ماما! مشفتيش عمل إيه عشان يصالحها :)... بجد عجبني أوي أوي. كل شوية يعمل لها مفاجأة و تلاقيه في أماكن هي مش متوقعاها، و ..... و... بس أكتر حاجة عجبتني لما ملى أوضتها كلها ورد.. دايما أتخيل الحركة دي أوي أوي
ماما: آه ( و ابتسمت و قالت) كلام أفلام و تمثيليات بأة
ساعتها اتدايقت أوي من كلمة ماما :(، بس مش قدرت أكتمها جوايا فسألتها... ماما! لما كنتي بتزعلي من بابا مش كان بيجيبلك ورد ساعات؟؟؟
فسرحت و كأنها بتفتكر ذكرياتها بأة ..بعدين قالتلي أيوة طبعا حصلت أكيد
فسألتها: مرة واحدة يعني؟؟؟
قالتلي لأ طبعا. كتير
...............................
طب هو ليه الناس بتحاول تنسى الرومانسية و تتجاهلها؟؟
ليه بيحاولوا يهمشوها و يلغوها من قواميس التعامل كلها و كأنها عمرها ما كانت موجودة؟
ليه بجد؟؟؟
و ليه لما نقول "كلام أفلام" مش بنحاول نقلده و نطبقه في الواقع؟؟
مش كل اللي في الإعلام لازم نقول عليه وحش و مش ممكن نقلده.... إذا هي حاجة بتخلي أرواحنا تطير معاها و لو عرفنا إن المواقف دي حصلت مع حد في الحقيقة بنلاقي قلوبنا بترفرف في تخيل الموقف و تترسم على شفايفنا ابتسامة، يبقى ليه مش بنفكر نعمله؟؟؟
ناس كتير بتقول إني خيالية أوي لما أفكر كدة!! بس أنا طول عمري بفكر فعلا فعلا إن شريك حياتي "لو جه يعني في يوم من الأيام :)" لو هو زعل مني لا قدر الله أنا هحاول أعمل حاجات مبتكرة عشان أصالحه، و تكون اللحظة دي لحظة دايما نفتكرها و نفرح لما نفتكرها مش نزعل........ كتير أوي فكرت في موضوع إن الواحد يملى الأوضة كلها أو أي مكان عموما بالورد عشان حبيبه و تكون مفاجأة الطرف التاني لما ييجي يلاقيها أدامه.... مش شايفة إن الورد حاجة مكلفة أوي كدة!!! و لا الموضوع كله هيتطلب مجهود زيادة و لا وقت مش ممكن نلاقيه. بس متخيلين إحساس الحبيب ساعتها هيكون عامل إزاي؟
لما واحد يفكر يعمل لحبيبه مفاجأة بأي شكل بأنه يجمع الناس اللي هو بيحبها أو بأنه يعزمه في مكان هو بيحبه أوي ومش يكون قايل له من قبلها... مش دي حاجات جميلة أوي؟؟ و هيفضل الطرفين فاكرينها طول عمرهم المفروض؟؟
عارفة إن الدنيا مليانة هموم و دايما مشحونة بمشاكل و مشاغل مش بتخلص و بعد كدة عيال و مطالب أد كدة.... بس أكيد لو فكرنا في الموضوع صح أكيد لازم يبقى فيه لحظات حب
لحظات نفتكرها مع بعض لما نكبر
و لحظات تقربنا أكتر من بعض و تلغي رتم الحياة الممل شوية
لو مرة حتى على الأقل كل شهر غيرنا رتم الحياة بجد و عملنا مفاجأة رقيقة... حتى لو جوة البيت قررنا نغير الطابع العصري و استعملنا الشموع في المكان و لبسنا كلاسيك كأننا في مطعم فخم و غيرنا جو البيت كله . مش ممكن تفرق نفسيا "ولو للحظات" مع الطرفين؟
مش عارفة ليه شايفة كل اللي حواليا "أو معظمهم بالأصح" اتخلوا تماما عن الرومانسية في الحياة، و مش بأة فيه أي جديد غير لما تيجي بالصدفة
مش شرط نعمل حاجة نصرف بيها كل فلوسنا لأن مش كل حاجة بتتقدر بالفلوس و بس
مش شرط حتى إنها تكون حاجة مبتكرة مفيش بعدها... يعني إيه المشكلة لو في يوم راح واحد و مراته و اتمشوا على الكورنيش في وقت الجو حلو فيه؟ و لا راحوا اتمشوا في حدائق المنتزه براحتهم؟؟
ليه لما تبقى واحد عندها 30 سنة و لا حتى أقل تقول إحنا خلاص كبرنا على الحاجات دي؟؟؟
مش شايفة الواقع دة حاجة حلوة خالص!! و عارفة إن الدنيا مش وردية و إن كل حاجة محبطة... بس لو كان فيه جو من الحب و التجديد في العلاقة كل فترة دة أكيد هيقلل من الضغط اللي موجود بسبب الظروف و الواقع اللي حوالينا. يعني إذا كانت الدنيا لونها اسود و كحلي و بس إحنا ممكن نضيف ليها شوية ألوان خفيفة ليه لأ؟؟؟
ليه مش نتحرر من واقعنا دة شوية و نسيب مساحة للحب يتنفس، و نسيب مكان للرومانسية تعبر عن نفسها و لو بأبسط الطرق؟؟؟
بجد سؤال نفسي تشاركوني في إجابته
أعرف واحدة يوم عيد الحب صحيت من بدري أوي و راحت لفت العربية بتاعة خطيبها كلها بتل أحمر و حطت عليها ورد و بقت شكلها متغلفة زي ما تكون هدية!!! رغم هيافة الموضوع و إنها في الآخر لو فكرنا فيها بجد هي مش جابت هدية و لا حاجة.... بس مش دي حاجة هتسعد الطرف التاني و تخليه مبهور بخطيبته؟؟؟
عارفة إنه مثال أهبل شوية :$ بس دة اللي افتكرته اللحظة دي و كمان كل واحد عارف شريك حياته بيفكر إزاي و بيحب إيه و على الأساس دة المفروض يتصرف
أنا شخصيا حبيت حركة البنت أوي لأنها مش متوقعة خالص، و لما اتخيلت رد فعل خطيبها لما يشوف العربية لقيته هبكون إحساس حلو أوي... و الأهم إنه جديد
عارفة إني خرفت جامد المرة دي و حتى مش راجعت على الكلام اللي كتبته دة بس دة بجد لأني حاساه أوي و مستغرباه في الدنيا حوالي أوي. ياريــــت تقولولي فيه أمل و لا أنا بحلم زيادة؟؟؟؟
فـــيه أمل الناس تعبر عن حبها و تجدد في حياتها بطرق بسيطة في فترة بعد الخطوبة؟؟؟ و لا مجرد أحلام نادرا ما بتحصل؟؟؟؟
31 comments:
معاك ان الرومانسيه شيئ جميل جدا بس ليها اشكال كتير جدا ، وفي رأيي اجمل ما فيها نظر من عين لعين ساعات بتلخص كتير قوي من اللي جوانا ، لكن ده طبعا ما يغنيش عن كل الكلام الجميل اللي قولتيه .
لكن صدقيني لو فيه اتنين بيحبوا بعض مش هيستحيل عليهم اختراع وسائل علشان كل واحد فيهم يعبر عن حبه للتاني .
العنوان
مش موافقة
او ثورة الرومانسيه
او بلاها النمطيه في الاحساس
انا لما بلاقي حوليا
امور مش عاجباني ودا كتير من الامور الطبيعية التي يحياها الناس امر واقع وارفضها انا
اقول في سري مش موافقة اكون طنت فلانة او جزء من علاقة في أسرة كأسرة فلان
وممكن ساعات اتكلم مع ماما
تقعد تقولي الواقع والحياة
وتقعد تسرد ليا قوانين السابقين
استفز جدا للواقع اللي بيتظلم معانا لانة معملش نفسة احنا عملنا
واقولها خلاص هنشوف سيناريوا حياتي كله هغير فية كل اللي مش عاجبني
تضحك مني زمان وكانت تفتكرة كلام هيموت لما أكبر شوية ولحد النهاردة انا هذا الشخص اثور علي ما لا يعجبني
ومن ضمنها طبعا الموضوع دا
لية تبقي الرومانسية مرحلة خداع ونفاق في حياتنا تنتهي علي الطف الاحوال بعد الطفل الاول
لية مش بنقلد النبي في رومانسيته حتي وهو عندة 60 سنه
لية بنقيس الامور بمكيالين في الاسلام
لية شيفنها تضيع وقت
هي ايوة تضيع وقت قبل ما يكون عندك اسرة لكن بعد الاسرة فرض وثواب وحسنات وسعادة وراحة بال وحفظ من الغلط
واتزان مع الطبيعة الانسانية اللي بنفضل خيفين تنتصر علينا في الحرام ليه اول ما يجي الحلال نستخسر
والمواضيع دي متسهلهشويتين في عصرنا دا لتنوع مجالات الافتكاس ولتطور صناعات تخدم المواضيع دي
ابقي فكريني اقولك علي حاجة
عارفه
انا كنت زيك كدا
الأحلام دى كانت احلامى بالظبط
لحد ما خطبت
وساعتها عرفت ان الأحلام بتفضل احلام
وانفصلت بحثا عن حلم جديد
ومازال السؤال بداخلى
هل يوما ستتحقق الأحلام؟؟
ازيك ياهبة؟
بصي في ناس رومانسيه أوي اوي أوي مش اي كلام يعني
والناس بتتريء عليهم وبسمع تعليقات زي أيه الكلام الفارغ دا والله انتي فاضيه يابنتي كبري انتي عامله كدا ليه وهلم جرا
بس لآ أحلي حاجه في الدنيا دي الرومانسيه مش لازم تكون في الحب بس
انما رومانسيه في علاقتك بنفسك بأصحابك بأهلك حتي بألاشياء اللي بتملكيها
واللي يتريء يتريء
وماتحطيش في دماغك كلام الناس كتيير
أه وأعملي المفاجآت الجميله لحبيبك
بجد يابخته:)
والله انت عسل وبوستك تحفة
انا بحلم وبفكر زيك كده وكل خوفى انى ارتبط بشخص لا يقدر رومانسيتى او يسخر منها
كل خوفى انه لو كان رومانسي بعد الجواز يتحول .. وتبدأ الحياة تبقى مملة ورخمة
مش عارفة ممكن يحصلى ايه
على كل حال
كل شيء فى الدنيا نصيب
بس خالى بالك
ممكن اتنين يكونوا بيحبوا بعض جدا وميقدروش يستغنواومفيش فى حياتهم ورد ولا شموع ولا حاجات من دى .. بس خوفهم على بعض ظاهر فى كل كلمة وفى كل تصرف
كفاية انها تبقى تعبانة تلاقى الخوف فى عنيه والقلق مش بيفارقه والوجع اللى فيها كأنه فيه
انا شايفه برده ان دا نوع عميق جدا من الحب .. ويا حبذا بقى لو اتجوزت واحد بيجمع بين الاتين .. رقة القلب وخوفه عليا ... ورومانسيته اللى تغرقنى مفاجأت
-----------
نسيت اسألك لو مليتى الاوضة ورد ... مين هينضف الورد دا ويروق الاوضة - بين قوسين وش بيطلع لسانه
-----------
تحياتى يا جميل
ربنا يكرمك بكل خير وبكل حاجة بتتمنيها
:)
كتير بيكون الواحد مخطط انة يعمل حاجات كتيييرة ... بس للاسف .. التخطيط بيكون شيء و الواقع شيء مغاير .... متتخليش عن رومانسيتك .. بس ماتخليهاش تبعدك عن الواقع ... عشان ماتتصدميش .... تحياتي
كلامك جميل اوى عبر عن اللى جوايا انا بسمى الموضوع ده اتنين مجانين اتجوزو بعض
الناس هى اللى بتتعس نفسها علما بان احسن نجاح واكتر نجاح بيخلى الانسان ينجح فى كل حاجة هو النجاح مع شريك حياته
كلامك جميل و عاقل جدا بلس الغلط فى الناس هى اللى مش قادرة
تفهم
Anonymous,
أكيد
معاك في كل اللي قلته
و أنا اللي قلته و اللي فكرت فيه مجرد أمثلة، ونقطة في بحر كبيييير أوي من الحاجات اللي ممكن تحصل
الموضوع بالنسبة لي مش كان أمثلة بتعبر عن الحب أبدا، بس هو سؤال "ليه"اختفت الحاجات البسيطة اللي بتسعد الناس
أتمنى تكتب الاسم بعد كدة لو سمحت.. شكرا علىالتعليق :)
حبيبتي البعيدة عني
فكرت في "مش موافقة"دة فعلا :) بس في الآخر مش لقيت عنوان برده فقلت خلاص. بس عجبني ثورة الرومانسية دة أوي:). انت صح إحنا اللي صنعنا الواقع دة في الآخر بدليل إن فيه ناس بنحسهم عايشين في عالم تاني و ناس نحس فعلا بيوتهم بتكون جنة صغيرة... يبقى فيه أمل، ويبقى العيب مش في الزمن وبس لكن فينا
أكيد معاكي في كل كلامك اللي بعدكدة ومش أقدر أضيف عليه حاجة ماشاء الله عليكي بجد
خليكي ثائرة ولا يهمك :) إن شاء الله ربنا هيرزقك باللي يسعدوكي أوي و يغيروا حياتك سواء أشخاص أو غيره
آه صحيح... ابقي قوليلي على حاجة
:p
آااااه نسيت حاجة تانية..نسيت أقوللك إني بحبك أوي
Blue Wave,
:)
مش عارفة
بس إن شاء الله تتحقق في يوم من الأيام
يارب تتحققلك كل أمنيات حضرتك قريب أوي
نورت البلوج
قلب ينبض الله
هاهاهااااي
يا بخته؟؟ :)
طب مش لما ييجي الأول؟؟
و بعدين دة هيكون الماميتو بتاع هو داعية عليييه :) مش يابخته
:p
عارفة إنك بتتنرفزي من كدة بس سامحيني...أصل يا بخته دي كبيرة أوي بصراحة
المهم.. معاكي جدا جدا في اللي قلتيه و فعلا سيبي اللي يتتريأ يتريأ. إيه المشكلة لما نحلم شوية ونعيش فوق السحاب؟
:) بحب أوي رقتك
و بحب أوي كلامك
الرومانسية فعلا في تعاملك مع كل حاجة أنا بحسها كدة أكتر،و إنك تفرحي أصحابك بحاجات بسيطة دة إحساس مش يتوصف أصلا
النهاردةماما جت فجأةلقيتني بحضن كراسةعندي بحبها. تفتكري ممكن نعديها رومانسية مع الحاجات اللي بملكها ولا..... :)؟
شكرا يا أحلى قلب على كل حاجة. ربنا يكرمك ويبلغك رمضان ياجميلة
حدوتة
:)
آمين يارب
شكرا أوي يا توتة
وجودك هنا أسعدني أوي عشان انت حد بفكر فيه كتيرأوي و دايما قلقانة عليكي ونفسي أعرف أخبارك مع إني مش أعرفك
أنا كمان خايفة نفس الخوف بتاعك دة... بس ربنا إن شاء الله مش هيرزقنا غير باللي فيه الخير لينا زي ما بتقولي
أكيد... اللي انت بتقوليه هو أهم حاجة..إنك تحسي بالحب في كل كلمة وفعل، وحتى لو بلغة العيون وبس
مش شرط وردولا حاجة بجد:) بس دة كان مجرد رمز عندي للي عايزة أقوله
نورتي يا أحلى حدوتة
Amr,
حاضر
مش هخليها تبعدني عن الواقع :)
بس متخافش من موضوع الصدمة دة. الدنيا كلها صدمات و أنا شايفة اللي حواليا فمش متوقعة أتصدم جامد يعني
شكرا لتعليقك
قررت أكون عانس
:)شكرا على تعليقك يا بنوتة
و صح لو كان البيت سعيد أكيد هيكون ليه تأثير كويس على اللي أسرتهم و بالتالي على اللي حواليهم وفي شغلهم و كدة
لماقرأت اسمك قلت أنا شفت الاسم دة فيييين قبل كدة :) بعدين افتكرت إن آيةصاحبتك كانت كاتباه على الماسنجر
:)
انتو لسة صغيرين ووردتين حلوين بجد. بلاش القرارات الصعبة دي
نورتي البلوج وشكرا على تعليقك القيم
مادمتى ترفضين هذه المبادىء وتفضلين الرومانسية
فلتطبيقها إذن بحق وتحققيقها فى حياتك ولتجعلى لها لحظات ولمسات دائمة حولك
رزقك الله بمن يستمتع بتلك الروح العاشقة
===============
الميزان محب جدا للحب وخاصة للورد
وش بغمزة
====
سلام يا طيبة القلب
هبة
علي فكره انتي صح ..
و بكرة تحسي بالفرق لما تلاقي ان حياتك مختلفة عن حياة الناس التانيه
خليكي علي مبدئك
الرومانسية مفتاح من مفاتيح السعاده
للاسف الناس فاكراها ضعف او ان الحياه كلها هتبقي رومانسية و سهتنه
لكن لو بقت نمط للتعامل .. أكيد الحياة هتفرق
تحياتي
هذه الزياره الاولي و لن تكون الاخيره بإذن الله
ياسمين
نوته و قلم
Doba,
حاضر
:)
ربنا يكرمك يا أجمل هوبا في الدنيا
بتنوريني بتعليقاتك المميزة دايما
:)
عاقلة على أرض الجنون
تفتكري؟؟ هقدر بجد تكون حياتي مختلفة؟؟
أنا فعلا ناوية كدة بس مش عارفة إيه اللي ممكن يحصل
شكرا على رأيك.. إن شاء الله مش تكون الزيارة الأخيرة
نورتي بتعليقك الرقيق يا ياسمينا
اول مرة قريت البوست ده توقفت عند موضوع العربية والورد دي وافتكرت اغنية لايهاب توفيق عمل نفس الموضوع بس كان بيصالح مراته ردم العربية ورد
كانت فكرة مبهرة بالنسبة لي
قلت اللي قال على الفكرة دي دماااااااااغ
بس ف الاول والاخر الرومانسية دي احساس داخلى بيتولد مع الانسان مش صفه مكتسبة وحتى لو قدرنا نكتسبها مش هاتتحس
علشان الموضوع لازم يكون طالع من القلب
ربنا يكرمك بحياه تغرقي فيها رومانسية
ولا شكلك بتعرفي تعومي؟
مش عارفة اوافقك و لا لأ
لكن أنا عارفة ليه الناس بتحاول تنسى الرومانسية ، عارفة ليه ؟ لأن لما في يوم الرومانسية دي بتصبح ذكري بيكون الإحساس مؤلم أوي
لكن ده مايمنعش اننا لازم نعيش لحظات السعادة لو احنا فعلا سعداء بالشخص اللى معانا و حاسين معاه بالأمان
لكن بردو من غير ما ننسى اننا عايشين في واقع
يعني مثلا تخيلى لو احنا عملنا حركة زي بتاعت الورد دي و الطرف التاني في مشكلة حقيقية ما تقوليش انه هيكون مبسوط لأ طبعا هو اللى يبسطه أكتر في لوقت ده انه يحس ان اللى معاه حاسس بمشكلته و متأثر معاه
يعني مش في كل وقت بتكون الرومانسية هي مصدر السعادة ، هي بس المشاعر الصاقة اللى بتحسس الإنسان بالسعادة
تحياتي يا قمر
واللهي انا معاكي 100 %
وانا شايفة ان احنا اللي بنموت فينا الاحسايس وبنستسلم لرتابة الحياة بس المشكلة ازاي الناس تقتنع بالكلام دة ان الرومانسية مش محتاجة غير كلمة حلوة مش حتكلف حد حاجة ان نقلها من ان إلى اخر
ولـــــو
ردم العربية؟؟ طب الملافظ سعد طيب
:))
لا فعلا الكلمة وصلتلي المعنى اللي تقصده جامد ومش كان فيه كلمة تانية هتوصل المعنى كدة
أكيد لازم يكون إحساس داخلي وطالع من القلب أوي أوي، بس زي ما ناس قالت في تعليقاتها اللي فاتت، الرومانسية مش ضروري تكون ورد ولاحياة مليانة شموع و كدة لأ خالص، بس حتى لو مجرد كلمات بسيطة تحسس الناس بالحب.. يعني لو الكلمات دي طالعة من القلب بجد بتفرق أوي
بس حتى الكلمات و النظرات و المعاملة الحنينة دي شايف الناس بقت بخلانة بيها!!! و دة اللي مزعلني
بعرف أعوم كويس أوي أوي الحمدلله، بس في دي معنديش مشاكل إني أغرق :)
نورت البلوج بعد طول غياب يا ولو
الحلم العربي
مش في كل وقت بتكون الرومانسية هي مصدر السعادة ، هي بس المشاعر الصادقة اللى بتحسس الإنسان بالسعادة
الله على كلامك يا حلم :). معاكي في كل كلمة فيه، بس أنا مش قلت الحياة كلها تبقى رومانسية، وبجد مش كان قصدي خالص النوع الواحد بس من الرومانسية اللي وصل لمعظم اللي قرؤوا كلامي
مش كل حياتنا أيوة، بس كمان لازم يكون فيه لمسات جديدة في حياتنا كل شوية.. دة اللي قصدته، وأكيد فيه وقت مناسب لكل حاجة
مش يكون الراجل عامل حادثة و أنا عايشة في عالم تاني مثلا :)
شكرا على تعليقك المميز يا حلم، منكم نستفيد :)
Salma,
الحمدلله إنك معايا في كلامي يا سلمى :)
بس فعلا فيه ناس كتير مش مقتنعة أوي بكدة
كمان لاحظت إن معظم اللي موافقينني في الرأي بنات. تفتكري إيه الحل؟؟
:)
انا مش شايفه انك هبلتى فى الحقيقه الهبل اننا نضيع العمر من غير ما نعبر للى بنحبهم عن حبنا ونستمتع بالحب ده
الحاجات الصغيرة والبسيطه دى ممكن تبقا زاد الرحلة يعنى الاكل اللى يغذى العلاقه مع مرور الوقت وحتى فى الاوقات الصعبه احيكى بجد على البوست اللى من غير عنوان ده
اصبح فكر
وعاده
ممكن
احنا
نغي الفكر ده
لو احتفظنا
بفكرنا احنا
^^
أكيد المواقف اللي كنتي بتتكلمي عنها مع والدتك من مسلسل نور التركي
بيني و بينك المسلسل كان حلو قوي و ملئ بالرومانسية كان عاجبني قوي تفاني بطلة المسلسل في الرومانسية دايما تسامحه و دايما تعمل له مفاجآت و دايما واقفة جنبه
تفتكري في وسط الحياة الصاخبة اللي عايشينها ديي ممكن نكون زيها؟
عصفورة من الشرق
الهبل اننا نضيع العمر من غير ما نعبر للى بنحبهم عن حبنا ونستمتع بالحب دة
كلامك عجبني أوي
و فرحت أوي إن فيه ناس لسة بتفكر كدة
ربنا يرزقك باللي يقدرك و يحبك كدة بجد
شكرا لتعليقك :)
أمير الهدوء
صح
يا
أحمد
:)
نورت
Om Hagar,
أيييوة :). إنه هو
هو فعلا المسلسل كان رومانيسة صعبة أوي
و مواقف الاتنين كانت فعلا مثال ممكن يحتذى بيه لو عملناها صح
نورتي كتييييير أوي من هنا لبكرة :)
و الله انا شايفه ان موضوع الرومانسيه ده ممكن تلاقيه موجود فى فترة الخطوبه وكتب الكتاب و بداية الجواز لحد اول مولود
بعد كده اغلبهم بقى ...عنيكى ما تشوف الا النور
:-)
حتى لو الست فكرت تعمل شئ رومانسى اغلب الرجاله تلاقيهم ميبدوش انبهارهم اوى ساعتها الست تلاقيها احبطت وتحلف انها ما عمله كده تانى
اعرف واحده راحت مره صبغت شعرها وعملتله فرد سنوى
قام جوزها قالها ايه اللون المقرف اللى انتى عملتيه ده؟؟
ساعتها طبعا احبطت جدا نفسيتها اتقفلت صح ممكن يكون اللون مش عاجبه بس كان لازم يبدى مثلا مفاجأته وانبهاره بالنيولوك اللى عملتهوله
عموما اظن انها بتختلف من شخصيه لأخرى وفرق السن بين الزوجين
معلش شكلى كده طولت زياده عن اللازم
Post a Comment