رمضــــان
يعني لمة عيلة مهما اختلفت مواعيد أكلهم و شغلهم على ترابيزة واحدة وقت المغــرب
يعني إحساس بالدفا بنفتقده كتيـر في حياتنا
يعني لمـة العيلة بجد و إنك تشوف ناس اسمها قرايبك لكن مش بتقابلهم أبدا في الحيـاة اليومية
يعني مواقف و قفشـات كوميدية قبل الآدان من الناس الجعانة لما العيلة الكبيرة تتجمـع
يعني واحد في ركن هادي لوحده بيدعي ربنا وهو شايف ألوان السما بدأت تتخلى عن الأحمر والبرتقاني..والألوان الغامقة بتعلن قرب آدان المغـرب
يعني أحلى وقت لقراءة القرآن في العصرية قبل الفطار...أو حتى بعد السحور
يعني وقت الناس بتقدّس فيه الآذان و بتسمعه أكتر من أي وقت تاني
يعني إحساس بالسكيــــنة و القرب من ربنا أكتر من أي وقت تاني
يعني منافسة عشان التقرب من ربنا... بس أخيرا منافسة شريفة جدا
رمضــان يعني ... فول مشطشط ع السحـور تفضل فاكره لتاني يوم
...................................................
وبرة البيـــوت
رمضــان ميتحسش في مدينة نصـر زي ما بيتحس في الأحياء الشعبية
الأحياء المصرية الجميلة اللي بعشق المرواح ليها في رمضان
أنوار في كل مكان وفوانيس معدنية أصيلة،وزينة ورق عاملها ولاد الحارة أو المنطقة مع بعض وموصلينها بين كـــــــل العمارات اللي في الشارع
مش زي عندنا :) عشان تحط فانوس ع العمارة لازم تتأكد من كل الجيران "ويمكن مابوافقوش كمان!!". مش عارفة ليه
و النـاس سهرانة لحد الفجر و الكل بيبتسم ويهني بالشهر الكريــم
و الراجل بتاع الكنافة واقف والعيال اللي بتشوفه من السنة للسنة واقفين حواليه بيتفرجوا بيعملها إزاي
هنـــاك بس بحس بروح رمضان الحقيقية
.............................................
رمضــــان... يعني تجمّـع كل الناس في صلاة واحدة و إحساس بالألفة طاغي على معظم المصلين هناك
يعني صلاة التراويـح الجميلة و اللي ...للأسف بالنسبة لي بقت مشكلة لأني مش بحسها غير لما أصلي ورا واحد معين.. :) وهو دلوقتي اتنقل حتة مش أعرف غير إن اسمها "المدبح"!! وطبعا مش بقيت أروح هناك غير نادر
رمضــــان... سحر صلاة التهجد و خصوصا لو بتصليها في مسجد ليه مكان مفتوح و تحس نسمة الهوا الباردة في نص الليل تستمتع بمرورها مع ترتيل الآيات
يعني تبادل ابتسامات و عبارات بسيطة مع ناس كل علاقتك بيهم إنك بتقف جنبهم في الصف وتصلي
يعني ناس متعرفهاش لكن عارف شكلها لأنها كانت معاك في المسجد رمضان اللي قبله
رمضـــــــان
يعني تجمّــع صحابي عشان نجهـز وجبات للفقرا
و ذكريات أيام كنا بنتمرد فيها ونحاول نعمل أكتر من كدة أنا وأنتيمتي زمان "هبة"و نرجع البيت نلاقيهم قلقانين علينا عشان اتأخرنا
رمضـــان... وحشنـي أوي. ربنا يبلغني و يبلغكوا الشهــر الكريـــم يـــــــــــــــارب..و ماكونش وحشة فيه
كل سنــةوالكل طيبين :). افتكروني في دعاءكم
ملحوظة سخيــفة:لو حد ساكن في مدينة نصر ويحب يشارك أي يوم في إعداد وجبات للفقرا أو تحضير شنط رمضان
Packing
ياريت يسيب لي كومنت أو اللي يعرفوا يوصلولي عادي وأنا هقول له التفاصيل لوحب. الحاجات دي تبع جمعية خيرية مشهرة مش تبع نفسها
:)
HaPpY RaMaDaN
12 comments:
كل سنة وانت طيبة يا بوبة الجميلة,
طبعا أنا رمضان عندي السنه دي هيفتقد الكتير من غير عيلة,وحتى المنطقة اللي أنا فيها زي منطقتك مافيهاش مظاهر رمضان ):
لكن أسأل الله أن يكون فيها باقي الحاجات التانية,
ويعينا على ذكره وشكره وحسن عبادته,ويتقبل منا ومنكم
بالله عليكِ ما تنسينا أنا وأهلي وأخويا من دعائك.
كل سنة وانتى طيبة
رمضان كريم
كل سنه وانتى طيبه يابوبه
وان شاء الله مش هتبقى وحشه كونى واثقه زى ماانا واثقه
واحسنى الظن بالله
رمضانك كريم ياقمر:)
عارفة اول يوم المغرب يا هوبا اللى هو كان من ساعات بيجيلى احساس جميل قوي
بحس انى سامعة صوت السلاسل اللى الشياطين بتصفد بيها و بشم ريحة الجنة و هي ابوابها بتتفتح و بحس بالملايكة اللى نازلة تستغفر لنا
رمضان ده هدية جميلة قوييييييي بييجي ينضف كل اللى حصل لنا في السنة اللى فاتت و يقول لنا لسة فيه أمل و لسة فيه فرصة
اتمنى تدعيلى معاكي علسان انتى من انقى الناس اللى اعرفهم و إن شاء الله هدعيلك كتيير معايا
انا مش ساكنة في مدينة نصر لكن عايزة اشترك ماليش دعوة فهحاول اشوف يوم فاضي و اكلمك ان شاء الله لأني نفسي اشترك في حاجة جميلة زي دي
جزاك الله خير يا أجمل هوبا و كل سنة و انتى طيبة
كل عام وانتِ الى الله أقرب يابندقة :)
تقبل منا ومنكم ياقمر
Salma Mohammed,
إن شاء الله تلاقي حاجات جميلة في رمضان :)كل سنة وانت طيبة يا لومي
ابتسمي أرجوكِ
ربنا يتقبل منا جميعا إن شاء الله يا سلمى....و يارب ربنا يتم شفاء أخوكي قريب أوي
هو انت في مكان غير أختك ولا عادي معاها؟
mohamed ghalia,
و انت طيب
:)
نــــور
و انت طيبة يا نور
حاااضر :)
ربنا يكرمك ويتقبل منك يانور إن شاء الله
الله أكرم يا قمرين
;)
الحلم العربي
إحساسك عالي و جميل أوي طول عمرك
:)
أنا كمان بحس موضوع الملايكة دة في أول ليلة زيك. بس عمري بصراحة مافكرت في الشياطين وسلاسلهم
رمضان ده هدية جميلة قوييييييي بييجي ينضف كل اللى حصل لنا في السنة اللى فاتت و يقول لنا لسة فيه أمل و لسة فيه فرصة
جميلة أوي أوي الجملة دي. ربنا يعينك على طاعته يا يووووي إن شاء الله
مستنية أشوفك قريب أوي :) إن شاء الله
و من غير ماتقولي أنا فعلا بفتكرك في دعائي كتير
همسة قلم
شكرا شكرا
:)
تقبل الله منا ومنكم يا أسماء
نورتي نورتي
:)
غسل الله قلبك
بماء اليقين
و اثلج صدرك
بسكينة المؤمنين
و بلغك
شهر الصائمين
.. * * . * * .
.* . . * . . *
* . رمضان . *
. * .كريم. * .
. . * . * . .
. . . * . . .
أكيد أنا وسمية سوا
Post a Comment