Wednesday, November 19, 2008

واحدة مفرووووووسة

كان يا مكان
في قديم الزمان
و لا يحلى الكلام
إلا بذكر النبي عليه الصلاة و السلام
هحكيلكوا المرة دي حدوتة... و هحاول مش أطول فيها إن شاء الله
الحقيقة إني شوية تعبانة ومش قادرة أصلب طولي يمكن، بس الموضوع استفزني جامد بصراحة
و بعد إذن "واحدة مفروسة".. أنا هنتحل شخصيتها و اسرق لقبها دة لمدة دقايق بس
إيه بأة الحدوتة؟؟؟
مرة كان فيه
جنــــــــــينة
جنينة؟؟؟ كل دة عشان تحكي على جنينة؟؟؟
أيــــــــــــــوة. جنينة، و شوفوا بجد و قولولي رأيكم
الجونينة دي كانت جنينة عادية جدااااا.... زي أي جنينة تانية فيكي يا مصر
فيها شوية شجر و كراسي مكسرةوكدة يعني
كانت جنينة ظريفة و شجرها أخضر الحمدلله
ما هو ف مصر ممكن تبقى الجنينة زرعها أصفر... و ساعات تانية بني محروق. يعني... حسب النفساوية و مكان الجنينة و ظروف تانية غريبة مش بنفهمها
مش هظلم الجنينة كتير. هي الحقيقة كراسيها كانت مكسرة لحد وقت قريب بس الحمدلله غيروا الكراسي كلها لما مش كان باقي غير كرسيين بس هم اللي سليمين
و إذ فجأة!!! و في يوم و ليلة كدة....... صحينا لقينا الجونينة شكلها اتغير خالص!!!! بجد
شكلها
اتغير
بدأوا في تغيير السلك الحديد اللي حواليها "اللي كان لسة متغير غالبا لنفس السبب قبلها بشهرين تقريبا"ومش محتاج طبعا لسة يتغير
و لقينا ورد أصفر و روز و أشكال و ألوان!!! و حاجات مش كــــــانت موجودة خالص قبل كدة
ماشي جميل جدا أكيد
و المفروض نفرح مش نزعل خااااااالص و لا للحظة
اليوم اللي بعده لقينا عمو بتاع العواميد جاي هو و صاحبه اللي بالعربية الكبيرة اللي بتشيلوا فوق دي ... و بدأ في تغيير كل العواميد الموجودة في الجنينة و حتى بقت لونها لبني أو فضي كدة.... مش رمادي يعني زي كل شوارع مصر
و فجأة!!! بأة مش لينا حجة لما بنت أختي تقول لنا عايزة أنزل الجنينة فنقول لها الدنيا ضلــــــــمة
دي بقت نورها زيادة حتى
خلاص كدة؟؟؟ لأ خـــــالص
بعدها بيوم أو يومين بالكتير... اتفاجئنا بمشهد رائـــــــع لمزارعين و عمال كتـــــــــــــــــــــــــــــير كتير بجد كلهم جوة الجنينة مش عارفة إزاي بصراحة
و كلهم ماشاء الله بيتحركوا!!!! ساعتها فكرت إن بلدنا فيها ناس كويسة أهه، و فيه ناس نشيطة و بتاع :)، و إنه المشكلة مش في الناس يعني
منهم اللي رايح و اللي جاي و اللي شايل و ..... كتير يعني
نفس مشهد خلية النحل الللي فيها كل حاجة بتتحرك دة و بيجننا كلنا لما نشوفه
بس اللي ضحكني اللي كانوا شايلين الفاس و قاعدين يضربوا في الأرض
بجد من غير مبالغة أنا حسيتهم أحسن من الفلاحين في غيطهم
!!!
هو فيه إيه؟؟؟
هم فجأة كدة افتكروا الجنينة المسكينة؟؟؟
طب إيه المناسبة طيب؟؟؟
و بدأ الناس في القيل و القال
و ترددت الشائعات
و كل واحد يقول اللي يحبه
و بابايا كان كل يوم ييجي يحكيلنا اللي الناس في المسجد بيقولوه و اللي العمال بقوا يقولوه "مؤخرا بس".... و هكذا
كنا في الأول بنفضل نضحك على اللي بيتقال
بس يوم بعد يوم لقينا إن شوية حاجات من الكلام دة ممكن تكون حقيقية!!و ساعتها تبقى بجد مسخرة
من يومين بالضبط بدأ الشغل "خارج الجنينة"!!!!! و بالتحديدفي كل الشوارع المحيطة بالجنينة
الشغل..... باختصار جدا
هو
إنهم شالوا الزبالة
هيييييييييييييييييييييه
مش صناديق الزبالة بس
Nooooooooooooooooo
لكن كمان بأة كل يوم تلاقي مش أقل من تلاتة من الزبالين بيشتغلوا بالمقشة
و مش بس كدة
:)
دول ماشاء الله زي ما يكونوا "مسحوا" الشارع مش نضفوه
تخيل معايا
حاول تتخيل حتى لو المشهد صعب علينا تخيله يعني
:)
شارع
في مصر
بلا تراب
!!!!!!!!!
أيوة بجد
دول كانوا بيكنسوا الرمل الخفيف اللي جنب الأرصفة
و ساعتها طبعا ...حتى لو كل اللي فات دة كان خلاك تقول "عادي.... ما بتحصل". دي تخليك تعيد تفكير و تشم ريحة حاجة غريبة في الموضوع
بابايا من الناس اللي كانت معجبة جدا بالموضوع... فكان كل شوية ينزل و يتمشى لحد الجنينة و يتفرج على اللي بيعملوه
و يوم بيوم بدأ يكلم العمال عشان يحاول يفهم إيه السر في الفيلم العربي اللي بيحصل دة
و في يوم لما لقاهم بيكسروا و يدهنوا رصيف "الجنينة الموقرة" انتهز الفرصة و راح قال لهم على بلاعة كبيرة موجودة على ناصية واحد من الأرصفة، قال إنه بدل انتو كدة كدة بتوضبوا الجنينة يبقى ليه تفضل البلاعة كبيرة كدة و بتاع
و المفاجأة إنهم اليوم اللي بعده................ اختفت البلاعة
!!!!!!!!!
تماما بجد
و ساعتها قعدنا نضحك على إن البلاعة دي بقالها سنين و أكتر من مرة حصل عندها حوادث و عربيات غرزت فيها و مهما الناس قالت.. مش كان بيحصل حاجة
واحدة من الشائعات اللي ضحكتنا جدا في الأول لكن النهاردة "نسبيا" بدأنا نصدقها للأسف... هي إن الجنينة دي اسمها على اسم منطقة في بلد أوربي
و لما مندوب من البلد دي عرف إن فيه جنينة بالاسم دة و شافها زعل جدا و قال مش يليق أبدا كدة و لازم تتغير و تليق بالمقام
بجد أنا قبلكوا قلت إيه العبط دة ومش ممكن أصلا!!! دي حتى جنينة جوة منطقة ومحدش هيسمع عنها عمره
بس اللي بيحصل دة بجد مش طبيعي!!! و النهاردة الصبح وصلتنا الأخبار بأن الجنينة بقت عروسة :) ... و ماليها أعلام ملونة صغيرة من أولها لآخرها
و أعلام كبيرة على البوابة و جنبهم قصريات زرع عمرها ما كانت موجودةطبعا :)، و "يقال" إن هيكون فيه افتتاح ليها النهاردة و المحافظ جاي و السفير بتاع البلد دي جاي و ..... حاجات ظريفة كدة
بعيدا عن إن الشائعة مش واقعية خالص لأن فعلا دة مش شارع رئيسي في منطقة مهمة و لا ليه أييييي لزمة
تفتكروا المفروض نصدق إن دة هيحصل عشان الأفلام اللي بتحصل دي و لا لأ؟؟؟
دة حتى من دقايق بدؤوا ينفخوا البلالين الهيليوم الكبيرة الهبلة دي... اللي بتكون موجودة في أي افتتاح
إيه بأة اللي فارسني؟؟؟
ببساطة
إن في يوم و ليلة ألاقي الحاجة ممكن تتغير 180 درجة بكل بساطة
مش موضوع تجميل لمكان و بس
لكن رصف و إعادة ترميم و تنظيف
و حاجات تانية أكيد
اللي فارسني
إننا لما نلاقي اهتمام، نشك في نفسنا و نتأكد إن دة مش لينا
كأننا مش نستحق كدة أبدا
اللي فارسني إن بلدي ممكن تبقى جميلة
بمجهود مش دايما يكون كتـــــــير أوي كدة
إن ساعات كتير ناس بتكون محتاجة حاجات بسيطة أوي و أهم مليون مرة من الاهتمام بشوية مزروعات مش محتاجة الكم دة من البشر و الأيدي العاملة..... بس مش بيلاقوا اي نوع من الاهتمام، لأ بالعكس كمان ممكن يلاقوا إنهم يتطردوا من بيتهم و يدوروا لهم على مكان تاني يقعدوا فيه
اللي فارسني بأة بجد بجد
:)
إني بفكر كمان أسبوعين بالكتير... ياترى المنظر هيكون زي ما هو و لا إيه اللي هيحصل؟؟
و ياترى هياخدوا معاهم "عدة النصب" اللي حطوها في الجنينة؟؟ و لا هيسيبوها؟
يللا حصل خير إن شاء الله
ملحوظة: أعتذر جدا عن عدم ردي على التعليقات. إن شاء الله هرد قريب و شكرا أوي بجد من كل قلبي لكل اللي سألوا و اللي علقوا
ملحوظة تانية: آسفة على الإطالة دي :). بس الكلام جاب بعضه و لقيتني بتكلم و ربنا يستر بأة
ملحوظة أخيرة معلش :$:
No comment moderation

22 comments:

فاتيما said...

للأسف يا هبهوب
هو دا اللى بيحصل
إستثناءات مع ان دا لازم يكون القاعدة أن خايفة من حاجة تانية بقى
أن الأرض دى يطمع فيها حد و متبقاش مكان عام خالص
و اللى حاصل دا مجرد بداية من اكتر
ربنايستر
و مبروك عليكم

Banota said...

حبييت اسلم واقول الى فى قلبى .. وحشتينى اوووووووووى ..
رجعه تانى باذن الله عشان اقره البوست تانى

وحـــــــــــى القلم said...

ازيك يا بوبه؟
وحشنى اوى انك تكتبى مواضيع كده بجد والله
عسى ان الاكتئاب يكون راح
انتى عارفه انا وانا بقرأ البوست ده مت على روحى من الضحك وقلت لازم اعلق ولو انى ورايه امتحان شفوى دراما بكره الصبح الساعه 8
اصل اللى انتى بتوصفيه ده حصل فى كليتنا المحروسه
وانتشر القيل والقال برضه وفى الاخر طلع ان الكليه جايلها لجنة مراقبة الجوده والاعتماد
الدكاتره بقى اتظبطوا اياميها فى مواعيدهم والكليه بان عليها النظافه والفرق كلها صراحة ما عدا الجامع اللى اصلا يعتبر معدش فيه جامع
بس يدوب بعد ما اللجنه مشيت من الكليه بدأ عودة الوضع الأصلى تدريجيا
كانوا كل يوم بيمسحوا ملى ملاى من الكليه مسح وليس كنس
وبعدين ولى هذا الزمن
على رأيك هو احنا خساره فينا نعيش فى نظافه؟؟؟؟؟
آآآآآآآآآآآآآآآه
أقول ايه بس
طولت اوى
هو انا كده اقعد ارغى ارغى واقول طولت اوى
ربنا يهدينى
سلام ابقى طمنينى عليكى

Rosa said...

طبعاً معاكي كل الحق انك تتفرسي و أنا كمان اتفرست لما عرفت ان حتى لما الحكومة اتشمللت و نظفت و عملت تجميل للمنطقة ماكانش علشان احنا بني آدمين نستحق نعيش في مكان آدمي و إنما كان علشان أوامر من دولة أجنبية مش عاجبها ان إسم جزء من بلدهم يطلق على منطقة سيئة بالشكل دا.

و الله برافو على الدولة الأجنبية دي عندهم غيرة على إسم بلدهم و الله يكسف حكومتنا.

أنا كتبت تدوينة النهاردة على موضوع له علاقة بالتدوينة بتاعتك دي و استشهدت بيها ابقي زريني و اقرأي التدوينة و قولي لي ايه رأيك

salma mohamed said...

السلام عليكم
اخبار الكلام المحبوس في القصر ايه؟
مجاش لسه اللي يحرره؟
انا كانت اول مره افتح مدونتك لما كتبتي الموضوع اللي فات وعلقت عليه بس معرفش ليه لما دخلت بعدها اشوف التعليقات ملقتش تعليقي
المهم بالنسبة لموضوع الفرسه من اللي حصل وحكتيه في البوست الاخير
ده حال كل مكان بيجي يزوره اي واحد من مهمين البلد
تلاقي الدنيا تقوم وتعد ويبقى المكان غير المكان وبعد مرور اليوم الموعود ترجع ديمه لعادتها القديمه
ربنا يفرس اللي فارسينا

انا اسفه على الاطالة
وفي انتظار فك الحصر عن الكلام حبيس القصر قريب ان شاء الله

mohamed ghalia said...

على فكرة ده بيحصل فى أى مكان يكون مسأول هيزوره
وبعد ما الزيارة تخلص كل حاجة بترجع تانى
يلا ربنا يستر بقى

ღϠ₡ღأمير الهدوءღϠ₡ღ said...

بجد بجد بجد استمتعت لما قريت الموضوع بجد
:)
وفعلا حاجه تخلي الواحد يتنرفز ان بلدنا ممكن تكون جميله بس لو كل واحد فينا اتحرك وعمل عهد مع نفسه انه يحافظ عليها

لكن للاسف احنا في واقع
ويمكن الحاجه بقى اللي تنرفز اكتررررر
ان صناديق الزباله البلاستيك اللي اتحطت عندنا في الشوارع كلها علشان الناس يبقى عندها دم وترمي الزباله في مكانها اتكسرت واتسرقت واتحرقت
يعني اقول ايه
غير اننا هنيجي يوم القيامه وهنتحاسب
بجد


بجد
بجد
نحاول نبدأ بنفسنا
:)

موضوعك جميل جداااااا يا هبه
وانا لسه على وعدي ^_^

اخوكي
احمد

نقطة مية said...

فعلا احنا بقى الطبيعي عندنا عدم الانضباط و الشىء الكويس هو الخارج عن سياق الحياة اللي عايشها المصريين
تحياتي

Wish I were a Butterfly ... said...

فاتيما

اممممم
ربنا يستر:).هتكبري الموضوع في دماغي لييييه؟
بس صح ممكن. ما هي حصلت في جنينة في المعادي قبل كدة و العاشرة مساء جابتها

بس إن شاء اللهى يكون كدة الموضوع خلص و عدى على خير:)،وشوية حرقة دم وراحوا لحالهم إن شاء الله
شكرا يا تمتومة

Wish I were a Butterfly ... said...

Bannota,

و انت كمان يا بنوتة وحشتيني

بعدكدة هسميكي "زوروني كل سنة مرة".:).مستنياكي ياللي من أول ناس حببتني في التدوين

Wish I were a Butterfly ... said...

وحي القلم

دراما؟؟؟ بكرة؟؟؟"ساعتها يعني كان بكرة".طب ربنا يستر و ميكونش اليوم كله بأة دراما عندك
:)
طب الحمدلله إن حظك جه في حاجة مش تزعلك قبل الامتحان :). سعيدة إني ممكن أكون ضحكتك ولو للحظة
انت بجد تستاهلي كل الخير

نفس السيناريو الفاشل هيفضل يتكرر كل شوية في حتة للأسف:) لحد ما البلد يتغير فيها حاجات كبيرة
ربنا يستر علينا

تطولي براحتك جدا مفيش حاجة

شكرا على اهتمامك أوي بجد،ويارب تكوني مسامحاني على اختفائي دة
هرجع قريب كويسة إن شاء الله

Wish I were a Butterfly ... said...

Om Hagar,

هم فعلا برافو على البلد الأجنبية دي
حاجة تكسف أوي بجد

قرأت تدوينتك،وفعلا أنا كمان حبيت الحملة أويوقت ماشفتها في العاشرةمساء

سامحيني لأني مقصرة أوي في زيارة الناس اللي بحبهاومنهم انت أكيد
شكرا أوي إنك فاكراني

Wish I were a Butterfly ... said...

Salma Mohamed,

ربنا يكرمك على كلامك الرقيق دة بجد
:)
شكرا على اهتمامك يا سلمى

معلش بجد أنا فعلا مش شفت تعليقك خالص.مش عارفة الغلط فين بس أتمنى مش تزعلي من الخطأ الغير مقصود دة

وكمان أول زيارة ليكي في المود الوحش دة؟؟ :$ معلش بأة. هحاول أصلحه قريب. ادعيلي :)

:))))) ربنا يفرس اللي فارسيننا.حلوة الدعوة دي
على فكرة اسمك غالي علي أوي أوي أوي. شكرا لتعليقك.نورتي البلوج

sakayar said...

ههههههه
سلامو عليكم
هو احنا كده دايما ... منشكرش النعمة
هههههههه
متهيألي كان فيه فانتازيا لخالد يوسف زي كده واتعملت فيلم او حاجة صح؟؟
كان فيه شارع عندنا برضه علطول عاملين عليه يافطة مكتوب عليها الوزير جاااي
تقريباً طلع الوزير ده محل بيبيع اكل او حاجة
هههههه
بس والله اللي بستغربله يعني طالما فيه ف الامكان نعمل كده وننضف ونظبط
يبقى ليه سايبينها كده؟؟
هو احنا بنستخسر ف نفسنا الحاجة الحلوة؟؟

يلا خييير
طولت انا
شكرا ع البوست

سمية قهوة said...

ربنا يستر و ميحولوهاش حديقة خاصة ولا يشيلو كل اللي عاملوه فيها بعد زيارة المحافظ

Doba said...

مش هقدر اديلك مبررات او اسباب للى بيحصل

لكن اللى اقدر اقولهولك بس

enjoy

وخلاص
انتى كمان وحشتينى خالص
لما تكونى صاحية الصبح وفاضية رنيلى عالموبايل اكلمك نرغى شوية

بوسى نفسك بوسات كتير
وبطلى تلعبى فى البلالين
هبة

Wish I were a Butterfly ... said...

mohamed ghalia,

المسئول فعلا جه
:)
و الأعلام والبلالين و المزروعات الكبيرة اللي كنا مستغربينها مشيت الحمدلله

بس سابوا لنا الورد الجديد :))). يارب يفضل شوية كمان قبل مايموت
و الزبالة اللي في الشوارع المحيطة لسة مش اتكومت بس أكيد هترجع تاني... أديني بفكر ممكن مش ترجع إزاي
شكـــرا لتعليقك :)

Wish I were a Butterfly ... said...

أمير الهدوء

الحمدلله إنك لسة على وعدك :). أتمنى كدةبجدوتكون فعلا بتدعيلي مش بتضحك عليّ

إحنا صناديق الزبالة "و لله الحمد" لسة موجودة... بس بييجي ناس غريبة يا بعدالفجر يا بالليل أوي أوي...وينكشوا فيها عشان ياخدوا الحاجات اللي ممكن يبيعوها و يتعاد تصنيعها وكدة.......وطبعا بيسيبوا كل الزبالة جنب الصناديق بعدها
:))
بس الحمدلله الصناديق موجودة

هي فعلا حاجة تنرفز،وفعلا تزعل لما تلاقيك مش عارف تعمل حاجة أوي

شكرالزيارتك وتعليقك يا أحمد

Wish I were a Butterfly ... said...

نقطةمية

دنيتنا بالشقلوب
:)

وحشني وجودك بيننا ياللي مش تعرفي أد إيه اشتقت ليكي بجد جدا

شفت البوست بتاعك قبل ماأعرف إنك كتبتيلي تعليق...فلما جيت هنا فرحت أوي لما لقيتك لسة فاكراني :).نورتي التدوين يا سر الحياة

Wish I were a Butterfly ... said...

Sakayar,

وعليكم السلام ورحمة الله

أيوة أيوة أكيد العيب فينا احنا
:)

أيوة بالضبط كدة. إحنا بنستخسر في نفسنا الحاجة الحلوة؟؟
سبحان الله

مش طولت خالص يا ساكايار.شكرا ليك
:)

Wish I were a Butterfly ... said...

آه ياني- سمية قهوة

الحمدلله زي ما قلت لأمير الهدوء... الورد باقي
:)
و نكتفي بهذا القدر.و الله أحسن من مفيش الحمدلله

أول زيارة ليكي في مدونتي.نورتي يا فندم :)

Wish I were a Butterfly ... said...

Doba,

I'm enjoying

:)

حاضر إن شاء الله هحاول اكلمك قريب ربنا ييسر. شكرا يا دوبادوبا