يعني إيه تكون إيجابي

إيه رأيكم في الجو الأسبوع اللي فات؟ طب إمبارح على وجه التحديد؟؟
طب تفتكروا إيه أكتر وقت الشمس بتكون بشعة فيه ودرجة الحرارة و الرطوبة تبلغ أعلى معدلاتها فيه؟؟
أييييييوة... بالضبط كدة
طيب أنا قررت أحكي لأي حد يمر على البلوج المسكين دة حدوتة صغنتوتة

صباح ذلك اليوم..الساعة 2 الظهر بالدقيقة... وقفت بنوتة شطورة أمورة جميلة زيييي السكر –اللي هو أنا طبعا
:p
ورا الشباك- ....... لأ طبعا خالص، بس دة لإضافة عنصر التشويق في القصة مش أكتر : )

المهم...أول ما بصيت في الشارع لقيت راجل واقف وسط الشارع –والله أعلم هو من إمتى موجود أساسا!! يمكن من قبل الساعة 2 كمان- شدني اللي كان بيعمله فقررت أتفرج عليه شوية
كان راجل شكله محترم أوي و كان شعره رمادي مش شاب صغير... لقيته بيتمشى في الشارع أمام العمارة في محاولة للبحث عن أي طوب صغير، وكل ما يلاقي طوبة "حتى لو فتفوتة" يشيلها معاه... بعد ما جمّع شوية طوب معاه بين إيديه لقيته بيقف في وسط الشارع تاني......... و بيرمي الطوب في حفرة عميقة موجودة في وسط شارعنا طول اليوم العربيات بتعدي عليها ونسمع صوت ارتطامها الشديد بيها..صوت بيحسسك أوقات كتيرة إن أكيد العربيات دي بتتكسّر من تحت بسبب الحفرة اللي في وسط الشارع دي
غير إنها كانت السبب في إن بوابة عمارتنا رجلها تتكسر من شهر لأنها اتكعبلت فيها بالليل..... الحقيقة مش موقف الراجل إن يحط الطوب ببساطة هو بس اللي استوقفني..... لكن إصراره الشديد على إنه يملا الحفرة كلها "رغم عمقها و اتساعهاالنسبي" عشان الناس مش تتأذى منها
ثانيا إنه مش من سكان العمارة...صاحبة أكتر ناس ممكن تتأذى من الحفرة دي، و لا من سكان الشارع أصلا
ثالثا إنه قرر و أصر بشدة إنه يملا الحفرة في وقت كانت درجة الحرارة شديدة جدااااا.... حاجة تخلي أي حد كسول إنه يعمل شغله حتى
رابعا إنه كان بيلف كتير و يدوّر في أرجاء المنطقة عن أي طوب عشان يستعمله، ويبعد كتير عن الحفرة في سبيل إنه يلاقي أي طوب ينفع حتى لو كان صغير،ويرجع تاني للحفرة
أعجبت جدا جدا جدا بإصراره الشديد إنه يصلح جزء من الشارع رغم إن محدش طلب منه طبعا، و هو كبير في السن لكن مصمم ينهي مهمته بنجاح

حبيت أسلوبه الجاد جدا و إنه وقف يتأكد بعد كل كمية طوب يحطها في الحفرة إذا كانت الكمية مناسبة للشارع و لا لأ.... كان يوزع الطوب بإتقان و مزاج عاااالي : ) يصعب تخيّـله.. بعدين يقف على الرصيف يشوف عدد من العربيات و هو بيمر على الحفرة وإذا كان وضع الطوب كدة مناسب أو لأ
استمر الراجل لوقت يزيد عن 20 دقيقة... بعدها لقيت شاب توجه ليه وكلمه و كان رد فعل الراجل إنه حط إيده على كتفه وابتسم... اختفى الشاب و بعدها بلحظات لقيته جاي وشايل قالب طوب كبير أوي...و قام بتكسيره قريب من الحفرة، وبدأ الشاب و الراجل في ترتيب قطع الطوب بشكل يكون مناسب لمرور العربيات من فوقها، و بدؤوا فقرة جديدة من التعاون الرائع بين شاب... و راجل، واحد شكله من الطبقة الوسطى يمكن، و التاني ممكن يكون مجرد عامل... وجه التشابه بينهم إنهم مش من سكان الشارع و إنهم ناس محترمة قررت تعمل حاجة إيجابية... و لو بسيطة أوي لبلدهم و لناسها.... و قرروا إن إيجابيتهم مش هيوقفها و لا حر و لا منظر و برستيج وسط الشارع ولاأي حاجة تانية
الساعة تجاوزت 2 و نص الظهر و الاتنين مستمرين في عملهم بطريقة رائعة تدعوا للتفاؤل جدا، الشاب تعلم من الراجل الإتقان وبدأ يكرر مشهد الوقوف على الرصيف عشان يشوف العربيات وهي بتمر ويعرف أوجه التقصير في الحفرة، والراجل اتعلم من الشاب إنه يكسر القالب الكبير عشان ييجي بنتيجة أسرع و يملا الحفرة

طبعا خلال المشهد كنت رويترز : ) ورحت بلغت مامتي اللي وقفت معايا تراقب المشهد و قعدنا ندعيلهم من كل قلبنا، ونعمل زي متعصبين الكورة لما نفضل نكلم نفسنا و نقول أهه... بص هنا! فيه طوب تحت الشجرة!! آه لو يعرفوا يشيلوا القالب اللي هناك..وهكذا... و بلغت أخويا وأنا فخورة أوي بالراجل... عشان "يمكن" يفكر في يوم من الأيام يكون زيه –أو هذا ما تمنيته على الأقل-. المهم... الحفرة دلوقتي كويسة و بتسلم عليكم :) و هم كام يوم و هتبقى جزء من الشارع ومش تزعج العربيات والناس تاني
صحيح..... فيه ناس هتقول نحط طوب في الشارع ليييييه؟!! هقوللهم و الله ما أعرف، بس أكيد حال أحسن من حال تاني، وهي كل شوارع بلدي الحبيب مرقعة أساسا..إذا كان في مدينة نصر ولا حتى "..." إلا طبعا الشوارع المهمة اللي كلنا : ) عارفينها

موقف خلاني متفائلة لوقت كتير إمبارح.. وبعدما خلصوا كنت مش عارفة أعمل إيه!! عايزة أرمي عليهم ورد :$ ، طب عايزة أقول شكرا أوي يا جدعان..هم دول رجالة بلدي، طب... أعمل إيه؟؟؟ فعلا مش كنت عارفة!! أينعم أخدوا ثواب لإيجابيتهم ولإماطة الأذى عن الطريق في حين إن ناس كل يوم شايفة الوضع ومش فارق معاها "بمافيهم أنا للأسف"، وأيوة دة واجب علينا المفروض وشيء طبيعي يحصل في أي حتة... لكن الواقع إنه مش بيحصل كتير في الزمن دة
يارب نكون كلنا إيجابيين كدة.. ولو حتى بلمسات بسيطة أوي في حياة الآخرين. بالنسبة لي الرجل كان مثال يحتذى به، أتمنى يكون كدة لأي حد هيستحمل يقرأ الكلام دة كله