لخبطة

ملحوظة هامة قبل ما أي حد يفكر يقرأ، إذا كنت شخص بيدور على الاستفادة فاعذرني جدا لأني بحاول أستعيد نفسي، و بكتب كلام مش يهم أي حد بس عايزاه يخرج من جوايا يمكن يساعدني دة... يعني البوست دة مجرد كلام مش راكب على بعضه...لأن دة اللي بيعبر عني دلوقتي.

اللهم بلغت.. اللهم فاشهد

كل واحد فينا بيمر عليه وقت يحس بالضيق أوي و بأنه مخنوق ومش عارف يعمل إيه في نفسه... ساعات حتى الحالة دي مش بتكون مصحوبة بأي أسباب!! و ساعتها بتبقى حاجة بشعة بس يمكن مقدور عليهاو ممكن الواحد يتغلب عليها لو عمل حاجة بيحبها أو غيّر مود

لكن ساعات لما يكون فيه سبب للخنقة.. و السبب مش راضي ينتهي، ومش عارف الحل ليه يبقى ازاي... بتزيد حالة الخنقة يوم بعد يوم ومش بتعرف تعمل فيها حاجة

حاليا... أنا حاسة إني مش كويسة بصراحة، و زعلانة من نفسي لأنها مش غلطة أييي حد تاني، بس في نفس الوقت مش عارفة أساعدني..... عديت مراحل كتيرة في المود دة لحد ما وصلت لحالة من التناحة غير مصحوبة بأي أعراض تانية

و دة رغم المحاولات... يعني هنقول إن أكيد حاولت أعمل الحاجات العادية لتغيير المود و هي التفكير في الأزمة و ممكن أحلها ازاي و الخروج مع أصحابي و القراءة في حاجة بحبها و الرياضة و..و... حاجات كتير عادية ممكن تتعمل تغير المود المفروض

و ساعات كمان كانت الشخصية الطفولية الخاصة بي و اللي طبعا "أقربهم لقلبي" بتتدخل و تحاول تحل الأزمة بطريقتها الخاصة... زي مثلا إني أسمع أغنية بحبها أوي و بتفرق معايا "مش عارفة ليه :)" على الرغم من إنها أغنية عبيطة جدا و عادية جدا و غالبا مش ممكن تفرق مع أي حد تاني في الدنيا كلها :) لأنها ببساطة أغنية أطفال..بس هي بكلماتها البسيطة عن التخيل بتأثر في أوي وبحسني في عالم تاني

ملحوظة مهمة: اللي بتكتب الكلام دة غالبا مش في حالتها الطبيعية

:)

كمان ممكن الشخصية الطفوليةتتجن شويتين زيادة عن كدة... زي إني أجيب ال

face painting colours

و ألعب مع بنت أختي و ألونلها على إيديها ووشها "ودة عادي لأني بحب كدة و كنت بعمل كدة ساعات في شغلي السابق"...لكن اللي مش عادي إن حد تاني يلون بيهم :) غير بنت أختي

بس دة برده في سبيل تغيير المود

و ساعات تانية تلاقي الشخصية الروقان بتخبط ع الباب و تقوللي افتحي افتحي... انا كمان هحاول

و ييجي دور الصابون النونو اللي على شكل قلوب بريحة اللافندر..و يحاول ينقلني عالم تاني

أو إني أشتري اللعبة بتاعة فقاعات الصابون و أنفخ فيها لوحدي :) و أنا في البلكونة

أو أنزل ألف بالعربية بعد الفجر شوية عشان أغير مود

أو إني أقرأ كتاب بحبه.... أو إني أسمع فيروز :) وطبعا في لحظات أبقى في عالم تاني بجد مع صوتها و حكاياتها

يمكن شخصية تانية ساعات بتظهر... و هي من أجمل الشخصيات جوايا لكن مش بشوفها كتير الأيام دي... بتيجي و تقوللي اقرأ تفسير سورة الشرح من "في ظلال القرآن"، و الموضوع مش في التفسير بوجه عام، لكن في التفسير من الكتاب دة شخصيا، واختيار الكتاب دة شخصيا مش غتاتة...أيوة ممكن يكون فيه عيوب تانية، لكن الحقيقة إني بحبه أوي أوي..لأنه مش بيوصل تفسير عادي للآيات و خلاص، لكن بيعيش القارئ و كأنه جوة القرآن و يخليه يفهم اللي بيقرؤه دة بقلبه قبل ما يكون بعقله...كتاب روحاني أوي و بيخاطب الإحساس، و دة اللي بحبه فيه

و عمري ما قرأت حاجة حسستني بالراحة أد ما تفسير سورة الشرح فيه حسسني، كمان سورة الضحى بعدها. يمكن كمان دي حاجة شخصية أوي بس دة اللي حسيته من الكتاب دة

الشخصية اللي بتكلم عنها دي موجودة جوة كل حد فينا طبيعي جدا...فمش محتاجة أقول حاجة تانية عليها

ساعات بأة.... بتيجي تتخانق الشخصية ال..."أنا" :) اللي هي بتاعتي و بس

و تقوللي يللا جيبي شيكولاتة كتييييير من الأنواع اللي بتحبيها و اغرقي فيهم

أو روحي حمام السباحة روقي شويتين، بس الحقيقة إن بقالي كتير حتى مش عملت كدة :( ، أو أكتب في البلوج و بكدة أخرج كتير من العبط اللي جوايا "زي مابعمل دلوقتي وهصدع أي حد يفكر يقرأ للأسف"...و حتى الكتابة مش بقت دايما حاجة سهلة عليّ لأني مش بقيت بعرف أعبّر

أو أحاول أغير الإحباط دة بأني أشوف في عالم المدونات و النت عموما حاجة بحبها...أو أرجع لبوستس مريحة أثرت في اوي وقت قرائتها أول مرة زي "امسح دموعك" عند ولـــو، "لا تيأس" عند الباحث عن الحقيقة، و "هاكونا ماتاتا" عند الحبيبة راما.. أو الدخول في مدونات رقيقة أوي و ليها طابعها الخاص.. و هم مميزين في حياتي

..............................................

و ساعات تانية... بتبقى مدمّر أوي ، أو.... "منهك القوى" هو المصطلح الغريب اللي بحسه و مش عارفة طلع منين

ساعات بتوصل لحالة "و انت السبب فيها و انت بس اللي تعرف تخرج نفسك منها"، حالة بتخليك لا تملك القوة لأنك تعمل أي حاجة من كل اللي فاتوا... رغم بساطتهم

:)

و مسيطر عليك حالة من التوهاااان و اللخبطة و بالتالي التناحة بعد طووووول تفكير

و بتبقى.... منهك القوى لعمل أي شيء

و بس

حد فهم حاجة؟؟ :)