هو لازم نلبس أقنعة عشان نكلم الناس؟
طب ليه مش ممكن نتكلم بطبيعتنا من غير تمثيل؟
ليه لوكنت تلقائي و بتعبر ببساطة عن اللي في قلبك...معظم الناس تفهمك غلط؟؟
ليه لما تشكر حد على خدمة قدمهالك..الناس بتتفاجئ من الشكر دة؟!! مش أكيد اللي بيساعدني يستحق و لو كلمة شكر بريئة؟
و ليه لو اعتذرت عن وقت حسيت إنك ممكن تكون جرحت حد فيه..الناس بتعتبرك ضعيف جدا، و يحاولوا يلغوا كلمة "آسف" من قاموس الحياة؟
مع إني دي مش مجرد كلمات بسيطة... لكن هي معنى و موقف و مشاعر كتييير، و ذكرى ممكن نحفظها جوة قلوبنا طول العمر
ليه كتير لما بنعبر عن مشاعرنا البريئة و عن أفكارنا بيكون رد الفعل صد؟؟
ليه معظم الوقت تتفهم غلط؟ و اللي قدامك يفهم تقديرك الشديد ليه بطريقة غلط و يبدأ يترجمه مع نفسه لحاجات تانية
و يكون رد الفعل بعدها محاولة للبعد عنك لأنك صادق في مشاعرك؟! "رغم إنك فعلا مش تقصد أي حاجة بكلامك"!
ليه بعد ماترتبط بشخص "في الحقيقة أو حتى في العالم الخيالي" و تتأثر بكلامه... تفرح لفرحه و تزعل لحزنه..... تلاقي إن دي أصبحت جريمة انت عملتها، و تكون عقوبتها رد صادم و صد لمشاعرك...مشاعرك اللي مش بالضرورة لازم معناها غلط أبدا أبدا!!! رد ممكن يكون سبب في جرح ناس تانية، و سبب في وجود دموع حارة جدا خلال لحظات رغم البرد القارس
ليه الناس مصممة تجرح؟؟؟
و ليه فيه ناس كتيــر بتقابل الحب و التقدير... بجرح كبيـــــــــر؟؟
دي أسئلة كانت جوايا... لو حد عنده رد عليها ياريت يقوللي
ملحوظة: "راما" حبيبتي من العالم الخيالي لامتني أوي لما قلت "سامحوني"، بس سامحيني ياراما أنا هكررها تاني و أقول للجميع... على الأقل في عالم البلوجرز اللي يعرفوني في الحقيقة و اللي لأ... أرجوكم سامحوني لو كنت غلطت في حق أي حد فيكم، سامحوني لو عبّرت بحرية و دة ضايق أي حد فيكم... و سامحوني تاني على الغلاسة دي. بس حسيت إني عاوزة أكتب أوي ، ومش قادرة أمنع نفسي المرة دي... و عاوزة أكتب الكلام دة... من إمبارح
المرة الجاية هكون واحدة تانية إن شاء الله :) "دة في حالة إن فيه حد لسة هيدخل تاني البلوج دة". ادعووووولي
22 comments:
بداية دايرة مغلقة
تبدأ بسلسة من ليه
و لا تنتهي
ليه مش بتلاقي حد يفهمك؟
ليه مش بتلاقي حد يقبلك زي م انت؟
ليه مينفعش نرجع و لو ساعة نعيش في زمن براءة الاطفال؟
ليه بيطلب مننا ندي كل حاجةو مش بنلاقي و لا حاجة.. و لا حتي نظرة شكر؟
ليه يبقي جزاء الاخلاص...الاهمال؟
ليه؟؟؟؟
ليه؟؟؟؟
ليه؟؟؟؟
و تبقي الاسئلة
علنا نجد الاجابة
تحيااااااتي
السلام عليكم
انا قاتيل يا ستي المدونة هنا وممش هبطل ادخلها
كل سنه وانتي طيبه
وهقولك كلمة واحده بس
لا هما كلمتين
كوني نفسك
اللي مش عاجبة
ولا بلاش
تحياتي
الرسول -ص-قالنا خاطبوا الناس علي قدر عقولهم
لو عرفتي اللي قدامك عايزك تقوليلوا ايه بالتاكيد الوضع هايتغير
احساسك واصلني جدا علشان بعيش حاجه زي كده اليومين دول
وبعدين ليه تتغيري ليه تكوني حد مش أنتي
ليه تلبسي قناع
الحياه أبسط من كده وماتستاهلش كم المراره اللي أنا حاسسها في كلامك
وبعدين رأي غيري خطأ يحتمل الصواب ورأيي الصواب يحتمل الخطأ زي ما قال الامام الشافعي
ياريت فعلا تخليكي زي ما أنتي
لأنك لو بقيتي حد تاني هاتضيعي نفسك وعمرك ما هاتلاقيها تاني
أنا ممتنع عن التعليق علي الجزء التاني
:)
تحياتي
عااااااااااااااا
صورة عليها أسفة بالبنط العريض
عااااااااااااااااا
ميت كلمة بتقول سامحوني
عاااااااااااااااا
وااااااااااااء
حرااااااااااااااام
ليه كده بس يا فراشة .. عمرك شوفتي فراشة بتقول سامحوني ، عمرك شوفتي فراشة بتقول اسفة.. لا طبعا علشان الفراشة اللي بالرقة والذوق والأدب والأخلاق دي عمرها ما تعمل حاجة تزعل
بس على كل أنا حسامحك المره دي لكن المرة الجاية لا يمكن تنزل كلمتي الأرض أبدا .. لو لمحت كلمة أسف او شميت ريحة إعتذار هجيب عصاية وحضربك على جنحاتك الاتنين ... فهماني؟
:@
___________________
وصحيح بالنسبة للبوست .. أنا معرفتش أرد على ولا سؤال بس عقلي قالي إن يمكن البشر ما بقوش بشر بقوا حاجة تانية خالص ومختلفة تماما
تحياتي
الاجابة بسيطة جدا على كل ليه قولتيها وهى ان الناس بقوا كده طبيعى يعنى بس مش معنى انهم بقوا كده اننا نكون زيهم
على فكرة موضوع الاصدقاء الوهميين دول عملى مشكلة وحاسس ان ناس كتير بقوا عندهم اصدقاء وهمين فى خطوة خطيرة للانفصال عن الواقع
اقرى البوست الاخير بتاعى فى هدوء مؤقت وانتى تفهمى قصدى
مرور اول واكيد راجع تانى للمدونة
عزيزتي الفراشه
واحشني كلامك اوي انا كنت هنا امبارح بس ممنتش حابب اني اسيب كومنت مش عشان حاجه غير بس اني بحب الكلام يكون خارج من قلبي مش من لساني-مش دايما طبعا بس ساعات- المهم انا كنت هفكرك بكلامك ليا ان اد ايه من الجميل اننا نفضل على طبيعتنا بس مش هعمل كده هقولك كلامي انا
احنا من الجميل اننا نفضل على طبيعتنا
لا لا مش تفتكري ان ده كلامك وانا بعيده ده كلامي انا
مش هقولك مش لازم نلبس قناع ومش هقولك مش لازم نمثل بس هقولك اعملي اللي يخليكي مبسوطة احنا في الدنيا دي اوقات كتير بنتعذب فكمان مش ناقصه اننا نزيف في تصرفتنا عشان ناس هما اللي عندهم مشكله مش احنا صدقني مهما اللي حوالينا فهمونا غلط فده مش غلط في مشاعرنا قد ما هو غلط في فهمهم هما لينا ولمشاعرنا
اه في ناس ممكن يكون رايها انه خطئي في طريقه التعبير هو اللي ممكن يؤدي الى خطأ فهم الاخر لي بس صدقني حتى ده انا مش مقتنع بيه لان لو اللي قدامي فاهمني كويس يبقى اكيد عمره ما هيترجم مشاعري غلط
انا كتبت كتير اوي بس لسه عايز اكتب تاني بس مش دلوقت لما ارجع المره الجايه هكتبتلك تاني
على الهامش الكلام والله مش كنت بكتب الكلام للنشر ولكن ليكي انتي ويهمني انه يوصلك انتي
تحياتي
ANGELIC DEVIL,
:)
دايما فاهماني يابنوتة
بس أنا أسئلتي مش منتظرة نظرة شكر أو عرفان... و لا منتظرة اعتذار من حد لأن دي حاجات لازم نكون عودنا نفسنا عليها من زمان إنها انقرضت خلاص
:)
بس سؤالي.. ليه لما تتصرفي كدة... بالحاجات الطبيعية دي معظم الوقت تتفهمي غلط؟؟! بجد غريبة
يللا...علنا نجد الإجابة فعلا
شكرا على وجودك المستمر يا angel
:)))
Mohannad,
و عليكم السلام ورحمة الله و بركاته
هقوللك حاجة... و يارب مش أتفهم غلط :(
بس بجد... تعليقك بيسعدني أوي أوي أوي
شكرا على التشجيع دة :) بس انت كمان مش تبطل كتابة، مدونتك ثمينة أوي، و بجد الناس محتاجة تسمع كلامك
طب حاضر هكون نفسي . بس وبعدين؟!!!!معظم الناس اللي بتتغير بتتغير للأسوأ مش الأحسن، و دة معناه إنك طول الوقت هتتجرح تاني و تاني
alshared,
ياأخي كلامك حكم
:)
بجد والله
و معلش على كم المرارة دة. عارفة إن الدنيا و لا تستاهل خالص... بس كنت وقت كتابة الكلام لسة اليوم اللي قبله مشحونة أوي فمعلش
و إن شاء الله هتكون آخر مرة أكتب كدة "ولو لفترة يعني متتعودوش :)" بس والله هحاول مش أضايق الناس تاني معايا
بجد كلامك جميل أوي، و امتناعك عن التعليق خلاني أبتسم بجد مع إني كنت لحظة قراءة التعليق دة مش في مود كويس خااااالص
:)
جزاكم الله خيرا ياأخويا اللي أصغر مني... بس بجد بستمتع و بستفيد جدا جدا من كلامه
تحياتي
عزيزتي راما
وحشتيني أد إيييييه؟؟!!! بجد مش هعرف أقوللك، بس وحشتيني أوي أوي أوي فعلا
مش عارفة أرد على كلامك كالعادة!! لأنه بيسعدني أوي بس انت بتتكلمي عن حد تاني مش أنا
:)
رقة و ذوق و أدب وأخلاق!! إيه يابنتي دة؟! والله فاهماني غلط
بس عموما شكرا على ذوقك و رقتك انت
على فكرة هو بيقول كلمتي "لاممكن "تنزل الأرض أبدا،مش "لايمكن" غالبا، أصل علطول ماما بتقولهالي
:)))
ياست راما.... اسمعي بأة وركزي جامد
أنا واحدة غير "أنا" اللي أعرفها تماما، و الجميع أجمعوا على كدة حتى أنتيمتي و بتقوللي إني مش هبة اللي هي تعرفها"للأسف يعني" :( الحمدلله
بس أنا نفسي أشوف حضرتك أوي
:$
ودة كمان عشان ءأكدلك إني مش بالرقة الفظييييعة اللي بتقولي عليها دي
:p
لو مش عندك مانع طبعا طبعا يعني، ولو عندك والله مش هزعل خالص تماما وعادي جدا والله
عاوزة أشوفك بس من قبلها تعرفي إن اللي هتقابليها دي ممكن تكون واحدة في أسوأ حالاتها وهي مش كدة خالص خاااالص بجد
مش عارفة دة قرار صح ولا لأ بس أنا بحبك أوي... وانت أكيد عارفة كدة كويس
:)
منتظرة ردك وبعدها هبعتلك الميل بتاعي ونتصرف "لو وافقتي"، بس بجد لو مش تحبي أنا مش هزعل خالص و مش هبطل أدخل البلوج الجميل بتاعك و لا أحبك
مستنية ردك... و من غير مجاملة لأنه عادي أوي
تحياتي يامروة :)
سلام عليكم
تامر سليط
مرور أول نورني أوي يافندم
أكيد مش عايزة أبقى زي الناس اللي مش مهتمة بحاجة اسمها مشاعر حقيقية... بس كدة بجد الحياة هتبقى صعبة أوي!!
قرأت التعليق بتاع حضرتك في وقت شغلي فقررت أبص بصة سريعة على البوست اللي قلت عليه أشوف موضوعه إزاي بتتناوله وبعدين أرجع أركز فيه مرة تانية بمزاج :) بس الحقيقة إن البوست شدني جدا ولقيتني بكمل قراءة لحد الآخر
:)
أسلوب كتابة رائع بجد ماشاء الله، القصة شدتني أوي أوي. بس برده هروح تاني أركز فيه أكتر
نورت البلوج
ياه ياهبه
انا فرحانه أوي أنك رجعتي البلوج تاني وكتبتي بوست جديد
فرحانه جدا جدا جدا بيكي وبرجوعك
بوست جميل اوي بيعبر عن قلب بريء ونقي
شايلاه بين ضلوعك
إنسان مقيد
وصلني اللي تقصده كله
انت بتقول "لو اللي قدامي فاهمني كويس...". المشكلة إن ساعات كتير بتفتكر إن اللي قدامك دة فاهمك جداجدا ومش ممكن يوصل فهمه ليك لأكتر من كدة، بس بتكتشف إنه بطاطس!! و مش عارف عنك أي حاجة تماما!! بس دة غالبا بيكون بعد فوات الأوان
المهم بأة.....هو حضرتك قفلت البلوج بتاعك لييييه؟؟؟
عارفة إنها حرية شخصية و هبطل تدخل و غتاتة، بس ليه بجد؟!:) دة مجرد تساؤل و علامات دهشة و استغراب وكل حاجة... بس مش منتظرة رد بالضرورة لأني عارفة إنها حرية شخصية
بصراحة كنت فاكرة ساعتها إن خلاص مفيش إنسان مقيد تاني وإنه اختفى من العالم الجميل دة، بس الحمدلله تفكيري طلع غلط و ظهر تاني تعليقك :) و أسعدني جداجدا
في انتظار تشريفك مرة تانية "لو فيه مرة تانية"
تحياتي ياباشمهندس
إنسان مقيد تاني
إسكــــت!!! مش لقينا حد تاني بيقول "علنا" بدال لعلنا
:)))
أول تعليق هنا كاتبة كدة
تحياتي
قلب ينبض الله
إيه يابنتي الرقة الفظيعة اللي مفيش بعدها دي
أنا مش مصدقة البنات السكر اللي بتشرف بلوجي دي!! إذا كان انت و لاراما و لا الخيط الرفيع
بجد مصر فيها بناتيت قطاقيط كتير بس الناس مش واخدة بالها
:)
بيني و بينك أنا فعلا كنت مقررة مش أكتب لفترة طويييلة، بس عمري ماقررت إني هبطل كتابة خالص للأبد، بس في الآخر مش عرفت أنفذ لا القرار دة و لا القرار دة :) ، وعدت بخفي حنين زي مابيقولوا
يعني من الآخر أنا زي ماأنا و لسة مخاصماني ولسة .... بس بحاول أشوفلي حل، و مش قدرت أسيب البلوج أكتر من كدة "أو على الأقل لحظة كتابة البوست دة مش كنت قادرة أمنع نفسي"
إيه ياعم مرة تقولي براءة و مرة طيبة و رقة... يا بنتي انت فاهماني غلط!!! دة تمثيل بس كدة لزوم المظاهر
:p
أنا مش مصدقة إني فرحانة دلوقتي و إني ببتسم وأنا بقرأ تعليقات الناس!!! تعبانة أوي أوي أويييي الحمدلله :)، بس مش هعرف أوصفلك كلامكم و تعليقاتكم بتفرق معايا أد إيه بجد
شايلاه بين ضلوعك؟! هو يعني إيه ضلوعك صحيح؟؟
:)))
جزاك الله عني خيرا، ورزقك بخير ما في الدنيا و الآخرة
أدخلتي على قلبي السرور بتعليقك و صدقك
:)
سلام عليكم
كتبت التعليق ومسحه الكمبيوتر كله .... عااااااااااااا
مش مشكلة حكتب تاني
انا كنت بقول : إنت شايفاني عبيطة ولا عبيطة يعني علشان تقولي كده.. أنا عارفة كويس أوي أنا بتكلم على مين ومتأكدة إني لما أعرفك أكتر الصورة صحيح حتتغير بس اكيد للأحسن
أنا مبسوطة بإقتراحك أوي يا فراشة وكنت مستنياها تيجي منك.. ويارب مش تندمي على خطوة زي دي .. خطوة كان عندي احساس إنك خايفة منها او مش عاوزاها.
على العموم أنا حسيبلك ميل msn علشان نتقابل أون لاين ونتكلم ونشوف حنعمل ايه
وبجد انا مبسوطة أوي بإقتراحك ومبسوطة أكتر إنك أضفتي مدونتي في خانة حاسة إني ماستحقاش وبجد لما شوفتها فرحت بس في نفس الوقت خوفت
شوفتي الرغي ده كلة ونسيت أقولك أهم حاجة.. أنا بحبك أوي بجد
سلامات
:)
عارفه ان دي مشكلتي بجد
انا ف الموضوع ده بالذات عندي انفصام ف الشخصيه
ساعات تلاقيني عندي الشجاعه اني اعمل اللي انا عايزه بالطريقه اللي انا عايزها ف الوقت اللي انا عايزه من غير ما افكر ف رد الفعل هايكون ايه وف نفس الوقت بانكر الحق ده عند حد تاني بيعمل نفس اللي انا عملته لمجرد ان التصرف ده ممكن يتفهم غلط لكن بجد انا ساعتها بيكون قصدي اني احافظ على الحد ده من انه يصطدم بالواقع اللي انتي بتحكي عنه وباقول ساعتها انه ممكن يغفرلي الجرح اللي سببته ليه على عكس انه ينجرح من حد تاني بطريقه تانيه تسيب اثر ممكن يفضل اثره سنين طويله
انا ممكن يكون كلامي مبهم وممكن مش يكون ليه علاقه مباشره بموضوعك وممكن اكون باوضحلك تصرف حد اتصرف معاكي تصرف زي تصرفي ده
مش عارف لكن اللي متأكد منه ان موضوعك بجد اتاثرت بيه جدا وخلاني اشوف اي موقف مماثل بنظره المجروح مش نظره اللي بيجرح
اتمنى انك تستردي حالتك النفسيه والمعنويه العاليه بسرعه وسامحيني لو كلامي مش واضح لكن للاسف الكلام ده كتبته من غير ما افكر فيه
كلمة قبل اخيره
اتمنى انك تتأكدي ان مجرد كلمات ليس لها معني من وجهه نظرك تكتبيها ف مدونتك وانتي متأكده انها مجرد هلوسات وتخاريف قلم ممكن تكون سبب مباشر ف توضيح فكره غايبه عن حد تاني تدفعه لتغيير مجرى حياته او تعاملاته او اختياراته او تفكيره
كلمه اخيره
مدونتك هي بيتك
انتي الوحيده اللي ليكي الحق ف اختيار الوان الحيطه والديكور والسجاد والتحف فلو اختيارك ده حسيتي انه مش عاجب حد زارك فده لا يعني انك تتأسفيله علشان هو مش عايش فيه وببساطه هو بس لو سطحي هايبطل يزورك لكن تأكدي ان زوقك عالي ف اختيار اثاث بيتك علشان كده كل الناس بتحب تزورك بس انتي اللي مش تزهقي من زياراتنا المتكرره
اتمنى ان المعنى يكون وصل
ليه كدة ؟؟؟
فين هبة ؟؟
راحت فين ؟؟
مش هى دى هبة اللى اعرفها ...اللبى تستسلم بكل سهولة للكل ..وللأمر الواقع ..انتى احسن من كدة بكتير يا هبة
...
وبعدين مين قال ان فى حد زعلان عشان بتعبرى عن رأيك بحرية
!!!
هبة ..احب اقوزلك على حاجة مهمة جدا ...احلى حاجة واهم حاجة بتجذب ناس كتير لعالم البلوجرز /المدونات ..هى الصراحة المطلقة
وان الواحد يقدر يعبر عن رأيه ويتقبل اراء غيره فيه او فى مواضيعه او فى اى حاجة يتكلم عنها
وانتى احلى ما فيكى - على حسب معرفتى بيكى - انك صريحة ..حتى لو مش فى العالم الواقعى ..بس صراحتك فى العالم الافتراضى اللى هنا ده ليها اساس كبير للجذب ده لشخصيتك ولمدونتك
...
مش لازم تقولى كدة ..ما ينفعش تقولى كدة اصلا ولا انك تعتذرى على حاجة انتى ما عملتيهاش من الاساس
اجمدى يا جميل شوية كدة ..وحاولى ما تضايقيش نفسك
اللى يفهمك غلط او حتى يفكر مجرد تفكير فى انه ممكن يفهمك غلط يبقى ما يستاهلش يعرفك اصلا
دى قاعدة انا شخصيا ماشية بيها
صدقينى لو طبقتيها هاترتاحى
وروقى كدة يا قمر ...ومستنية اتطمن عليكى يا قمر
تحياتى
:)
Rama,
طبعا ردي متأخر جدا
:)
وانت عارفة كدة
بس بجد فرحت أوي بأني كلمت ياراما :) ويارب تتكرر تاني قريب ياااارب
عشان انت مش بتكوني أون لاين أغلب الوقت اللي بكون فيه
:(
و أنا كمان بحبك جدا جدا، وحبيتك أكتر بعد الماسنجر
:)
سلام عليكم
ولو
قبل ماأقول أي حاجة... عاوزة أقوللك إن بجد البلوج بينور أوي بتعليقك، ودي مش مجاملة تماما
i appreciate a lot
إنك ممكن تفكر تعلق على بوست خلاص فات ويمكن اتنسى بالنسبة لناس كتير، :) وآسفة من حتة الكلمتين الانجليزي اللي في النص بس ..... انت فاهم قصدي لأن الكلمة دي مش بحسلها معنى في العربي يوصل بالضبط اللي أنا عاوزة اقوله... ومتأكدة جدا إنك فاهمني من غير ماأوضح
وبمناسبة انك ممكن تكون فاهمني...فتأكد إن أنا كمان فهمت قصدك جدافي تعليقك على البوست ومش محتاج تتأسف عشان الكلام ملخبط أو إني مش هفهمه لأن ..أولا: بجد فهمته جداجدا، وفهمت إنك يمكن بتعمل كدة لأن شايف إن الطبيعي إنك تتصرف بتلقائية و محدش هيفهم غلط، بس في نفس الوقت انت بتعمل كدة وانت مش حاسس أو مش بتفكر كتير قبل ماتتصرف، في حين إنك لو شفت حد تعرفه هتقولله مش المفروض يكون له نفس التصرف لأنك خايف عليه...وحتى لو زعل منك وقتها، دة أكيد هيكون أهون من اللي كان ممكن يكون نتيجة تصرفه. صح كدة يافندم؟؟
:)
شكلي أنا اللي توهتك أكتر بكلامي
دة كان أول سبب إن مفيش داعي تتأسف... تاني سبب بأة..فهو ببساطة شديدة إني بكتب تعليقات و برد من غير تفكير كتير...فعادي يعني هتلاقي مني تعليقات فهمها أصعب من دة بكتييير
:)
شكرا على الكلمة اللي قبل الأخيرة دي :) بجد ربنا يكرمك
كلام كبير أوي عليّ ومش أستحقه بس شكرا جدا على ذوقك
الكلمة الأخيرة...ممممم
:)
ابتسمت كتير أوي وأنا بقرأ الحتة الأخيرة دي..بس مش حاسة فعلا إني هعرف أرد عليها خالص
مش عارفة بجد خالص!! أخجلتم تواضعنا ووشي بقى طماطم :)، وأيوة فهمت قصدك. انتو هتخلوني أحرّم أعتذر تاني
:)
أكيد عمري ما همل من تكرار الزيارة للبلوج منكم. دي مش حاجة تتقال أصلا
بالنسبة للديكور والسجاد بتاع البيت بأة :) عاوزة أقوللك إن السجادة اللي موجودة مش عاجباني خالص
لأني أساسا مش بحب أبدا اللون البني، بس البيج حسيته لذيذ شوية و هيليق على حاجات كتير تانية. يعني لو ينفع أخلي السجادة البيج وأشيل السجادة البني الكئيبة اللي مفروشة تحتها "خلفية البلوج بتاعي يعني" :))) أكيد هيكون الوضع أحسن ساعتها شوية.
شفت بأة دخلتك في شئون البلوج الداخلية إزاي؟ :)
تعليقك بيسعدني أوي :) وخصوصا لما أكون مش متوقعاه على بلوجز فاتت
:)) ربنا يسعدك دايما
ويارب تفضل مشرفني كدة علطول
تحياتي
Oceaneyes,
"اللى يفهمك غلط او حتى يفكر مجرد تفكير فى انه ممكن يفهمك غلط يبقى ما يستاهلش يعرفك اصلا"
يااااه!! إيه الكلام الكبير دة؟؟
ربنا يكرمك على كلامك اللي زي السكر،و على كلماتك المشجعة أوي أوي كمان
بس أنا فعلا كنت اتجرحت أوي، ومش كنت ناوية أكتب أي حاجة بس مش قدرت...بس في رأيي مش بالضرورة تكون الناس اللي بتفهم غلط هي اللي متستاهلش تعرفنا، يمكن الموضوع ببساطة إننا لازم نخبي مشاعرنا ورأينا ومش يظهروا غير للي قريبين أوي مننا وبس...عشان مش نتجرح جامد بعدها. مش عارفة!! وبصراحة أنا مستغربة اللي بكتبه في الوقت الحالي لأني مش كنت مفكرة كدة خالص
:)
بس واضح إن عقلي الباطن بيفكر يفكر كدة
مجنونة :))) تقولي إيه؟؟
شكرا أوي على تعليقك اللي حسيته قريب مني أوي، حسيت إنك بتكتبي وعارفة بتكتبي لمين أوي، كمان ناديتيني أكتر من مرة باسمي :) و الطبيعي إن لما تكوني بتحبي حد بتناديه باسمه كتير أو تقعدي تقولي ياجميلة و ياحبيبي وكدة
:))
فشكرا أوي بجد ياسالي على الشعور الجميل اللي إدتيهولي دة
على فكرة نسيت أقوللك إن "صدفة" إننا كنا عايشين في بلاد البترول اللي بتقولي عليها دي :) مش صدفة أوي بالنسبة لي...لأنك مرة حدسألك شفتي المحيط فانت قلتي لأ بس شفت البحر والخليج والنيل...فساعتها فكرت إنك أكيد كنت في الخليج. بس كنت فين بأة؟؟؟
أنا الحمدلله دلوقتي أحسن بكتير "لسة تحت تأثير السحر واضح" :)بس أهه الحمدلله
شكرا لاهتمامك أوي ياأوشن
Post a Comment