أغنية بحبها أوي... عارفة انها قديمة شويتين :) بس برده لسة بحبها
و حبيت أكتبها -رغم انكم ممكن أوي أوي تكونوا عارفينها- بس عايزاكم تركزوا في كلامها المرة دي.عشان بجد معناها جمييييييييييييييييييل أوي
الفرصة بنت جميلة .. راكبة عجلة ببدّ ال
شعرها بيطير أدامها.. بيداري علينا جمالها
و العاقل لو يلحقها
يتبدل بيه الحال
الفرصة :)
لو ننده مابتسمعشي
أصلها بتسد ودانها
لو راحت مبترجعشي
دي شقية و ليها دلالها
.......................
حلمك لو يوم يلمسها
تدّ يك أكتر ما بتحلم
تدّ يك أكتر ما بتحلم
الفرصة بتعرف ناسها
و اللي بتفوته بيندم
......................
لو واقف وسط كتير
ممكن تختارك انت
ممكن تختارك انت
مهما تطول المشاوير
فآخرها هتوصل انت
و العاقل لو يلحقها
يتبدل بيه الحال
دي الفرصة
الدنيا كلها مليانة فرص. بس فعلا الفرصة مش هتستناك، و لا هينفع تناديها و هي تجيلك... لازم انت اللي تروح تدور عليها، و تاخدها بسرعة
انتهز الفرصة في مجالات الدينا كلها
انتهز فرصة انك حاسس أوي بالحب في اللحظة دي.. و اعلن حبك
انتهز فرصة أي ثواب... اوعى تتأخر و تاخد وقت في التفكير! لأن ساعتها هتلاقي "ألف" شخص غيرك ممكن يسبقوك و يفوزوا بالثواب
انتهز فرصة انك حاسس أوي بعطف أمك و خوف أبوك عليك، و انحني بوس إيديهم و فرح قلوبهم
انتهز فرصة شعورك بالألم الشديد أو الظلم... و قرب من ربك أوي و ادعي بكل قلبك و خلص نفسك من قسوة قلبك و جفاف عينيك أدام ربك
و في النهاية... انتهز فرصة إنك لسة عايش في الدنيا دي، و خلي ليك بصمة و فعل مشرف و إيجابي في حياتك... و افتكر اننا موجودين "هنا" في الدنيا.. لفترة مؤقتة و بعد كدة هتكون حياتنا خالدة... يا في مكان جميل أوي :) ، يا.... انتو عارفين بأة
20 comments:
فعلا يا جميل احسن واريح حاجة ممكن نعملها فى حياتنا اننا ننتهز الفرص وناخدها ...
عشان بعد كدة ما نندمش على فرصة ولت من زمان ...
بس ده مش معناه اننا نتهور وناخد قرارات متسرعة ونسميها فرصة ...
لازم برده التعقل ووزن الامور ..
ولو على الاغنية فكلماتها جميلة لكن بصراحة اول مرة اعرف عنها
....
هو مين بيغنيها ؟؟؟
...
تحياتى ليكى يا جميل واتمنى تكون النفسية عندك اتحسنت عن الاول بكتير
....
:)
أه عارفين طبعا.. يارب انا وأنت وكل الناس الطبييين نتجمع هناك
البوست بيقول إن هبه حلوة مبسوطة .. ولا عندك رأي تاني ؟؟؟
هههههههههههه
بجد حلو أوي أوي .. تحياتي
الاغنيه مش اعرفها وان كنت اعجبت بيها انا مش هاعلق على البوست دلوقت بس حبيت اشكرك بجد
انتي حد كويس فعلا
البوست بقى راجعله عشان عندي كلام كتيييييييييييييييير
Oceaneyes,
دة ايه الكلام الكبير أوي دة؟ :) التعقل ووزن الأمور و حاجات كدة جامدة. بس أكيد طبعا عندك حق.. ومش صح التسرع في أي حاجة
شكرا على الكلام الكبيييير دة اللي بجد بيضيف للبلوج بتاعي و بتشرف بيه أوي
و بالنسبة للأغنية.. فهي لمحمد منير، بس الحقيقة انها من زمان جدا "يمكن من نهاية التسعينات او حاجة كدة" في شريط اسمه "الفرحة" :) و الأغنية دي اسمها "الفرصة" و الاسامي كلها كدة شبه بعضها... بس بجد فيها أغاني ليها معنى، و انا بحب الأغنية دي اوي رغم موسيقتها الطفولية
النفسية يا سالي...ممم... أكيد اتحسنت، وخصوصا بعد ما فضفضت و حاولت اسمع كلامكم. بس.... نقدر نقول اني بحاول اهه :) . و ربنا ييسر
RaMa,
:)
مبسوطة طول ماانا اعرف ناس جميلة زيك. يارب مش أخسرهم أبدا يارب
ربنا يعزك يا راما... تحياتي :)
...........................
و لو
شكرا أوي :) و يارب أكون أحسن من ظنكم فيّ عند ربنا
أكيد ترجع للبوست في أي وقت، و ان شاالله تعلق 10 مرات حتى. البيت بيتك :) بس ممكن نعرف ايه اخبار والد حضرتك؟! يارب تكون صحته اتحسنت
انا بمووووووووت في حاجه اسمها محمد منير
و الاغنيه دي بالذات بحس فيها بالوصف الحي لفكرة الفرصةو لمدي روعه الفرصه و ان الواحد لو عرف فعلا ياخدها في وقتها الصح هتكون من اجمل الحاجات
علي فكرة انا اول مرة ازور مدونتك بس من الواضح انها اكتر من رائعه
عزيزتي
عرفت الاغنيه ولكن ن فتره قررت أعمل بيها ومستناش الفرصه تجيلي وأروح انا أدور عليها بس وقعت في مشكله يمكن عشان مدورتش صح أو يمكن عشان مش المفروض أننا نبحث عن الفرصه لكن مفروض أننا نعمل اللي يخلينا نستاهل الفرصه
تحياتي
الاغنيه حلوه بجد لانى من عشاق منير فاى حاجه بيقولها بحبها
انا معاكى انى الواحد لازم يدور على الفرصه بس اى فرصه علشان الواحد يلاقى فرصه لازم يكون الجو الى حواليه بيساعد الانسان ده على انه ياخد فرصته ويعمل بيها فرصه فى بلدنا اه ممكن تيجى بس بعد ما تكونى شارفتى على الاعتزال
انا مش ياس انا بتكلم على الظروف الى فيها البلد دلوقتى بس لما تتغير ظروف البلد ان شاء الله كل انسان حيلاقى فرصته
Sally,
يا فندم منوراني في اي وقت. و بالمناسبة دي مش اول مرة تزوري البلوج :) بس انت اللي مش فاكرة. كانت زيارتك قبل كدة اول ما انا رديت على التاج و اتفضحت :) بس عموما أهلا وسهلا بيكي دايما
أنا كمان بحب كتير من أغاني محمد منير لأنه من الناس اللي ممكن تنقلك لمود الفرح لو كانت اغنيته فرحانه، و ينقلك للعكس بنفس الجدارة
ربنا يرزقك يا ستي بفرصة جميلة و تعرفي تخطفيها صح
تحياتي
.................
انسان مقيد
مش عارفة أكيد كان ايه المشكلة لما حاولت ومش عرفت توصل للفرصة. بس عموما الكلام اللي انا كتبته كان ليّ قبل ما يكون ليكم حتى
عارفة ان الموضوع مش سهل... بس يعني... نحاول اد ما نقدر عشان نوصل لها ، و لو انه صعب أوي في ظروف البلد دي نلاقي اي فرص
بس عجبني أوي اللي قلته "مفروض أننا نعمل اللي يخلينا نستاهل الفرصه". انت صح جدا جدا
شكرا جدا على متابعتك
جميل جدا
وصورة البنت زي السكر
:)))))
ايه خير ؟
الجميل بتاعنا مختفى فين ؟
طمنينى عليكى يا قمر ...اتمنى تكونى بخير ...
واتمنى المرة الجاية اللى هاجى فيها هنا الاقى بوست جديد ان شاء الله
:)
رئيس جمهورية نفسي
معاك في ان كتير من أغاني منير جميلة أوي. بس هو شخصيا مش بحبه أبدا أبدا بصراحة... :)
معاك كمان للأسف في كل اللي حضرتك قلته.. و عارفة انه مش يأس و لا اكتئاب اد ما هو كلام عن الواقع الحالي
بس يا سيدي الرئيس... خلاص سامحني و هسحب كلامي الأخير لو تحب :) . الفرص قليلة جدا و نادرة كمان، لكن دة معناه ان فيه ولو 10% فرص. و عموما بجد ممكن أسحب كلامي... و أكتفي باغتنام الفرص في العلاقات مع الناس و مع ربنا. إيه رأيك؟
تحياتي ليك. و بجد تشريفك للبلوج دة بيشرفني جدا
و حقيقي بكون سعيدة بمناقشتي مع حضرتك. شكرا على رأيك الواقعي جدا
أمير الهدوء
أهلا و سهلا بيك في بلوجي المتواضع
على فكرة حلو أوي اسم "أمير الهدوء" :) بجد عجبني
و لو على صورة البنت...أنا مغرمة بيها من ساعة ماشفتها وحطيت ليها صورة تانية على شاشة الكمبيوتر عندي :)
واضح حبك لصور الأطفال يا أمير الهدوء. بس هو انت عرفت البلوج دة منين؟؟! نورت
..............................
Oceaneyes,
شكرا على السؤال يا حبيبي :)
أنا موجودة ان شاء الله و هحاول اكتب قريب. بس لسة مش مستقرة أوي في الدنيا ولسة حاسة اني ملخبطة شوية كتير. بحاول اتصلح لسة يعني :) بس حقيقي شكرا اوي على السؤال. ربنا يخليكي ليّ... و نتقابل في يوم من الأيام :)
مش عارفة ليه كل ما ادخل مدونتك احس اني عارفاكي من زمااااااان...و الله احساس جميل...
اخبارك ايه يا قمر؟؟
انا لما انزل مصر عايزة اشوفك على فكرة شخصيا...لو مفيش عندك مانع
:-)
الفرصة بقى ان الواحد يعرفك و اديني طبقت اللي انتي كتباه في البوست اهو
نقطة مية
:))
متتصوريش بجد تعليقك الرقيق دة أسعدني أد ايه. ربنا يعزك يارب
و أكيد يسعدني جدا جدا اني اقابلك :) مكسوفة شويتين بس أكيد يشرفني جدا والله لو بتتكلمي بجد
و يا ستي يمكن نطلع عارفين بعض واحنا مش واخدين بالنا :) صح؟! بجد شرفتيني بظهورك تاني و اهلا بيكي. هعلق على البوست بتاعك ان شاء الله في اقرب وقت، و بجد جدعة انك رجعتي تاني لمدونتك
بس هو انت فين في الوقت الحالي و امتى هترجعي مصر؟؟! عموما نورتي بجد و فرحني كلامك اوي ربنا يسعدك
والدي مره قاللي ان الفرص تصنيفات
فيه فرص عظيمه وفرص مش مهمه
فرص سهل اقتناصها وفرص تتعب جدا لحد ما تتاح ليك
فرص تبان مش فرص وفرص تخطف العقول
لكنها كلها بيجمعها حاجه واحده
انك لو سيبتها تعدي على امل انك تلاقي فرصه احسن
هاتبعد وممكن مش تتاح ليك مره تانيه
علشان كده لازم نغتنم الفرصه مهما كانت بسيطه طالما اتيحت لينا
تسأليني هو عمل كده اقولك انه قالي عشان ما اعملش زيه
تسأليني انا عملت كده
اقولك انه قالي كده بعد ما الفرصه ضاعت وعشان كده انا دايما فاكر كلامه
تحياتي
و لو
Welcome back my friend :)
كلامك أصلا كفاية أوي يتكتب في بوست لوحده. شكرا ليك و شكرا لوالدك "اللي أتمنى يكون صحته أحسن كتير دلوقتي". بس المشكلة بأة اني ركزت ركزت في كلامك... و في الآخر لقيتك بتقول انك برده ضيعت الفرصة :) ربنا يرزقك بفرص أحسن منها كمان
و هضيف حاجة صغيرة للي باباك قاله... مش معنى ان ضاعت عليك فرصة رائعة قبل كدة انه مش هيكون فيه فرص تانية. بجد ان شاء الله ربنا يرزقك بفرص أحسن مليون مرة
و افتكر "وعسى أن تحبوا شيئا وهو شر لكم". صح كدة :) ؟
شكرا على كلام والدك وكلامك الجميل
انا بحب الاغنية دي جدا
وبحسها جدا
بس نفسي اعرف مين اللي مالفها
شاب مصري مفروس
مبدئيا... أنا استغربت جدا من تعليقك لأننا شهر 4 دلوقتي :) و البوست دة كان نوفمبر اللي فات
:)
بس مفاجأة حلوة ربنا يكرمك
عموما... الكلمات هي لواحد اسمه "أحمد أبو ذكري" و المغني طبعا محمد منير
أسعدني جدا تعليقك و إن البوست عجبك
:)
مش عارفة هتقدر تشوف ردي دة و لا لأ بس أشكرك فعلا
نورت
Post a Comment