Saturday, November 3, 2007

لحظة تخاريف



أول ما بدأت أفكر في اني أعمل مدونة... مكنتش مفكرة في أيييي حاجة غير اني هكتب و بس. مش عارفة هكتب ايه و لا لمين!! بس المهم إني هكتب

ممكن أقول اني كنت بادئة أكتب لأني كان جوايا كلام كتيييييييييييييييييييير عايزة أخرجه من جوايا.. و ممكن أوي يكون الكلام دة لنفسي أصلا! أو بمعنى تاني... مجرد أحاسيس و أفكار جوايا.. تعبت من الكلام أوي، و في نفس الوقت وصلت لمرحلة اني مش عارفة اتكلم اصلا خااالص :( و لا حتى لأعز أصحابي... بس حسيت إني عايزة أعبر... بس بطريقة تانية غير الكلام، و غير الدموع


فكرت في البلوج دة و كتبت فيه من غير ما أقول عليه لحد غير أنتيمتي... بعدها بفترة بدأت أقول للقريبين مني. كنت منبهرة بأكتر من بلوج تانيين بس كنت مش بعلق أو ساعات قليلة بعلق ك"مجهول" لأني كنت حاسة اني مش بكتب حاجة تهم أي حد في الدنيا، و لأني مش شايفة نفسي شاعرة و لا أديبة :) "طبعا يعني" . بس مجرد بنت و بتكتب اللي جواها... اللي مضايقها واللي مفرحها

بعد كدة لقيت نفسي بقيت بحب المكان دة أوي :) . جزء مهم من حياتي، و بكون في قمة سعادتي و راحتي و أنا بكتب فيه أو بشوف البلوجز اللي بحبها. و بحب أفتح البلوج و أقعد أحكيله..... يمكن عشان كدة معظم كلامي يضايق "للأسف يعني"!! بس دي طبيعة الحياة.. دايما مش ماشية على طريق واحد، و بالنسبة لي أنا بقالي فترة و أنا مش أنا. . . بحاول أرجع لنفسي بس مش لاقياني!! بحاول أفتكرني بس واضح اني اختفيت من الذاكرة!!! أتمنى ان اختفائي دة يكون من ذاكرتي أنا وبس، مش من ذاكرة العالم كله


طبعا وااااضح جدا.. إني حاليا بخرف جامد و بكتب كلام ملوش لزمة. بس أنا حاسة إني عايزة أكتب و بس. عايزة أكتب إني بجد تعبت أوي، الحمدلله و راضية جدا بكل حاجة الحمدلله. بس مش عارفة فيه ايه اصلا!! :) مش هزعل لو مفيش حد علق على الكلام دة، لأني معاكم انه كلام "لا يستحق التعليق". بس أنا بس حاسة اني عايزة اتكلم شوية... و في نفس الوقت.... زهقت جدا من الكلام


كنت عاملة البلوج و أنا "شبه متأكدة" إن مفيش حد هيكتبلي.. و بصراحة شديدة..... كنت مش متضايقة أوي من كدة لأني بحقق هدفي في الكتابة شخصيا.

يمكن ناس هتفكر إنه لأ. أكيد التعليقات هتكون أهم حاجة ليهم. دة صحيح مش هنكر.. بس دة يمكن عشان يعلقوا على أسلوبهم أو مواضيعهم اللي بيناقشوها

دي كانت بداية تفكيري إن التعليقات مش فارقة خالص... بس بعد كدة لقيت ان حد يعلق على اللي أنا بكتبه، و يشاركني همومي و أفكاري... و يحاول يشجعني لو حسيت إني وقعت جامد... دي أكيد حاجة من أحلى الحاجات في الدنيا كللللها

ناس مش عارفاهم في الحقيقة :) . يعني... مجرد شخصيات على ورق، بس الحقيقة إن كتير منهم أثروا في حياتي و تفكيري بجد. بقيت حاسة إني مش قادرة أستغنى عن البلوج دة.... اللي هو "عالمي التاني" اللي ممكن أقول انه غير واقعي إلى حد ما... ايوة مش واقعي

بس مجرد إني أحس ان ناس ولا أعرفهم ولا يعرفوني بس بيحاولوا يساعدوني... و بيعلقوا على كلامي المتواضع جدا اللي مرة كل 10 مرات ممكن يفيد حد "للأسف طبعا" :)
و إني أحس اني أنا و شباب من بلدي بنشترك في التعبير عن رأينا، و لو في الحاجات الصغيرة دي.... دة بجد حاجة فرقت معايا جدا. و بجد بجد..... مش عارفة لو ماكانش عندي عالمي التاني دة كنت هعمل ايه!!! أكيد الانترنت و البلوجز ممكن يولدوا "الوحدة و الانطوائية" من ناحية تانية. بس ان شاء الله أنا واخدة بالي من النقطة دي و مش هوصلها بإذن الله

حاسة أوي إني مش بقول حاجة فعلا حاليا... و سامعة كمان ناس ممكن تكون بتقول "إيه دة؟! مالها دي؟!!" دلوقتي :) . بس أنا فعلا بكتب اللي جوايا حاليا. و يمكن المرة دي من أكتر المرات اللي خرفت فيها و كتبت كلام عمره ما يهم أي حد غيري... و عشان كدة ان شاء الله همسحه بعد فترة :)

بس هو بس احساس إني كتبت اللي جوايا عشان أبقى أحسن. لأني بجد مش حاسة إني كويسة أوي.

سامحوووووني على التخريف ياأصحابي و اخواتي المدونين القليلييييين أوي... بس اللي بجد فخورة جدا بيهم و بحبهم أوي و مش محتاجة أكتر من كدة حتى :)

إن شاء الله مش هخرف أوي كدة تاني و هبقى أكتب كويس ان شاء الله

يارب مش تزهقوا مني ...... يا عالمي الخيالي و يا اصحابي اللي عمري ما هشوفهم "غالبا" :) إلا لو حصل صدفة غريبة عجيبة مع أي حد فيكم

شكرا ليكم أوي... بجد مش عارفين كل واحد فيكم ايه بالنسبة لي. جزاكم الله عني خيرا. يارب كلكم تبقوا كويسين أوي و مبسوطين ان شاء الله

وسلامي إلى الأهل و الأصدقاء و ماما و تيتا و عمو عباس و خالتو...... :) و السلام عليكم و رحمة الله


ملحوظة: واضح إني في حالة من التهييس، و لكن .. لا تقلقوا. همسحه قريب ان شاء الله

ملحوظة تانية: :) أنا بكتب الكلام دة على اساس ان ممكن حد يستحمل و يواصل قراءة البوست لحد هنا أساسا!!! سامحوني تاني... مش هعمل كدة تاني...... و ادعوووولي ، بس دعاء غير "ربنا يشفي" عشان خاطري

17 comments:

فلسطينية الهوى said...

استمعت بكل كلمة في البوست ده

من أوله حتى نهايته

يمكن لأني بمر بنفس الاحاسيس فحاسة بكل كلمة

لاني لحد النهاردة مش عارفه أنا منتظرة ايه من البلوج


اد ايه أنا بحبه لانه صاحبي

زيه زي قلمي ودفتر مذكراتي


اياكي تمسحي البوست ده

لانه معبر لاقصى درجه

ربنا يكرمك يارب

ويخلينا نوصل لنقطة نبدأ منها قريبا

Wish I were a Butterfly ... said...

فلسطينية الهوى

:) جزاكي الله خيرا يا يوية

مش عارفة بصراحة استمتعتي بإيه!! بس أكيد دي حاجة تفرحني الحمدلله. و ايوة انا كمان بحب البلوج دة اوي و بعتبره... يمكن مش واحد من اصحابي، لأ دة هو اقرب حاجة ليّ

ربنا يسعدك انت كمان يا آية، و يبعد عنك أي حاجة تضايقك ان شاء الله

ولــــــــــو said...

مش معقول
بصي والله بجد ده البوست الجديد اللي كنت ناوي انشره قريب
طبعا مش الكلمات بس نفس الفكره ونفس المضمون
متهيألي مش مجرد صدفه
زي ما قلتي احنا كلنا فينا حاجات كتير من بعض
انا طبعا باقرا وانا مذبهل وعمال اقول اني حتى مش كتبته ف درافت اصلا
ربنا يوفقك وعايزك تعرفي اني اخدت منه كوبي عشان ابقى افكرك بيه بعد كده
مش قلتي صحيح بعد الاهداءات تحبي تسمعي ايه!!!

Wish I were a Butterfly ... said...

و لو

:) ضحكتني اوي بجد. و الحمدلله انك مكنتش كتبته في درافت عشان متقولش سرقته :)

يا فندم دة شرف لي اني أكون زيك :) لأ و كمان هتاخد كوبي؟! اكيد براحتك خالص. بس هو انت هتفكرني بالبوست دة بعد كدة ليه؟!! هتذلني و لا حاجة ؟ ههههه

لأ بجد. انا شوية مستغربة ان اتنين علقوا على البوست دة... اللي في الحقيقة مش عارفة اوصل للهدف منه حتى الآن :). بس هو كان مجرد فضفضة مع الذات

وهو الحقيقة ان اللي مش معقول هو اني لسة من شوية كنت بعلق في البلوج بتاع حضرتك :)
و بخصوص الاهداءات بأة...مممم... لو بنتكلم جد يبقى اي حاجة لفيروز كفيلة بأنها تنسيني الدنيا و ما فيها

خصوصا لو "اديش كان فيه ناس" او "كيفك انت" :) و شكرا على تشريفك للبلوج :)

oceaneyes said...

هههههههههههههههههه

يا ريت ما تتضايقيش من ضحكى ده بس انا بضحك لسبب بسيط اوى ...انى تقريبا لقيت تؤأم روحى بس من بعيد
:D

بجد انتى عسل

مش عارفة اجيب او الاقى الكلمة المناسبة اللى تعبر عن اللى عايزة اقوله عنك ...بس بجد انتى تتحبى بسرعة وتدخلى القلب اسرع

....

لو على الكلام اللى انتى شايفاه تخاريف وهلوسة وتهييس ...فصدقينى دى احلى حاجة كتبتيها لحد دلوقتى ...عارفة ليه ؟!

لانها كلها انتى ...كلها بتعبر عنك انتى ..مش اى حد تانى ...وده طبعا مش معناه ان اى موضوع تانى ليكى مش بيعبر عنك من خلال وجهة نظرك ...بالعكس اكيد بيعبر ...بس اللى يفرق فى البوست ده هو ان الهدف الاساسى منه هو انتى ...

ودى حاجة حلوة جدا ...وانا بصراحة شايفة ان اهم حاجة لاى حد عايز يعمل بلوج هو انه يوصل وجهة نظره فى اى موضوع واهم حاجة يتكلم عن نفسه ويدردش ويطلع اللى جواه ..

ويمكن كمان ينفصل عن الواقع والروتين اليومى للحياه

....

ورجاء منى ليكى ..ماتمسحيش البوست ده
بجد بوست حلو اوى ...اوعى تمسحيه

:)

SunShine said...

loool! u remind me of my self bgad! sometimes i write without knowing wht i'm riting or wht i really wanna rit abt...it seems tht it runs through bloggers these days =D...

and yes i'm from cairo u can add my email if u like to =) tab3an it's my honour

رئيس جمهوريه نفسى said...

اولا ربنا يكرمك ويحقق ليكى كل الى انتى بتتمنيه انا ذيك عملت البلوج علشان اتكلم ومكنش هاممنى التعليقات لحد ما ابتدت الناس تعلق عندى وده خلانى مبسوط انى بسمع راى الناس فيه وفى افكارى
موضوع البلوج ادمان انا والله حاولتى اخد اجازه من البلوج والله معرفتش
ويا ستى ربنا يخليكى وتهئيسى دائما لينا

Banota said...

يا سلام يا هبة أنتى حسيستينى ان انا اللى بتكلم .. بجد انا كنت بكتب حاجات كتيير وبحس نفس الاحساس اللى عندك ..تقريباً ياهبة الاحساس دة عندة كل الشباب اللى فى سننا .. مش عارفة لية نفس الاحساس والكلام تقرباً ولا أنا اللى خيالية شوية وبحس بحاجات غريبة .. بس أنا أدعوك دلوقتى بجد أنك تروحى عندى على البلوج فى شهر julio
وأقرى البوست بتاع الى متى ستأخذنا الحياة
بجد هتحى أن الكلام قريب أوى من كلامك .. وعلى فكرة لو على عالم البلوج وكدة فأنا كنت بكتب بحس مش حاطة فى دماغى التعليقات أوى فى الاول كدة زييك .. بس كانت بترفع معنوياتى وهى أن لسة فى حد عايز يعرفنى ويقرأ كلامى .. لسة أنا فية حاجة كويسة حد عايز يعرفها عنى فعشان كدة بقيت بهتم جداً بالتعليقات دية .. عارفة أنى طولت عليكى أوى وزهقتك منى .. بس الصراحة الكلام لمسنى أوى وحسييت أنى عايزة أطلع بعض اللى كان جوايا
وربنا معاكى يارب

Wish I were a Butterfly ... said...

Oceaneyes,

:)

انت اللي عسل. ايه الكلام الكبير اوي دة؟!! و الله انا خايفة تكونوا فهمتوني غلط دلوقتي. ربنا يكرمك والله على كلامك الجميل دة. و ربنا يجعلنا ان شاء الله أحسن كمان من ظن الناس فينا

والله فرحني كلامك اوي :) . بس كسفني اوي كمان.

و لو بتقولي على الانفصال عن الروتين اليومي... دة يا بنتي قمة الانفصال عن العالم دة كله فعلا فعلا

شكرا اوي بجد يا اوشن :)

Wish I were a Butterfly ... said...

Sunshine,

It's my pleasure ya Shammousa :)
But... how can I get ur mail anyway?!

..........................

رئيس جمهورية نفسي

نورت البلوج جدا جدا. شكرا على تشريفك تاني، و شكرا أوي على الدعوة الحلوة اللي محتاجاها اوي دي

و شكرا كمان :) على آخر دعوة "بس لعلمك دة مش قمة التهييس :) بس كفاية عليكم لحد كدة حرام." :) و بالنسبة للادمان... هو ايوة صعب اوي.... بس زي ماناس قدرت توقف على الاقل انها تكتب بوستات جديدة في رمضان، ممكن اي وقت نقدر ولو لوقت صغير لو عايزين

مش عارفة. بصراحة دة كلام بس مش عن تجربة شخصية، بس حاسة انه ممكن اوي لو عندي ارادة فعلا

و اساسا :) . مش هيسعدنا ان حضرتك تسيب البلوج و متكتبش فيه حاجة لمدة طويلة
أهلا و سهلا بيك في أي وقت يا ريس

.........................

Hola Banouta,

اهلا بيكي يا بنوتة. ازيك؟!! يارب تكوني احسن كتير دلوقتي. على فكرة مش زهقتيني خالص بكلامك. و انا شخصيا لما بحب حد اوي بفضل اكتب كتير في التعليق و مش بعرف اختصر :) فعادي يعني

و أنا معاكي جدا في انك لما تسمعي تعليق الناس على اللي بتفكري فيه و مساعدتهم ليكي دي حاجة ترفع المعنويات جداااا. و تسعد اوي "زي ماانا سعيدة بيكم كدة :)" هشوف البوست اللي قلتي عليه في اقرب وقت ان شاء الله

و شكرا اوي

إنسان مقيد said...

عزيزتي
أحيكي اولا
أما عن ثانيا فأنا مرت من هنا من يومين وكان البوست طتزه بس كعادتي كل ما أمر من هنا مسبش تعليق بس المره دي هكسر القاعده عشان بس اقولك أنك مش لوحدك أبدا في الحاله دي وبليز بلاش تمسحي البوست لأني كل ما أحس أن خلاص مفيش أمل بعدي وأقراه
تحياتي

Wish I were a Butterfly ... said...

انسان مقيد

من حسن حظي ان حضرتك قررت تكسر القاعدة المرة دي. الحمدلله :) و نورت البلوج لأول مرة... و أتمنى مش تكون آخر مرة

عارفة اوي اني مش لوحدي في الحالة دي و لا التفكير دة. بس كنت عايزة اكتب عشان افضفضلي... بصراحة متوقعتش المساندة دي منكم. شكرا اوي

و شرفتني "بتعليقك" :) بعد مرورك

alshared said...

خليكي كده زي ما انتي

لان مفيش حد بيفقد نفسه ممكن تلاقي جانب تاني في شخصيتك
ممكن تكتشفي نفسك اللي ماكنتيش تعرفيها وكانت مستخبيه جواكي
وساعتها بتحسي بغربه وبتحسي انك فعلا مش لاقيه نفسك بس الحقيقه غير كده

تحياتي للاسلوب الرائع

RAMA said...

أنا زعلانة منك أوي .. عارفة ليه ؟؟... علشان أنتي اتكلمتي وحش عن واحدة بحبها اوي اسمها هبه وعندها مدونة بسيطة وجميلة وبتقول كلام حلو أوي.. بلاش تتكلمي عنها بالطريقة دي تاني لو سمحتي .. اتفقنا.. متخليهاش تيجي تشتكي ليه منك .. يعني يرضيكي هبه تزورني وهي زعلانة وتقولي إنك قولتي عليها كلام يضايق كده.. صالحيها من فضلك.. أوعي تنسي

ــــــــــــــــــــ

من أحلى واروع اللحظات هي لحظات التخاريف بعديها بنرتاح اوي .. ولا أنا غلطانة

اتكلمت كتير .. صح ؟؟.. طيب كفاية عليكي كده .. سلامات يا فراشة

Wish I were a Butterfly ... said...

Al-Shared:

تفتكر كدة؟! مش عارفة... هحاول أعمل زي ماانت بتقول و أدور على الكويس في "أنا" الجديدة. بس أنا فعلا زي ما انت قلت .. حاسة بغربة جدا جدا

و عموما بأة.... أنا لو أعرف ان تخاريفي دي هتخلي البلوج ينور كدة!! هكتب كل لحظة و دقيقة بجد :)

تحياتي ليك... نورتني بجد و ربنا يكرمك

..............................

Rama:

مبدئيا... اتخضيت جدا قبل ما اقرأ التعليق بتاعك. قلت ايه دة؟!! هي زعلانة مني؟ طب ليه؟! طب...!!! و كنت قلقانة جدا و أنا بقرأ اول سطر في تعليقك
بس الموضوع عدى على خير :) و الحمدلله

و بعدين... أنا لسة عند كلامي في كل حاجة قلتها على "هبة" دي
ايوة بحبها طبعا... بس زعلانة منها، و جدا كمان. و نفسي ترجع ثقتها في نفسها شوية :( , و لعلمك بأة.... مش هصالحها
و مش هرجع في كلامي
أصل كلمتي لا ممكن تنزل الأرض ابدا

خلاص.. هتنزل المرة دي :) . بس عشان راما متزعلش مني

و بالنسبة للشعور بالارتياح.. عندك حق اوي :) . الحقيقة ان حالة من التهييس و السعادة اللي من غير لزمة موجودة معايا لحد النهاردة!! و كنت مستغرباها اوي لأن مفيش حاجة حصلت اصلا تفرح!! بس فعلا عندك حق..... أكيد السر في الفضفضة الكتيييير دي

عارفة اني أنا المرة دي اللي طولت عليكي اوي. بس هطول كمان جملة واحدة بس... لأني عايزة اقوللك.. إني بجد بحبك أوي، و بحس انك صاحبتي اللي عارفاها من زمان و مش غريبة عني خااالص . :) بجد و الله

ربنا يكرمك ياراما. و يسعدك زي ما بتدخلي السرور على قلبي كدة

همسة قلم said...

:)

...وكفى ياهبة

Wish I were a Butterfly ... said...

همسة قلم

:)

*) و كفى ياسمسم