Sunday, May 15, 2011

!! أرجــــــــوكم... ارجعوا بيوتكوا

Pic. taken from: mahaalaswad.wordpress.com


عــودة .. إلــى أعداد كــبيرة من الجرحى



إلى أصوات "رصاص" :( بقلب مـــصر



إلى بلطجية و أشخاص مجهولة بقنابل مولوتوف



إلى خـــوف و ترقب صامت في قلوب الجميـــع



إلى صـــور باهتة على شاشات التلفــاز لا يظهر منهــا شيء سوى ظلام الليل و بعض الدخان المجهــول





دخــان حــين رأيته اليوم تذكرت أحداث جمعة مريرة منذ شهــور قليلة كانت



عــودة إلى الجلوس أمام التلفاز لوقت متأخر بإحساس متعب بأني لا أستطيــع فعل شيء لإيقاف ما يحدث هنـــاك




! عـــودة... إلى دبابات تحاول إحاطة المطالبين بحقوقهم لحمايتـــهم........ من مجهولين


. . . . . . . . . . . . . . . . . . . . . . .




اللي بيحـــصل عند ماسبيرو حاجة تدايق أوي


و تقـــــــلق كمـــان أوي أوي




مع الناس إنها تطالب بحقوقها. دة حق ومفيهوش هــزار



بس هــو دلوقتي وقت المطالبة؟؟ مش نبني شوية بعدين نطـــالب؟



الاعتصــام كــان سلمي في بدايته مع ترقب و خــــوف كبيــــــــــــــــــر من كل المراقبين للموقف



دلوقتي هومش سلمي.. يمكن المعتصمين زي مــا هم . بس هم في مكانهم وهم عارفــين إن الفترة دي حرجة علينا كلنا و إن النظام السابق ليه ناسه اللي لسة موجودة وما هتصدق تلاقي مشكلة عشــان تكبرها أكتر و تأثر علينا جدا جدا



لــيه نديهم فرصة إنهم يشوهوا صورتنا و صورة اللي أنجزناه في الــفترةاللي فاتت؟



لـــيه مش نعبر عن رأينا بس بطريقة منظمة أكتر و نفكر و نخطط قبلها؟؟




بـــجد مــع الناس في إنهم يطالبوا بحقهم بكــل الطرق السلمية، بس يفكــروا الأول في الوقت المناسب لكدة



ياريت يفكروا في مصلحة البلــد و كــل المصريين حواليهم ومش يخلوا الصورة ضيقة أدامهم


. . . . . . . . . . . . . . . . . . . . . . . . . . . . . . . . .


الـــجيش المصري الرائـــع، المجلس العسكــري.... لسة فيه ثقة بيــننا



يــاريت يبقى فيه أحكــام رادعة أكتر من كدة



سمعنــا عن أحكــام فعلا رادعة لبلطجية كتير بيرهبوا المصريين و دي حاجة جميلة جدا... بس ليــه القــوة، الحسم، الصرامة و القسوة حتى اللي عارفين الجيــش بيها...... مش ظهروا بقوة و بسرعة في الأحداث دي؟



دي وســط البلد، و أكيد الموضوع كــان متوقع جدا




محتاجين على الأقل إعادة فرض لحظر التجول من العاشرة مساءا مثلا..عشان مش يؤثر على إنتاج البلد


محتاجين قانون صارم و أحكام رادعة ضروري و إلا المهزلة دي عمـــرها ما هتخلص



دي رســالة من بنت مصــرية.. لا هي خبير عسكري و لا مفكر سياسي


. . . . . . . . . . . . . . . . . .


يا شــباب مصر الرائعين... ياريت كــلنا نبقى بجد إيد واحدة فعلا مش كلام، دلوقتي كــل الناس بتتكلم عن الفتنة الطائفية و الحوادث و اللي بيحصل..... و نسيوا كتير عن المحاكمــات و مطالبنا الأساسية...و هــو دة اللي أعداء الثورة و أعداء التغيير عايزينه



يــاريت بجد نساعد بعض وننسى المطالب الفئوية دلوقتي خـــــــــــــــالص





يـــارب احفــــظ بلدي و خليها ترجـــع عظيمة أوي

7 comments:

Anonymous said...

هبة
المجلس العسكري مش هو اللي المفروض يثق فينا
احنا اللي بنعطي الثقة وبنمنحها وبنمنعها
....
معاكي ان كل اللي بيحصل ده مش لطيف
...........
لكن مين اللي كان متصور انها هتكون "بيس اوف كيك"
رغم اني ضد اللي بيحصل
لكن حق الجميع انه بيطالب باللي يحتاجه بدون قيد ولا وصاية من احد
.....
النظام السابق عمل كل اللي عمله ده بمنطق مصلحة البلد ووصايته عليها وانه هو اللي بيفهم وكل الشعب غير مؤهل للديمقراطية
"أصعب ما في الثورات ليس اولها "
بل قد يكون تفجير الثورة اسهل بكتير من ادارتها ...
لكن
مش معنى كلامي اني راضي عن اللي بيحصل ولا مبسوط منه ...
لكن مصر محتاجة اكثر
واللي افسده انظمة قمعية عسكرية في عقود صعب نغيره في ايام.
لكن انا على ثقة ان هنقدر ..
لكن اخيرا ..
المجلس العسكري
نحن من منحناه الثقة مش هو اللي لسه واثق فينا،، لان باختصار ده واجبه ومش منه ولا فضل منه ...
ويوم ما هيعجز عن تأدية واجبه او يتباطأ او يتوطأ "احنا اللي هنسحب الثقة دي ".
في كل الدنيا
الشعب هو مصدر السلطات
مش حد تاني
تحياتي
اتمنى تكوني بخير
:)

Wish I were a Butterfly ... said...

Anonymous,

مش مستريحة غني بكتب لحد مش أعرف حتى اسمه

عموما يا فندم...انا مش قلت خالص إن المجلس العسكري هو اللي المفروض يثق فينا

مش مستنية منه ثقة. اللي كــنت أقصده إن لسة بيننا ثقة... إحنا لسة واثقين فيه "دة قصدي وقت كتابتي يعني". مش اتخيلت عمري إن كل حاجة هتكون "بيس أوف كيك"....كدة على الأقل عرفت إن اللي كاتبلي حدمش عارف عني كتير يمكن. عارفة إن الموضوع مش بسيط و إنه هياخدوقت.طبيعي جدا... بس ليه نساعد في استمرار الفوضى؟؟

طيب..عايزة أطالب بحقي،و لازم طبعا هطالب بيه لأن دةحق من حقوقي وعمري ما هستغنى عنه ومحدش يعرف يمنعني عنه

بس..هو دة وقته؟؟ دة بس قصدي. حاسة إن إحنا عايزين البلد تبدأ تهدى... مع استمرار مطالبتنا، بس لو لقينا الدنيا فجأة قلبت و ناس بتتضرب و ناس ممكن تموت... يبقى ازاي كدة؟؟

عموما رأي حضرتك منطقي ويحترم جدا
بس بجدزعلانة إني مش عارفة مين،وسامحني أو سامحيني لو كنت غلسة شوية في البوست أوالرد. بــجد تعبت من استمرار وحب الفوضى دة

شكرا جزيلا على تعليقك دة

Anonymous said...

هو مش حب للفوضى يا هبة لكن
للاسف المجلس العسكري ما عندوش رؤية ولا يزال يحكم بمنطق النظام الماضي
يعني ايه قوانين تصدر من غير اي نقاش مجتمعي ومعاليهم في المجلس يقولوا لنا هي دي مصلحة مصر ...
لما هما عارفين مصلحة مصر كانوا فين لما الوضع وصل للشكل اللي خلانا نعمل ثورة علشان نفيره
.......
ثم لو هما عارفين الصح
ليه الحلول السحرية دي ما بتظهرش الا لما ننزل الشارع
ليه قبل الاعلان عن اي مظاهرات يوم الجمعة تحديدا تطلع قرارات عظيمة ...
عير ان فيه خلل كبير في البلد فلازم حد يقول "انتبه من فضلك ..هنا بعض الخلل"
غير ان اي استقرار هينفع يتبنى على اساسات خربانه
طبعا مش حابب فوضى وبالمناسبة احنا مش في فوضى لكن اعلامنا الجميل الللي كتير منه ولاءاته لم تتغير بعد للنظام السابق يحب تضخيم الامور
وبيتكلموا عن فوضى واقتصاد بينهار ...
صدقيني مهما كان اللي بيحصل دلوقت عمره ما هيكون اسوأ مما كنا عليه ..
اخيرا وعارف اني طولت
ياريت تدوري على تحليل دكتور أحمد النجار وده اقتصادي قدير شغال في مركز الاهرام للدراسات السياسية والاستراتيجية
عن الوضع الاقتصادي لمصر واسباب الازمة اللي قاعدين ننفخ فيها دلوقت ايه ......
حاجة اخيرة معلش
ما تم افسادة في اكتر من 30 سنه مش هيخلص في يومين ..محتاج شوية

Wish I were a Butterfly ... said...

شكرا على التعليق مرة تانية

بس فعلا واضح يا فندم إنك بجد متعرفنيش :(. لأنك بتقول-بتقولي رأيي وأنامعاك فيه عادي، بس برده مش فهمت اللي أقصده خالص ولا اللي بتكلم عنه .كمان...لو تعرفني-تعرفيني فعلا كنت هتعرف كويس إني عمري ما بتفرج على القنوات المصرية إلا من باب الهزار

عارفة دكتور أحمد النجار كويس "يمكن تكون والله أعلم".. تعرف إني كلمته كتير قبل كدة

شكــرا مرة تانية فعلا على اهتمامك بالرد... و ربنا يستر على البلد دي

Anonymous said...

هو الموضوع تحول لخناقة كده ليه ؟؟؟
ولا انا بيتهيألي :)

Wish I were a Butterfly ... said...

:)

بتهيألك




أنا بس مش حابة إني مش عارفة مين بيكتبلي. شــكرا

Anonymous said...

أنا اللي ظنتيه هو
:)
واللي يمكن أكون والله أعلم.. أعرف إنك كلمتي النجار كتير قبل كدة
:)