Thursday, February 14, 2008

أنا..وحياتي

سفينة...وسط البحر

موجودة ورا الضباب

حاولت أوصل

لكن مفيش مركب توصلني

بكيت كتير ع الشط وحيدة

سرحت في دنيا جميلة بعيدة

اتمنيت أوصل هناك

ملاني الحلم وبقيت شريدة

لما أصحى أو حتى انام

مفيش مكان لغير آلام

حاولت ألاقي مكان في قلبي
و ماسيبش نفسي للاستسلام

عشان آلامي تصبح آمال

و أخلق حقيقة من الأوهام

و يمكن كمان ساعتها

هقدر أحقق أحلام

.......

البحر سمع بكايا

و حس بيّ.. دة كان معايا

و قاللي كلام

عايزة توصلي للسفينة؟

يبقى عمرك ماتبقي حزينة

وابدئي عومي لجوة البحر

و بدأت أعوم وأعوم

موج كتير بيرجعني

و صخر كتير بيوجعني

و ساعات بغرق تحت المية

لكن الأمل لسة فيّ

و برجع تاني أعوم

يمكن.....في يوم من الأيام

أحقق الأمنية

و أقدر أوصل للسفينة

23 comments:

رئيس جمهوريه نفسى said...

انا وحياتى
نختزلها ببساطه فى كلمه كلنا هذا الرجل
لانى هى دى الحياه ليكى وليه ولكل الناس بتعاندنا ونعانده وفى كتير بينتصر وفى ناس تانى بتقف وبتستسلم للهزيمه فى معركه الحياه لذه الحياه فى اننى نعاند ونحلم ونحاول ونحقق احلامنا
ده بالنسبه لموضوع الفكره ككل
-------------------------------
بالنسه لموضوع الابيات والصياغه انا تقريبا اول مره ااقرى ليكى حاجه على البلوج شعريه هى حلوه قوى بس فيها شويه كلمات لو اتعادت صياغتها حتكون اجمل
يعنى فى رابع بيت لو استبدلتى كلمه (مراكب )وخليتيها (مركب ) حتكون اخف
وفى البيت بتاع (الامى تصبح امال) المعنى مش واضح خالص
كلامى مش قانون تتبعيه انا بس حبيت ااقولك راى بصراحه والراى الاخير ليكى واسف مقدما لو تدخلى زعلك
-------------------------------
بالنسبه لموضوع التدوينه السابقه
خمس دول اوربيه اعادت نشر الرسوم مره تانى والعرب نيام

Wish I were a Butterfly ... said...

ؤئيس جمهورية نفسي

هههه
بتقول "تدخلك"؟ و "زعلني"؟
تعليقك على كلامي الفارغ دة كفاية أوي، زائد إن الحقيقة إني توقعت إن لوحد كلمني جد ومش جامل يبقى هيقول تعليقات أكتر من اللي حضرتك قلتها بكتير

أنا مش فنان، ولا عمري جربت أكتب كدة أصلا..هي مرة واحدة كنت شبه مسطولة من الشمس وكتبت كلام غرييييب أوي يمكن في يوم من الأيام تقرؤوه. لكن والله أنا عارفة إن اللي فات دة مش يتسمى "شعر"خالص ومش زعلانة، مجرد كلام كان في دماغي وحاساه أوي أوي... وطلع بالمنظر دة وولا أعرف حتى جه منين لأني عمري مافكرت في الكتابةكدة،زائد إن الكتابة عربي دي أساساعمرها ماكانت حاجة بستعملهامع نفسي
:)
أشكرك جدا على نصيحتك واسمحلي هكتبها "مركب"زي ماقلتلي لأنها مقنعة فعلا
أتمنى ليك إنك توصل للسفينة قريب :) وتنقذ الناس اللي لسة في البحر كمان

شكرا أوي

Wish I were a Butterfly ... said...

حبيبتي راما

:)
فاهمة الابتسامة دي وراها إيه

انت عارفة كويس قصدي أكتر لأنك كنت لسة مكلماني قبلها بأيام

ربنا يسعدك ياراما وفرحت أويييييي إني أعرفك أكتر والله
سلام

alshared said...

أهم حاجه أن فيه أمل
أمل في الحياه
بصراحه
وبجد
أنا حاسس باللي جواكي أزاي ماتسالينيش

يمكن علشان تقريبا كنت في موقف زي ده قريب

علي العموم
دي أول مره تكتبي فيها شعر

ياريت تكملي

تحياتي

رئيس جمهوريه نفسى said...

اولا ممكن بلاش كلمه حضرتك بس انا فى حياتى مبحبش الرسميات مع اخواتى وكل المدونين اخواتى وموقفك يوم واقعه الدستور يخلينى اشبط فى انك ترفعى كلمه حضرتك ولو سمحت وبعد اذنك الموضوع مش مستاهل
ثانيا: مفيش حاجه اسمها كلام فارغ وكلام مليان فى كتابه بتعبر عن نفسك وكل ما ياجى على بالك كلام يعبر عن نفسك اكتبيه خطوه خطوه الكلام حيتطور معاكى وكلنا ابتدينا بكلام من سطله شمس
ثالثا يشرفنى انك تاخدى براى المتواضع وتغير الكلمه

Rain_Drops said...

أنا مش هقدر أقول حاجة أكتر من اللي الرجالة قالوها فيما يتعلق بالشعر يعني ، بس المهم ما تنسيناش أول ماتوصلي للسفينة
:d

Wish I were a Butterfly ... said...

الشارد

ماهو لازم يبقى فيه أمل. أمال هنكمل إزاي؟؟
كان ضايع مني فترة كبيرة أويييي، بس بحاول ألاقيه أهه

إدعيلي
:)
و ياريت أكمل دي..شهادة أعتز بيها جدا أنا مش أدها
تحياتي

Wish I were a Butterfly ... said...

رئيس جمهورية نفسي

:)))

مش حساني عملت حاجة غريبة أو مش متوقعة يوم الدستور!!!خالص يعني! بس عموما يسعدني إنه أسعدك

Wish I were a Butterfly ... said...

Rain_drops,

حااااضر
:)
بس أوصل للسفينة الأول
دة "لو" وصلت أو حتى قربت يعني

نورتني

Anonymous said...

ربنا يحققك امانيك وتوصلي للسفينة
كلماتك معبرة عن واقع بنعيشوا كلنا وربنا يوفقنا جميعا

تحياتي

oceaneyes said...

البحر سمع بكايا

و حس بيّ.. دة كان معايا

و قاللي كلام

عايزة توصلي للسفينة؟

يبقى عمرك ماتبقي حزينة

وابدئي عومي لجوة البحر

و بدأت أعوم وأعوم

موج كتير بيرجعني

و صخر كتير بيوجعني

و ساعات بغرق تحت المية

لكن الأمل لسة فيّ



مش عارفة ليه الجزء ده تحديدا قرأته اكتر من مرة ...وركزت فيه اوى يعنى

بجد رائع

جايز لانى فعلا مؤمنة بإنك ممكن تكلمى البحر وتشتكيله وهايسمعلك كويس اوى ...ويمكن لو الحظ حالفك ..هايرد عليكى ويقولك تعملى ايه

!!!


شكرا بجد ..كنت محتاجة اسمع حاجة زى الخاطرة دى ..بس المشكلة انى ما كنت عارفة اكتبها لنفسى

:)))


بس شكرا بجد



:)

(احمد سكر ) said...

احساسك جميل جدا

بيفكرنى فى مقوله قريتها من 15 سنه

لدكتور نبيل فاروق

كان كاتبها فى ظهر روايه من رويااته

الروايه اسمها الامل
كان بيقول
(حتى لو انتزعنا السمكه من قلب البحر والقيناها فى صحراء لا زرع بها ولا ماء
سيقى لديها امل فى ان تمطر السماء تكون بركه تسبح بها فتحيا )

تقبلى مرورى المتواضع


احمد سكر

Wish I were a Butterfly ... said...

أيامنا الحلوة

شكرا أوي لزيارتك البلوج

ربنا يوفقنا جميعا إن شاء الله

نورتيني

Wish I were a Butterfly ... said...

Oceaneyes,

:)
الحمدلله إنه عجبك ياسالي

وأكيد لسة قدامك الفرصة كل يوم إنك تحاولي تحققي اللي انت عايزاه...مش ضروري تكلمي البحر يعني :) بس إن شاء الله تقدري توصلي لكل طموحاتك

إدعيلي
:)
و شكرا أوي ياجميلة

Wish I were a Butterfly ... said...

سكر

شكرا جدا لإضافتك الجميلة

أنا بصراحة عمري ماقرأت حاجة لأستاذ نبيل فاروق، بس الجملة اللي حضرتك فاكرها من سنييين دي عجبتني جدا جدا جدا و تستحق تفضل فاكرها فعلا

أنا حفظتها لأنها جميلة أوي بجد

شرفني جدا مرور حضرتك المتواضع لبلوجي المتواضع :). أتمنى تتكرر

LOST said...

كلماتك رائعه و مؤثره
دي اول زياره ليا و اكيدد مش هتكون اخر زياره

الخيط الرفيع said...

سفنتك مش بعيدة
دوري جواكي
فتشي وحاولي تحدي فين نقطة البداية وفين اخرها
في اللي يريحيك لو يكون
واللي يريحك لو راح او بعد
اتعلمي الامل يتحول لسلوك مش طاقة جو القلب مستخبية
خلي بالك منك قوي
لانك حلوة قوي
ومهمة عندي قوي

ما تسمحيش لحاجة تهزك حاولي تخترقي الاحزان وتعرفي ايه بيكونها
اكيد في حاجة بيترتب عليها كل حاجة

ولو مفيش سفينه في عوم
عومي صح توصلي
الحياه دار اختبار سواء حلوة او ملعبكة
بجد لازم نكون اقويا ادها
ولو احنا مش كدا لازم نكون كدا
خلي الصخر يخبط والموج يهبط براحته
لانك هتدربي تواجهي كل حاجة

كنت عاوزة اقول
انك انسانه قوي
ودي في حد ذاتها مشكلة جدا
بس لازم تحافظي علي نفسك زي ما انتي
لانها احلي حاجة

وحاولي تعملي درع حماية من القسوة
والجفاء وكل سمه مش مقبوله عندك وهي من سمات العصر
بحبك بترددك وطيبتك بحنانك وخوفك وقلقك
برقه مشاعرك باحساسك العالي بيا
يارب نبقي جران في االجنه
حتي لو فضلنا طول العمر يبعدنا المكان

ღϠ₡ღأمير الهدوءღϠ₡ღ said...

يمكن.....في يوم من الأيام

أحقق الأمنية

و أقدر أوصل للسفين

ويا رب انا كمان
اوصل لامالي واحلامي

:)
بجد كلمااااااات راااااائعه

وكالعاده مدونه راااائعه

مبروك المدونه الجديده
:)

تحياتي

Wish I were a Butterfly ... said...

هاجر

شكرا ياهاجر

تنوريني في أي وقت
:)

قلب ينبض لله said...

ايه الأحاسيس العاليه دي بجد احييكي عليها

حلو أوي الامل اللي جواكي
والعزيمة اللي بتخليكي تعومي وتقاومي الموج والصخر علشان توصلي للي انتي عاوزاه

تحياتي ليكي ياقمر

Wish I were a Butterfly ... said...

روفي الجميلة

:)

كلامك مش بينفع يترد عليه خالص!! وكل مرة لازم أدور في قواميس قلبي و عقلي كلهم عشان أعرف هرد عليكي أقول إيه!!! يابنتي انت فاهمة بأة و خلاص
ربنا يخليكي لي يااااااارب
:)
إنت حاجة من أحلى الحاجات في حياتي بجد بجد جدا
بحبك أوي ومغرمة بيكي كمان

بالنسبة لكلامك اللي نسيته دلوقتي و أنا بفكر بحبك أد إيه:)... حاضر...بيتحول لسلوك و الله. بس بسرعة السلحفاة
:)
بس هيحصل قريب انت عارفة فجأة بقرر قرار مجنون ومش برجع فيه...وآخر مرة انت اللي رجعتيني عن قراري عشان مش نفترق. فاكرة؟؟:) مش نسياهالك على فكرة
بجد كلامك كبير أوي، ونفسي أحققه بحذافيره.. ربنا يسهل إن شاء الله

و بعدين لحظة!! أنا إنسانة أوي؟؟ أمال حضرتك تكوني إيييه؟؟؟:) الحمدلله إن ربنا رزقني بحد جميل زيك ياروفي،نفسي أردلك أي حاجة من وقوفك جنبي دة بس مش بعرف :(

شكرا أوي على كلامك وعلى نصيحتك وعلى وجودك في حياتي...وعلى فكرة اسمك على البلوج بتاعي بيفرح قلبي أوي من قبل ماأقرأ ولا كلمة
بحبك أوي

Wish I were a Butterfly ... said...

أمير الهدوء

:$

المدونة الجديدة؟؟
ششششششت.محدش واخد باله منها :). دي مدونة مع نفسها سيبها نايمة لوحدهاومتجبش سيرتها
:))
الله يبارك فيك ياأحمد

ربنا يحققلك كل أحلامك إن شاء الله قريب ونسمع عنك واحد معروف في الجرافيكس والبرمجيات و الحاجات الغريبة اللي انت متميز فيها دي
:)
نورتني كتير

Wish I were a Butterfly ... said...

قلب ينبض الله

زي ما "الخيط الرفيع" قالتلي..المهم الأمل دة يتحول لسلوك مش يفضل طاقة جوا القلب وخلاص

قولي يارب الدنيا تبقى أحسن لي و ليكي ونعرف نكسر الدنيا
:))
أصلي متمردة أوي وطموحي موديني في داهية
شكرا لوجودك دايما :) حتى في بوستات فاتتك أصلا!! بس بجد بتسعديني
ربنا يسعدك ياجميلة