أخيييييييرا قابلتهم
أخيرا اتجمعنا
كان بقالنا شهور مشفناش بعض
أصحاب الجامعة
:)
الشلّـة
أحلى أصحاب في حياتي
أينعم كتير استندلوا "كالعادة" و مش ظهروا على الشاشة رغم اتفاقنا، بس برده كنت فرحانة، و اتجمعنا بعد طوووول غياب، و شفت 3 كنت مش قابلتهم من يوم تخرجنا..... ياااااه!!! كنت حاسة إنه فات 10 سنين على تخرجي
كان يوم حافل بالضحك و الحكايات و التريأة على الوضع الحالي... خصوصا لما واحدة اقترحت كل واحدة تحكي عملت إيه في الفترة اللي فاتت بعد الجامعة
و كأنها أطلقت المدفع اللي بعده الكل اتكلم في صوت واحد... اتبهدلت، تعبت، من بعدك يا األسن إحنا ضعنا، هنكون عملنا إيه يعني؟!!اكتأبت، كنا فاكرين الجامعة صعبة... و تعليقات تانية كتير
:)
كنت محتاجة أوي أشوف الناس دي
وحشتني أيام الجامعة
وحشني التزويغ من محاضرة العربي "شخصيا" عشان أروح معهد الكلى
وحشني التزويغ من أي محاضرة مش فارق... عشان نخرج كلنا مع بعض
وحشني حتى الرخام اللي كنا بنقعد عليه بين أوقات المحاضرات
وحشني لما كنا نتفق نتقابل عند باب الجامعة من الصبح بدري... مش عشان نحضر :) بس عشان نروح نركب خيل مع بعض أنا و أصحابي
وحشتني محاضرات الدراما اللي كان أصحابي مش بيحبوها بس كنت بعشقها
وحشني كل حاجة في كليّـتي الحبيبة
نقول إيه؟!! ليت الشباب يعود يوما
:)))
13 comments:
ايه يابنتى وحدى الله يا ليت الشباب يعود يوما ليه انتى كام سنه وخريجه كام معلش بقاء خلى الطابق مستور العبد لله خريج القرن الماضى من التعليم احم احم احم
بتظل دوما ايام الجامعه وذكرياتها وشلتها من اجمل ذكريات الحياه ماشى ياعم المزوغ
اتعشم من الله ان اليوم ده يكون سبب من اسباب الخروج من اطارك النفسى ولو انى فرق السماء من الارض بين الكلمات فى البوست ده والى قبله
السلام عليكم
البوست دا جه في وقته
انا خلاص كلها كام شهر وأخلص الكليه بتاعتي
وها ابئي زيك كدا ياهبه
هاتوحشني حاجات كتير
رغم ان كليتي خنيئه بس انا بحبها وبموت فيها علشان هناك بشوف اصحابي وبنقضي وقت جميل سوا
اهم حاجه انك اتبسطي مش عاوزين اكتر من كدا
ربنا يوفقك ويجعل كل أيامك فرح وأمل ونور
رئيس جمهورية نفسي
:)))
خلاص بلاش
ليت أيام الجامعة تعود يوما
و لعلمك أنا كنت بنوتة شطورة الحمدلله.. بس مش طبيعي هيوحشني المحاضرات أوي كدة لو بنتكلم على ذكريات
يعني هو التزويغ بس كان طبعا أول سنة في الكلية و سنة تانية.. و شوية كدة من رابعة :) بس
أنا كمان أتعشم
:)
هو زي ماكتبت إنه يوم كنت محتاجاه أوي، مش أكتر
شكرا بجد على تعليقك الموجود ومنورني دايما
يا بختك بارتياع ومش حقدر أقول أكتر من كده
ربنا يكتر من الأيام دي في حياتك يارب ويسعدك دايما
تحياتي
ما قولتيش ان ماضيكي في تزويغ من المحاضرات
:)
وحشتيني
يارب تكوني كويسة
مش عارفة
:)
انتى اكيد عندك حق ..ايام الجامعة بجد تحفة وحلوة جدااااااااا وبجد مش هانقدر نعوضها فعلا ..وعلشان كدة لازم نعيشها بحلوها ومرها ونتقبلها كويس
انا عن نفسى عايشاها اهو اليومين دول وعلى الرغم من انى مطحونة مووووووووووووووز يعنى الترم ده
بس الحمد لله بحبها برده وبحب اروحها جدااااااااا
...
وبجد الحمد لله انك عملتى حاجة فرحتك واسعدتك ..ايوة كدة
خليكى كدة دايما
وبأكد عليكى تانى ما تزعليش منى اليومين دول ..بجد والله مطحونة اوى يعنى
وحشتينى اوووووووى يعنى
:)
قلب ينبض الله
و عليكم السلام ورحمة الله و بركاته
يا بنتي! ياااا بنتي
إسمعيها كلمة من جدك العجوز
:)
كلنا كنا بنقول على الكلية خنيئة، بس بعد كدة... عرفنا يعني إيه خنقة بجد
:)))
لا يا جميلة والله الدنياحلوة و كل فترة وليها جمالها، بس هفكرك تستمتعي بكل لحظة في الكلية، و إعملي كل حاجة مجنونة ممكن تفكري فيها مع أصحابك واتصوري كتير معاهم وكدة..عشان يكون ليكي ذكريات حلوة كتير
ربنا يكرمك على رقتك اللي مفيش بعدها دي :)و يارب أعرف إنك دايما كمان فرحانة و راضية بحياتك
بس إبقي عرفينا أخبارك
:)
راما
آااامين
:)
ويسعدك إنت كمان يا أحلى راما
ترقبي الوجه الآخر قريبا
:p
روفي الحبيبة
بجد؟؟
مش قلتلك على خروجات الهرم عشان نركب خيل؟
:)
دي أكتر حاجة كنت بحبها ومواظبة عليها
بس مش عارفة إني مش حكيتلك
:(
الأيام بيننا :) و هتزهقي مني حواديت لو عايزة... بس أشوفك
إنت كمان وحشتيني أوي أوي ياروفي
Oceaneyes,
إنت كدة مية مية
:)
عيييييشي جامد :) و إن شاء الله ربنا هيوفقك
لما قابلت أصحابي لقيت واحدة قالت حاجة غريبة أوي.. و هي إنها حتى الآن مش لقت واحدة من الشغل تكون صديقتها أوي وتقرب منها وكدة!! مش أعتقد يعني إنه للدرجة دي، بس في نفس الوقت متأكدة إن أصحاب الدراسة ميتعوضوش
ربنا يوفقك في دراستك و حياتك إن شاء الله يا سالي :) و أنا مش زعلااااانة
take care :)
في الاول الكليه فيها ذكريات كتير حلوه
وأحلي ما فيها أنك تكوني أنتي وأصحابك طالعين بعد أمتحان رذل لماده رخمه وأنتوا مبسوطين وبتحمدوا ربنا
بجد
دي أحلي حاجه
تحياتي
alshared,
:))
والله حتى أيام الامتحانات ليها ذكرياتها يا محمود
وتمر الايام وتمر صفحات الحياه
وفي كل صفحه نرسم فيها ابتسامه
او نكتب فيها ذكرى
او تسقط فيها دمعه
حتى ياتي الوقت
وتنطبق آخر صفحه من الكتاب على اول صفحه
وفي آخر دقائق نتذكر طفولتنا
افرحنا
ذكرياتنا
والدموع تواسينا
ثم نذهب إلى آخر بيت في تلك الدنيا
وكلنا آمل في ان نلقى بعضنا في جنة الرحمن
:)
Post a Comment