Friday, September 7, 2007

أحلى عمل خير بحبه :)

أنا النهاردة مبسووووووووطة... لأ... دة أنا النهاردة طايرة من الفرح :D
النهاردة أنا رحت معرض الملابس الخيري. كان بقالي شهوووووور مش عارفة أروحه :( ممكن أكون كملت سنة مرحتوش و أنا مش حاسة. كل مرة كان بيحصل حاجة تمنعني من اني اروحه "تماما"، و كنت ببقى زعلانة جدا جدا جدا.
:) بس الحمد لله
أنا لسة راجعة من شوية صغيرين.
طيب و ايه يعني مالها مبسوطة كدة ليه؟!؟ حد ممكن يفكر كدة.
أنا مبسوطة جدا جدا لأن المعرض دة بجد بحس انه من أحلى الحاجات اللي ممكن أعملها في حياتي... يعني ممكن يكون
فيه أعمال خير كتيييييير أوي.. و متعدش، بس معرض الملابس... بجد بجد حاجة تانية.
انك تقابل الناس الفقراء اللي فعلا مش معاهم فلوس خالص وجها لوجه، و انك كمان تحس انك مش لوحدك في الدنيا دي... و انك أساسا تحس ان المشاكل البسيطة اللي بتواجهك دي و انت عامل منها فيلم كبير مغير حياتك كلها.. دي بالنسبة لمشاكلهم.. مجرد حاجة بسيطة جدا
انك تشوف الناس و هي بتفاصل معاك عشان تشتري البنطلون الجينز بأربعة جنيه بدال خمسة جنيه، و تفتكر نفسك و انت بتشتري الجينز و بتدفع فيه كام
و انك تشوف الأم اللي جايبة عيالها عشان تشتريلهم هدوم، و فلوسها متكفيش فتفكر هتستغنى عن لبس مين من عيالها... و ساعتها تفكر في الهدوم اللي في الدولاب عندك اللي ممكن تكفي المنطقة بحالها :)
أو تشوف الولد الصغير اللي يلاقي الجزمة غالية "يعني.. قول بتلاتة جنيه".. فيقرر يمشي بالجزمة اللي معاه و خلاص و بلاش يشتري أصلا... مممممم... يا ترى لما بنيجي نشتري جزمة "نايك" و لا حتة (شبشب بصباع) :)" بس ماركة طبعا" بندفع كام؟! طب فكر تحط نفسك مكان الولد دة...... حاسس بإيه دلوقتي؟
بحب المعرض أوي و بتكون من أحلى لحظات اليوم في المعرض لما تشوف الفرحة اللي بجد من القلب.. في عيون ولد صغير عشان اشترى لبس و شنطة المدرسة بسعر رمزي.... أو لما تشوف بنت بتشتري لبس.. كنت انت في يوم من الايام اللي اتبرعت بيه، و تشوفها و هي بتقيسه و مبسوطة بيه... أو لما تشوف بنت صغيرة تشتري فستان و تختفي... و كمان شوية تلاقيها جاية لابسة الفستان اللي اشترته... فخورة اوي ، و فرحانة اوي، و قاعدة تضحك لكل اللي حواليها عشان هي لابسة فستان جديد، و حاسة ان كل اللي حواليها اكيييييد واخدين بالهم من جمالها بالفستان الجديد دة :)...
بحب المعرض عشان بحس ان قلبي بينضف شوية هناك... مفيش مجال للكبر، و لا المنظرة، و لا النفاق... بجد عايز ثواب،؟؟ يللا اشتغل بأة و من غير ما تحسس اللي حواليك انك احسن منهم في اي حاجة. واحدة من اللي كانوا معايا في المعرض قالت ان نيتها في المعرض دة (ان مناخيرها تتكسر شوية) :) بالكلمة كدة، انها تحس انها بياعة و الناس دي هتطلب منها تساعدهم في انهم يشوفوا الهدوم من غير اي تحترام زايد بينهم. هيعاملوها زي ما بيعاملوا اي حد معاها. بجد محتاجين نحس بالتواضع اللي بجد دة. و انا شخصيا.. المعرض دة من اكتر النشاطات اللي بتخليني اجدد قلبي و احاول اطلع منه الحاجات الوحشة دي. يارب أقدر، و يارب ارزقني الاخلاص ياااااارب
ممكن نقول ان المعرض دة كمان تدريب عملي... يعني تاخد فيه ثواب بالهبل... بس لو اشتغلت صح. يعني تتدرب على التبسم مثلا في أصعب المواقف.
افتكر ان تبسمك في وجه أخيك صدقة، دة و الناس كلها هاجمة عليك عشان تحاسب على الهدوم و الدنيا حر نار و كمان اللي ادامك بيفاصل معاك و مش عايز يخلص. هتضحك؟؟ طب بس هتبتسم حتى؟ و لا....؟؟
طيب... بقالك أكتر من 3 ساعات واقف في الزحمة بتساعد الناس و في النفس الوقت بتراقبها " عشان ساعات فيه ناس... طيبة :) بتلبس الهدوم بتاعة المعرض كأنها بتقيسها و تقرر تخرج بيها من المعرض من غير ما تدفع تمنها"، و الناس كلها تعبانة من الحر و الستات نفسهم يلاقوا لبس لعيالهم، و الرجالة بيشوفوا هدوم ليهم ... و كللللهم مكشرين... هتبتسم و انت بتكلمهم؟؟ :) أكيد لازم تحاول
دي مجرد خواطر بسيطة كانت في دماغي و كنت عايزة اكتبها عن معرض الملابس الخيري "اللي بمووووت فيه و بموت في البناتيت اللي شغالة فيه كلهم"
بكرة آخر يوم فيه، و يارب أروح ان شاء الله، و يارب تقبل منا جميعا

7 comments:

ولــــــــــو said...

فيه ساعات باقرا بوست عند حد اعرفه من فتره ويهجبني اوي واحمد ربناواحس بالسعاده اني عرفت الحد ده بس سازعل قوي لما اقرا بوست عند حد باقراله لاول مره ويعجبني لدرجه اني باندم على اني مش عرفته قبل كده
البلوج بتاعك من النوع التاني
انا فعلا سعيد جدا اني عرفتك وحزين للفتره اللي فاتت
وربنا يرزقنا الاخلاص ف العمل ونكران الذات
خالص تحياتي

Wish I were a Butterfly ... said...

:) جزاكم الله خيرا كثيرا..... مش عارفة اقول ايه... بس بجد أنا سعيدة جدا انك مريت على البلوج بتاعي و اديته شوية من وقتك.

حقيقي اتشرفت جدا جدا بزيارتك و تعليقك على البوست، و يااارب تتكرر تاني :)

جزاكم الله خيرا على الكلام الجميل دة، بس الحقيقية أكتر من الكلام بكتير دة يقال على البلوج بتاعك. ربنا يرزقنا كلنا الاخلاص في كل حاجة ان شاء الله، و يعتقنا السنة دي من النار في رمضان. قول " آمين " :)

Dina El-Torky said...

Enty nawaty el ma3rad ya heba begad :)
we enty konty wa7shah zai ma howa kan wa7shek bezabt w yemken aktar kaman.........
ya rab nefdal m3 ba3d 3alatool
أحبك في الله
Dina Sherif :)

Dina El-Torky said...
This comment has been removed by a blog administrator.
Wish I were a Butterfly ... said...

شكرا أوي يا دندونة على التعليق
بجد بجد كان المعرض واحشني أوي و انتي عارفة اد ايه.

يارب دايما نجتمع على الطاعة يا حبيبي. أنا كمان بحبك في الله و... أحبك الذي أحببتني فيه :)

skymad said...

السلام عليكم ورحمة الله وبركاته

بجد البوست ده اثر فيا اوى وخصوصا انى نفسى اوى اعمل حاجة حلوة زيك كده


انا بجد سعيدة اوى انى قرات البلوج بتاعك

وده اول بلوج اقراه لانى لسة جديدة فى عالم البلوجات

وزادنى شرف انك من اوائل البلوجات اللى قريتها

اتمنى من الله رب اعرش العظيم ان لايحرمنا من تلك الخواطر التى تحسنا على فعل الخيرات باذن الله

ربنا يكرمك يارب

Wish I were a Butterfly ... said...

و عليكم السلام

جزاكي الله خيرا أوي على التعليق دة يا بنوتة :)

أنا اللي بجد يشرفني جدا اني أكون أول بلوج تقرئيه. مع اني مستغربة !!
انتي عرفتي البلوج منين عشان يكون فعلا أول واحد؟؟ :)
بس بجد أسعدني جدا تعليقك

أكيد كلنا بنحب نعمل خير طول الوقت. و يارب يتقبل منا و يكون فعلا خالص لوجهه الكريم.
أحلى حاجة ممكن تتعمل في رأيي هي انك.. مش بس تعملي خير و خلاص...... لأ دة كمان تكوني مستمتعة جدا باللي بتعمليه. و كل التعب و البهدلة اللي ممكن تكون نتيجة العمل دة.. حقيقي بتختفي أمام سعادتك و استمتاعك باللي بتعمليه

يارب تلاقي أعمال خير كتيرة أوي تشاركي فيها يا جميلة. و ساعتها "يااارب" ربنا يتقبل مننا احنا الاتنين :D