عارفين النكتة بتاعة الغلس اللي وقع في حفرة، حاول يطلع أكتر من مرة مش عرف... فقال "خلاص. المرة الجاية لو مطلعتش..أنا همشي" :) الحقيقة إنها نكتة سخيييييفة، بس فجأة لقيتني قررت أحققها في الواقع
قررت إن اللي أنا فيه دة لازم ينتهي، و أنا مش عارفة أنهيه، ومش عارفة أقرر إيه الغلط بالضبط، فهدي لنفسي مهلة 3 أسابيع بالكتير غالبا... بدأتها من امبارح كأني لسة واحدة جديدة و ذاكرتها ورقة بيضا مش فيها أييي حاجة...عشان أعرف أحدد النقطة الغلط اللي غيرت شخصيتي و خلتني "غتيتة جدا" دي فين!!و الحقيقة إني قررت إني لو مش وصلت، يبقى هسيب شغلي اللي أنا فيه حاليا و هسيب حاجات تانية... عشان أشوف إيه اللي كان السبب في حالتي السيئة دي.. اللي ملازماني و في تزايد مستمر... و خلت حتى بنت أختي اللي عندها 3 سنين تلاحظ وتعمل حاجات فظيييييعة عشان تسعدني "هحكيهالكم بعدين يمكن"، حاجات عمري مااتخيلت إن فيه طفلة صغيرة كدة ممكن تفكر فيها
قرار البدء من جديد دة كان لأسباب كتير أوي... أولا إني وصلت لمرحلة وحشة جدا عمري ماوصلتلها، و دة مش أنا، ودة كمان أنا مش هسمح بيه لأكتر من كدة
زائد إن حالتي النفسية السيئة دي بقت باينة عليّ أويييي لدرجة إني مش بقابل حد غير لما يسألني "مالك؟!!" من قبل ماأتكلم، ودي حاجة تخنق بصراحة لأني معرفش مالي أصلا
:)
سبب تاني....هو ميمو بنت أختي وأحلى حاجة في حياتي
بجد هي سبب رئيسي جدا... إن الأطفال بيحسوا بكل حاجة أكتر من الكبار دي عارفاها، لكن إنهم يعملوا حاجة جامدة عشان يغيروا المود دة!! دي حاجة أكيد مش كنت متخيلاها للدرجة دي
بس المهم إن بداية ملاحظة ميمو لي كانت بأننا كنا في العربية وهي مش سلمت علي و لا ضحكتلي ولا أي حاجة رغم محاولاتي!! ودي مش حاجة بتحصل معايا أبدا لأنها بتحبني أوي و بتبدأ في الضحك الهيستيري من أول ماتعرف إنها هتشوفني :)... المهم إننا فضلنا شوية في العربية وهي مش بتعمل حاجة غير إنها قاعدة بتص عليّ أوي ومش بتقول حاجة
عينيها بتتكلم، لكن هي مش قالت حاجة أبدا... بعدها بفترة كبيرة، لقيتها بتسألني "انت صوتك خفيف كدة ليه؟!"، السؤال بصراحة صدمني أوي لأني فهمت قصدها إن صوتي حزين!! ودي حاجة زعلتني أوي لأنها آخر واحدة ممكن أفكر تتأثر بي وأنا زعلانة
:(
المهم اللي عملته بعدكدة كان فيلم تاني بس مش وقته
من أسباب قراري كمان...إن إمبارح مشيت في المطر الجااااامد :)))) و طبعا كلنا عارفين المطر وسحره
فافتكرت حاجات كتير سعيدة و مواقف مع المطر... و كمان خرجت مع أخويافي المطر وعملنا مغامرات ضحكتنا أوي
فأنا الحمدلله النهاردة مرتاحة شوية...مش لأي حاجة غير يمكن تأثير المطر لسة... و قراري إني أبدأ من جديد مؤقتا دة برده أكيد حاجة مفرحاني، بغض النظر عن نتائج القرار دة اللي لسة مش عارفاها ولا عاوزة أفكر فيها لأنها مجنونة أساسا
:)
لاتنسوا الدعاء للفلسطينيين
20 comments:
السلام عليكم
طبعا بعد السلامات والاخبار والذي منه
هاقولك ان بجد انا فرحان جدا اني قريت ليكي بوست النهاردة وكمان لأنه جاي ف وقته علشان كنت بافكر ف حاجة برذه تتعلق بموقف عندي وكنت متردد بس بعد ماقريت البوست الفكرة وضحت قصادي وياريتني قريته قبل ما ارد على تليفون جالي من شويه كنت اتصرفت تصرف مخالف تماما
الحمد لله على كل حال
نرجع بقى لموضوع البوست
انا بصراحة مش عارف النكتة بس هي فعلا سخيفة وان كانت بتحمل معنى يخللي الواحد يفكر شوية
موضوع الmakeover اللي هاتعمليه ف حياتك ده انا باحييكي على مجرد التفكير فيه مش كل حد فينا بيكون عنده الشجاعة انه يبدأ يتخذ خطوات فعليه علشان يغير حاجه مش عجباه ف نفسه
بجد قليلين بس اللي بيبقى عندهم الشجاعة دي
ثانيا احساسك بالاخرين برضه جدير بالاحترام وده حاجه عرفناها عنك من بداية معرفتنا بشخصيتك الجميله فبرضه مش كتير اللي يحاول يغير من حاجه فيه علشان حاسس ان وقعها على اللي حواليه ممكن يكون بيضايقهم وخللي بالك من ممكن دي علشان الاحساس ده غالبا بيكون غلط وبيكون العكس هو الصحيح زي مانت شفتي فبيكون السبب الاساسي من السؤال والاحساس بالحزن هو معرفة اذا كان فيه اي حاجه ممكن نقدر نعملها علشان خاطر حد عزيز علينا شايفينه بيمر بفترة مش كان يحب يكون فيها
وبنت اختك ربنا يخليهالكوا اكبر مثال على كده من غير ما اعرف تفاصيل اللي عملته لكن اللي متأكد منه ان غرضها الوحيد كان انها تحاول تخرجك من حاله شايفاكي عليها وحاسه انك مش مبسوطة فيها
ثالثا احساس المشي تحت المطر ده بجد من احلى الاحاسيس اللي ممكن تعدي على الواحد وفعلا تأثيرها بيبقى احيانا يفوق كل توقعاتنا لكن صدقيني بلاش يكون مطر جامد علشان تبعاته مش بتكون كويسه خالص وممكن الاحساس اللي سابته ف نفسك مش تلحقي تستمتعي بيه بسبب نزلة شعبية لا قدر الله
واسأليني انا مجرب كتييييييييييييير
ف النهايه اتمنى ان حاله الراحه اللي معاكي النهاردة تستمر على طول وترجعي الشخصيه اللي انتي عايزه تكونيها علشان مش تضطري تسيبي الشغل اللي انتي فيه
قعدة البيت وحشه للي زينا يا اوختي
ربنا ما يكتبها على حد ابدا
ههههههههههههههههه
خالص تحياتي
و عليكم السلام ورحمة الله وبركاته
أنا فرحانة أكتر بجد
لأني كنت مفتقدة أوي "ولو" و تعليقاته، فرحانة أكتر لأني كتبت حاجة مش حاسة إن ليها أي لزمة بس بتقول إن ممكن أكون ساعدتك في قرار عندك..فبجد الحمدلله لأنك من امبارح و انت مخك مشغول بالموقف اللي عندك و القرارات وكدة "زي ماقلت في البلوج عندك" :) مش تخاف أنا معرفكش والله و لاعمري شفتك
الحمدلله بجد، و يارب أكون عرفت أساعد بأي طريقة
شكرا أوي على ذوقك، و شكرا على وجودك في وقت محتاجة فيه أعرف رأي اللي حواليا أوي، و أكيد حضرتك من المهمين عندي إني أعرف رأيهم "نسبيا" رغم إني معرفكش
:)
و الحقيقة أنا مش شايفاها "شجاعة" أوي، أنا خايفة تكون نوع من الهروب...بس زي ماتقول..خلاص مش أدامي غير الحل دة ..إني أبدأ من جديد كل حاجةوربنا يسهل
وبالنسبة للشغل
:)))
قعدة البيت مش حلوة للي زينا ياأوختي؟؟!!! مااااشي
:)
عندك حق بجد، بس لو سبت الشغل يبقى هدور على واحد تاني لكن الموضوع هيكون إني أجرد حياتي من كل حاجة وابدأ من الأول تاني، لكن مش أقدر فعلا على قعدة البيت
:)
لمعلوماتك بس...امبارح خرجت من الصبح لحد 4تقريبا، وبعدين من 7.30 لحد9.30 مع أخويا وحصل مغامرات في مستنقعات المطر :) بس المطر كان ساعتها بأة خفيف شوية :) والحمدلله أنا مش كتبت الكلام دة غير لمااتأكدت إني مش جالي برد
ربنا ستر المرة دي الحمدلله
مش عارفة أشكرك إزاي!!
إدعيلي
إنسان مقيد
مش فاهمة سبب إصرارك إني أمسح التعليق زي ماأنا مش فاهمة ليه ممكن تكتب في بلوجز تانية من غير اسمك...بس عموما مازالت حرية شخصية وهحترمها أكيد ومش هفتح الموضوع دة تاني
بس كنت أتمنى يفضل تعليقك
:)
عموما...أنا فهمت والله اللي قلته، بس الحقيقة إني مش لاقية نفسي في الوقت الحالي، يعني لما أكون "هبة الجديدة" أعتقد بكدة هكون رجعت لنفسي تاني إن شاء الله
ماتخافش :) ومش تقلق كمان، الحمدلله أنا عارفة اللي أصحابي وأهلي بيحبوه فيّ فإن شاء الله هحاول مش هغيره
الله المستعان
إدعيلي أصلا إني أعرف أكون كويسة تاني، مش بقول إني كنت كويسة طبعا!! بس أقصد أرجع أحسن بس تاني
إدعييييلي بجد
:)
وبجد فهمت رسالتك وفهمت تقصد مش أعمل ومش أعمل إيه، وشكرا على النصيحة
و شكرا كتير على تعليقك ياصديقي وأخويا الجميل وصديق صديقي كمان
ياعم أنا محظوظة أوي :)
إن بيكتبلي ناس زيكم
ربنا يوفقكم للخير دايما
سلام عليكم
السلام عليكم ورحمة الله وبركاتة
أزيك عاملة أية وحشانى أوى والله .. وحشنى زيارة البلوج بتاعك وبتاع كل الاصدقاء
على فكرة أنا عايزة أقولك أن بنت دمك زى العسل بجد وبحس أنك روحك حلوة مش غتتة خالص زى ما انتى بتقولى على نفسك
وعلى فكرة أنا حاسة أنك حتة وأنتى حزينة .ز كفاية الروح الحلوة
وعلى فكرة هى فترة كدة يا هبة بتصيب الواحد من الحياة الروتينية .ز بس مع التغيير والتجديد كل حاجة بتتغير ودة اللى حصل معايا بالضبط .. مع التجديد والتغيير كل حاجة أتغيرت
عايزك بس تحطى فى بالك أنك لزيزة ومش غتتة خالص وكل حاجة هتتحل بعد كدة
بصي يا ستي
مفيش مشاكل أنك تقعدي مع نفسك
تقيمي حياتك أو شخصيتك
ده المفروض يحصل معانا كلنا
المفروض كل فتره نراجع نفسنا ونراجع مواقفنا ونراجع شخصيتنا
ونحاول نصلح الحاجات اللي شايفينها غلط
بس أهم شئ أن الجوهر بتاعنا يفضل زي ما هوا
لان من غيره هانكون اي حد تاني مش هانكون ابدا أنفسنا
علي فكره الحزن نفسه بالنسبه ليه حاجه هيا اللي بتدي طعم للحياه
من غير الحزن والالم مش هانعرف معني الفرحه والسعاده
نزار بيقول في قصيده الحزن
لم أعرف أبدا
أن الدمع هو الانسان
أن الانسان بلا حزن
ذكري انسان
تحياتي
جميل ان الانسان يراجع نفسه
ويشوف ايجابياته وسلبياته
ويحاول يصلح اخطاءه
ربنا معاكي ويوفقك
Bannouta,
تعليقك بسيط ودمه خفيف يابنوتة
:)
وحشتيني انت كمان بجد
مبروك الأجازة مبروك رجوعك لنفسك. حاسة إنك كويسة دلوقتي الحمدلله
عاوزين منى ترجع تاني للبلوج بتاعها بأة وتكتب كتيييير، ومش ضروري نستنى لما الدراسة تبدأ عشان الإلهام اللي بيجيلك في المحاضرات يظهر
:)
يابنتي دةأنا شربات زي العسل ..أدوّخ من الآخر
:p
شكرا على كلامك اللذيذ دة، و حاضر أنا ناوية أبدأ تاني من جديد والله
الله المستعان
فرحني ظهورك على الشاشة بعدطوووووول غياب و أتمنى يتكرر تاني
باي باي
تعالوا زورونا
:)
تسلميلي يابنوتة
الشارد
كلامك مضبوط. المهم الجوهر يفضل زي ماهو
ربنا يثبتنا دايما على الحق والصح في الدنيا دي إن شاء الله
و بحب كلام نزار قباني دة :) مش أعرفه بصراحة غير من أغنية كاظم
تحياتي
a long distance
آمين يارب. ربنا معانا ويوفقنا كلنا إن شاء الله
نورت البلوج
:)
بجد بجد انا فرحت اوى اول ما قرأت الكلام الحلو ده منك ...كويس ان الاحساس ده ( احساسك انك لازم تتغيرى وتبقى هبة ..هبة هبة يعنى ..مش شبيهة ليها ) نابع من جواكى ..
ربنا يقدرك يارب وتبقى هبة اللى كلنا عرفناها فعلا ..انتى طبعا هبة ..ما قولناش حاجة ..بس انتى فاهمة قصدى اكيد
:))))
مش كدة برده ولا انا بتكلم من تأثير الامتحانات ؟:D:D
عموما يا جميل يا رب تقدرى تعملى وتوصلى للى انتى عايزاه ..وبجد وقت ما هاتحتاجى حد معاكى اكيد هاتلاقى 1000000000 حد ..كونى واثقة من كدة يا هوبة
وحشتينى اوى اوى بجد ...انا لسة ما قرأتش ردك على كومنتاتى ..لانى بجد بفتح خطف كدة ..بس اول ما اخلص السفرية دى على خير ان شاء الله مش هايكون ورايا حاجة غير العالم الحلو بتاعنا ده ...ان شاء الله
وربنا يوفقك يا جميل
تحياتى
:)
كان نفسي الاقي بوست جديد اقراه قبل ما اسافر بس يكون بوست والسلام
بوست تقوليلناه فيه انك بقيتي حاسة ان الحالة اللي انتي كنتي عليها قربت تنتهي لو مش كانت انتهت وده اللي بأتمناه يكون حصل فعلا
بس مش مشكلة المهم ان ده يكون بيحصل فعلا
عايز ان شاء الله لما ارجع يكون البلوج مليان بوستات مبهجه ولا اقولك يكون بوست واحد او اتنين علشان مش يفوتني كتير مع الاحتفاظ بحالة البهجه اللي هاتكوني عليها ان شاء الله
يالا شدي حيلك واملي البلوج ولا يهمك برضه هاقراهم
وف انتظار البلوج التاني اللي متأكد ان شاء الله انه هايكون على نفس المستوى بتاع البلوج ده ان لم يكن يفوقه
انا مش بأكتب تعليق لكنه اقرب للميل بس بما اني مش اعرف الميل بتاعك فاهاضطر اني ابعته على البلوج
مش محتاج رد على الكومنت ده علشان زي ماقلت ده اقرب للميل منه للكومنت
اتمنالك كل الخير وان شاء الله ف احسن حال وف اانتظار ابداعات الفراشة
تحياتي وكمان اكيد تحيات المقيد
كان نفسي الاقي بوست جديد اقراه قبل ما اسافر بس يكون مش بوست والسلام
بوست تقوليلناه فيه انك بقيتي حاسة ان الحالة اللي انتي كنتي عليها قربت تنتهي لو مش كانت انتهت وده اللي بأتمناه يكون حصل فعلا
بس مش مشكلة المهم ان ده يكون بيحصل فعلا
عايز ان شاء الله لما ارجع يكون البلوج مليان بوستات مبهجه ولا اقولك يكون بوست واحد او اتنين علشان مش يفوتني كتير مع الاحتفاظ بحالة البهجه اللي هاتكوني عليها ان شاء الله
يالا شدي حيلك واملي البلوج ولا يهمك برضه هاقراهم
وف انتظار البلوج التاني اللي متأكد ان شاء الله انه هايكون على نفس المستوى بتاع البلوج ده ان لم يكن يفوقه
انا مش بأكتب تعليق لكنه اقرب للميل بس بما اني مش اعرف الميل بتاعك فاهاضطر اني ابعته على البلوج
مش محتاج رد على الكومنت ده علشان زي ماقلت ده اقرب للميل منه للكومنت
اتمنالك كل الخير وان شاء الله ف احسن حال وف اانتظار ابداعات الفراشة
تحياتي وكمان اكيد تحيات المقيد
السلام عليكم
معرفش النكتة
بس اتمني انك تنجحي في اللي عايزه تعمليه
بس متسيبيش كل حاجه مره واحده
اصطبري وواحده واحده
تحياتي
Oceaneyes,
تعليقك بيسعدني أوي
بجد بحس إن البلوج دة حاجة حلوة أوي عشان فيه ناس بتهتم كدة...كلنا محتاجين حد يسمعنا، و إني ألاقي دة ولو حتى في عالم غير حياتي الحقيقية...بجد حاجة حبيتها أوي وفرقت معايا أوي
بحبك ياأختي الجميلة :) وفهمت اللي تقصديه في كومنتك أكيد
آسفة على التأخير في الرد كدة
جزاك الله عني خيرا
ولو
قلتلي مش أرد، بس برده أنا هرد لأن الرد دة مش واجب عليّ بس أنا بحب أرد على الناس اللي بتكلمني أكيد
و حتى لو كان إيميل بيكون برده فيه رد بإيميل زيه لوفيه حاجة محتاجة رد. صح؟؟
شفت الجملة اللي فاتت دي كلها نفس الكلمة إزاي؟ :)
ربنا يوفقك في شغلك.ووقت ماكتبت تعليقك دة كان موجة صقيع شديييدة في القاهرة فمكنتش قادرة أتخيل ممكن تبقى عاملة إزاي في محافظات الساحل الشمالي خالص!!إحنا كنا في فريزر يبقى ولو كان في إيه؟!!!:) . بس حاليا وأنا بكتب التعليق عارفة إن الجو اتحسن فأتمنى تكون مستمتع بالموضوع لأنك مش لحقت تقعدفي القاهرة خالص
بس إيه موضوع إبداعات الفراشة دي؟!!! أولا أنا مش فراشة!أنا كنت أتمنى أكون فراشة بس، كمان مفيش إبداعات خاااالص!!بكتب اللي جوايا ملخبط كويس ملوش معنى عربي انجليزي نص نص ...كله على بعضه :)فمش ينفع تكون إبداعات خالص. ممكن نقول إحسن إنه مجرد تدوين بالمعنى اللي أنا فهمته وبس
شكراأوي على اهتمامك
ربنا يصلح لنا الحال جميعا
سلام عليكم
Mohannad,
مش نافع خلاص واحدة واحدة. حاسة إني زهقت من كتر التفكير وعدم الوصول لحاجة فقررت كدة!! مش لأنه الحل بصراحة شديدة...بس لأني مش عارفة أفكر في حل تاني
الله المستعان. هي فعلا الدنيا محتاجة صبر كتيييير، وأنا محتاجة أعرف أمشيها صح بس أنافي الضياع الحمدلله
شكرا لنصيحتك
السلالالالالالالالالالالالالام عليكم
انا مدونةجديدة بس بجد عجبنى البوست جدا لانة انا كمان كان نفسى اعمل زيك بس ملقتش اللى يشجعنى لانى بحس انى بعض تصرفات بتصدر منى غصب عنى وبتتفهم غلط المهم ان يكون عندك القدرة على فهم الاخرين علشان تعرفى تفهميهم صح وبجد انتى انسانة بجد مشفتش حد فى الزمن دة بيعمل كدة معظمهم دماغهم فاضية ومش بيهمهم حد ولا مشاعر الاخرين
والله برافو عليكى
وربنا يوفقك وادعيلى انى اخد الخطوة دى قريب
سلالالالالالالالالالالالالالالالام يا جميل
مساء الخييييييييير
انا مدونة جديدة
وعجبنى مدونتك اوى لانها قريبة منى جداانا برضة كنت عملت واقفة مع نفسى وكنت عاوزة اغير حاجات كتير لان اللى بجانبى شايفين انها مش صح بس انا كنت شايفة انها صح (عند طبعا) بس فى الاول كانت صعبة علشان ملقتش حد جامبى بس
بجد لو عندك صديقة مخلصة او بتحبك بجد حتنصحك وتقف جمبك للاخر بس انا الحمد للة دلوقتى احسن بكتييييييييييير ويمكن كمان علشان كنت بعيدة عن ربنا بس الحمد للة ربنا هدانى و(اعطى لكى هدية) ويا رب تقبليها عليكى
بالمصحف وقراءة القران والصلاة حتلاقى ربنا معاكى وتبقى احسن ان شاء الله
والمهم ان تكونى مقتنعةوعاوزة تتغيرى بجد والمهم تكونى فاهمة اللى حواليكى علشان تعرفى تتفهمى معاهم
وعلى فكرة يمكن انا اول مرة ادخل مدونتك بس بجد كنت مرتاحة وانا بقرائها
سلالالالالالالالالالالالالالالالالالام مؤقت
مريوووووم العقل كله
وعليكم السلااااام ورحمة الله
أولا اسمك بحبه أوي لأنه اسم بنت أختي النونو اللي بحكي عليها:)
ثانيا آسفة جدا إني اتأخرت أوي كدة في الرد. أتمنى تسامحيني
ثالثا...كلامك صح أوي، لازم نكون فاهمين اللي حوالينا كويس.وجميلة أوي الهدية اللي انت قلتي عليها..صح هو القرب من ربنا هو أحسن حاجة في الدنيا كلها وهو حل لكل مشاكلنا
ربنا يوفقك في حياتك كلها يامريووووم، و أسعدني إنك حبيتي البلوج شوية
:)
Post a Comment