Tuesday, December 2, 2008

بوست من السنة اللي فاتت تاني

البوست دة الحقيقة كنت كتبته السنة اللي فاتت "مش دلوقتي خـــــــالص" في الكام يوم اللي زي دول (أول عشر أيام من ذي الحجة)..... معلش هو نفس الكلام طبعا، بس مش عندي حاجة تانية أقولها حاليا وكان يهمني يوصلكوا المعنى دة

ما من أيام العمل الصالح فيها أحب إلى الله من هذه الأيام." قالوا يا رسول الله ! و لا الجهاد في سيبل الله؟ قال: و لا الجهاد في سبيل الله، إلا من خرج بنفسه و ماله ثم لم يرجع من ذلك بشيء." دة حديث لرسولنا "محمد" صلى الله عليه وسلم، و غالبا كلنا عارفينه... و يمكن كمان حافظينه. بس الحقيقة اننا مش بناخد بالنا منه و لا بنطبقه
....................
الأيام اللي في الحديث دي هي العشر أيام اللي قبل العيد!! يعني الأيام اللي احنا فيهم دي
و الوقت دة دايما يكون فيه امتحانات و مشاريع تخرج و برد و..... كتييييييير أوي. بس كنت دايما متعودة ان أصحابي الحلوين دايما بيتجمعوا في الوقت دة و بنعمل خير مع بعض... بغض النظر عن عمل الخير. هم كتير لو عديناهم. بس المهم ان السنة دي شكلنا كدة مش هنتقابل
:(
و دي حاجة أكيد مزعلاني
بس في نفس الوقت...مش عايزة الأيام دي تفوت كدة مع نفسها و احنا مش عملنا حاجة
و في نفس الوقت كمان..... فيه كتير أوي من الناس اللي بيشوفوا الأي كلام اللي أنا بكتبه دة.. أنا بحبهم أوي "أكتر مما يتخيلوا" :) و نفسي أشوفهم جدا... و بما ان أمنيتي دي.. ممممم.... يمكن صعبة شويتين.... فأنا قررت قرار
قررت إني أخلي عندي أمل أشوفهم في الجنة بعد كدة "لو دخلناها يعني" :) فممكن تسمحولي؟


يعني ممكن كلنا نتفق على حاجة نعملها؟ و كل واحد مع نفسه وكل واحد في مكانه.... بس هنكون كلنا بنفكر في بعض، و تكون نيتنا اننا بنعمل عمل في أحلى 10 أيام طول السنة، و كمان نيتنا إننا عايزين نتقابل في الجنة عشان اشتركنا مع بعض في عملنا دة. ممكن بجد؟؟؟
يعني من الأعمال المستحبة جدا في الأيام هي الصيام... طب ما يللا نصوم الأيام كلها بالنيتين اللي اتفقنا عليهم؟!! و لا حتى كفاية اتنين و خميس بس
أو نتفق على طول ال10 أيام دول بس... يكون فيه صدقة يومية بنعملها. ممكن؟؟
و أعمال الخير ماااا أكثرها لو فكرنا نعدها، يعني أيتام و مسنين و إطعام فقراء و صدقة بأنواعها و زيارة مرضى و مساعدة حد"ان شاالله في مشروع تخرجه بس بنية صح" و سد حاجة محتاجين...... كتير أوي بجد، و مش هقولكم أنا لأن كل واحد في دماغه ألف عمل هو عارف ممكن يعمل فيهم ايه

......................................
ربنا يتقبل منـــا و منكم إن شاء الله
مستحب في الأيام دي الحمد و التهليل و التكبير

8 comments:

ღϠ₡ღأمير الهدوءღϠ₡ღ said...

كل سنه وانتي طيبه يا هبه
:)

ويارب تكون ايام خير وبركه عليكي

تحياتي

mohamed ghalia said...

حقيقى بوست هايل
ربنا يجعله فى ميزان حسناتك
تحياتى
دمتى بكل الود
كل سنة وانتى طيبة

الخيط الرفيع said...

ربنا يتقبل طبعا
ووحشتيني وشكرا كتييييييييييييير

Lyssandra said...

كل سنة وانتي طيبة ياهبة

سعيدة أوي بيكي وبأفكارك وبنيتك الطيبة

ربنا يجمعنا دايماً علي خير

---------

كنت بادعيلك النهارده

:)

والمرة دي كمان مجاناً يا ستي

:P

---------

كل التحية لقلبك الطيب

Lyssandra

alshared said...

كل سنه وأنتي طيبه

وربنا يجعله في ميزان حسناتك ان شاء الله

بعيدا بقي عن الموضوع ده أنا عايز منابي من اللحمه بتاعة العيد
:)

أوعي تصدقي أنا بهزر بس والله
:)

عموما
كل سنه وأنتي طيبه

أخوكي

Empress appy said...

كل سنه وانتى طيبه يا كميله

نـــــور said...

كل سنه وانتى طيبه
عيد سعيد عليكى ياجميله :)

salma mohamed said...

كل سنة وانتي طيبه يا هبة
هي بعد العيد بس والله غصب عني