاردة... رغم إني واللللله حاولت...

و متضايقة أكتر بكتير عشان رئيسي في الشغل مش حاسس إني بجد فعلا خايفة على الشغل و بعمل اللي أقدر عليه...

بس في نفس الوقت هو ساعات بيكون ليه حق يفكر في كدة... لأنه ببساطة مش قاعد معانا و شايف كل واحدة بتعمل ايه!!

بس برده أكيد متضايقة جدا جدا رغم إنه ليه حق...

لأني مبحبش أبدا أبدا أمشي و حد زعلان مني، أو كان متوقع مني أكتر و أنا مقدمتوش...

بس بجد كنت هعمل ايه؟!!!

و متضايقة أكتر و أكتر إن الكلام دة حاصل يوم ما بابايا مسافر :(

كنت بقول لرئيسي في رسالة على الكمبيوتر إني مش ممكن أتأخر أكتر من كدة في الشغل لأن بابايا مسافر النهاردة... و هو فاجئني بأني مش ممكن أسيب الشغل... فاجئني بأني بصيت على الرسالة في الكمبيوتر و بدأت دموعي تنزل... فاجئني بأني اكتشفت اني خلاص على آخري و مش قادرة أمنع دموعي... و مش قادرة أمنع نفسي من التفكير في الفراق بتاع كل شوية دة.

. . . . . . . . . . . . . . .

أنا تعبانة من الصحيان بدري و من الشغل، و متعودة إني لازم أنام لماأرجع من الشغل كل يوم... لكن النهاردة....... مش قادرة.

مش قادرة من التفكير.. و مش قادرة لأني خايفة بابايا يصحى و بكدة أكون ضيعت شوية وقت أقضيه معاه في آخر يوم له قبل ما يسافر تاني...

مش قادرة لأني بفكر في أخويا حبيبي اللي لسة مسافر من كام يوم.. و دي أول مرة يسافر بعيد عننا ويكون هيسيبنا لفترة طويلة.

بجد الفراق هو أصعب حاجة في الدنيا دي... ربنا يكون في عون كل اللي باباهم أو مامتهم متوفيين، و ربنا

يكون في عون كل اللي ليه حد قريب منه أوي .. بس بعيد في المسافة، و ربنا يكون في عون أي حد أهله اتاخدوا منه من غير وجه حق...

. . . . . . . . . . . . .

دي أول مرة أكتب فيها بالعربي... و غالبا ممكن أوي تكون آخر مرة. أنا مش عارفة كتبت عربي ليه المرة دي... بس حسيت إني عايزة أقول الكلام دة بالعربي كدة... أو بمعنى أقرب... أقول الكلام اللي في قلبي بالضبط... من غير تفكير مسبق في أي حاجة من اللي مكتوب.

يعني ممكن أقتبس الكلمة دي من مدون تاني... و أقول إن دة كله "خربشة قلم" مش أكتر، و مش عشان أي حاجة غير إني أعبر عن اللي جوايا . . . و بس