يوم ميلادي هييجي في العشرة الأواخر من رمضان
بحب يوم ميلادي أوي أوي :)
بس الحقيقة مش عشان هو يوم اتولدت فيه و جيت الدنيا دي كدة و خلاص
بس عشان ..... عشان كل الناس في مصر بتكون مبسوطة بيه، أو على الأقل "المفروض" تكون مبسوطة بيه
و كمان.. عشان الريس نفسه شخصيا يعني
بيحتفل بعيد ميلادي
:D
كمان قبل اليوم دة بيحصل غسيل مخ لكل المصريين عن طريق عرض مستمر لفيلم "الرصاصة لا تزال في جيبي"، و "الطريق إلى إيلات" . و العرض دة... لحسن الحظ طبعا "عشان محدش يكون عنده حجة إن الفيلم فاته و مشفهوش. العرض بيكون مستمر ست أو سبع أيام قبل يوم ميلادي... و يومين كدة بعده
و الغريبة إن كل سنة الناس بتكون حافظة الفيلمين بس بيكون فيه سعادة غامرة برده إن الفيلمين دول هيتعرضوا "خصوصا ايلات طبعا" و الناس برده تقعد تتفرج عليهم !!! حاجة تانية كمان يوم ميلادي... بدال ما أسمع
Happy Birthday
و اتبسط بأة، بنسمع أغاني وطنية بجد بجد و الله غاية في الجمال. و الناس كلها تتساءل "هو ليه الأغاني دي مش بنسمعها طول السنة؟ بس اليومين دول!!!" بس عمره ما بيكون فيه رد طبعا. و طبيعي جدا... عمر ما أمنية الناس اتحققت في انها تشوف الأغاني دي كتير على التلفزيون عادي
طبعا طبعا :)
محدش عرف يوم ميلادي لأن أكييييييد أنا موضحتش أي حاجة عنه و لا لمّحت حتى بمعاده
:)
و يارب كل المسلمين يحققوا كل اللي هم عايزينه في حياتهم. مش يتفرجوا على عمرهم و هو بيعدي.... و هم لسة في مكانهم متحركوش
4 comments:
كل سنة وحضرتك طيبة
ان شاء الله ربنا يحقق لحضرتك كل ماتتمنيه وتكونى دوما
من الله اقرب وعلى طاعته ادوم
اسال الله ان يجعلك من احبائه وينادى ملائكته ويقول لهم انى احب هذه فاحبوها
Skymad,
و انت طيبة يا جميلة :)
و شكرا جدا على المشاعر الرقيقة دي
بس أنا مش "حضرتك" خااالص. انا أختك، و الفرق بيني و بينك في العمر حاجة بسيطة اوي :)
و يارب يستجيب لدعائك كله ان شاء الله
انا الظاهر حظي كويس
انشاء الله اكون اول حد يقولك كل سنه وانتي طيبه ف يوم ميلادك زي مافهمت
وبعدين كويس اوي ان يكون عيد ميلادك بيوافق ذكرى اخر وقت حسينا ان بلدنا عملت حاجه حافظت بيها على كرامتها وبعدها ضاعت
غير انه الناس كلها بتاخده اجازه
شوفي خيرك على كل المصريين
وبعدين الافلام اللي بتتذاع ارحم من الافلام اللي بيذيعوها ف عيد ميلاد اخويا
اصله مع الثوره
يارب انشاء الله تكون بدايه لتحقيق كل احلامك
و لو ظهر يا جدعان :) حمدا لله على سلامة حضرتك، ربنا يتقبل منك رمضان ان شاء الله، و يارب تكون استغليته صح السنة دي
و حضرتك طيب.. و شكرا جدا على التعليق على البوست دة :) بصراحة متوقعتش ان حد هيعلق عليه خالص، بس بجد جزاكم الله خيرا، و ربنا يحققلك كمان كل أحلامك "الدنيوية" بعد رمضان دة علطول ان شاء الله. و كل الأحلام المؤجلة كمان بتاعة الآخرة ان شاء الله
و يعني ... برده أخوك يحمد ربنا ان عيد ميلاده جه يوم الثورة :) مش يوم النكسة
Post a Comment