كليـّــتي الحبيـــــبة
وحشتيني
بجد وحشتيني
اشتقت لكل حاجة فيكي، و كل حاجة مرتبطة بيكي
:)وحشني حتى الرخام اللي مبنية بيه
وحشتني كوريدوراتك الطوييييلة اللي كنت ساعات و أنا ماشية فيها بحس إنها ملهاش نهاية
وحشني أصحابي حبايبي ووحشتني أيامهم
وحشتني قعدتنا على الأرض بعد المحاضرات ساندين على عمود و نبدأ نخمن الناس اللي قاعدة حوالينا تجارة و لا ألسن و لا تجارة انجليزي
وحشني أيامك يا كليتي الجميلة
وحشني حتى الوقت اللي كنت بروح فيه على الكلية الصبح بدري قبل الشمس، و نسمة الهوا الباردة اللي لسة مش اتلوثت جامد تيجي تسلم عليّ قبل ما أبدأ يومي
وحشتني امتحانات المحادثة... الامتحانات "الوحيدة" غالبا اللي كنت بدخلها و أنا واثقة في نفسي جداااا..... و لحد النهاردة مفهمتش سر الثقة الزايدة اللي كانت بتتملكني ساعتها
وحشتني د. كرمة اللي كانت كل الناس بتكرهها جدا!! بس كنت بحب أوي عشقها للدراما و إحساسها بيها، كانت حد فعلا بحترم فيه حاجات كتير
وحشتني أمال الحضري اللي درستني الشعر 3 سنين من عمري
محدش كان بيفهم هنكتب إيه في امتحانها صحيح :) بس كنت بحب إحساسها هي كمان أوي
كانت شخصية لو قلت بتتنفس شعر مش هبقى بالغت.. إنسانة عايشة في عالم مش عالمنا أبدا
كتير بفتكر لما كانت بتبدأ شرح في اي قصيدة شعر، ألاقيها فردت إيديها و هي بتشرح و عاشت مع القصيدة... بتفرد إيديها و يسمو بيها الشعر و الإحساس اللي هي بتتكلم عنه... و ساعتها كنت بجد بحس إنها طايرة لفوووووق مع كلمات قصيدتها
مش هنكر إن معظم الناس كانت مش بتحبها .. وطبعا عندهم حق :) لأن حبها للشعر دة ممكن يساعدنا نفسيا ساعات لو حسيناها بجد و عشنا معاها.. لكن عمره ما كان بينفع يوم الامتحان
وحشتيني يا كليتي الحبيبة
يـــــا أول حلم كبير حققته في حياتي و بجد بحمد ربنا كتيــــــــــر عليه
:)
ياريتني أقدر أرجع أيامك تاني...على الأقل أحس إني بعمل حاجة وورايا حاجة مفيدة في حياتي
22 comments:
هي ألسن دي يعني كنتو بتتعلموا تتكلموا ولا ألسن دي بتقعدوا تطلعوا لسانكم لبعض؟؟؟
افتكرت الكلية انا كمان والشعر والدراما بس كنت بحب الدراما لما تعطيهالنا دكتورة مش الدكتور الرخم رئيس القسم ...يااااه الأيام دي كإنها لسه أول امبارح بالليل الساعة 9 مش عارف اشمعنى الساعة 9 بس هي جت كده
المهم الواحد يكون عرف يحافظ على علاقاته بالناس ف الكلية وبجد لو الواحد يرجع للكلية تاني هيعمل حاجات كتير كان مأجلها ومعملهاش
تحياااتي
على الأقل أحس إني بعمل حاجة وورايا حاجة مفيدة في حياتي
هي دي الفكرة فعلا
انتى عارفة يا فراشتى انا بعد الكلية جالى توهان عجيب
طول عمري كنت متعودة احدد الحاجات اللى عايزة اعملها في وقت معين ، أول ما اتخرجت كنت عايزة اي تاريخ أحدد عليه أي حاجة ما كنتش عارفة
بجد أيام الكلية كانت أحلى أيام بالغم من انها في حالتى انا كانت متعبة أوي ، لكن على الأقل الواحد كان بيتعب و هو عارف هو عايز يوصل لإيه
:))))))))
ياااااااااااااااه عليكي أنا أقدر أخمن انك كنتي في ألسن جامعة عين شمس. أنا بقى كنت في تجارة جامعة عين شمس
و أنا بقرأ كلامك حسيت اني شايفة الأماكن و حسا بالجو هناك و قاعدة مع أصحابي
فاكرة كافيتريا ألسن قبل ما يقفلوا البوابات و يقصروا دخولها على طلبة كلية الأسن فقط
و فاكرة الكافيتريا اللي كانت خارج مبنى الألسن في الواقع أمامه مباشرة جنب المبنى اللي فيه المدرج اللي باخد فيه محاضراتي و فاكرة عم أحمد اللي كان بيعمل الكابتشينو في الكافيتريا دي و اللي كان أول ما يشوفني قبل الساعة 7 الصبح و أنا واقفة قدامه شبه نايمة يعمل لي الكابتشينو اللي على مزاجي و يناوله لي في ايدي و يقول لي "صباحك فل يا بنتي ما تنسيش تاكلي ان شا الله بسكويت مع الكابتشينو دا علشان معدتك ما تتعبكيش" (أصله كان صاحبي)
فاكرة قد ايه كنت طول الوقت متضايقة ان محاضرتنا بتبدأ بدري قوي الساعة 8 الصبح يعني على الأقل لازم نكون جوا المدرج من الساعة 7 علشان نلاقي مكان كويس قبل الزحمة
فكرتيني بالذي مضى و يا ريته ما مضى
متصورة انا باقرا الكلام وسامع ف الخلفية موسيقى تحسسك انه فيلم تسجيلي مش بوست
كويس اوي انها كانت حلم والاحسن انك حققتية
دايما بيبقى عندنا حنين كبير للي فات مهما كان مدى نجاحنا او اخفاقنا فيه
لاننا ببساطة مش عارفين بكرة فيه ايه
اتمنالك بكرة بتاعك يبقى احلى علشان بعد فترة لما بكرة يبقى امبارح تقولي اللي بتقوليه ده تاني
كل الخير اللي ف الدنيا ليكي
وابقى سيبيلي حبة صغيرين
Sakayar,
صح
المهم الواحد يكون عرف يحافظ على علاقاته بالناس في الكلية
امممم...ألسن؟؟؟ مش عارفة :). بس اللي فاكراه إنه كان فيه مناقشة جامدة "جدا" بين دكتورتين في إن ألسن بتتكتب
Alson
كدة
و لا
Alsun
كدة:). ففي الحالة دي طبعا موضوع معنى "ألسن" اللي كانوا يقصدوها بالعربي دة بسيط جدا
:))
هي فعلا أيام لا تنسى
شكرا لتعلييييقك كتير، و أول تعليق كمان؟:) نورت يا فندم
الحلم العربي
و الله في حالتي أنا كمان كانت مش سهلة، و كان مواد معينة عاملالنا ضغط نفسي فظييييع لأننا مش كنا قادرين نتخيل "تماما" الامتحان هيكون إزاي و إيه علاقته باللي احنا بندرسه
بس هي فعلا كانت أيام حلوة عشان زي ما انت قلتي :).. على الأقل الواحد بيتعب و هو عارف عايز يوصل لإيه
على الهامش: مبسوطةأوي أوي أوي إن حد جميل زيك بأة بينور البلوج بتاعي شوية كتير:). بجد حاجة مفرحاني أوي. ربنا ما يحرمني منك يا حلم
يارب تكوني عايشة كويس ومستريحة في بلد عزيزة أوي على قلبي
Om Hagar,
تشرفنا يا مودام
:)))
تجارة عين شمس؟ :) دة احنا كنا جيران يعني
ذكرياتك حلوة أوي. فرحت إني كتبت عن كليتي عشان قريت كلامك دة بجد و فكرتك :). إن شاء الله أيامك الجاية كمان هتكون جميلة مع جوزك و جوجو الجميلة :)
بس... كافيتيريا ألسن؟؟ هي لأ كانت مقصورة على ألسن بس لفترة معينة بعدين مش قدروا يستمروا كدة!! لأن أصلا الكافيتيريا اشتكت لأن تجارة هم اللي كانوا كتير منهم مش بيحضروا فبيكسبوها أكتر بأةوكدة :). انت محضرتيش لما رجعت الكافيتيريا حرة مستقلة؟:))
شكرا يا جميلة على تعليقك :)، وبعدكدة ابقي كلي أي حاجة ان شالله بسكوتة
:p
مع النسكافيه
ولو
صح جدا
دايما بيبقى عندنا حنين كبيير أوي للي فات حتى لو هو وقتها مش كان باين إنه بالجمال دة
اممم...الموسيقى؟؟ بتتريأ يعني؟
:)
عارف؟؟ أيوة الموسيقى معروفة إنها بتاعة فيلم والمفروض الناس بتفتكر مشاهدفيه وكدة، بس أنا مش كدة بالضبط.. مش عارفة ليه الموسيقى دي بالذات بتحسسني فعلا بحنين للماضي، بتحسسني إنها بتتعزف بسلاسةأوي كدةويبدأ معاها شريط ذكريات يمشي مش عارفة ازاي
:)
فحسيتهاأوي مع البوست دةوأنا بفتكر سنين عدت في حياتي وانتهت
بكرة يكون أحسن؟؟ خايفة أوي.. بس يارب :). و ليك كمان ان شاء الله تكون أيامك الجاية أحلى مليون مرة مع الناس اللي بتحبهم
لو كان لية حق التدخل او الاقتراح ممكن بسهولة لو متفرغة تقدرى تكملى دراسات عليا فى نفس المكان ونفس الكلية وبالتاكيد حتكون حاجة مفيدة
anonymous,
مع احترامي لحضرتك
بس أكيد حق التدخل لأ :).معلش
الاقتراح شكرا جدا عليه و أنا فعلا فكرت فيه كتير في وقت من الأوقات بس مش أعتقد
و عموما الجامعة وحشتني بالجو اللي كان فيها. لو رحت دلوقتي مش هلاقي الجو دة بالتأكيد
انا بقى كليتي مش وحشتني خاااااااااااااالص ...:)
انتي اللى وحشتيني جدا يابندقة انتى وروفي بجد :)
ازيك يا قمرة
اخبارك ايه ان شالله بخير و سعادة
و يا ستى ما تزعليش نفسك انتى ممكن ترجعي الكليه تعملى فيها دراسات و لا حاجه
و لا تشتغلي فيها فى الادارة و لا حاجه
بس روحي اسالى و ان شاء الله ربنا حيوفقك
و بعدين انا مقدرة غيابك عني انا عارفه مشواري طوييييييييييييييييييييييييييييييل
جه انا فى محافظة تانيه اساسا
سلام يا قمرة
عزيزتي الفراشه
ياه كانت أيام بجد أيام متتعوضش
بس أنتي عارفه لو رجعتي تاني ليها مش هتحسي بنفس المشاعر والاحاسيس من تاني فخلي دايما الصوره دي هي اللي في ذهنك ليها
على الهامش
هي المتاهه أخبارها ايه؟
همسة قلم
انت كمان وحشتيني أوي
:)
بجد كليّـتك مش وحشتك؟؟ دة أنا بحب كليّتك أوي
:)))
نورتي بلوجي يا سمسم
ادعيلي
واحدة مفروسة
مشوارك مش يمكن مش طويييييييل
:)
أنا فعلا اللي كنت مقصرة مع ناس كتير أوي
امممم... مليون حاجة في دماغي!! و أحلى ما فيّ إني مش عارفة أتقدم أي خطوة :). ادعيلي أتحرك بأة وربنا يقدرلي الخير في اختياراتي إن شاء الله
يارب انت كمان تكوني بخير وسعيدة. نورتي البلوج يا قمرة :)
إنسان مقيد
مازال الحال على ما هو عليه
دة بالنسبة للمتاهة
:)
لو مش كانت المتاهة اتلعبكت أكتر كمان...ربنا يلطف بينا بأة
أنا عارفة فعلا إن لو رجعت ليها مش هحس نفس الإحساس بالقوة دي. بس عارف؟؟ بقالي فترة بينتابني حنين للماضي في كل حاجة
تقريبا بحاول أهرب من الحاضر :). الحمدلله على كل حال
حمدلله على سلامتك ويارب أيامك الجاية تكون سعيدةجدا وتقول عليها برده إنها"أيام متتعوضش". شكرا أوي لتعليقك
ممكن سؤال
اتفضلى
شكرا
احم احم
انتى قفلتى المدونة التانيية ليه
منتظرة الاجابة
وشكرا
===================
الحياة مراحل وزى مالكلية كانت ليها مذاق خاص اخلقى المذاق الخاص فى الوقت الحالى واستمتعى بيه عالآخر
الواحد بيكون مبسوط طول مهو مش عليه مسؤوليات او ضغوط - نحى الاتنين جانبا وهتلاقى كل الحاجات حلوة
من الآخر ارمى حمولك على الله وهو بيدبرها حلو قووووووووووى
يلا باى
هبة
وانا كمان وحشتنس الكلييييييييييه اوي
صحيح اسلم الاول
ازيك يا هبه اخبارك ايه يا رب تكوني مبسوطه ديما
بجد بوست رااااااااااااااااااائع
لما بدخل مدونتك بفتكر ديما كل حاجه جميله
:)
doba,
صح يا دوبا
و الله بحاول فعلا
بس عارفة؟؟
انت غريبة أوي :). آه بجد
أصل لسة إمبارح كنت بفكر فيكي كتير أوي و بفكر أكلمك!!! انت إزاي كدة بجد؟
:)
المدونة التانية؟؟ امممم...غالبا عشان لقيتني بغلس أوي، و فيه كلام ساعات بيكون من جوايا زيادةأوي بس برده حاسة إني عايزة أفضفض بيه فبقيت أكتبه هناك لوحدي. عادي يعني :). مفيش حاجة
كلامك دايما بيشجعني أوي أوي
بدوّر دلوقتي على اللي يدوقني المذاق الحلو للدنيا في الوقت الحالي. إن شاء الله هلاقيه قريب. أتمنى
شكرا شكرا شكرا لآااااخر الدنيا. انت شخصية جميلة اوي أوي يا بيبو بجد
ربنا يخليكي للي بيحبوكي و بتحبيهم
كلنا بيوحشنا زماااااااان وكل حاجه والصحاب والهزار
وحشني النتطيط والجري والصحاب صعب اوي تعرفي رغم انها ذكريات جميله بس بكرها وبحاول انسي بكرها علشان لما بفتكر بتعب واعيط وانا مليت الحزن
تحياتي انتي وحشك زمان وانا وحشني
سمكه
أمير الهدوء
لما بدخل مدونتك بفتكر دايما كل حاجة جميلة
انت قلت كدة :)
أتمنى كدة يا سمو الأمير :)، بس لو اتكلمنا جد أنا ساعات كتيرة كنت بكتب حاجات صعبةأوي و بدايقكوا كلكوا. مش فاكر و لا إيه؟ :) دة انت من المخضرمين معايا في البلوج دة و شفت مني كتيييير :)
يارب مش تكون متدايق مني بس
بس كان عندي سؤال صغير. هو ازاي وحشتك الكلية؟؟ انت مش لسة فيها؟؟ و لا مسافر و لا إيه؟؟
أتمنالك حياة سعيدة سمو الأمير :)
و شكرا أوي إنك لسة فاكر مدونتي
سمكة وحدة
صح أوي
كتير لما برجع بذاكرتي لورا بحس إني عايزة أعيط
:)
عندك حق ساعات بيكون إننا مش نفتكرها أحسن
يارب أيامك الجاية تكون أحلى و أحلى من كل اللي فات
نورتي البلوج لأول مرة. أتمنى مش تكون الأخيرة يا سمكة
Post a Comment