Tuesday, October 7, 2008

عايزة مطر بأة :((


جوايا رغبة كبيرة أوي في إني أشوف المطر


مش قادرة أصبر و مش قادرة أستناه لما يفكر ينزل

:)

وحشني الشتا بكل ما فيه...بجدمغرمة بيه

بس بقالي كام يوم مش قادرة أفكر غير في المطر

عايزاه أوي أوي أوي



إمبارح و النهاردة الجو لطيف...خلاني أتمنى الشتا ييجي بسرعة و مش يتأخر أكتر من كدة

و تكون بدايته نعمة من النعم اللي بحبها أوي أوي

:) المطر

مش عارفة !! بس بحسها نعمة ساحرة أوي لكل الناس

وكل حد بيكون ليه إحساس مختلف بيها طبعا، بس معظمنا فعلا بنحبها



المطر بالنسبة لي بحسه

فرحة وضحك من القلب للأطفال

قمة الرومانسية للعشاق

و يعني بشرى و رزق للفلاحين و المزارعين

خير و تفاؤل في كل حتة



أينعم في مصر الأحاسيس دي بتزيد شويتين و يدخل معاها حاجات تانية مرتبطة ببيوت العشوائيات المساكينو الشوارع اللي مش متساوية و البالوعات الروعة... لكن برده بيفضل مصدر سعادة و أمل للناس



لما بشوف المطر بكون حاسة إني عايزة أرجع طفلة تاني و أتصرف بكل حرية من غير ما حد يشوفني

بكون عايزة أجري تحته و أنا فاردة إيديا كأني بطير فوق أعلى سما

بحس إني عايزة أفضل أتنطط لوحدي و أنا بضحك

.................................

ساعات بحس إن نفسي أقعد تحت المطر مع حبيبي و أجرب الإحساس الجديد دة



فعلا مش عارفة :))، بس بتمنى المطرينزل قريب جااااامد، و أستمتع بكل لحظة و هو بينزل من السما



المطر كمان بيفكرني أوي بقصيدة كان "بلوجر" كتبهاو عجبتني أوي أوي ساعتها

مع إن فيه كتير أوي كتابات حلوة عن المطر بس بقيت دايما بفتكر القصيدة دي وقت نزول اي مطر
خصوصا آخر كام جملة

مش عارفة إذا كنتوا هتشاركوني رأيي دة و لا لأ بس دة عموما رأيي الشخصي و إحساس كنت عايزة أكتبه


دي القصيدة...من بلوج "قصر الرئاسة" و صاحب البلوج رئيس جمهورية نفسه


برد الشتاء
راعش بدن كل البشر
والناس بتجرى فى الشوارع
تستخبى من البلل
وانا ماشى وحدى وفى وسط الطريق
من غير صديق
تحت المطر
معرفش عايز اغتسل
من الذنوب وارجع اتوب
يمكن بدور على الامل
اوحتى بهرب من الملل
تحت المطر

ماشى وكانى طير مفرود الجناح
طاير سعيد منتشى بنور الصباح
عالى وبدور على الجاى
ناسى ايه هو الى راح
ونسيت كمان طعم الجراح
تحت المطر

بجناحى ارفرف اطير لفوق
من وهم يأسى بدأت افوق
طاير سعيد بدنيتى
فى لسانى طعم محبتى
للدنيا ولكل البشر
تحت المطر

ساكته الشوارع والبيوت
احلام كتير لناس تموت
وانا حلمى لسه بيتولد
تحت المطر
:)
.....................................................
حاجة تانية من أجمل ذكريات حياتي بفتكرها مع المطر هي أول أيام شغلي... لما كنت بدرّس أطفال صغيرين
كان المفروض الوقت دة من السنة هنعمل فيه نشاط فني "غير الأغنية طبعا" عن فصل الشتاء.. كل فصل عمل حاجة
غير التاني،بس أنا حبيت أعمل حاجة نفضل فاكرينها طول الوقت فقطعت لوحة كبييرة "نسبياطبعا"مش هملى كل
الحيطة بيها يعني :)،و قطعتها على شكل سحابة و لونها الأطفال بالألوان المائية مع بعض باللون الكحلي... بعدها جبنا
قطن و قعدنا نلزقه كلنا على سحابتنا المغيمة..... و قصيت لوحة لبني على شكل قطرات مية على أد عدد الأطفال و
كلطفل لزّق النقطة بتاعته في المكان اللي يحبه هو تحت السحابة
كانت سحابة مغيمة بس كنا بنحبها أوي،و بعدها بفترة فكّر ولد منهم إننا نحط تحتها شمسية و فعلا عملتلهم شمسية
عملاقة و بقينا أي وقت الدنيا تمطر ألاقيهم "ساعات حتى من غير استئذان" يجروا بسرعة و يقفوا تحت الشمسية
اللي فوقيها المطرفي الفصل و يفضلوا يضحكوا
:)
مشهد عمري ما هنساه طول عمري ضحكهم كلهم مع بعض و غناهم للمطر
.....................................................
المطركمان بعيش معاه أوي وبفتكر معاه كتير من أغاني فيروز

بفتكر أغنية هي مش قالت فيها أي حاجة تنم عن وجود مطر أساسا بس أنا دايما بتخيل المشهد كدة جوايا رغم اللي هي بتقوله في أغنيتها

:)
يمكن عشان أكتر أغنية بحبها؟؟ :)و الله ما أنا عارفة


المهم..... نفسي أشوف المطر قريب

أمل عندي بتمنى ربنا يحققهولي

عشان وحشني أويييييي

35 comments:

Empress appy said...

ا دى زى بعض فيها يعنى مش مختلفين
بس قوليلى انت شاريه شمسيه جديده وعاوزة تجربى اذا كانت هتبقى حلوه فى المطر ولا لا ههههههههههههههههه

Rosa said...

حلو قوي البوست دا بجد و أكتر جزء عجبني فيه وصفك للأطفال لما بيستخبوا تحت الشمسية. مش محتاجة
أقول لك قد ايه مبدع شكل النشاط اللي عملتيه مع الأطفال دا بس وصفك ليهم خلاني أحس ان شايفاهم و هم بيجروا يستخبوا تحت الشمسية و يضحكوا.

أنا كمان من عشاق الشتاء و المطر زي ما انتي أكيد اكتشفتي بنفسك من مدونتي و برفع ايدي للسما و أدعي معاكي يا رب الشتا ييجي بقى و الدنيا تمطر

Wish I were a Butterfly ... said...

Appy,

:)))

شمسية؟؟
تصدقي عمري ما جربت أمسكهافي حياتي؟
:)
أتمنالك شتا سعيد يا بيبو

Wish I were a Butterfly ... said...

Om Hagar,

ربنا يكرمك يارب:)

أنا بعشق الأطفال و بعشق أي حاجة أعملها معاهم و يحسوا بمتعتهالأن التعليم عمر ما كان معناه ضغط و تهديدو بس
متأكدة إن انت أصلا ممكن تعملي أحلى من كدة مليون مرة مع هاجر.. الواحد لما بيحب الحاجة بيبدع فيها بطريقة هو نفسه مش يتخيلها

يــــارب :). كويس إن فيه حدهيدعي معايا
نورتي

... amr said...

من بقك لباب السما :)))) ... انا برضة من عشاق الشتا ... بس للاسف الشتا في مصر قصير و مش برد اوي يعني

قلب ينبض لله said...

هايتحقق حلمك دا قريب أوي أوي
خلاص أحنا قربنا أوي من فصل الشتا

مع أن في ناس بتتبهدل بسبب المطر علشان بيوتهم وشوارعهم وكدا الا أن مفيش حد بيكره المطر لأنه رزق وخير من ربنا
بس طبعا بتتفاوت درجة الحب والعشق دي من شخص للتاني

أول مرة عرفتك فيها كنتي منزله بوست عن قوس قزح
من يومها وانا عرفت انك بتحبي الجو دا جدا وبئيت لما أشوفه أفتكرك علي طول:)

وحشاني جدا جدا

sakayar said...

كل سنة وانتم بألف خير وسعادة
معلش والله والله على اني مش جيت من كتير
بس برمي بوستاتي في مدونتي والله وبطلع جرري
ومع ذلك بشوف مدوناتكم على الجوجل ريدر ومتابعها والله
وكنت قاعد اقرأ من كام يوم كيمو وانتيمو ومتصور المشهد مش بس قراية ولما لقيتك ف الاخر بتقولي انه موقف حصل بجد لحد تعرفيه قلت ف نفسي

يا خبر هو فيه لسه ناس كده؟؟؟
ربنا يعافينا بقى

ندخل بقى ف الشتا
مووضوع الشتا بتاع الفصل ده بجد فكرة توووحفة جدا
أما عن الشتا بتاع البوست ده فبجد من اكتر الحاجات اللي بتسعدني ... حتى ريحة المطره ليها ريحة كده بتدخل جوه جسمك تحس بانتعاشه غريبة وتبتسم زي الاطفال
آخر مرة ليا ف مصر الدنيا كانت بتشتي وببص لقيت الناس بدأوا يجروا تحت البلكونات واللي ماسك جرنال واللي رافعة شمسية ... لقيتني قمت ماشي ف وسط الطريق تحت المطره بتلقائية وخلعت الجاكت بتاعي علشان المطرة بتل كل هدوووومي ... كنت عامل زي العيال اوووي ... بس اكيد كل الناس قالت عليا مجنوووون .... بس اعمل ايييه ...بحبه يا ماما بحبه
ههههههههه
شكرا ع البوست الجميل

Anonymous said...

عزيزتي الفراشه

فكرتني بحلمي اللي بحلم بيه اصل فيه مطر بضه بس فيه عربيه كمان اصلي بخاف من البلل ويمكن ده من تأثير دور البرد اللي مسيطير عليا شويتين لاني في العادي بحب الميه عشان طيبه ومبتجرحش


يارب الدنيا تمطر

على الهامش كنت في ميكروباس وواحده وابنها الصغير ورايا وبيقولها هي اسم المنطقه دي مشتق من المطره؟
قلتله لأ اسمها نطره
ههههههههههههه
كان نفسي اقولها حرام عليكي متبوظيش معلومات الواد مش كفايه بتقولي على اليمكروباس ميكروراظ كمان عايزه الواد يقول نطره

a Dreamer with feet on the Floor said...

Dear.. rain is romantic when it is not heavy and we R not in a rush 2 go work or do some thing.. I mean it is romantic 4 the ones who R not suffering.. and If U experienced Rains In europe.. U would not have Loved it at all.. Besides.. rain expores the pain of the Homeless ones.. and make them suffer more..
I do not deny .. one enjoy Rain.. when one is behind the glass widow watching Rain drops.. while drinking hot tea and feeling warm..

نـــــور said...

ازيك ياهبه
كل سنه وانتى طيبه

انا عارفه هى جابه متاخر بس سامحينى بقى :)

تعرفى انا مقدرتش اقاوم
وكنت عايزة اخلص البوست بسرعه علشان اعلق
انا كمان بعشق الشتا والجو فيه
بعشق البرد واحساسه واللبس التقيل

بعشق شكل الجو والدنيا بتمطر ولو السما بعده

حتى هوا الشتا بحبه
علشان كده حسيت ببوستك اوى وبكلامك
وفرحت لما حسيت ان فى حد بيحس نفس احساسى
انا كمان مستنيه المطر
وبرد الشتا :)
سلام ياجميله

قضية عم أحمد Ahmed Case said...

تشششششششششششششششش

تشششششششششششششششششششششششش

تششششششششششششششششششششششششششششش


لنل مطر نازل على البلوج علشان يفرحك

انت فين من زمان والله مفتقدك في قضية عم احمد

ღϠ₡ღأمير الهدوءღϠ₡ღ said...

اممممم شعور جميل حاسه وانا بقرأ البوست الجميل ده

فعلا نسيم الشتاء بفتكر بيه أجمل ذكريات
كانت في السنه اللي قبل اللي فاتت
اما اللي فاتت نفسي الغيها من ذاكرتي
همم

:)
مبسوط لانك مبسوطه

سلام
أمير الهدوء

Wish I were a Butterfly ... said...

amr...,

صح
الشتا في مصر اسما بس
بس برده أحسن من مفيش :)

شكرا لتعليقك... و لتمنيك الشتا ييجي
:)

Wish I were a Butterfly ... said...

قلب

يااااه!!! بجد؟؟
كل ماتشوفيه تفتكريني؟؟ :). ربنا يكرمك يـــــارب

أنا أول مرة أعرف إنك أول مرة عرفتيني كان في البوست بتاع العيد اللي شفت فيه قوس قزح دة :). الحمدلله إنك عرفتيني في يوم مش منكدة فيه على الخلق
:)
صحيح... أنا زعلانة منك
البلوج بتاعك ماله؟؟؟؟؟؟؟؟؟؟
و الموبايل كمان ماله؟؟؟
يارب تكوني كويسةومبسوطة

بحبك أوي

Wish I were a Butterfly ... said...

Sakayar,

و شكرا على التعليق الجميل دة
:)
وصفت إحساس الشتا صح أوي

ريحة المطره ليها ريحة كده بتدخل جوه جسمك تحس بانتعاشه غريبة وتبتسم زي الاطفال
عندك حق جدا

خلعت الجاكت؟؟ :) كان نفسي أعملها أكتر من مرة بس عارفة إن لو مامتي معايا مش هتحبني أعمل كدة فعمري ما بعملها...:) للأسف

ومفيش حاجة ومفيش داعي للاعتذار خالص. ربنا يوفق حضرتك في شغلك و حياتك
نورت :)

Wish I were a Butterfly ... said...

إنسان مقيد

هاهاها :).مش قادرة أتخيل فعلا ليه لسة فيه ناس كتير بتقولها "نطرة"؟!!يعني حتى "لو" افترضنا إنهم مش متعلمين، هيلاقوا الكلمة في أغاني أد كدة!! طب ليه "نطرة"؟؟
:)

بحب المية عشان طيبة و مبتجرحش...و أنا بحب التعبير دة أوي :). شكرا على تعليقك بجد. بيفرق معايا كتير

Wish I were a Butterfly ... said...

a dreamer with feet on the floor,

Realistic view again Mr. "Dreamer".:)

Any way there's no space for romance& dreams in our society, I know it.

My parents told me about it one day :). They were living in London for a few years. They told me some Egyptians got depressed of such foggy weather, and dreamt of just one day to see the sun. :)

Ur words are a bit sarcastic may be... but I certainly agree with you and respect what u said.
But still dreaming of soon light rain :)

Wish I were a Butterfly ... said...

Habiba,

و أنا فرحت أوي بتعليقك لأنكوصفتي الإحساس بطريقة حلوة أوي

أنا كمان مش كفاية تقولي "بحبه" ..لكن فعلا بعشقه بكل ما فيه

أصلا بحب إحساس التكتكة و إنك مش قادرة تتكلمي من كتر البرد كدة
:)))

مش قدرتي تقاومي؟؟طب تقدري تقاومي لايز؟
:p
شكرا كتير على زيارتك. تعليقك جميل بجد:)

Wish I were a Butterfly ... said...

أحمد رفعت

:)))
هو فعلا فرحني

تشت تشت تشششت بوم :)دة بأة الصوت اللي بيحصل لما نتنطط تحت المطر

شكرا جدا على تعليقك... بجد فرحني جدا زيارتك لبلوجي
:)
نورت يا عم أحمد

Wish I were a Butterfly ... said...

أمير الهدوء

و أنا كمان مبسوطة إني مبسوطة :)). تخيل؟

بصراحة... نفسي ألغي السنة اللي فاتت ديمن ذاكرتك فعلا!! لأنك قلت كدة أكتر من مرة،و أنا كمان ألغي السنة بتاعتي اللي فاتت دي :)

فرحانة بتعليقك حتى لو دة مش معناه عودتك للتدوين فعلا
ربنا يطمننا عليك :)

انا حره said...

ياستى يارب يارب تشتى بكره ادام بتحبى المطره كدا

semsem said...

اول زيارة ليه للبلوج وبصراحة شدني موضوعك لاني لسة كنت بفكر فى حكاية المطر والشتا دي النهاردة الصبح
انا مش بس المطر اللي وحشني
انا كمان البرد وحشني
بحب احساس اني اضم نفسي عشان احس بالدفا
وبيفكرني بزكريات كتير جميلة فى حياتي
ان كان البرد ولا المطر
البرد لما كنت انام بحضن جدتي واخد الحنان والدفء اللي مش موجود ذيه فى اي مكان فى الدنيا
والمطر بيفكرني زمان لما كنت صغير
كنت ابص للسما فوقي والدنيا بتمطر واتحدي نفسي اني اقدر اشوف ايه فوقيها
وكنت دايما كل اما الدنيا تمطر احلم واتمنى كان دي فرصة اني احلم ويتحققلي حلمي
ميرسي على البوست اللي خلاني ارجع لايام زمان
واطلع جزء من اللي جوايا
مع تحياتي
حسام

شوية قهوة said...

انا كمان نفسي ان المطر ينزل بسرعة والموضوع جميل جدا انا قرات المدوة كلها وحلوة كل ما اقرا موضوع اقول هخلصوا واقفل يشدني الموضوع البعدو
ودي اول زيارة لية لمدونتك
ويريت انت كمان تيجي تزوري مدونتي وشكرا

Wish I were a Butterfly ... said...

أنا حرة

:)))

يارب يارب يارب

شكرا على الدعوة الحلوة دي :)

Wish I were a Butterfly ... said...

Semsem,

أنا اللي ميرسي على التعليق الجميل دة
:)
أنا كمان بحب الشتا بكل ما فيه، و جملة
ابص للسما فوقي والدنيا بتمطر واتحدي نفسي اني اقدر اشوف ايه فوقيها
دي عجبتني أوي :). عمري ما فكرت بالطريقة دي. بس فعلا إحساس حلو أوي

أول زيارة و أتمنى مش تكون آخر زيارة، و الصورة اللي جنب توقيعك دي بتوجع أوي :). بس أحسنت في اختيارها لأن معانيها كبيرة أوي أوي

Wish I were a Butterfly ... said...

مقتطفات من حياة فتاة

حاضر حاضر :). إن شاء الله هزور مدونتك قريب

دي حاجة تشرفني و تسعدني أوي أوي إن المدونة شدتك كدة :). غريبة!! شكرا على رأيك اللي أسعدني بجد

وحـــــــــــى القلم said...

انا بحب المطر اوى برضه بس مبحبش البهدله بتاعته فى الشوارع
بيثير فى نفسى ذكرياااااااااااااات كتير
كنتى مستعجله على المطر اهو نزل عندنا بتلج كمان كأنه سيول ومش عارفه هنزل الكليه فى الجو ده ازاى؟
)-:

Wish I were a Butterfly ... said...

وحي القلم

بجد؟؟؟
بجد نزل عندك؟؟
:)
مشفتش حاجة

عقبالنا يارب
:)))
معلش و الله مش قصدي أفرح فيكي بس بتمناه أوي بجد

أنا أكتر حاجة بحبها فيه إني أتغرق :). شفتي بأة؟
ربنا يكرمك يا سمسمة
شكرا لزيارتك للبلوج دةكمان :$

وحـــــــــــى القلم said...

اه والله نزل عندى شفتى بأه
وعشان الحق الباص اللى بروح فى الكليه فى ميعاده نزلت نص ساعه بدرى مع العلم بأن الباص بركبه من على ناصية شارعنا
يلا يا عم افرحى عقبال عندكم
انتى مدونتك من المفضلات عندى

Wish I were a Butterfly ... said...

وحي القلم

و قد وصلتنا أنباء "مؤكدة" من مراسلنا في المنصورة بأن الأمطار قد هطلت في ذلك اليوم بغزارة :) مما عطل حركة السير خااااااااالص
:))
ربنا يكرمك يا بنوتة. بس هو انت في القاهرة و لا بعيدة زي صاحبتي المراسلةالخاصة؟

و دي حاجة بجد تشرفني إن مدونتي تكون من المفضلات عندك. شكرا يا سمسم على رقتك

وحـــــــــــى القلم said...

لأ بعيده زى مراسلنا انا مراسلتكم من المحله الكبرى وطنطا
:)))
يظهر ان السحابه كانت كبيره شويه اخدت الخط كله طنطا والمحله الكبرى والمنصوره

Anonymous said...

اهوه ياستي ربنا محرمكيش من المطر والدنيا امبارح اتغرقت مطر مش عارفة عندكم كان في ولا لاء بس عندنا كانت مطرة كتييييرة
على فكرة عجبني البوست لانك وفتي المطر كما ينبغي ان يوصف وفعلا انا بحسه رزق واسع اوي مع ان في ناس بتضايق من المطر

تحياتي

Wish I were a Butterfly ... said...

أيامنا الحلوة

أصلا أصلا لو مش كنت فرحت بالمطر فأنا فرحت جداااا بزيارتك دي لبلوجي
:)))

لأ الحمدلله مطرت عندنا، و تلج صغير و رعد و كلللل حاجة :). و مشيت تحته كمان و كنت مبسوووووطة
الحمدلله

شكرا أوي لتعليقك يا قمرة

Anonymous said...

مطر ايه و شتاء ايه ده الواحد مابيعرفش يروح التمرين ولا بيعرف يجرى و قاعد فى البيت ولا المطلقة :((

فييييينك يا صيف

Wish I were a Butterfly ... said...

Anonymous,

كنت كاتبة الكلام دة شهر أكتوبر. ساعتها كان لسة الشتا الحقيقي مش حن علينا و لا ظهر خالص
دلوقتي يمكن ممكن ناس تغير رأيها فعلا وتقول زيك

بس فعلا
... لولا اختلاف الأذواق
:)
أنا الشتا بالنسبة لي هو فصل النشاط بتاعي،لأني مش بحب الصيف والحر أبدا

بس في النهاية. مين انت؟؟