I've Been Tagged!!

أولا: لازم أقدم اعتذاري الحار و الشديد جدا لأني اتأخرت في الرد."خصوصا لمن أرسل لي هذا التاج الجميل" ولو"... شكرا جدا و آسفة جدا". بس اهه :) محدش يزعل مني

ثانيا : ممممم... أتمنى انكم كدة تعرفوني أكتر، زي الاتنين اللي بيتعرفوا فوق دول :) " و يااااارب محدش يكرهني ". بسم الله الله أكبر... انطلق

كنت طالب شاطر في المدرسة؟

الحمد لله كنت طول عمري شاطرة، بس طبعا أولى ثانوي لأ. : ) لأنها ملهاش لزمة. و بعد كدة ثالثة ثانوي كنت في شلة الضياع، و لم ينقذني إلا مجموع ثانية ثانوي بصراحة شديدة.
بس عمري ما كنت بفكر إني لازم أكون شاطرة و لا أذاكر كتير... الحمد لله الموضوع ماكانش في دماغي أوي و لا كنت بهتم بالمذاكرة زيادة.
حتى يوم نتيجة تانية ثانوي اللي عمري ما هنساه في حياتي... ما كنتش قلقانة و لا حاجة خالص و لا حاطة في دماغي ان النتيجة هتظهر في اليوم دة. لقيت ماما بتصحيني و تقوللي "اصحي بسرعة!! انت جبتي 97%". طبعا كان رد الفعل المتوقع من واحدة لسة صاحية من النوم.. ان أنا ضحكتلها أوي و قلتلها "لأطبعا". و بعد كدة .......شششش. ساد الصمت في الغرفة.... : ) لأني نمت و سبتها

ايه كانت أحب مادة ليك في المدرسة و الكلية؟

أكتر مواد طول عمري بحبها من صغري هي اللغات، و زاد عشقي ليها مع دخولي الكلية لأننا كمان درسنا أصول اللغة الانجليزية كويس و اللغات التانية اللي هي اتأثرت بيها و الكلمات المتاخدة من هنا و هناك... كدة يعني. بجد تعلم اللغات دة من أحلى الحاجات اللي عملتها في حياتي و فخورة بيها جداااا.
و بتجنن لما نسافر الغردقة و لا أي حتة و أكلم الأجانب.. حتى حاجة بتثبلهم ان احنا شعب متحضر و بيعرف يتعامل. لازم نغير نظرة بعضهم الرجعية لينا.

كمان بحب أوي التاريخ "بس الجغرافيا لأ"، و الفلسفة مش عارفة ليه!! بس بحبها جدا.يعني ..ممكن أقول ان كل المواد كانت ظريفة إلا الرياضيات و الفيزياء
في الكلية كانت مادتي المفضلة هي Culture, Drama, and Conversation.

أكره مادة ليك في المدرسة و الكلية؟

ما قولنا الفيزياء. بلاش إحراج بأة. : ) أساسا أنا بطيخة في الفيزياء دي. و كنت بحس بالغباء الفظييييع و أخويا بيحاول يشرحلي و أنا مش فاهمة و لا كلمة!

كنت عايز تطلع ايه و انت صغير؟

ممم...هو الحقيقة إني طول عمري كنت شخصية حالمة جدا، بجد زيادة أوي : ) و كل أصحابي كانوا بيحسوا اني خيالية جامد. بس أنا كنت بحب كدة، و الحمد لله ربنا رزقني بأني حققت كتير من طموحي و أحلامي.
بس عموما كنت بحلم أطلع ايه و انا صغيرة؟!
... هحاول أقول شوية منهم :)

أول حاجة كنت بحلم أكونها لما أكبر.. و يمكن دي استمرت معايا لسنين كتير أوي، هي اني ابقى مضيفة جوية "بس مش في مصر للطيران عشان مكنتش بحبهم خالص : )"

و أغرب حاجة اتمنيتها هي إني ابقى
Waitress
جرسون يعني : ) . و مكسوفة شوية و أنا بقول كدة بصراحة!! بس بجد دة كان من أحلامي لدرجة إني كنت بسعد جدا لما نروح ناكل في أي مطعم و أفضل أراقب اللي بيشتغلوا هناك بيتكلموا و يتحركوا ازاي، و بيشيلوا الأطباق الكتييييير من غير ما تقع ازاي : ) . و كنت بتضايق جدا لما ألاقي جرسون بيشتغل\ بتشتغل من غير ما يبتسموا، و كتير كنت بقولهم إن كدة وحش أوي : (

والله دة و أنا في فترة ابتدائي و أولى اعدادي يمكن (بعد كدة مش بقيت أقول "كدة وحش" : ) ).

كمان كان نفسي أكون مدرسة عشان بحس إني كويسة في المجال دة. دة من الأحلام السهلة اللي اتحققت لبعض الوقت الحمدلله.

و من أحلامي اللي استمرت معايا كمان كتير أوي اني أكون صحفية ناجحة جدا أو مراسلة في بلد بحبه... و دة الحقيقة يمكن لسة بحلم بيه شوية. بس مش عارفة طريق تحقيقه!

اسم مدونتك؟

Whispers :)

Is the name of my beloved blog
My other beautiful unreal world

لماذا اخترته؟ و ما هي نيتك من اختياره؟

هو المفروض كان يكون اسمه
Whispers lost in space
بس خليتها كلمة واحدة كفاية. و اسمها كدة لأني فكرت في البلوج بس عشان أقول اللي جوايا كله. و اللي جوايا عمره ما بييجي مترتب.. عبارة عن أحاسيس و أفكار و أحلام... كلها ملخبطة و مبعثرة.. يعني...

حسيت إن اللي أنا عايزة أقوله هو مش حاجة معينة. هو بس أي حاجة بفكر فيها. زي لما تمسك لعبة الصابون بتاعة الأطفال و تنفخ فيها جااامد... بتلاقي فقاقيع الصابون طارت في كل مكان... هو دة اللي جوايا، اللي عملت البلوج عشانه في الحقيقة. عشان كدة هي
Whispers... flying&lost in the endless space

هل فكرت في اغلاق مدونتك؟ و السبب

لأ خالص

صورتك في المدونة... رمزيتها

هي الصورة الوحيدة اللي على البلوج حاليا هي صورة حصان. بحب الصورة دي جدا.. و بيعجبني فيها ان كل واحد بيشوفها بيحس احساس غير التاني خالص.

أنا شخصيا اختياري ليها كان لأني ب... لأ هي كلمة اكتر من "بعشق" الخيل بكتير. و مش عارفة ليه لما شفتها حسيت بالحرية المطلقة. حاسة ان الحصان دة طاير لوحده، و معاه ضوء القمر ماشي معاه في رحلته دي. الحقيقة انه مش حصان واحد، هم كتير أوي بس دة اللي سارح لوحده "في ملكوت تاني "يمكن

كمان معظم الصور اللي بتكون ظل لشكل معين بتعجبني أوي

لماذا دخلت عالم التدوين من الأساس؟

الموضوع كبير.. و حاسة اني اتكلمت كتير أوي. البوست الجاي ان شاء الله هيكون ردي :) على السؤال الصعب دة

أحلى جملة قيلت لك في وصف مدونتك؟

السؤال عن وصف "المدونة" مش بوست معين. أكيد بحب كل اللي كتبولي، بس لو بنقول على اكتر تعليقك حبيته و أثر في "عن المدونة عموما مش بوست".. يبقى : " فيه ساعات باقرا بوست عند حد اعرفه من فتره ويعجبني اوي واحمد ربناواحس بالسعاده اني عرفت الحد ده بس سازعل قوي لما اقرا بوست عند حد باقراله لاول مره ويعجبني لدرجه اني باندم على اني مش عرفته قبل كده البلوج بتاعك من النوع التاني"... و يااااارب أرجع كدة زي ماكنت وقت البوست دة تاني عشان أكون مفيدة

التعليقات بالنسبة لك. أهميتها

أكيد التعليقات فرقت معايا جدا جدا. و بقيت حاسة اني لي عالمي التاني اللي ممكن ألجأله أي وقت اكون محتاجاه. و بجد بحب اوي معظم اللي بيعلقولي على أي حاجة. و كفاية جدااا عليّ اني الاقي حد مهتم باللي بكتبه وممكن يشاركني فيه :)

كمان هي حاجة تسعد اوي اننا نحس اننا عندنا القدرة عشان نعبر عن رأينا من غير خوف و لا قلق. و بجد يكفيني فخرا اني أحس ان شباب بلدي لسة كويسين و بيعبروا عن رأيهم. و دة ممكن تشوفه في اي بلوج مصري تفتحه

عموما موضوع التعليقات دة هتكلم عنه اكتر مع بوست سبب المدونة دي

ما أحلى بوست كتبته؟ ضع اللينك ثم اذكر لماذا

ممم... مش عارفة!!

يمكن بحب

feelings!!

هو حزين اوي بس يمكن بحبه لأنه اول بوست حسيت اني نجحت اخرّج اللي جوايا فيه

بحب أوي "وعجلت اليك رب لترضى" و

Crazy Laughter

لأن ذكريات اليومين دول بحب افتكرهم جداااا :)

أحلى مدونة قرأتها

صعب أوي يكون فيه أحلى مدونة قرأتها!! بس ممكن أقول بعض المدونات اللي بحبها.. بس كدة طبيعي هكون مكتبتش مدونات تانية جميلة أوي.

1. قضية عم أحمد رفعت: بلوج بيعجبني في كل حاجة فعلا. وبحب أوي اختلاف المواضيع في البلوج بتاعه، يعني مش ماشي بنفس الشكل و الأسلوب على طول البلوج، و مواضيع المناقشة بتاعته بتتغير كل مرة، بس برده تشدك تقرأها جدا.

ميزة أخرى تميز هذا البلوج جدا في رأيي هو الرد على التعليقات. صاحب البلوج دة هو أحسن شخص عجبني في رده على تعليقات الناس التانية من حيث الاحترام و الدم الخفيف...


2. و لو: يمكن نفس الكلام في اني بحب أوي اختلاف المواضيع عنده. بس اللي بحسه لما أدخل البلوج دة هو غير اللي بحسه في أي بلوج تاني. بجد بحس إني في بيتي : ) مش بيتي يعني. بس أقصد إني بحس ان كلام البلوج قريب مني جدا جدا، و مش محتاج أي اضافات عشان تصدقه. بلوج صادق لدرجة لا تتخيلها

فعلا من البلوجز اللي بستريح أوي لما أفتحه، و بفرح جدا جدا لما ألاقي بوست جديد عليه
ميزة تانية كمان هو إن صاحب البلوج شخصية ابتكارية جدا، و كل شوية تلاقي منه حاجة غريبة و جديدة! بس جميلة : )

. فلسطينية الهوى: برده من أقرب البلوجز لقلبي. واحدة بتتكلم من قلبها بجد. بكلمات و أسلوب بسيط جدا. بس بلمسة ساحرة.

.همسة قلم: مش هعرف اتكلم عنها كتير بصراحة. بس اللي أقدر أقوله إن البلوج دة نوع تاني غير اللي فاتوا. أسلوب وصياغة رائعة. أسلوب أدبي متميز جدا. لما بدخله بحس إني بقرأ لشخصية تتمتع بمستوى آخر من التفكير غيري تماما . بس مازالت كتاباتها رائعة " في معظم الأحيان"

كتير بجد. بس طبيعي مش هعرف أقول كله لأن كل واحد مميز بحاجة. بس ممكن اللي كتبته بالترتيب يكون أكتر حاجات متابعاها جدا و قريبة من قلبي

حد قل أدبه في التعليق؟ عملت ايه؟

لأ الحمدلله. و مش متوقعة حد يعملها ان شاء الله . و لو حد عملها.... (صمت لفترة قصيرة، ثم يسمع المتفرجون صوت ضحكة شيطانية تتردد و تعلو و تعلو ) : )
بسيطة يعني مش موضوع. همسح التعليق. بس دة لو كان كلام وحش، لكن لو كان واحد مخالف في الرأي و خلاص، يبقى أكيد مفيش مشاكل. في الحالة دي يتفضل يكتب و كمان أعزمه على أكلة

إيه اللي هيحصل لايميلك لما تموت؟

على فكرة دة أكتر سؤال بيستفزني لما أقرأ أي تاج. و عشان كدة مش هرد عليه "غلاسة"

اديت الباسورد لحد قبل كدة؟

أييييون

ايه كانت علاقتك بيه؟

كدة حسيت إني في تحقيق بجد : ). بس عموما الباسوورد مع أعز صاحباتي "هبة"

اسمك؟

اسمي سهل أوي : ) و ممل أوي. أكتر الأسماء انتشارا في مصر. مكون من 3 حروف بس. لو شقلبت الاسم من الآخر للأول هيفضل برده زي ما هو : )

كويسة الفزورة دي؟!! اسمي كمان "هبة" زي صاحبتي

اسم الدلع المشهور بيه وسط أصحابك

لو وسط "أصحابي" يبقى اسمي "بندق" : ) لا تعليق بأة خلاص.

مجال دراستك؟

الحمد لله مجال دراستي هو اللغات. دخلت كلية الألسن اللي كنت بحلم بيها من و أنا عندي 12 سنة، و اتعلمت ايطالي زي ما كنت بحلم برده. و الفضل كله لربي أكيد "الحمدلله"

شخصيتك... نوعها ايه؟

شخصيتي... لو بنتكلم في الوقت الحالي يبقى هادية و بس.
لكن لو بنتكلم في لما أكون في حالتي الطبيعية "مش مجنونة متخافوش : )". يبقى غالبا هادية هو الانطباع الأول للناس عني "دة لو كان الانطباع دة في مكان عادي". لكن لو كان في رحلة أو فرح أو كدة... يبقى. مجنونة و مرحة و مطرقعة جدا. و دة غالبا في أي وقت تاني... بس برده دة مش في الوقت الحالي للأسف.

نفسي ألاقي نفسي تاني!! هوصل ان شاء الله.

ممكن كمان طفولية "شوية يعني" : ) مترددة، بحب الناس جدااا، و بحبهم بسرعة، بحس باللي حواليا أوي و يمكن بحاول مجرحش أي حد..حتى ساعات زيادة عن اللزوم. دي ميزة اني حساسة شوية كدة، بس كمان عيب كبير أوي و بحاول أخلص منه.

مودك ايه؟

MoooooooDY

بتعمل ايه في وقت فراغك؟

زمان كنت برسم أكتر، دلوقتي أكيد بكتب أكتر بكتير أوي. بحب القراءة أوي. بس أكيد مش أي وقت كدة.. لازم اكون في مود القراءة.

لو وقت فراغي و أنا متضايقة شوية يبقى بعزف على الأرج "ممكن لساعات و أنسى نفسي"، أو بقعد في أي حتة لوحدي و أحلى حاجة لو أمام منظر طبيعي واخد مساحة. يعني لو بنتكلم على داخل البيت يبقى أكيد أقعد في البلكونة و أسرح في الدنيا تحت. أو لو متضايقة بنزل بعد الفجر أسوق العربية و أشغل سامي يوسف عالي "شوية يعني" :) و أفضل ألف بالعربية في أي حتة (ودايما أبدأ الجولة بأغنية سامي يوسف
FREE )
أقولكم على سر... مع اني متعلمة سواقة من زمان : ) مش معايا رخصة لسة. محدش يبلغ عني بأة ; )

أو أكيد بعيش مع الانترنت في أي وقت فراغ، بس دي حاجة بحاول مقضيش فيها وقت كتير أد ما أقدر عشان ماما متزعلش

: )

الأكلة المفضلة؟

Le Chocolat
لو أكل بجد يبقى الأكل الايطالي عموما و البروكلي. بس الشوكولاتة هي عشقي الأول و الأخير

السفر بالنسبة لك؟

بحلم أسافر أماكن كتير أوي، و بحب جدا اتفرج على البحر و الجبال و الحاجات دي. بس في نفس الوقت مش بشتاق للسفر أبدا.. حلو وبحبه، بس ... مش عارفة

صفات أخدتها من بابا

حب الفقراء و البسطاء اويييي، و حب انك تتعامل مع كل الناس الموجودة في الشارع كأنك تعرفهم من زمان "خصوصا في الأماكن الفقيرة :) عشان الناس بتكون طيبة وصديقة أوي"

عدم القدرة على النوم لأيام كتييير لو فيه حاجة شاغلة تفكيري

صفات أخدتها من ماما

مراعاة مشاعر الناس اوي والحرص على عدم جرحهم زيادة

التعبير عن الرأي في اي مكان -سواء نقد او حاجة كويسة- بس أكيد من غير مضايقة حد. لسة مكتشفة قريبا جدا ان انا طالعة لماما أصلا في كدة :)

مهما حاولت أخبي مشاعري... كله بيبان علطوووول :) للأسف

و يارب يرزقنا الطيبة وحسن الخلق دايما

أكتر 6 حاجات بتكرهها

جرح الناس وعدم مراعاة مشاعرهم

الجدل.. لمجرد الجدل، مش للوصول لحل أو الاقناع

النفاق

التردد "مع انه موجود معايا دلوقتي "

أكيد بكره أي حد بيحارب ديني

و الفراااااق

أكتر 6 حاجات بتحبها

ممم... هي حاجة طفولية أوي. بس الحقيقة اني لما أشوفها،بحس اني في عالم تاني.

إني أشوف فقاقيع صابون كتييييير أوي طايرة في الهوا :) . ساعتها بحس اني رجعت طفلة تاني، و بسرح معاها لغاية ماتختفي في السما و أنا قلبي بينط من الفرحة :))) . عبيطة مش كدة؟

"ملحوظة: بحب أجيبها لبنت اختي و ألعب بيها انا "

إني أشوف طفل بيضحك.. ويكركر كمان :). ياخبرررر... بجد الأطفال ينسوا الدنيا كلها

أعمال خير وسط أصحابي، مش لوحدي.. بتكون طعم تاني

ساعات مش دايما... احساس اني قاعدة لوحدي في مكان بحبه

بكون مبسوطة أوي لما الاقي "شهامة" بين الناس

الشغل بالنسبة لك

أكيد مهم جدا عشان أحس اني بعمل حاجة بجد. نفسي أعرف أحقق نفسي في المجال اللي فيه دلوقتي... لأني حبيته جدا

ايه الكمبيوتر و النت بالنسبة لك؟

الكمبيوتر شخصيا... ولا حاجة خالص

النت... حاليا جزء مهم أوي من حياتي، مش حاسة اني ممكن أستغنى عنه

عالمي التاني

بس بحاول مش اقضي ساعات كتير في عالمي الجميل لأن فيه أولويات تانية

تمرر التاج لمييييين؟

RaMa,

BannouTa

&

SunShine

و يارب مكونش خنقت الناس معايا :)