FrEE WritinG

كــان عجبني أوي اسم المدونة دي من أول ما شفته... أنا حتى قلتلها أكتر من مـــرة
فاكــرة إني في مرة زمــان كــنت بقول لواحدة من أصحابي العزيزين عليّ إني ساعــات كتيــر بحس إن المدونة دي قريبة مني أوي، و كتير بحس أوي أوي باللي صاحبتها حاسة بيه... في مــرة قلت لصاحبتي إني أوقــات كتير بحس إن اسم المدونة دي ينفع معايا كمان
:)

حدوتـــــــة

معظم النـاس حياتهم فيها حواديت و مغامرات، بس حياتي...و يمكن أنا بس اللي حاسة كدة.. كــنت دايما بحس إن فيها قصص و مغامرات حقيقية، و خروجات جديدة و أنشطة و محاولات لتغيير الجو العــام دايما

.......................

طبعـا عمري ما هكون زي حدوتــة لأن طريقتها في الكتابة و إحساسها ملووووووش حل ما شاء الله..خالص خالص بجد،و أنا من المغرمين بيها هي و بلوجها
... لكــن برده

كــنت بحس أوي إني ينفع أسمي البلوج دة حدوتة زيها فعلا :).. ضحكت صاحبتي لما كــنت بقول لها كدة..... و بعدما حكيتلها شوية من المغامرات و اللي بيحصل لي في الدنيا استغربتني أوي و قالت لي إنها مستمتعة أوي بالحودايت دي!! و كأني بحكيلها فيلم في الأحداث اللي بتحصل وحصلت "لحد وقتها يعني"..... كــانت بتحب تسمـع شوية من حواديتي "و حتى ساعات حكاياتي الصغنتوتة عن مواقف بتحصل لي في مشروعات الشغل اللي أنا فيه حاليا" كل ما نتـكلم. أكـــيد في النهــاية هي كلها حكايات طبيعية ومش فيها حاجة، بس ساعات.. بتحصل مفاجآت و أحداث في الحياة تخليك تقول إيه دة؟؟ هو ازاي كدة؟ سبحان الله بجد....... على الأقل بالنسبـة لي
كــنت كتيـر بحكيلها.. بس بقالي كتير أوي مش حكيتلها فعلا من قلبي

........................

...فلاش بــــــــاك لشهــور كتيـــرة فاتت

بس التاريخ دة عادي أوي!! مش كدة؟
أيــوة. بصراحة مش حلو أوي "و ضحك ضحكة صغنتوتة".. بس طيب إمتى التاريخ هيبقى لذيذ يعني
اممم.... عندك حق. رغــم إني مش بحب رقم 9. بس طب مش لو كـان يوم
9-9-2009 دة
كـان يبقى ألذ؟
أكيــد. بس دة فات خلاص ومش كان ينفع وقتها أكيد
صح. طب.. "و ضحكت ضحكة خبيثة" تيـجي نستنى ليوم 10-10-2010؟؟ دة يبقى يوم لذيذ أوي. إيه رأيك يا عم؟
هو فعلا هيبقى يوم حلو أوي و مش صعب يتنسي..بس ساعتها هتغرم كتير!! يعني يوم ميلادك و بعدها بأيام مناسبة تانية؟؟! عموما يا ستي و لا يهمك.. اليوم شكله لذيذ و مش هخليه يعدي كدة و تزعلي. إن شــــاء الله.. يوم 10-10 دة هيكون يوم كــتب كتابنا :)، ومش هضيعه عليكي

ضحكنــا أوي و بصينا لأحلامنا البعيدة في السما بأمل و شوق كبير.... و رغـم معرفتنا إحنا الاتنين بإن دة بعيــــد أوي إنه يحصل وشبه مستحيل لأن المشوار أدامنا لسة طويل.. إلا إننا إحنا الاتنين صدقنا.. و حلمنا باليوم و التاريخ دة فعلا
لمــا اليوم قرب السنة دي و اتأكدنا إنه مش هيحصل حاجة لسة... فكرت كتير و اتخيلت كتيــــر
اتخيلت أعمل له مفاجأة عمره ما فكــر فيها..... اتخيلت أجيب لي عشر هدايا صغيرين بيحبهم....... اتخيلت هديـة خاصة جدا و يمكن حتى كــنت بدأت أخططلها... اتخــيلت كتير............. بس اللي عمــري ما اتخيلته

.........

:) إنه عمره ما هيــــاخدها

إن نفس اليوم دة... يكون هو نهايــة كل حاجة بيننا و آخر يــوم نتكلـــــم فيه
!!
مش يــــــوم قبله و لا يوم بعــده
بجـــــد حاجة عمري ما اتخيلتها

واجـعاني أوي.. و واجعني أوي التاريخ

الحمــــــدلله