Friday, May 29, 2009

...

سمعت صوت الكلب جامد أوي. بس دة كان نسبيا طبيعي لأننا اتعودنا عليه خلاص في منطقتنا
اللي كان مش طبيعي و خلى قلبي يقع كان صوت بنت صرخت
مش صريخة واحدة اتخضت وبس !! لكــن صريخ متواصل مع صوت الكلب اللي لسة نباحه مستمر
.....................
جريت بسرعة على الشباك وأنا قلقانة...بس مش لحقت غير آخر المشهد
و هو إن البنت كانت بتجري من الكلب!! و طبعا بالتالي هو بيهوهو ويجري وراها
الكلب مشي الحمدلله... و مش عارفة بداية ظهوره كانت إزاي عشان هي تجري منه و هو يتنرفز. لكن اللي أعرفه كويس هو إن البنت كانت لوحدها تماما
في شارع و في وقت مليــــان ناس والدنيا منورة
بس كمان مش دة اللي دايقني
أد ما دايقني رد فعل الناس دي
يعني مش كفاية محدش كان قريب منها يساعدها أو حد يروح لها بعد ما الكلب مشي ويهديها شوية
لأ . خالص
البنت فضلت بعدها دقايق متجمدة مكانها و هي حاطة إيدها على بؤها و مش بتتحرك... بس اللي يزعل كان إن شلة أولاد كتير كان رد فعلهم الوحيد هو إنهم قعدوا يضحكوا بصوت عالي أنا سمعاهم و أنا مش قريبة منهم
اتخيلت نفسي مكانها ساعتها
صحيح مش ممكن كنت هجري لأن غير الدروس اللي بنتعلمها من صغرنا عن الجري من الكلاب، كمان رد فعلي دايما لو اتفاجئت بحاجة هو إني بابقى زي التلاجة التقيلة اللي مستحيل تتعتع من مكـانها
بس قلقت أوي و اترعبت لما فكرت في إني هابقى لوحدي. و ممكن محدش يفكر يساعدني أو يبعد عني الكلب دة
. . . . . . . . . . . . . . . . . . . . . . . . . . . . . . . . . . .
يـــاريت بجد يا جماعة نحاول نحس ببعض أكتر شوية
حتى لو الدنيا وحشة و الظروف وحشة و الناس علطول زعلانة وكل واحد في حاله
هي عمرها ما هتبقى حلوة لو احنا كنا مقتنعين إن كل حاجة في الدنيا وحشة و مستحيل تتغير
عايزين الناس تهتم بينا لازم نهتم إحنا كمان، عايزين الإحساس و الحاجات البسيطة اللي بتسعد تظهر تاني في الدنيا.. لازم إحنا اللي نرجعها
ياريت بجد... حتى لو مش كنت قادر تساعد حد أدامك و شايف إيديك متـكتفة لأي سبب من الأسباب
بس حسسه إنك معاه، ادعمه نفسيا، شــاركه حتى لو مجرد مشاركة وجدانية مش أكتر
يعني... أنا لو مكان البنت دي بجد كان هيفرق معايا أوي لو حد كان قرب مني وسألني أنا كويسة و لا لأ
صحيح السؤال مش هيفيد في حاجة... بس على الأقل تحس إن فيه حد حس باللي هي فيه و يهدي من روعها شوية
صغيرين

يــــاريت بجد بجد نعيد نظر في كل علاقاتنا و في الناس اللي حوالينا اللي مش نعرفها
لو الشهامة و الضمير و الإحساس -و كــــل الحاجات اللي كل يوم بنقول إنها اختفت أكتر- لو الحاجات دي مش موجودة إحنا اللي لازم نوجدها
إحنا اللي لازم ندور عليها

يـــاريت بجد كلامي يفرق و لو مع شخص واحد بس... لأن بجد الدنيا و هي بادرة كدة ومش فيها علاقات إنسانية كويسة دة تاعبني أوي أوي أوي

10 comments:

وحـــــــــــى القلم said...

يعينى
بجد موقف بايخ اوى
حاسه بيها اوى
انا مره جرى ورايا كلب الساعه سته ونصف صباحا وانا فى اولى اعدادى رايحه المدرسه ومكنش فى حد غيرى فى الشارع كله
طبعا من بعدها وانا متعقده من الكلاب ميه فى الميه
بس فعلا الناس بقت شئ عجيب
معدش بيحس إلا القليل أوى !!!
أكيد كلامك هيفرق مع كتير إن شاء الله
..................................
إزيك يا جميل؟
ايه اخبارك
معلش أعذرينى أنا مقصره بس أنا حالتى صعبه هبدأ امتحانات يوم الأثنين وقول ماده poetryربنا يستر :-(

Unknown said...

للاسف الشديد الناس صار عنها
لا مبالة غريبة بالاخرين يمكن
كمان(سرور )بمصائب الاخرين
يصدق هذا ما رأيته انتِ
من عدم استجابة الناس
لصرخة الطفلة
وضحك شلة
الاولاد
عليها!

blue-wave said...

الرجاله ماتوا فى الحرب
بجد ياعينى عليكى يا بلدنا

salma mohamed said...

اذا لم يستحِ الناس من رب العباد واصبحوا لا يهمهم ارضاؤه
اننتظر منهم ان يستحوا ويرضوا ويشعروا بالاخرين؟!!؟

Wish I were a Butterfly ... said...

وحي القلم

:)
ربنا يفقك في امتحاناتك كلها إن شاء الله

هو فعلا موقف بايخ
مش مجرد إنها اترعبت. لأ كمان لقت الناس ردفعلها عكس المتوقغ كمان

هبفرق؟؟ أتمنى يفرق والله يا سمية. أشك في كدة جدا بصراحة
و تاني مرة مش تبقي تجري من الكلب عشان مش يجري وراكي اكتر :)

Wish I were a Butterfly ... said...

norahaty

مش هقوللك كنت أتمنى تكون طفلة لأنها أكيد مش أمنية أتمناها
بس عموما هي كانت بنت... يعني ثانوية عامة يمكن أو حتى أوائل الجامعة
والأولاد كمان كانوا كدة
يعني مش عيال في السن السخيف اللي مش مهتم وخلاص

دة اللي زعلني أكتر يمكن
فيه سن بيحب يتتريأ على كل الناس حواليه ومش بيحاول ابدا يساعد...دة خلاص اتعودنا عليه ومش بنستنى منه حاجة. بس لما يبقى الشباب اللي بجد هم كمان كدة.... يللا الحمدلله
ربنا يهدينا جميعا

شكرا لزيارتك وإضافتك :)

Wish I were a Butterfly ... said...

blue-wave,

كـــلهم؟؟
!!!

يا عيتي عليها فعلا

بس كلهم يا دكتور ماتوا؟؟؟
:(

Wish I were a Butterfly ... said...

Salma Mohammed,

عندك حق طبعا يا سلمى

بس دة معناه إننا نسلم بكدة وخلاص؟
و مش نحال ننبه اللي حوالينا بجد؟ أصل الموضوع مش في الموقف البسيط دة أبدا

لكن في الإحساس نفسه و في المواقف اللي أكبر كتير من كدة

رحــــيـل said...

حقيقى موقف صعب جدا

اللى يضايق بجد ان الناس مبقاش عندها دم الواحد بيشوف مواقف كتير فى الشارع وردود افعال الناس بقت غريبة قوى مفيش اى مبرر ليهم انهم مش يساعدو بنت فى موقفها وهى لوحدها
ربنا يهدى بجد

شكرا جدا ليكى على متابعتك :)

Wish I were a Butterfly ... said...

رحيــل

لو عندي وقت أكتر كنت تابعت أكتر
:)
مدونتك جميلة قلتلك قبل كدة

بس فعلا.. مفيش أي مبرر إنهم مش يساعدوا البنت زي ما انت قلتي

نورتي البلوج