Saturday, March 15, 2008

تفكير عيال... بس يمكن ينفع


زمان و إحنا كنّا صغيرين... كان دايما يحكولنا عن الجنة و النار... و كان وصف الجنة حسب عمر اللي بيسمع الوصف دة
فكان في الأول الجنة هي المكان اللي فيه حلويات و آيس كريم كتيييير، بعدها أصبحت الجنة هي مكان مليان بأحلى اللعب و الأكل اللي بتحبه، و على رأي بنت أختي... "الجنة أحلى من النادي أصلا!!" و كأنها تعرفها

:)

بعدها أصبح وصف الجنة هو إنه مكان مرييح جدا و مش فيه أي حاجة تضايق و فيه أطفال كتير وأصحاب... و يستمر الوصف في التغير كل وقت بتتغير عقلياتنا

بس مع كل الوصف دة... كان دايما فيه حاجة شاغلة مخي جدا جدا، و هي فكرة "الخلود"!! يعني إيه هفضل عايشة للأبد في الجنة بعد كدة؟! و إزاي مش هكون زهقانة لوطول عمري عايشة وبس؟

و لأن عقل الإنسان و تفكيره محدود مهما زاد الأفق بتاعه.. عمري ما قدرت أوصل للمعنى الصح لحديث وصف الجنة و اللي بيقول

ما لا عين رأيت، و لا أذن سمعت، و لا خطر على قلب بشر

يعني مهما اتخيلت و فكرت في متع و ملذات ممكن ألاقيها في الجنة، هتكون خيالاتي دي صفر على الشمال للموجود فعلا في الجنة، و لأني كنت طفلة و تفكيري طفولي جدا، كنت بفكر إنه طبيعي في يوم من الأيام هتخلص كل الملذات و المتع و حتى المفاجآت السعيدة اللي ممكن أفكر فيها في الجنة

!!!!

ساعتها هعمل إيه؟

فكرت كتيييييير.... و في النهاية وصلت لحل كويس، و هو إني أنام لمدة 3 أو 4 سنين، بعدها أصحى مبسوطة و مشتاقة لكل حاجة حلوة أعملها في الجنة... لكن افتكرت إن الحياة "خالدة"! يعني كام سنة مش هتفرق، فقررت أدعي ربنا إني أنام مئة سنة في الجنة و بعدين أرجع أفرح تاني، بس برده وصلت لنفس النتيجة

:(

و تعبت جدا جدا من التفكير، و دة كان تفكيري على مدى سنين كتيييير أوي، بس فجأة!!! اكتشفت إن تفكيري محدود في إحساس الملل اللي ممكن أحسه في جنتي!! و اللي بعد كدة طبعا عرفت إنه مش ممكن يحصل

اكتشفت إن كل تفكيري في شعوري بالملل و التكرار لو كنت في المكان الجميل المسالم دة، و إن كل مشكلتي هي فكرة الخلود... و إني عمري ما فكرت في قلب الآية و التفكير في إني لو مش كنت في الجنة أصلا !!! ساعتها كمان فكرة الخلود موجودة هناك

إلا إن إحساسي مش هيكون ملل و لا زهق من تكرار المتع و مقابلة الناس الجميلة، و لا هيكون همي الأكبر إني أفكر في حاجة جديدة تسعدني!! لكن هيكون همي إني أطلع من النار دي ولو لحظة واحدة، و تفكيري هيكون كله ندم على لحظات فاتت عملت فيها معاصي كتير أوي و مش تبت بعدها

و تخيل إن الأحاسيس دي كمان ممكن تفضل مستمرة معاك إلى..... آخر حياتك؟؟ لأ. .إلى ما لا نهاية
إلى ما لا نهاية!!! بجد

أكيد محتاجين نفكر كتير أوي إزاي ممكن نبعد عن عذاب النار دة... و نستغل فرصة إننا لسة أحياء

اللهم أنا نسألك الجنة... و نعوذ بك من عذاب النار

9 comments:

رئيس جمهوريه نفسى said...

حبتدى من الاخر امين يارب لنا ولكم ولسائر المسلمين والمومنين يارب

ღϠ₡ღأمير الهدوءღϠ₡ღ said...

:)
في حد يدخل الجنه ينام

انا نفسي في حجات كتير
اشوف ربنا سبحانه وتعالى واشوف الرسول واشوف الصحابه واشوف اجدادي اللي مش شوفتهم
و... و...و


يا رب ادخلني الجنه مع الابرار يا كريم يا غفار


:)

تحياتي
:)

MarwaAshraf said...

صدق الله العظيم حين قال

فمن زحزح عن النار وأدخل الجنة فقد فاز

شكرا على التذكرة يا بندقتي وربنا يجعلنا جميعا من أهل الفردوس الأعلى

Wish I were a Butterfly ... said...

آااامين
:)

شكرا سيادة الرئيس

Wish I were a Butterfly ... said...

أمير الهدوء
ههههه
و بعدين بأة؟؟
مش قلنا تفكيري و أنا طفلة؟
:)
أيوة فكرت أنام، مش أول ماأدخل هنام يعني :) بس كنت فاهمة إني بعد 100 سنة كدة هلاقيني زهقت من كل المتع الموجودة، ففكرت في النوم
:)
و عموما طبعا مش هزهق من أي حاجة... أنا بتمنى حاجات كتير أوي زائد اللي انت قلته، والجنة مفيهاش معنى للملل

يااارب كلنا ندخل الفردوس الأعلى يا أحمد، و ساعتها هفتكركم هناك
:)
ملحوظة بأة بمناسبة الكلام دة... أنا قلت لأنتيمتي من فترة إني لو توفاني الله في أي وقت هي تكتب في البلوج إنكم تدعولي :) و أنا قبل ما تحصل بأكد عليك أهه :) حتى لو كنت مش بتتابع البلوج خلاص ابقى تعالى شقّر كل سنة مرتين ولو لقيت الخبر في يوم من الأيام... اسألك الدعاء
:)
على فكرة مش بهزر

شكرا لوجودك دايما :) نوّرت

Wish I were a Butterfly ... said...

Rama,

آمين يارب

ربنا يجعلنا من الفائزين دنيا و آخرة إن شاء الله
:)
يا راما!!! يللا بقى عايزة أشووووفك
:)
قريبا و حصريا :) و يارب ساعتها مش تغيري رأيك فيّ

ღϠ₡ღأمير الهدوءღϠ₡ღ said...

ليه كده بس هتخليني ابكي ليه

:(

طيب انا نفس الكلام اوك
:)
مش تنسي

Wish I were a Butterfly ... said...

أمير الهدوء

:)
أكيد أوكي جدا
ما عاش اللي يخليك تبكي يا أمير

بس أنا و الله بتكلم جد. أتمنى مش تنسى لأني مش بهزر
اسألك الدعاء

:)

oceaneyes said...

حلو اوى البوست ده يا هوبة ..بجد حلو كتييييييييييييييير

احنا فعلا محتاجين نقف كدة شوية ونفكر فى كل حاجة بنعملها ..ولازم نعرف ان على الرغم من صعوبة الطريق للوصول للجنة ..الا انه فى نهايته الجنة ..اللى كلنا بنتمناها

ربنا يوعدنا بيها يارب


اميييييييييييين يارب العالمين


ويبعدنا عن عذاب النار



ياااااااااااارب



وحشتينى على فكرة


:)