Thursday, December 15, 2011

2011.. U were special dear :). Bye Bye


مـش باقي من السنة غير نص شـــهر.. نــص شــهر بس 
:)

السنـــة دي كـــانت سنة زحمــة أوي. حـــصل فيها فعلا أحداث كتيــرة للبلد كلها.. لي كمــان شخصيا.. :) كـــانت ســنة لذيذة الحمــدلله


يـــــــــوم 1-1-2001
كـــان يوم عادي؟؟ :). اممم..... بالنسبــة لي مش كــان عادي خالص


مــع شروق أول شمس لأول يوم في السنــة دي.... :)) كــنت على أعلى قمة في مـــــصر


و أنا بشوف الشمس لسة بادة تطلع أشعة خفيفة من ورا السحاب الساحر الكتيـــــــــــــــــــــــــــر اللي كان حوالينا دة ...ابتسمت.. و غمضت عينيا و فردت دراعاتي جامد
ابتسمت و اتمنيــت جوايــا السنــة دي تبقى غير أي سنة عدت عليّ، و أي سنة على بلدي و الناس التعبانة فيها، و دعيت ربنــا إن السنة دي نشـوف فلسطين و أهلها من أسعد البلاد اللي في الدنيــا كلها



غمضت عيني و حسيت بالطيران بكل معنـى الكلمة.... الدنيا مش برد، دي تلج....... تحت رجليا كله أبيض و الهـوا فعلا جامد أوي لدرجة إنه ساعات ممكن يزقنا و إحنا ماشيين
كـــانت أول مرة لي أطلع جـــبل سانت كاترين



مش أول مرة أطلع جبل الحمدلله، بــس أول مرة في حياتي أطلع سانت كاترين..... جبل كـنت متحمسة جداجداجدا أطلعه، بس و أنا في آخره.. قررت إني مش أكررها تاني أبدااااا و أطلع أي جبل تاني غيره لأني كنت تعبت تعب عمري ما حسيته في أي حتة تانية
طبــعا كل الكلام دة اتلغى تماما بعد ما طلعت القمــة و شفت المنظر من فوق :)))، و شفت التلج اللي بجد و لعبت بيه مع كل الناس اللي حواليا....و بعد مــا شفت السحاب حواليا في كل حتة...و إحنا فوقه و مش فوقينا غير السما
كل السحاب تحتنا و بس.. بحــر من السحــاب عقلي عمره ما كان يتخيله


فـــوق الجبل دة..... اتمنيت إن بداية السنة الجديدة دي تبقى جميلة في كل حاجة زي المنظــر الخيالي اللي أدامي دة


حتى لو محـدش قرأ الكلام دة :))... بكتبه عشان أفكر نفسي بيه بعد سنين إن شاء الله لو فيّ عمــر

To Be Continueeeeeed ...

5 comments:

Mafrousa said...

و ياتري يا هبة امنيتك اتحققت؟؟؟

آخر العنقــــــود said...

انا بحب المرتفعات جدا ويابختك انك عملتي كده :)
دمِتِ بسعادة

Wish I were a Butterfly ... said...

Mafrousa,

لأ.. مش اتحققت
بس كل اللي قصدته إن السنة دي كانت مختلفة، و فيها فعلا أحداث كتيرة على الصعيد الشخصي..وحواليا كمان

كان المفروض أكمل و أكتب بوستس تانية عن السنة دي، بس الأحداث حوالينا متعبة أوي ومش عارفة أكتب حاجة.... بس مع كدة.. أنا شايفة إن اللي حصل السنة دي في بلدي هوبداية لحاجات كتير أحسن إن شاء الله. حتى لو تعبنا شوية و لا حتى كتير... إن شاء الله الدنيا هتبقى أحسن
ربنا يستر بس و نعرف نمشي في الطريق الصح

فرحت أوي إنك لسة فاكراني يا مفروسة
:)

Wish I were a Butterfly ... said...

آخر العنقود

شكرا
:)

لازم تجربيها في يوم. بجد حاجة مش تتنسي خالص أبدا ولو عملتيها مرة هتحسي إنك نفسك تكرريها تاني كتيــــر

شكرا لتعليقك

Hope said...

كانت سنة فيها تغيير جدري علينا والحمد لله اللهم احفظ ليبيا ومصر وتونس وسوريا واليمن والبقية العربية الصامتة واللهم اعنا على استرداد فلسطين