Thursday, February 12, 2009

:) عندمـا أغضب... أخبر كعكة غريـــــــــــبة الطعم


من فترة كتيرة قرأت البوست اللي كان عند المدونة ""غادة"و اللي بحبها جدا من كتاباتها وبجد بحسها قريبة مني أوي أوي

قريبة من كلماتها و إحساسها وكل حاجة.واحدة من كتاباتها بحس إني أحب أعرفها ومش هحسها غريبة عني كتيرلو فعلا قابلتها في الحقيقة

واحدة بحب إحساسها و بحب طريقة تدوينها جدا جدا جدا من يوم ما اكتشفتها



الله أعلم طبعا بس دة إحساسي



المهم إن البوست كان بعنوان "عندما أغضب..أخبر كعكة" و لقيتني أعجبت جدا بالفكرة

طبعا مش فكرة الكعكة الكيكة نفسها لأني مش بحب الكيك أساسا:)،و لا موضوع إني أخبر كعكة لأني مش أقصى متعتي في المطبخ أبدا الحمدلله..... لكن موضوع إن لما أكون فعلا متدايقة أو مخي مشغول بحاجة.. أفكر في حاجة لذيذة و أعملها

أغير المود يعني... بس بطريقة مختلفة



الفترة الأخيرة كانت مش ظريفة شويتين الحمدلله... المهم إني قررت أعمل زيها بالضبط:)و أعمل كيك برده

و قلت لمامتي على القرار الفظيـــــع دة، و دخلت على المطبخ علطول



بصراحة كانت أول مرة "أقرر" أعمل كيك لوحدي. لأني مش من محبيه أبدا فعمري ما شدني إني أعمله مفاجأة لأهلي و لا ماما كلفتني بيه قبل كدة...يمكن عملته معاها كتير بس يومها قررت أنفذ المهمة لوحدي

وبدأت أدخل في المود و لبست مريلة المطبخ اللي جايباها لبيتي مستقبلا "آل يعني". . .و جهزت المكونات و الجهاز و كل حاجة

و بدأت في إزعاج أهل البيت الموقرين بصرت الكروان البلبلي الكناريني الرائع.. ألا و هو..... بلا فخر صوتي

و كل شوية أغني أغنية و أنا بلعب في المطبخ

.................................................................



الحمدلله مش كنت بعمل الكيكة عشان غضبانة.. بس لأني كنت في قمــــة خنقتي و ضيقي

و مش كنت عارفة أعمل حاجة تانية أغير بيها الإحساس دة

و كان كل همي هو إني أحاول أركز أد ما أقدر لأني و أنا بالحالة دي يمكن مش أعرف أركز كويس



مع البيض المخفوق بدأت أفتكر أول مرة في حياتي عملت بيض... و أد إيه كنت حاسة إنه إنجـــــاز ساعتها

و فكرت إن كل حاجة بنعملها مهما كانت صغيرة فهي في وقتها إنجاز لحد لما نعمل حاجة أكبر منها شوية



بدأت أحط الدقيق و البيكنج باودر و ساعتها افتكرت لعبة النفخ في الدقيق اللي بحبها جدا جدا جدا من صغري لكن عمري في حياتي ما جات لي الجرأة إني ألعبها لأني بقرف أي حاجة تيجي على وشي

:)

غلسة أنا عارفة



و في قمة انسجامي مع الفيلم اللي بيحصل دة لقيت مامتي دخلت المطبخ،ومش كنت لسة حطيت الكاكاو فاقترحت علي و قالت

إيه رأيك نعملها بالأناناس بدال الشيكولاتة؟؟

أنا: امممم...ماشي. مفيش مشكلة. و بسرعة رحت ناحية الدرج بتاع المعلبات لكن ماما كلمتني تاني و قالت: خلـــي بالك

شوفي العلبة اللي فيها التاريخ الأقدم و خديها. لأن كتير بنحط الحاجات بسرعة وبننسى نحط الحاجات الأقدم في متناول اليد الأول

رديت بسرعة و قلت لأ مش تخافي!! آخر مرة كنت "أنا" اللي طلعت المشتروات، و مش تقلقي خالص أنا باخد بالي من الموضوع دة

و بسرعة فتحت الدرج و بدأت أدور في التواريخ و أثبتت وجهة نظري أدام ماما و "وريتها" العلبة الأقدم في الأول إزاي

............................................

أخدت العلبة و الفتاحة و بدأت في محاولات الفتح الفاشلة

هه. واحد اتنين......مفيش فايدة.طب أفتح من هنا؟؟ طب من هنا؟؟؟

العلبة شكلها كانت محتاجة لتدخل جراحي عويص و هتاخد وقت

و هنا ماما بدأت تقلق و قالتلي أنا هعملها و انت شوفي العجينة و كمليها

قلتلها نو نوووو. أنا يا ماما هفتحها مش تقلقي

بدأت تفقد الأمل ..... فقررت هي تكمل مكونات الكيكة و بقت هي جنب الجهاز للأسف ومش بقى شغلي لوحدي

:(

و أنا لســـــــــــة مع العلبة

و بدأ وشي يحمّر و أنا بحاول فيها، و غيّـرت الفتاحة حتى.... إنها تفتح؟؟؟؟

أبـــــــــدا



مامتي حبيبتي خافت ... طبعا لأني قوية و عفية و ممكن أكسّر العلبة في غمضة عين طبعا طبعا:). هي خافت أيوة. بس خافت على العلبة الحقيقة

و صدقنا إن الموضوع فعلا في حاجة لتدخل أجنبي....... و استعننا بإدارة شقيقة تتمثل في أخويا "الصغير" وااااااااء.... عشان يفتح العلبة



مسك العلبةو بص على محاولاتي فيها

و ابتسم ابتسامته المميزة جدا

الســاحرة الســـاخرة

و قاللي هه.... كل دة بتحاولي فيها؟؟ هاتي هاتي

و بدأ هو كمان... واحد اتنين.... مفيـــــــــش

يبص عليها أوي!!! و يحاول تاني

وبدأ و هو متنرفز يقول آدي الصناعة المصرية الفاشلة!!! و لا يمكن دي كمان صيني

انتو كنتوا مسترخصين أوي فيها و لا إيه؟؟؟ و كان مش مصدق نفسه



لإحساسه الرائع بأنه توتو عضلات أحيانا

لحد ما الحمدلله بدأ بصيص من النور يوصل للي جوا العلبة

و قلنا الدنيا لسة بخير



فتح و فتح و فتح..... لنكتشف الاكتشاف المذهل

تاتاتاتــــــــــــــاااااا



بصيت أنا و أخويا في العلبة بعدما شيلنا الغطا

و أنا و أخويا في نفس واحد!!!! مشـــــــــــــــــــــــــــــروم

ميـــــن؟؟؟؟

أيوة أيوة

علبة مشــــــروم



عيب في التصنيع يعني؟؟؟ لا لا لاااا. خالص

دة عيب في التركيز

:$ :$ "$

كانت أخدت فعلا وقت كبير جدا كان فيه ممكن تكون الكيكة قربت تستوي يعني لو كانت دخلت الفرن



و أنا اتكسفت أوي بعد كلمة المشـــروم دي.....ومشيت من المطبخ بسرعة أجر أذيال الخيبة و الحمار و البقرة و كــــــل ذيل ممكن تتخيلوه

كنت هعيط أصلا من كتر الاستفزاز

و لا أنا....و لا ماما...ولا أخويا :) بص على العلبة

و ركزت في التواريخ بتاعة الصلاحية و بتاع........ومش بصيت للحظة على الصورة

دي صورة البيبي ممكن يفهمها

ييييييي

اتكسفت جـــــــامد :).و طبعا على ما قدرت أجمع نفسي من الكسوف الكسوف...... كان الموضوع خلص ومش باقي غير إن الكيكة تتحط في الفرن، و الحقيقة كانت ماما سايباهالي أحطها عشان أحس بقيمة الإنجاز اللي عملته

و من ساعتها....... :)قررت المرة الجاية أعمل بسكوت

و لا لا لا للكيك

و يا ويله اللي هيقوللي عايز كيك تاني . خصوصا لو بالأناناناناس "زي ما بنت أختي بتقولها". حرمــــــت

عندما أكون شوية زعلانة.....سآكل شوكولااااا
ملحوظة هامة: الكلام دة كتبته بعد مرور فترة كويسة على أكلهم للكيكة...و ذلك للتأكد من بقائهم على قيد الحياةو عدم توجههم إلى قسم السميّات بالقصر العيني
وشكرا

19 comments:

alshared said...

هههههههههههههههه

ضحكه كبيره أوي ما ضحكتهاش من كتير قوي

ربنا يكرمك المره الجايه أنا عايز نصيبي ده بما ان مفيش حد حصله حاجه يعني

هههههه

يولد الفرح من رحم المعاناه أو كما قال الراجل اللي قال الكلمه

:)

..........
دمتي عزيزتي بكل الود
أخوك

alshared said...
This comment has been removed by the author.
Lyssandra said...

هههههههههههههههههههه

إيه ده يابنتي ؟؟

ده انتي طلعتي حدوته

مش عارفه أعلق علي ايه ولا إيه ؟؟

علي لعبك في المطبخ ولا توتو عضلات ولا المشروم

ولا إيه

هههههههههههههههه

.......

بس بجد انا زعلانه من نفسي

أنا أبكيكي وانتي تضحكيني

:)

بس بجد مش كنت متخيله حاجه تخليني أضحك أصلا يافراشه

ربنا يكرمك بجد

دمتِ بقلبي أحلي فراشه

:)

mohamed ghalia said...

الحمد لله إننا اطمنا عليهم وإنهم على قيد الحياة
بس انا خايف يكون السم بطىء المفعول
ههههههههههههه
دمتى بكل الود

Anonymous said...

عزيزتي الفراشه

:))

عندما أغضب أأكل كعكه
كده أسهل

انا طبعا بحب البوست جدا وفعلا غاده حد رقيق جدا
وكان حظي حلو أني شفتها في مره

أنتي عارفه ان بطلتي المفضله في مسلسلي المفضل عندما تغضب أو تحزن تخبز كعكه

كنت بتقضي أيام كامله بتخبز

على الهامش

لسه أمبارح كنت باكل مشروم
صدفه غريبه

Rosa said...

ها ها ها ها

المهم انها في الآخر بعد دا كله طلعت كيكة مش أي حاجة تانية و كمان احلمد لله انهم بخير.

بألف هنا و شفا لهم كلهم و ليكي كمان إذا كنتي دقتي عمايل ايديكي.

أما بقى عن فكرة انك تغيري المود لما تكوني متضايقة أو غضبانة فدي فعلاً فكرة فعالة و خصوصاً لو شغلتي نفسك في حاجة تعمليها بايديكي مش شرط تخبزي كيكة ممكن تغسلي الأطباق تهدي دولابك و تروقيه تمسكي درج تفرزي اللي فيه و تروفيه.

أي حاجة من قبيل انها تشغل دماغك في سكة تانية غير اللي مضايقاكي و تشغل أكبر قدر من حواسك و مجهودك

ربنا يبعد عنك الضيق و يجعل أيامك كلها سعادة

salma mohamed said...

بالهنا والشفا,وعقبال بسكوت المرة الجاية بس يكون انجازك لوحدك,
وعلى فكرة موضوع انك تغيري المود بحاجة تعمليها وتشغل وقتك فكرة مجربة وهي طريقة ناجحة جدا.

قلب ينبض لله said...

ههههههههههههههههههههههههههههههههههه
مشروم ياهبة:D
طول عمري أقول عليكي طباخة ماهرة
:)
طيب أنا لسه مادوئتش الكيكيه دي
مابعتليش نصيبي ليه في رسالة علي الايميل
أو حتي سبتيهالي في أوف لاين ميسج:)

بس تصدئي البوست دا لذييييييييذ جدااا



و فكرت إن كل حاجة بنعملها مهما كانت صغيرة فهي في وقتها إنجاز لحد لما نعمل حاجة أكبر منها شوية

الله كلام جامد جداااااا

سلام ياقمر

sakayar said...

انا فعلا قرأت البوست بتاع عندما أغضب أخبز كعكة وقلت هو انا كنت قارئه عند فراشة؟؟
بس جميلة المغامرة ههههه
وعجبني طريقة التنظيم كمان بس ابقوا فرقوا بقى الفاكهة لواحدها والاكل العادي لواحده
يارب المزاجات تكون أحسن والحمد لله ان الكل تمام ومحصلوش حاجة بعد العملية الانتحارية دي

ملحوظة ... رديتها لحضرتك وشلت البوست الأخير بتاعي هههه
مش قلتلكم ف اقرب فرصة؟؟؟
بس لظروف تحديثية للبوست اللي قبله بجد
ربنا يكرمكم ويعزكم وتكونوا ف أحسن حال أختنا

Wish I were a Butterfly ... said...

alshared,

إيه دة؟؟ يعني مش خايف؟؟
مفيش حد حصل له حاجة"حتى الآن" بس
:)
بتمنى فعلا أكون قدرت أخلي أي حد يضحك من قلبه أو حتى بس يبتسم

ربنا يسعدك يا شارد

Wish I were a Butterfly ... said...

Lyssa,

بجد؟؟؟دة بجد والله؟؟
يـــــارب أكون نجحت إني أضحكك يا ليسا يا جميلة

مش تجيبي سيرة توتو عضلات عشان كدة هيزعل مني :). دي بس كان إحساسي ساعة الموقف بس هو ساعات بجد بيكون طيب
:)
خلي بالك من نفسك
مفيش حاجة تستاهل دموعك يا جميلة. خليكي دايما بتضحكي وبس

Wish I were a Butterfly ... said...

mohamed ghalia,

يوووووه
و بتقول كدة بس ليه؟؟

ما هو دة السر!! مفعوله بطـــــيء
وكدة مش هقدر أكمل خطتي لأنك كشفتني

:)
شكرا لتعليقك

وحـــــــــــى القلم said...

ههههههههههههههههه
موضوع شربات
بس ليه الكيك لأ متيأسيش ابدا
ده انا بحب الكيك موووووت ...
المهم انك غيرتى المود وهم لسه على قيد الحياه :-)
كنتى روقى واعملى بيتزا وحطي عليها المشروم :-)
بس انا زعلانه بجد :-(
ازاى تعملى كيك ومدوقهوش :-(
عاوزه حته :-)

Wish I were a Butterfly ... said...

إنسان مقيد

أنا فعلا و أنا بكتب عنوان البوست فكرت إن أول حاجة هتشدك ليه هو الاسم و توقعت كدة فعلا لأني عارفة إنك بتحب مدونة غادة،ومرة كتبت عن الندوة اللي فيها شفت رحاب و غادة وغادة
بس بصراحة مش توقعت إني هلاقي منك تعليق كمان!! شكرا ليك

مش هينفع عندما أغضب ءأكل كعكة..لأني مش بحبها، كمان لأن لما بكون متدايقة
مش بعرف آكل حاجة أساسا
مسلسلك المفضل؟؟
Grey's anatomy?و لا دة مش المسلسل المفضل أصلا؟؟
أيام كاملة؟؟؟ إيــه دة؟ ليه يعني؟
لأ. أنا كان مجردتغيير جو مش أكتر.والمطبخ حلو بس مش شرط الخبز دة

مشروم؟؟ :) بالهنا و الشفا. كنت فاكرة إن كل الناس مش بتحبه بس الحمدلله لقيت ناس لسة فيها أمل :). سعيدة بتعليقك

Wish I were a Butterfly ... said...

Om Hagar,

إزيك يا أم جوجو الجميلة؟
:)
لأ الحمدلله كانت كيكة و كويسة أوي الحمدلله.شكرا ليكي:)

عندك حق يا جميلة
أتمنى أقدر

شكرا لدعائك بجدبجد أوي :). ربنا يتقبل يارب...و يسعدك انت كمان

Wish I were a Butterfly ... said...

Salma Mohamed,

البسكوت هو أول صنف حلو عملته في حياتي،و الحمدلله بعمله جميل أوي
:)
تاخدي شوية؟؟
بس الكيك..... حرّمت

عندك حق. هي الحقيقة نتيجتها وقتيه بس. بس أكيد أحسن من مفيش

شكرا لمتابعتكدايما يا لومي

همسة قلم said...

هههههههههههههههههههههههههههههههه


ضحكتيني ضحك يابندقة

يابنتي مالك انتي بس ومال الكيك

خليكي في البسكويت .. انا شخصيا دقته من ايديك مرة وكان رائع بجد فعلا خالص اوي

مش عارفة والله اضحك على الكيك ولا على المشروم :D:D:D

اقولك

سيبك انتي وهاتي حتة :P

ربنا يبارك فيكِ يابندقة وتسلم ايدك ده كفاية انك قمت وعملتي

هانفتري يعني :D

Anonymous said...

عزيزتي الفراشه

مش مشكله أكلها انا
:)

رغم أني مليش تقل على الحلويات كتير

فعلا هو ده مسلسلي المفضل وبطلتي المفضله هي أيزي وكان في موقف مش كويس هو اللي بسببه فضلت أيام تخبز
بس صحيح دي تيجي برضه يعني البوست خالي من الوصفه وطريقه التقديم دي تيجي برضه

هو المشروم بصراحه كان على البيتزا - وجبتي المفضله- ولكن لو على حب المشروم يبقى عليكي وعلى منال العالم - تعرفيها- بتحط المشروم على كل حاجه بيتهيألي لو عليها هتحطه في كل الاكل

على الهامش

طيب بلاش طريقه عمل الكيك لو ممكن طريقه عمل البسكويت
:)

حسام غانم said...

هههههههههه

طيب ده الكيكة بالمشروم تبقى فكرة جامدة برضه