قلت النهاردة عيد بأة... و بلاش من الكآبة المعهودة المرة دي :). فقررت أكتب حاجة نوع تاني و تجربة جديدة نسبيا لي
المشهد الأول
بإحدى غرف المنزل....
أم سفروتة: سفروتتي حبيبتي...تعالي عايزاكي ف موضوع كدة
سفروتة"بتكلم نفسها": حبيبتي؟؟وموضوع كدة؟؟ خلاااص عرفته :). أيــوة يا ماما خير؟
أم سفروتة: طنطك "حبوبة"جايبالك عريس. بتقول إنه كويس أوي و هو عنده 29 سنة و بيشتغل .... وكدة يعني
سفروتة: طب وإيه تاني؟ تعرفه منين و لا هو إيه المواصفات اللي عايزها بالضبط؟؟؟
أم سفروتة: لأ مش عارفة غير كدة. هي أصلا متعرفوش لكن بتقول إنه كويس أوي.. ها؟؟ قولتي إيه؟
سفروتة:امممم... طيب حاضر. هفكر و أقوللك
أم سفروتة: يعني مبدئيا موافقة عليه؟
سفروتة: آه عادي. ليه لأ؟ بس هفكر و ... تقاطعها أم سفروتة: طيب خلاص. هو جاي بكرة بالليل هنا إن شاء الله
سفروتة: نعم؟؟ بكرة؟؟؟؟؟
..........................................................................
المشهد الثاني
سفروتة في انتظار العريس و يسمع في الخلفية صوت جرس الباب
تسمع سفروتة صوت واحد بيضحك و يهزر.. لحظات و تسمع صوت تاني غير الصوت الأول!!!
سفروتة "في سرها": إيه دة؟ هو معاه حد؟؟ بس دي أول مرة ييجي! ينفع ييجي معاه حد؟؟
تخرج سفروتة و تلاقي مامتها في المطبخ فتسألها
سفروتة: ماما. إيه الأخبار؟
أم سفروتة" تضحك": دة طلع أكبر من اللي طنط قالته. هو ليه الناس مش بتتأكد من المعلومات بس؟؟
سفروتة: طيب يا ماما يعني إيه الأخبار؟ بعدين كمان دة فيه اتنين برة!! مين فيهم العريس؟؟
أم سفروتة "تضحك بشدة": أيوة صح :) عندك حق. مش عارفة ليه كدة. هههههه
سفروتة تبتسم و تعيد سؤالها: يا ماما طب أقعد فين؟ أبص لمين فيهم؟ ردي بس.... إلا أن أمها تهم بالخروج من المطبخ و سفروتة تنادي
مـامـا... يا مامـــــااااااااااا
..........................................................................
المشهد التالت: الصالون
تخرج سفروتة في خجل و هي لا تدري ما ستفعل
سفروتة "في سرها": آااه... واضح إني هقعد مع كيمو و أنتيمو. مين فيهم العريس و مين فيهم صاحبه؟!! و لا عمري هعرف إذا هم مش وضحوا كدة ف كلامهم
و تبدأ سفروتة في تعريف نفسها و هي لا تعرف لمن تنظر أو توجه كلامها
سفروتة" في سرها": أنا مش عارفة بجد أكلم مين فيهم. طب مين هسحره بنظراتي طيب؟
:p
كيـمو هادي و شكله رزين و مكسوف شوية..يمكن هو دة العريس؟؟ بس هو مش بيتكلم أبدا أبدا. لكن أنتيمه هو اللي بيتكلم و يتعرف عليّ أنا و العيلة!! هو اللي شكله واخد راحته و عايز يتكلم! أنا مش فاهمة حاجة
يمضي الوقت و تمر أكثر من نصف ساعة إلى أن تكتشف "بالصدفة" أن كيمو هو العريس فعلا
سفروتة "في سرها": لكن أنتيمه ما شــاء الله راديو شغال!! دة مش بيسيب فرصة لأي حد يتكلم!! لا كيمو و لا حتى أنا
!!!!!
و تمر الساعات ثقيلة يتخللها محاولات "فاشلة" لإسكات أنتيمه الطيب و إبعاده عن ساحة المعركة و لو لدقائق
أم سفروتة "موجهة كلامها لأنتيمه": تحب تتفضل تقعد هنا شوية معانا و نسيب سفروتة مع كيمو؟
أنتيمو: لا معلش. أنا بس دقيقة هقف في البلكونة. أصل من ساعة ما جيت و أنا عايز أشوف المنظر من البلكونة هنا بيوّري إيه
أم سفروتة "و لسان حالها بيقول هيييييييييييه..فرجت :)))" : اتفضل طبعا طبعا
لا تمض ثلاث دقائق و يعود مرة أخرى ليلتصق بكرسيه و يقتحم السؤال الدائر بسؤال "خفيف" جدا
سفروتة... كلمينا بأة عن نفسك شوية (بصيغة السؤال المحفوظة من اخواننا المذيعين اللذاذ... و في قول آخر الأطباء النفسيين). سفروتة "في سرها": إيه دة؟؟! أنا ليه فجأة كدة حسيت بأني في برنامج "كرسي الاعتراف"؟
الأكثر تشويقا في الليلة كان قصص أنتيمه :). ففي الحقيقة لم تسمع العائلة إلا صوته، و كان يقاطع كل من يتحدث و دوما هو مديرا للحوار الذي في الحقيقة.. حوار بينه و بين نفسه فقط
انتهت الليلة... و رحل كيمو و أنتيمو
أم سفروتة: ها؟ إيه يا سفروتة فيـــه؟
سفروتة" و نظرات الاذبهلال كلها على وشها": فيه؟؟ هو ميــن؟؟؟
:)))
ملحوظة هامة: اعذروني إذا كان اللي كتبته دمه تقيل أوي و فيه مبالغة... بس الحقيقة إن اللي مكتوب دة هوموقف حدث بالفعل مع حد أعرفه
يا ترى ممكن نتعلم حاجة من اللي اتكتب دة؟؟
28 comments:
السلام عليكم ورحمه الله وبركاته
عيد سعيد وضحكت رغم أني من أول العيد مضحكتش
اول ما قريت قولت أن لو عشت الموقف ده فأكيد هكون انتيمي وحبيبي هيكون هو كيمو يمكن عشان من الأول كنت حاسس ان كيمو هو العريس وطبعا ان مش هسيب حبيبي يروح يخكب لوحده وطبعا رغم ان لسانه طويل على طول بس ساعتها مش هيتكلم وهكون انا الراديو
بس قبل ما اكومنت تليفون البيت كان بيرن وكنت برد وتلقيت دعوه عشان ربنا يكرمني واتجوز فتخيلت الموقف بالمقلوب وان انا اللي هخطب فلاقيت اني هكون كيمو مش انتيمو بس طردت الفكره بسرعه لأني أحب أكتر أني اكون انتيمو
طولت أنا عارف بس أصل كان واحشني اوي الكلام هنا
على الهامش
مين سفروته؟ :)
موقف حصل بالفعل
أممممممم
ولحد تعرفيه كمان
طيب ماقولتلناش هي عملت أيه بعد كدا
علي فكرة الكلام اللي كتبتيه دمه خفيف جدا
وعيد سعيد عليكي ياقمر
اكيد كلنا اتعلمنا من الموقف ده
بس اهم ما في الموضوع
سفروته شايفة الوضع ازاي وايه رد فعلها بعد كده ؟
ههههههههههههههههههههههه
والله انتيمه دا مالوش حل
انا رأيى تتجوز انتيمه وتسيبها من كيمو:))
عمتا يعنى او خالاتا على حيب وجود حد من الاتنين
انا مبحبش الزواج بالطريقه دى بس شكلها كده مفيش غير كده وبس كده
تحياتى
عيد سعيد
ابوالعربى
اممممممممممم
ده بفكر بس انا من راى بالنسبة لسفروتة ترفض العريس لانة واضح انة عديم الشخصية والا مكنش جاب انتيمو معاة
من ناحية الموقف فهو مش مقبول يعنى لانى المفروض ياجى لوحدة في اول زيارة علشان يشوف خطيبتة بس واضح انة جايب انتيمو معاة يشوفها
الموقف مكرر وبيحصل كتير
كل سنة وانتى طيبة وسلامى لسفروتة وش بيضحك :D
قصدك مش اروح مع محمد لما يروح يخطب ؟
تقتكري لو واخد راديو او كاسيت ابو روحين ده هايغني عن وجودي ؟
اكيد لأ ثم اني مش رغاي للدرجة دي
ومش رخم وغتت للدرجة دي
انا هاكون زي احمد ادم ف فيلم همدي لما راحوا يخطبوا لصلاح عبدالله
شفتي الفيلم اصلا ؟
المهم انا مش هايجيلي قلب اقعد ف بيتنا وهو بيخطب
اينعم هايحكيلي لكن اللي شاف خير من اللي اتحكاله
انا ابقى انتيمو بس مش اتخلى عن صاحبي ف ظرف زي ده
يانهار ابيض حدث بالفعل ؟
لا الصراحة غلطانة سفروته لو مش كانت رفضت
مش هي رفضت برضه ولا سايبه الباب موارب ؟
كل سنة وانتي بخير
إنسان مقيد
وعليكم السلام ورحمة الله
لو أعرف إن العيد هيخليني أشوف اسمك في التعليقات كنت هتمنى كل شهريكون فيه عيد
:)
نورت البلوج بجد
بس كدة هتكون كررت نفس الغلطة أساسا!! أول مرة دي المفروض بيكون مجرد تعارف و إن الطرفين يشوفوا فيه قبول و لا لأ... زائد إن البنت في العادي بتكون مكسوفة فالموضوع مش بيكون ناقص حد تاني معاها
أكيد انت حر بس حاسب تكون بتصعب الموقف أكتر على أنتيمك
:)
تطول براحتك
سفروتة هي بجد واحدة أعرفها مش أكتر
قلب مغرمة بيه
:)))
عملت إيه بعد كدة؟؟ تفتكري لو مكانها ممكن "تفكري" توافقي؟؟؟
:)
بجد كتبت الكلام أيوة عشان مش يكون كلام حزين وعيد بأة وبتاع..بس كمان عشان فيه ناس مش بتفهم البنات بيفكروا إزاي، و يمكن مش بيسألوا أهلهم كمان عن اللي المفروض يحصل في المقابلات دي
دمه خفيف؟!! مش أعتقد بس أتمنى
:)
وحشتيني أوي
anonymous,
طب الحمدلله إن حضرتك اتعلمت منه حاجة
هكرر نفس السؤال اللي كتبته لقلب ينبض الله
لو حضرتك أخو البنت كنت هتوافق؟
blue-wave,
:)))
أيــــوة
هو دة الحل
تصفيق حاد للي حل اللغز
:)
ما هي المصيبة إن أنتيمه كمان بيدور على عروسة!! طب تيجي إزاي بس يا دك؟
:)
هو فعلا كل اللي سمعوا الحكاية قالوا إن أنتيمه ملوش حل
نورت البلوج و أتمنالك عيد سعيد
ضد الظلم
إيـــه دة؟؟
أبو العربي شخصيا يتحدث إلينا؟؟؟
يا أهــــلااااا
:)
نورت البلوج يا فندم
كنت لسة هرد عليك و أقوللك و مين بيحب الجواز اللي بالطريقة دي، بس لقيتك بتكمل و تقول واضح إن مفيش غير كدة
بالضبط كدة :)
معظم الوقت مفيش غير كدة فعلا
أتمنى مش تتعذب كتير و حضرتك بتدور على عروسة، و تلاقيها علطول إن شاء الله
كل سنة وانت طيب :)
رئيس جمهورية نفسي
صدمني آخر جملة كتبتها
مكرر و بيحصل كتير؟؟
يا خبر أبيض!!! أتمنى عمره ما يحصل لأي حد أعرفه
دة أنا كنت أول مرة أسمع عن موقف زي كدة
هي طبعا رفضته يا ريس، بس مش عشان هو عديم الشخصية
وجود أنتيمه مش بالضرورة دليل على ضعف شخصيته خالص، ممكن يكون هو كويس جدا بس عدم وجود خبرة أو حد يوجهه بجد للأصول و اللي المفروض يحصل ممكن هو دة اللي يكون السبب في وجود الاتنين مع بعض
وجود أنتيمه معاه معناه إنه ليه ناس بتحبه أوي. بس العيب هو عدم السؤال كفاية من ناس ذوي خبرة،أو عدم احترام يمكن و إحنا مش نقدر نعرف دة عمرنا..و من ناحية تانية العيب ساعتها كان إن واضح إن شخصية أنتيمه طاغية عليه مش أكتر
هوصل سلامك لسفروتة حاضر :)، بس مش شرط تكون تعرف سفروتة يا فخامة الرئيس
:p
يارب تكون قضيت عيد سعيد في صعيد مصر
ملحوظة استفزاز مش أكتر:) : اللكنة الصعيدي واضحةأوي في كتابتك حتى. "ياجي لوحده"؟
:)
نورت كتييير و سعيدة برجوعك أوي
ولـــو
:)))
راديو أبو روحين؟؟
يعني لازم حاجة مكانك و خلاص؟:)
مش رغاي للدرجة دي، و مش رخم و غتت لدرجة دي. طب مش تسيب صاحبك هو اللي يقرر الكلام دة؟ :) يمكن يكون ليه رأي تاني مثلا
طبعا بهزر
طبيعي هتكون قلقان جدا و صاحبك بياخد قرارمصيري، أنا كمان أي حد من صاحباتي في نفس الموقف هكون قلقانة عليها جدا و قاعدة أدعيلها، بس مش معناه أروح معاها
على الأقل أول مرة دة مش حاجة محببة أوي أعتقد
شفت حتة من الفيلم يمكن لأن بابا بيحب الضحك من كل قلبه، بس أنا مش عارفة المشهد دة لأ
شكرا لتعليقك يا ولو..أسعدني أكيد
قصه غريبه جداااا
!!!!!!!!!!!!!!!!!!!!!!
مش لازم هى تقبل حد شخصيته كده ابدااا
ايه ده انتي صدقتي ؟
دانا لو رحت خطوبتي انا يبقى كتر خيري
انا اخر مشوار اروحه واحنا رايحين نتغدى بره نشتري جزمة او هدوم
لكن اروح معاه وهو بيخطب وكمان اول مرة طب يدعي هو اروحله يوم الفرح
الحقيقة ان الحمد لله ربنا كارمني انا وصاحبي باحلى صفه ممكن تلاقيها ف راجل
بنتكسف
ربنا يوفق الجميع ووالله لسه كنا بنتكلم انا وبابا عن الموضوع قبل البوست بيومين واتفقنا على انه المفروض فعلا الواحد يروح لوحده حتى علشان لما يترفض زي كيمو مش يبقى شكل اهله وحش معاه
اصل القرد ف عين مامته
قرد برضه
يعني معقول مامته مش تعرف القرد الاصلي شكله ايه ؟ تروح تبص لجوزها ومش تخنقنا
السؤال بقى اللي محيرني بيقول :
علل
مين هي سفرووته بالظبط؟
تطلعى من الموقف ده انك تنبهى على اى حد ميجبش انتيمو معاه او تردى بغلاسه وبس
ههههههههههه
كل سنه وانتى طيبه يا قمر
HappY Feast> arranged marriages .. is ..coming Back ...but can not we Organize it , 2 B much Controled.. outside homes in The 1st times.. so .. The girl will NoT B hurt ..if they do not get a long together..
I think our Social . Context must B alternated in Many sides..
any way . I wish U ,and al Men and girls... 2 have the right choice.. and the Happy End...if Possible
magn0lia,
أكيييييد
:)
شكرا على رأيك و تعليقك
ولــو
لو رحت خطوبتي أنا يبقى كتر خيري؟؟
:)))
لسة بتكلم بابا قريب؟؟طيب خير خير
:)
يارب نسمع عنك أخبار كويسة قريب قريب يا ولو
و نعم الاتفاق بينك و بين والدك.. أكيد أول مرة المفروض الواحد يروح لوحده طبعا
مستنيين نسمع عن ولو أخبار حلوة :)
Appy,
و انت طيبة يا قمرين
:))
هو المفروض الناس بتكون عارفة من غير تنبيه يا بيبو.صح؟؟! بس على رأيك.مفيش حاجة أصلا اسمها مفروض خلاص
نورتي يا جميلة
Dreamer,
I wish so.
I myself prefer the first time we meet to b outside, and my family did this many times in the past with my sister as well.. but u r right,many things need more modification these days.
Hope u had a nice feast too:)
&by the way... :)Ur comment was the first on the day of my birth.
Thank you for visiting the blog again.:) Best wishes for you, sir.
موقف بايخ أوي
الحقيقة طريقة جواز الصالونات دي بتحصل فيها شوية مواقف ينفع تتعمل بعد كده كتاب يبقى اسمه " كيف تتجنب الإحراج في طريقك للزواج" ههههههههههههه
انا رأيي تغيظ كيمو و تتجوز انتيمو و خلاص
و لا اقولك تتصل بأنتيمو و تقوله هو انت كنت جايب صاحبك ليه ؟؟؟ ههههههه
دي تبقى رخمة اوي :D
لكن ساعات بتكون الطريقة دي أحسن لناس كتير لكن المهم الطرف الثالث اللى بيحاول يعرف الناس على بعض لازم يكون مركز و عارف كل طرف عايز ايه بالظب لأنه ممكن يبوظ الدنيا
كل سنة و انتى طيبة يا اجمل فراشة
موقف عجيب و الأعجب انه لسا بيتكرر لحد دلوقتي. مش عارفة طول الوقت عندي قناعة ان زواج الصالونات دا بيفشل الا حالات نادرة جدا
بس لازم حد يقول لكيمو يهرب من أنتيمه أحسن كدا عمره ما هيتجوز D:
dear.. It is My pleasure..2 B The ast who sayes Happy birthday as well.
I wish U long , Healthy and happy life.. In shaa2 Allah...
الحلم العربي
و انت طيبة يا أجمل حلم
:)
يــارب تكوني عرفتي تقضي عيدسعيدهناك
بحب أوي أسامي الكتب اللي بتخترعيها دي :).بجدمخكجميل أوي ماشاء الله
عارفة؟؟لما قرأت تعليقك افتكرت جوز أختي مرة كان بيحكيلنا عن برده مواقف كدةوقال إنه مرة راح لبنت لقاها قابلته بالبيجاماهي و باباها عادي جدا!! دي تنفع في الكتاب بتاعك.صح؟
:)
تخيلي فعلا اللي انت بتقوليه دة يحصل :).بجد تبقى مسخرة
شكرا أوي على تعليقك اللي رسم ابتسامة جميلة أوي على وشي
ربنا يطمنني عليكي
Om Hagar,
يمكن حد يقولله في يوم من الأيام
ويمكن هو يفهمها لوحده بأة بعد كام مرة:). مش محتاجة فكاكة بجد
شكرا يا أم جوجو :)
a dreamer with feet on the floor,
Thank you
:)
Post a Comment