Sunday, March 8, 2009

رحـــلة صعب نسيانها :)




كانوا يومين كنت حاساني عايشة جوا حلم


بجد... بكل معنى الكلمة


هو فعلا كـــان حلم


و حلم كبير أوي كمان


:)


الحمدلله




يوم الخميس الصبح ظهر لي رحلة مفاجأة!!! مش كنت مقررة أي حاجة و لا عاملة حسابي. بس خلال ساعات قليلة كنت حضرت شنطتي الصغيرة "اللي لازم تكون خفيفةعشان الرحلة" و رحت مع أخويا على مكان التجمع




رحت جبل موسى


مع أصحاب أخويا طلعنا كلنا لفوق الجبل


مش هقول و أحكي عن التعب لأنه بصراحة لا يوصف


مشيــــــنا كتيــــــــــــــرـ و طلعنا سلالم كتيـــــــــــــــــــــــــــــــر.... بس لما توصل للقمة


بتنسى أي إحساس فات أصلا


بالعكس.. الإحساس الرائع هو إنك بتحس إن تعبك ومجهودك دة كله كان ليه لزمة




طلعت أنا و أخويا و كان معانا كشاف واحد فكنا دايما مرتبطين ببعض طول الطريق لفوق لأن من غير الكشاف........ :). من الآخر مش كنت شايفة الفرق بين الجبل و سواد السما حواليا


إحساس أكتر أكتر أكتر من رائع.... لما تبص فوقك تلاقي نجوم كتيرة جدا لدرجة تزغلل عينيك الحقيقة


:)


إحساس أكتر من رائع إنك تحس إنك قريب منها أوي، و لو مديت إيديك لفوق هتلمس النجوم دي فعلا


أخويا لما بص لفوق راح قايل


stairway to the stars


هي فعلا كدة


كل خطوة تطلعها تحس إنك قربت أكتر سبحان الله




كان فيه حاجة "مرعبة:(" بالنسبة لي


ودي يمكن الحاجة الوحيدة الوحشة في الرحلة بالنسبة لي


و هي


إحم إحم...... الجمل :). أيـــــــــــــــــــــوة. هو الجمل


طول عمري الناس تقول عليّ بحب الحيوانات أوي و متعاطفة معاهمومش بخاف منهمو بتاع....لكن إلا دة!!!! لما تكون ماشي مش شايف حاجة قدامك. وماشي في طريق مش يكفي أكتر من شخص يمشي فيه


في ظلام دامس!!!و فاهم إن كل اللي حواليك هوطوب الجبل و بس!!!! بعدين تفاجأ فجأة بأن الطوبة اللي جنبك بتتحرك


!!!!!!!!!!!!!!!!!!!!!!


دة كان الجمل


كــل شوية ألاقي واحد


على طول الجبل موجود الجمال. اللي ماشيين على الأقل هتاخد بالك منهم أوتبقى محظوظ لو الناس اللي قدامك قالت هييييي.خدوا جنب عشان فيه جمل جاي. لكن فيه صنف تاني:( قاعدين


لوحدهم


من غير لا بدو و لاحتى قرود


لوحدهم كدة!!! مش بيتحركواو لا بيطلع لهم نفس،و فجأة تلاقي راس بتتحرك جنبك


أنا كل شوية أصرخ صريخة صغيرة


:(


و مش قادرة أمسك نفسي لأن فعلا بتخض جداااااا


طبيعتي إني مش بتخض اصلا!!! و كمان طبيعتي إني ببقى بضحّـك جدا لما أتخض، بس مش بصرخ!!! إيه اللي حصل؟؟؟ معرفش


حتى جات مرة وكان حتى فيها استراحة صغيرة في حتة أوسع شوية فكان بدأ يبقى فيه نور من بعيد"شوية". و في ظل النور الخافت دة لقيت صف جمال... زينة للمكان الظاهركدة


صف يمين... صف شمال


:)


و انت عملتي إيــــه؟؟


جريـــت طبعا!! دي فيها سؤال؟


بجد جريت من غير ما أحس


وستر ربنا إن محدش من الجمال الطيبة زعل مني.و إلا كان زمانكوا بتقولوا و الله كانت بنت ساعات طيبة


:)


هانسى الحاجة الوحشة


و افتكر الكتيـــــــر الحلو


إحساس لا يوصف لما بدأنا نشوف قمةالجبل فعلا


و نعرف إننا قربنا للنهاية... للهدف اللي عايزينه من أول الرحلة


إحساس أروع و أروع لما تطلع فعلا القمة... و تشوف شروق الشمس


تستمتع بألوان السما الرائعة اللي مش بنشوف زيها كتير أبدا،وعمرها ما تكون بالصفاء دة


............................................................


إحساس بأة...... :) إحم إحم إحم كتيييييير يعني


فوق الخيال


لما في عز البرد و أنا لابسة كتير جدا أقرر لازم أقلع الجوانتي "القفازات يعني"..... عشان ألمس ال.......... :) الحاجة اللي عمري في حياتي ما شفتها غير في التلفزيون،و طبعا عمري ما لمستها


هقول عليها بس قبلها أفتكر الشروق و جماله


و الشمس و هي بتبدأ،و إحساس إن السما من عزالسواد يبدأ يظهر فيها نور شوية شوية


و إنك فووووووووق لوحدك تماما


الكل بعدماكان بينهج و فيه اللي مش طايقين نفسهم و قالوا عمرهم ما هيعملوا رحلة زي كدة تاني:)تلاقي كل الناس بأة على وشها ابتسامة فظيــــــعة،و راحة جميلة أوي أوي


في لحظة وصولي دي حسيت حاجات جميلة جدا


حبيت أوي المنظر إنك بتبص على جبال تانية أدامك لونها بني بس عليها شوية أبيض. رووووعة سبحان الله


بدأت أقرأ أول آيات في سورة الكهف لأني عارفة إن عمري ما هستشعر الإحساس دي غير يمكن بعدكتيـــــــــر أوي


كام مرة في حياتي ممكن أكون في مكان لوحدي بالطريقة دي


فوق أوي أوي كدة.... فوقي السما و بس وحاساني قريبة أوي


فجر يوم جمعة


ادعي براحتك. انت لوحدك فوووووووووووووق


يااااااه.بجد كنت حاسة إني بحلم، و اتمنيت لحظتها عمري ما أرجع هنا


................................................................




كان فيه حاجة عبيطة أوي في الموضوع:$ و هو إن أخويا قال لي و إحنا طالعين على عرض معين "مش فاكرة اسمه فبلاش إحراج"...عن لما الأكسجين بيقل، و قال لي مش تركزي معايا كمان شوية لو لقيتيني بقول كلام مش مفهوم


ضحكت أوي بس مش كنت متخيلة إن الموضوع جد أوي يعني :). بسمع عن كدة لكن عمري ما شفت




شوية و لقيت فعلا ناس بدأت تضحك من غير سبب،وشوية بدؤوا يخرفوا فعلا :)....و أنا كمان كان لحظات غباء بس بلاش أقولها أحسن


بس كانت فعلا مضحكة جدا آخر فترة دي


..............................................................


طلعت الرحلة دي من غير تردد كتير لأني كنت محتاجاها بطريـــــــــــقة.و كنت بتمنى بجد إن أقدر أغير جو، بس عمري ما تخيلت إني هغير جو بالطريقة دي


لحد دلوقتي بحاول أعيش بالذكريات و الأحاسيس دي




حاجة كمان غريبة أوي...كانت العصافير


و إحنا على القمة وقت الشروق شفنا عصفور..... صغير، لونه أسود...... عادي.وصفه يقول إنه عاااادي جدا


مش عارفة بصراحة إيه كان الغريب فيه!!!و لا قادرة لحددلوقتي أعرف إيه اللي شدنا ليه


كل الناس من غير مبالغة...كانت بتبص عليه


حتى السياح


وكأنه كائن مريخي!!! سبحان الله. فعلا مش عارفة ليه


كان عصفورعادي جدا، بس سواده جميل أوي أوي.زي ما يكون لسة مغسول حالا :). لونه اسودو فيه جزءصغير أبيض


شوية وواحنا نازلين لقيت عصفور..... أغرب من اللي قبله بالنسبة لي بس


كان لونه أحمر أوي


برده عصفور صغير عادي جدا، بس كان أحمره جميل جدا ماشاء الله


برده زي ما يكون مصبوغ كدة :). تبارك الخلاق فعلا


شوية و قعدت أضحك بأة........ لما لقيت تالت عصفور


و اللي كان لونه


................


أخضر!!! أوي


ساعتها كمان فكرت إن العصافير بالضبط زي لون الجبال اللي حواليها سبحان الله


الجبال البني العادي، جبال أحمر أوي، أسودطبعا فيه......و جبل واحد


ترابه أخضر:).اسمه جبل الدكّــة،و اللي بيقولوا إنه هو دة الجبل اللي ربنا تجلى ليه في حديثه مع سيدنا موسى و الله أعلم...... هوفعلا تراب،و صغنتوت كدة في وسط الجبال التانية :) بس أخــــــضر


مميزجداجدا :)ولون العصفور القمر




أحلى ما في الرحلة مش كان أي حاجة من اللي قلته الحقيقة


أحلى ما فيها..... :)هو اللي لمسته بإيديا


و بعد الشروق و إحنا نازلين مش صدقت نفسي لدرجة إني نمت عليه و مش ركزت في إن هدومي كلها هتبقى مية، بس المهم إنها مش فرصة كتير هتتكرر


:)


كان تلج


snow


بجد


زي ما بشوفه في الأفلام


بالليل وإحنا طالعين لما وصلنا لمنطقة كويسة فوق بدأت أشوف حاجات فاتحة جنبنا و إحنا مش فاهمين هو إيه، و لما سلطنا عليه الكشاف بدأنا نصرخ من كتر الفرحة كلنا،و كله بسرعة بص جنبه و معظم الناس مش قدرت تستحمل و لمسته


أول مرة في حياتي أشوفه


و إحنا نازلين كان خلاص الصبح


شلة أولاد قرروا يعيشوا الحياة طول و عرض و بدؤوا يعملوا كور تلج و يرموها على بعض :))) . بس المشكلة إن كان نصهم على جنب و الفريق التاني الجنب التاني.و معظم الناس كانت خلاص نزلت ومش باقي غير أنا و أخويا و بنت تانية....و في وسطهم...كان السلالم لتحت ...واللي طبعا اتضربنا فيها إحنا لأن كور التلج كانت قذائف


ودي كانت بداية معركة من الضحك مش انتهت غير بعدها بساعة تقريبا :)). بجدكان حلم


الحمدلله


بعدها بدأنا نكمل نزورمن على الجبل بس شوية قليلين اتأخروا عن الباقي عشان بناخد صور


الحمدلله كنت منهم :)،و لقيت أخويا اقترح حاجة جميلة أوي


أتأخرنا عن باقي المجموعة كتيـــــــــــــــــــــــــــــر جدا الحقيقة. بس بجدكانت تستاهل و استمتعنا أكتر منهم


اقترح نعمل


Snowman:)))))


و بدأنا كلنا في عمله و قعدنا كلنا مع بعض على التلج


و بسرعة جبت زلط صغير لعينيهوواحدة رفيعة وطويلة لمناخيره،و أعشاب جافة كانت موجودة قطعت منها عشان إيديه


وبدأنا كلنا نحاول نجمله و إحنا بنضحك على شكله


و الحقيقة كان نونو أوي أوي جدا :) بس كان جميل أوي


وكلنا حبيناه جدا لدلاجة إننا مش كنا راضيين نمشي و نسيبه


و اتصورنا معاه كتير جدا :)وواحنا ماشيين كنا حاسين إننا هنعيط


بيبي أوي :)،وتحفةجدااااا


مش نمت على التلج وبس


ومش قعدت عليه وبس


ومش شاركت في رجل التلج الصغير وبس


بس كمان طلعت حتة من التلج على الجبل و اتزحلقت عليها :))). زي ما طول عمري بحلم "في خيالي"و عمري ما فكرت في يوم إنه هيحصل في الحقيقة




كان يوم أقرب للأحلام


في كل حاجة فيه


بس مش كان فيه فرحة أكتر من لمس التلج بجد الحمدلله :)،و إحساسي إني مش نسيت الدنيا و فاتني الصلاة الحمدلله بجد




تغيير جو بمعنى الجملة اللي كتير بقولها وبسمعها.... بس مش شرط أحسها فعلا


بحمد ربنا على كل لحظة حلوة


وبحمد ربنا على الجمال الرائع اللي حوالينا


و نعمه الكتيرة جداجداجدا و جمال المناطق في مصر


بحمد ربنا على نعمة البصر اللي مش مقدرينها أبدا و كتير بيستعملوها في الغلط وهم مش مدركين قيمتها


و إنه قدّرلي أكون في رحلة زي دي في الوقت دة بالذات..... الحمدلله بجد


إحساس لا يوصف

بتمنى كل حد فيكو يحسه بجد. يـــــارب

قلت أحاول أفرحكوا معايا بدلما علطول نكد كدة :).يارب يسعد كل اللي بيقرأ




بحمدربنا أكتر و أكتر.... على أسبوع جميل أوي الحمدلله. مش متخيلة أسبوع زيه تاني قريب. بس أكيد بتمنى... لسة مش حكيت على يوم تاني في الأسبوع اللي فات دة، بس إن شاء الله هحاول قريب


سامحوني على عدم ردي على التعليقات وعارفة إنها مش حركة ظريفة ابدا ابدا بصراحة...بس عشان... :) كنت مشغولة "اول مرة اقولها و انا مبسوطة".مشغــولة


:)


ملحوظة صغيورة:الصورة دي هي بيبي التلج اللي عملناه.معلش غريب شوية بس دة مصريين أول مرة يعملوا راجل تلج يعني:)ومستعجلين عشان باقي المجموعة كمان.آل يعني

27 comments:

Mafrousa said...

الله يا بنوته
ربنا يسعدك دايما و يفرح قلبك
انتى بوصفك عن الرحلة حسيت انى كنت معاكم
جميله اوي
حسيت فيها بالحرية
حتى و انتم مقيدين و طالعين الجبل
بس فيها حرية
فيها انطلاق
تحياتي ليكي

sakayar said...

واااااااو
وااااااااو
واااااااااااو بجد
طلعتي فوق الجبل يا فراشة؟؟
الاحساس ده عالي بجد جداااا
أنا اهتميت جداً أقرأ التفاصيل كلها علشان أعيشها أنا كمان ... الاحساس ده فعلاً من الجميل اوووي الواحد يحسه ويعيشه حتى لو لحظات قليلة
عارفة ... هتقعدي كل فترة تفتكري وتقولي كنا يوم كذا ف جبل موسى .. من اسبوعين من شهر من من من لحد ما تروحي مرة تانية إن شاء الله ... ولما ترجعي هتقولي اول مرة رحناه كان يوم كذا :))
الذكريات الحلوة خصوصاً اللي بتترك أثر زي كده ف النفوس عمرها ما بتتنسى
يارب يسعدك ويباركلك ف حياتك وف كل اللي حواليكي
بس فيه عتاب بسيييط كده
مصورتيش ال ice man
ليه؟؟
الجمل وقلنا علشان ف الضلمة ... لكن الآيس مان؟؟
يلا خير اهم شيء انك انبسطتي ويارب يديم سعادتكم دايماً

sakayar said...

ملحوظة خفيفة
أحسن تفتكريني نظري راح ولا حاجة
:))
أنا بس عجبني شكل الآيس مان بس حسيتكم عاملينه آيس وومان مش مان فسألت عن المان نفسه
:))

salma mohamed said...

ماشاء الله,
جمييييييييل جدا,انا حسيت اني معاكم,
ربنا يسعدك دايما يا بوبة,
تعرفي انا ياما طلعت جبال وشفت الوانها واشكالها ومنها العالي والمنخفض والرملي والصخري والمنجرف والمسطح و....
بس ده كله وانا صغيرة لما كنا في السعودية,
كان دايما بيزعقولي لاني كنت صغيرة,
بس الصراحة كانت النتعة بتخليني اجازف واضرب بكلامهم عرض الحائط,
بس هناك صحراء مش تلج,
نفسي اعيش احساس التلج ده,
عمري ما تخيلت انه موجود في مصر,بجد جميل اوي.

... amr said...

مبسوط لك كتير و الله

:)))

ربنا يكتر من ايامك الحلوة دي :)

رئيس جمهوريه نفسى said...

ربنا يبسطك ويسعدك كمان وكمان وان شاء الله اليوم دة يتكرر تانى

mohamed ghalia said...

المهم إنك استمتعتى بوقتك
ربنا يسعدك دايما

قلب ينبض لله said...

انتي ماشوفتنيش في الرحلة دي ولا أيه؟:)
أصل بصراحة وصفك وأحساسك بالجو والرحلة خلاني أحس أن انا كمان طلعت الرحلة دي وعيشت نفس الأحاسيس
بجد بجد بجد يابختك
خصوصا بئي اللحظة اللي وصلتوا فيها لقمة الجبل بجد أحساس رائع وجميل

أنا أول مادخلت ولائيت بوست جديد طبعا شوفت الصورة وقولت الله هي هبة بتلائي الصور دي فين أتاريها أنتوا اللي عملينوا ومصورينوا
بجد تسلم أيديكوا

وحشتيني أوي ياهبة ماتتصوريش أنا فرحت بالرحله دي أزاي
فرحت بيها علشان فرحتك وخلتك مبسوطة وتعيشي أحاسيس جميله
أنتي تستاهلي أحلي حاجة في الدنيا خليكي فاكرة كدا كويس

سلام يا أجمل هبة في الدنيا

بسمة انور said...

الله

بجد بجد
يابختك
كان نفسى اوى اطلع الجبل اوى
واعمل رجل ثلج

بس يله بقى مسيرى هحقق حلمى

Wish I were a Butterfly ... said...

واحدة مفروسة

آه عندك حق :).حرية جميــــلة الحمدلله
وكلمة "مقيدين"دي مش كانت موجودة في قاموسنا يومها يمكن
:)
صحيح كان تعب ناس مش استحملته و ركبت الجمل لجزء معين من الجبل، بس بجد كان إحساس مش يتوصف
لو مشكنت رحتيها في حياتك..بجدبجد لازم تروحيها
تحححفة :). الحمدلله
ربنا يفرح قبلك انت كمان يا جميلة

Wish I were a Butterfly ... said...

Sakayar,

أيـــوة طلعت
:))
أكيد إحساس عالي!!ما هو فوق الجبل
:)
اممم... أنا حاولت فعلا أكتب بالتفاصيل أدما أقدر بس طبعا كتير مش اتكتب برده الحمدلله...كان نفسي فعلا اللي يقرأ يحس إنه متخيل المكان وكان معانا في رحلتنا
بجد رحلة تستاهل التعب الحمدلله

على فكرة فيه صورة جمل:) بس معاها أخويا. الآيس... :)معلش بأة هصوره المرة الجايةو أخليه يعمل باي كمان
الحمدلله على كل حال. اتبسطت أوي فعلا...شكرا لدعاءك. ربنا يسعدك ويرزقك كتير أوي دايما يا سكايار

Wish I were a Butterfly ... said...

Sakayar,

كلاكيت تاني مرة

يمكن عندك حق .بس الحقيقة إنه كان كويس بعدين واحد قرر يغير شكله شوية!! ساعتها أنا حسيته أقرب للبطة من المان و قعدنا نتتريأ على شكله
بس برده لينا عذرنا :).أول مرة نعمل واحدوإحنا مش شخص واحد فكل واحدو"وجهة نظره" للأسف..العادي يعني

على فكرة..بعدها حطينا على رقبته شريطة لونها أحمر كمان :).والله وحشني أوي الشخصيةاللي زمانه ساح دة

Wish I were a Butterfly ... said...

Salma Mohamed,

و لا أنا اتخيلت :). أو يعني... طول عمري عارفة إنه في على قمم الجبال
بس بصراحة عمري ما اتخيلت أشوفه ويكون بالكثافة دي. قلت "لو" لقيت يبقى هيكون مجرد حتت صغيرة. بس الحقيقة إنه كان رائع وكان الحمدلله في مكان كمان نقدر نوصل له
و غير دة كله... مش اتخيلت ألمسه و أنام عليه عمري :))).أتمنى تحسي الإحساس دة وتجربيه في الحقيقة يا لومتي

Wish I were a Butterfly ... said...

amr...

وأنا مبسوطة إنك مبسوط
:)
أتمنى تفرح أكتر و أكتر في حياتك إن شاء الله

شكرا لدعوتك الحلوة :). نورت

Wish I were a Butterfly ... said...

رئيس جمهورية نفسي


:)
يارب
و يارب كمان يتكرر فعلا

ربنا يسعدك كمان سيادة الرئيس و يبعدعنك الهم و الحزن دايما

Wish I were a Butterfly ... said...

mohamed ghalia,

استمتعت
و حسيتني بطير زي الفراشة فعلا
:)

بس شكلك مش بتحب المغامرات دي.صح كدة؟؟

Wish I were a Butterfly ... said...

قلب ينبض الله

و انا اقول... إيه الصوت اللي سامعاه دة؟ :)و اتلفت يميــن و شمال
كنت فين يا بنتي مش شفتك

و اسمع "تم تم"كل شوية. أقول إيه القلب اللي بينبض دة :)وافتكرته قلبي عشان تعبت...أتاريــــكي
:D
ياريتك كنت معايا فعلا.بجدافتكرتكوا كلكوا...و كان نفسي بجد أقول لكل اللي بحبهم يحسوا اللي أنا حاساه وييجوا معايا

آاااه.شامة ريحة تريأة!! تسلم إيديكوا؟؟ يا بنتي حرام عليكي.دة مش باين من الأرض أساسا :) بس إحنا ضاحكين على الناس ومصورينه صورة لوحده عشان يبان حاجة معتبرة :)وجنبنا في صور تانية تلاقيه بيبيييي
بجد يا رودة مش كنا عارفين نسيبه.كل شوية نبص له و نقول طب صورة كمان :)،كنت حاسة إني هعيط وأنا نازلة من الجبل أصلا
و أنا كمان فرحانة أوي.عارفة ليه؟؟ عشان كلامك بحسه من القلب أوي :). ربنا يسعدك أكتر مني ألف مرة يا جميلة

أستاهل أحلى حاجة في الدنيا؟؟........ أشك

نورتيني حبيبتي

Wish I were a Butterfly ... said...

BaSMa,

ان شاء الله هتحققيه
:)
لسة قدامك العمر طويل إن شاء الله يا بنوتة. لسةمغامرات كتير مش تقلقي

شكرا لزيارتك ...و على فكرة صورة البروفايل جميلة أوي ماشاء الله

Banota said...

إحساس لا يوصف لما بدأنا نشوف قمةالجبل فعلا


و نعرف إننا قربنا للنهاية... للهدف اللي عايزينه من أول الرحلة


إحساس أروع و أروع لما تطلع فعلا القمة... و تشوف شروق الشمس


تستمتع بألوان السما الرائعة اللي مش بنشوف زيها كتير أبدا،وعمرها ما تكون بالصفاء ده
ماشاء الله .. أسلوبك حتى وأنتى بتحكى جميل جداً .. أنا حسيت انى طلعت الرحلة .. وحسيت انى كنت هناك

..
أنا حبيت اسلم واقولك وحشتينى .. ومعلش انا عارفة أنى مقصرة وانى بقالى كتير مش بدخل .. بس ربنا واحدة عالم بالظروف .. يلا خلى بالك من نفسك يا هوبة

Unknown said...

الله انا كانى كنت معاك
بصحيح وصفك للرحلة سلس
وجميل اوى .عارفة انا حاسة شوية باحساسك لانى فاكرة اول مرة اركب الطيارة وكنا مسافريين نيويورك فعلا الطيارة طلعت فوق السحاب وبقى السحاب ده هو اللى تحتنا ياسبحان الله تحتنا وفوقناوحوالينا سبحان ربى العظيم وشفنا اللحظة اللى بتوصيفيها لحظة بزوغ الشمس من بين السحاب لحظة ما ممكن حد يوصوفها فى جمالها .
بلدنا جميلة اوى اوى اوى
وفيها كل الحاجات الحلوة
اللى فى بلاد برة بس
عايزة شوية اهتمام
مننا احنا .

يُشكر اخوكى وتشكرى انتى كمان على الرحلة الحلوة دى اللى لا كانت على البال ولا الخاطر.شكرا

Anonymous said...

عزيزتي الفراشه

مفيش أي هدايا من الرحله دي ولا أيه؟
طيب حته تلج
بلاش حته صخره ولو صغيره

انتي عارفه ايه احلى حاجه
انه مكنش حلم كان واقع عشتيه ولمستيه وده اللي يخليه زي ما قلتي
كأنك عايشه جوا حلم

بس هي الدنيا كده لحظه الم ولحظات فرح

اغتنميها

على الهامش

لو كنتي هتسمي الـ
snowman
كنتي هتسميه ايه؟؟؟

وحـــــــــــى القلم said...

واااااااااااااااااو
تحفه اوى وصفك لليوم ده
والاحلى انك غيرتى المود اللى انتى كنتى فيه
اظن بوصولك للقمه تخيلتى شعور الطيران اللى نفسك فيه ولا إيه ؟ :-))
بس هى الرحله دى تبع إيه ؟؟؟
أكيد مش جامعه ولا مدرسه يعنى
بجد انا مبسوطالك اوى يا بوبه وفى انتظار باقى الصور يا جميله
وسا محينى انى اتأخرت فى الرد

Wish I were a Butterfly ... said...

Banota,

انت كمان يا منمن : ).خلي بالك من نفسك يا جميلة

أنا مش زعلانة أصلا عشان تقولي معلش: ).. بس بكون حابة أتطمن عليكي يا توتة

ربنا يعدل لك كل الظروف إن شاء الله
شكرا على رأيك اللي بفتخر بيه بجد...و يللا.. عقبال ما تروحي رحلة كدة فعلا و تحسي انت باللي حسيته وأكتر

نورتيييييني

Wish I were a Butterfly ... said...

norahaty,

انت كمان وصفك لمشهد الطيارة وسط السحاب جميل أوي
:)
بس مشهدالطيارة دة ينفع كمان في البوست اللي قبل اللي فات تقريبا... بتاع لمس السحاب
:)

عندك حق. بلدنا روعة. عايزة اهتمام كتير الحقيقة، بس كمان للأسف عايزة ساعات تبقى أرخص شوية عشان أهل البلد يقدروا يستمتعوا بجمالها. طبعا مش كل مكان بس فيه فعلا شايفاهم محتاجين كدة

انت كمان شكرا على زيارتك و شكرا على تعليقك يا بنوتة. امممم..... صح : ) شكرا يا أخــــويا كتيـــــــر

Wish I were a Butterfly ... said...

إنسان مقيد

عارف إن فعلا كنت نفسي أجيب معايا تلج؟؟
:)
وكنت بعدما خلاص نزلنا كتير وبدأ التلج جنبنا يقل كنت آخد في إيديا الاتنين تلج وأمشي ألعب بيه و أفتفته لحدما يخلص آخدكمان حتة.. حتى أخويا لما بص عليا فجأة راح وطى راسه بسرعةو افتكرني ماسكة تلج عشان أرمي عليهم و قال خياااانة
بس الحقيقة إني فعلا كان كل إحساسي إني عايزة آخد معايا بس مش هقدر
:)
تأكد إني كنت هحب جدا آخدمعايا ذكرى بس مش عرفت آخد إيه أبدا غير الصور الجميلة الحمدلله
امممم...كأني؟؟ أنا فعلا كنت عايشة الحلم جدا

................
Snowman :)))
واحنا بنعمله كنا متحمسين جدا، بس بعدما عملناه راح واحد بص عليه باشمئزاز وقال سنومان؟؟ دة "جعبورة مان"!!والحقيقة إني واقفته في رأيه:)

بس أنا مش عملت فيه غير تجميع الملامح والايدين الصغيرة و عدل الجوانتي اللي فوق راسه
وإحنا ماشيين قعدنا نعمل له باي لحد ما مشينا بعيد:)،وساعتها واحدة قالت نسميه
Uzo
بس بصراحة مش فكرت في اسم لي ساعتها. كل اللي جوايا كان إنه بيبي أوي وبس. بعد سؤالك فكرت بس بصراحة مش عرفت اسم يليق عليه. يمكن .... بيانكو..أو حاجة كدة بس مش عارفة فعلا ليه اسم مناسب أوي
ممكن تسميه إيه حضرتك؟ : )
........
أغتنم لحظات الفرح؟؟ أتمنى تغتنمها انت حضرتك كمان. أتمنى بجد

Wish I were a Butterfly ... said...

وحي القلم

الحمدلله يا سمسم أنا فعلا غيرت جووكان جميل . كنت محتاجاه جداجداجداجدا الحمدلله
:)
امممم.... الطيران؟؟ قربت منه كتير أيوة

خصوصا فــــوق خالص وانت شايفة كل الجبال حواليكي والهوا جامد أوي

أكيد مش جامعة طبعا. منهم شوية أصحاب أخويا.امممم.... موضوع يطول شرحه :)، بس لو حابة ممكن أقوللك لو فيه رحلة تانية

دة بجد

باقي الصور؟؟ :(. مش أعتقد هينفع أنا آسفة. هحاول أضيف صورتين أو حاجة بس
لكن الباقي فيهم العبد لله:) فافهمي الباقي بأة. معلش بجد
أنا فعلا نفسي أوريها لأصحابي بس مش كل ما يتمناه المرء يدركه

مش تعتذري يا جميلة. ربنا يكون في عونك أكيد،و المهم إنك شرفتيني
:)

Lilly said...

Iam so happy for you specially that I saw this spark of happiness in yr eyes,when tellin me the whole adventure...wish yo can do it again baby:))but without the camel;)