...

سمعت صوت الكلب جامد أوي. بس دة كان نسبيا طبيعي لأننا اتعودنا عليه خلاص في منطقتنا
اللي كان مش طبيعي و خلى قلبي يقع كان صوت بنت صرخت
مش صريخة واحدة اتخضت وبس !! لكــن صريخ متواصل مع صوت الكلب اللي لسة نباحه مستمر

.....................
جريت بسرعة على الشباك وأنا قلقانة...بس مش لحقت غير آخر المشهد
و هو إن البنت كانت بتجري من الكلب!! و طبعا بالتالي هو بيهوهو ويجري وراها
الكلب مشي الحمدلله... و مش عارفة بداية ظهوره كانت إزاي عشان هي تجري منه و هو يتنرفز. لكن اللي أعرفه كويس هو إن البنت كانت لوحدها تماما
في شارع و في وقت مليــــان ناس والدنيا منورة
بس كمان مش دة اللي دايقني
أد ما دايقني رد فعل الناس دي
يعني مش كفاية محدش كان قريب منها يساعدها أو حد يروح لها بعد ما الكلب مشي ويهديها شوية
لأ . خالص
البنت فضلت بعدها دقايق متجمدة مكانها و هي حاطة إيدها على بؤها و مش بتتحرك... بس اللي يزعل كان إن شلة أولاد كتير كان رد فعلهم الوحيد هو إنهم قعدوا يضحكوا بصوت عالي أنا سمعاهم و أنا مش قريبة منهم
اتخيلت نفسي مكانها ساعتها
صحيح مش ممكن كنت هجري لأن غير الدروس اللي بنتعلمها من صغرنا عن الجري من الكلاب، كمان رد فعلي دايما لو اتفاجئت بحاجة هو إني بابقى زي التلاجة التقيلة اللي مستحيل تتعتع من مكـانها
بس قلقت أوي و اترعبت لما فكرت في إني هابقى لوحدي. و ممكن محدش يفكر يساعدني أو يبعد عني الكلب دة
. . . . . . . . . . . . . . . . . . . . . . . . . . . . . . . . . . .
يـــاريت بجد يا جماعة نحاول نحس ببعض أكتر شوية
حتى لو الدنيا وحشة و الظروف وحشة و الناس علطول زعلانة وكل واحد في حاله
هي عمرها ما هتبقى حلوة لو احنا كنا مقتنعين إن كل حاجة في الدنيا وحشة و مستحيل تتغير
عايزين الناس تهتم بينا لازم نهتم إحنا كمان، عايزين الإحساس و الحاجات البسيطة اللي بتسعد تظهر تاني في الدنيا.. لازم إحنا اللي نرجعها
ياريت بجد... حتى لو مش كنت قادر تساعد حد أدامك و شايف إيديك متـكتفة لأي سبب من الأسباب
بس حسسه إنك معاه، ادعمه نفسيا، شــاركه حتى لو مجرد مشاركة وجدانية مش أكتر
يعني... أنا لو مكان البنت دي بجد كان هيفرق معايا أوي لو حد كان قرب مني وسألني أنا كويسة و لا لأ
صحيح السؤال مش هيفيد في حاجة... بس على الأقل تحس إن فيه حد حس باللي هي فيه و يهدي من روعها شوية

صغيرين

يــــاريت بجد بجد نعيد نظر في كل علاقاتنا و في الناس اللي حوالينا اللي مش نعرفها
لو الشهامة و الضمير و الإحساس -و كــــل الحاجات اللي كل يوم بنقول إنها اختفت أكتر- لو الحاجات دي مش موجودة إحنا اللي لازم نوجدها
إحنا اللي لازم ندور عليها

يـــاريت بجد كلامي يفرق و لو مع شخص واحد بس... لأن بجد الدنيا و هي بادرة كدة ومش فيها علاقات إنسانية كويسة دة تاعبني أوي أوي أوي

هلــوسات قلـم ليس أكثر

طفلة

حالمة رقيـقة

لكنهـا بأحلامها كانت ترحل إلى عــــالم آخر

تطير وحدها بين سحب من الخيـال

. . . . . . . . . . .

يـوما رأت ذاك البريـق

بريق أخاذ

لم تعرف ما هو و من أين أتى

لكنه بريـق يأخذ الأبصار كلها إليه

ســاحر يفوق الحدود

حلمت أن يكون لها

أن تمتلكه و تحتفظ به وحدهــا

أخذت تقترب منه متحمسة

يدور بخلدها مئات الأسئلة والأفكار

كيـف سيبدو هذا البريق عندما تقترب منه، و ماذا سيكون؟

اقتربت كثيرا

مدت يديها الصغيرتين إليه و أخذته بينهما

مسرعة ركضت إلى منزلها... إلى غرفتها الصغيرة

طـوال الطريق كانت حريصة جدا عليه

محكمة إغلاق يدها كي لا يزول أو يختفي بعيدا

وكلمـا كـانت تخاف أكثر من سقوطه منها.. كانت تحكم إغلاق يديها عليه

إلى أن وصلت إلى غرفتها

إلى صندوقها الصغير

تسميه صندوق الأسرار و ترى أنها تحتفظ فيه بكل ثمين في حياتها

فتـحت يديها ببراءة و هي تنظر إليهما لا تطيق الانتظار

!!لكنــها دهشت

فلم تجد بين يديها سوى الرمـــاد

عندهــا أبتسم

عندما أستيقظ على صوت العصافير و أشاهد السماء بألــوانها الهادئة وقت الفجر.. عندها أبتسم

عندما أرى ابتسامة طفل ببراءة.. عندها أبتسم

عندما أرى القمر و قد أصبح بدرا ينير ظلمة السمــاء.. عندهاأبتسم

عندمـا أرى طائرة ورقية طرف خيطها يمسكه طفل صغير.. عندها أبتسم
عندما أرى فقـاعـات صابون تتطاير بحرية مع كل نسمة هواء خفيفة.. أبتسم بطفولة
عندمـا ألقى فراشــة تطير برقة بين الزهور.. أحلم و أبتسم

عندمـا أمر بزهرة صغيرة تعجبني..أتحسس أوراقها الرقيقة و أبتسم

. . . . . . . . . . . . . .
عندمــا أشاهد أطفالا تلعب و تجري بمرح في الحديقة القريبة من بيتي.. أبتسم

عند نجـاحي في عزف لحن استعصى عليّ في البداية... أبتسم

حـينما أقول دعـاء الركوب... أنظر إلى السمــاء وأبتسم

عندمـا أرى مياه النيل الزرقاء أمامي.. عندها أبتسم
عندمــا أسمع صوت البحر و أتخيل حديث أمواجه معي.. عندها..أبتسم و أستريح
عندمـا أنظر إلى السماء فوقي و أتأملها.. أسبح بحمد ربي لنعمه الجميلة في الكون و أبتسم

عندمـا أشعر أن ربي راضي عني أو أحس برسالة منه واضحة أمامي.. بالطبع أبتسم

. . . . . . . . . . . . . .
عندمـا أرى بسطاء مصر الذين أعشقهم بملامحهم الأصيلة.. عندها أبتسم
عندمـا أقرأ معاني الحب الحقيقي في عيون أشخاص حولي بالشارع.. عندها أبتسم

عندمـا أرى حب الخير فيمن حولي...عندها أبتسم

عندمـا أرى ضحكة أمي... عندها أبتسم
إذا مررت بجانب صورة أخي البعيد عني و ابنه.. عندها أبتسم
عندمـا يحاول ابن أختي إضحاكي بغمزة من عينيه الصغيرتين و حركات بهلوانية بسيطة.. بالطبع أبتسم
عندمـا أشاهد المفتش كورومبو و ألغازه المثيــرة "للضحك غالبا":)... أتذكر أبي و أبتسم

. . . . . . . . . . . . . .
عندما أر نوع الشيكولاتة الذي أحبه.... أبتســـم
:)
عندما أكون بالخارج و يتسلل إلى مسامعي موسيقى لأغنية من أغاني فيروز التي أعشقها.... أغمض عيناي و أبتسم
عندما أشم رائحة المطـر أو أحس بقطراته تلمسني برقة... من كل قلبي أبتسم
أبتسم... عندما أسمع هاتفي المحمول يرن بنغمة أنتظر سماعها دوما
أبتسـم.. عندما أسمع صوتا أتوق لسماعه دوما

أبتســم.. عندما أسمع أغنية تذكرتي بمن أحب

. . . . . . . . . . . . . . .
أبتسـم.. عندما أرى ما يذكرني بأناس أحبهم من كل قلبي في أي مكان حولي

أبتسـم..عندمـا يحدثني طفل صغير عن أحلامه المستقبلية

أبتســم.. عندما أستشعر الطيبة في ملامح شخص لا أعرفه
أبتسـم و الدموع في عيناي.. عندما تمر بذاكرتي بعض الذكريات مع أناس أحببتهم بشدة
أبتسم بمرارة.. عندما أشعر أحيانا أنه ربمـا يتم خداعي، لكني لا أفكر في الأمر كثيرا
أبتســـم... عندما أرى الابتسـامة صادقة في عيون من حولي

و ماذا عنك... متى تبتسم ؟؟

حــبيبتي الصغيرة

نادوا اسمها فخرجت بسرعة من الطابور النونو للمكان اللي نادوها ليه و على وشها مليون سؤال ووشها معبّـر جداااااا باللي في بالها
كلنا صقفنا ليها و معظم الموجودين في قمة السعادة لأن دي حفلة أولادهم الصغيرة
إدوها هدية صغيرة وورقة صغيرة على شكل رسالة ملفوفة و لبسوها تاج صغير "على إنه تاج الوقار يعني"...و بسرعة أخدتها مدرسة تانية و وديتها للطابور التاني اللي فيه الأطفال اتكرموا خلاص
كـان قبلها جابوا حبيبتي الصغيرة عند الميكروفون و خلوها تقرأ سورة صغيرة :)... الحقيقة إن ساعتها كنا لسة أنا وماما بنركن العربية، بس كانت أختي راحت بسرعة عشان تشوف بنتها لأن5دقايق كانت مرت على معاد بداية الحفلة الصغيرة في المدرسة
قالولي إن محدش في فصلها قرأ غيرها بس بصراحة مش متأكدة من كدة... حتى لو الفصل كله قرأ في المايك... كفاية أوي إنهم يدوهم الفرصة دي و يدوهم ثقة أكتر في نفسهم
بعد ما حبيبتي الجميلة لبست التاج ووقفت مع أصحابها الشطورين اللي حفظوا قرآن كويس،بدؤوا يلفوا في طابور صغير حوالين الناس كلها... ساعتها هي بصت لي وابتسمت لما عرفت إني جيت فعلا حفلتها زي ما اتفقنا مع بعض اليوم اللي قبله
مش هنسى إنها بالليل آخر حاجة عملتها قبل نومها هي إنها جت إديتني بوسة وحضنتني و هي بتقول "يــاريت تيجي الحفلة بكرة مع ماما. عايزاكي معايا"!!! و ساعتها بصراحة ذهلت من طريقة تعبيرها دي
بنت أختي الجميلة.... أحلى حاجة في حياتي الحقيقة
بدأ الأطفال في المشي مع الطابور و أنا لقيت نفسي اتأثرت أوي أوي بس ركزت إني أهم حاجة عندي اللحظات دي هي إني أصورها صور حلوة..... كنت مبسوطة أوي أوي وقتها ولقيتني قاعدة أبص حواليا عشان أشوف الفرحة في عيون الأمهات التانية و الآباء"القليلة" اللي جت تشوف أولادها.... ببص لقيت مامتي دموعها نزلت!!! و أختي مامة حبيبتي كمان!!! مش لقيت أدامي غير إني أضحك أوي من التأثر الجــــامد دة

........................................
أول مرة البنوتة الصغيرة دي تتكرم
لأ و تكريمها عشان حفظت قرآن كويس في المدرسة :)))
و لما تفكر بعقلانية تلاقيها أساسا لسة مش بقت محسوبة على المدارس لأنها
Baby Class
حتي مش حصلت كي جي :). كان شكل الأطفال جميل اوي اوي اوي يجنن
و كلهم معبّــرين أوي. اللي بيدور بسرعة بعينيه على مامته بين الوشوش الكتير الموجودة، و اللي مبسوط وبس و عايز يتنطط لأنه حاسس إن فيه حفلة، و اللي عايز يقول لمامته بصي..أنا كبرت أهو و بقيت شطور... خليكي معايا طول اليوم عشان تشوفيني و أنا شطور ومميز في مجتمعي الصغير
قضينا طول اليوم معاها لأنه كان
Open Day
اللي "المفروض" بيكون أول السنة عشان أولياء الأمور يتطمنوا أكتر على أولادهم ويعرفوا طريقة التدريس والمعاملة المتبعة في المدرسة بتاعة أولادهم. بس الحقيقة دة كان نظام المدرسة دي!! إنها آخر السنة وقرروا يعملوا حفلة القرآن نفس اليوم وخلاص
شفتها و هي بتغني و وهي بتسرم على السبورة بإيديها الصغيرة، شفتها وهي قبل ما تقول أي حاجة تبص لي و تبتسم. شفتها وهي بتعمل حركات رقصة صغيرة كانت "غششتهالي" قبل الحفلة بيومين و خلتني أتمرنها معاها:$ بس من غير ما أقول الحركات لمامتها أو جدتها أو حتى أخوها الصغير عشان يشوفوها مفاجأة في الحفلة

............................................
ابتسامتها البريئة بتجنني،و خجلها الرقيق بمــــوت فيه
اليوم دة لقيتني بفتكرها وهي لسة بيبي صغيرة... و هي لسة مولودة، و بعدها لما كبرت شوية و بدأت تبتسم... و ابتسامتها لما تسمع صوتي من قبل ما تشوفني عشان أنا خالتها..... و بعدها لما بدأت تتكلم بسيط،و وأنا بحاول أعلمها إزاي تتكلم و تقول إيه
لحد ما كبرت و بقت تحكي لي حكايات صغيرة بريئة وجميلة زيها... بتغير لي أي إحساس وحش حاساه
البنوتة الصغيرة اللي بتعلم منها كتير...... يـــارب ربنا يبارك فيها و تفضل أحلى بنوتة في الدنيا مش في حياتي بس
و ييجي قريب اليوم اللي ألاقيها حافظة القرآن كله

Masquerade

حفل تنــكري

خلف الأقنعة تقبع وجوها


تخـفي ملامحها


وراء شخصيـات زائفة


هناك من يخفي لؤمه خلف وجه وديع


و آخر يخفي حقده خلف ابتسامة قنــاع


نظرات خادعة و ابتسامات باهتة


تختبئ شياطين في زي الملائكة، و تختفي الخسّـة خلف زي بديع


أمام أبواب القصر قبل الدخول يرتدي الجميع الأقنعة..و تختفي حقيقتهم معهم


تلقى الزيـف في كل خطوة تخطوها


و تحاول البحث عن الصدق بداخل المكان





في الحفــل التنكـري


كــــل الحقائق تذوب


خلف الملامح الزائفة


يختبئ الجميــع





أشخاص كالذئاب في أرواحهم


بابتسامة خبيثة.. يخفون مخالبهم خلف عباءة التنكــر


هنـاك من يمشي بثقة بزي أسد مغوار


وهو في الواقع يخاف كل شيء حتى أنه لم يكن يوما كالأسود





في الحفــل التنكـري


تجد من يخفي جرحه العميق خلف ابتسامة مهرج


رسمها على وجهه قبل الدخول


و تلك بتنكرها أميــــرة الثلوج


تحت عينيها دمعة


تدّعي أنها ثلج يذوب





و آخر بتنكره تظنه كيوبيـد


بسهم الحب يلف القاعة مبتسما


ترى هل يخفي جرحه الغائر.. أم أنه لا يأبه بالألم الذي سببه للآخرين بحياته؟؟


و تلك من الخارج تسحر الألباب


تراها ترتدي زيا ملائكيا


و بداخلها خبث و شر يجعلها أقرب للشياطين





و فتاة في ريعان شبابها بضفيرتين


في غاية الرقة تسير بفستان طفولي


تتمنى لو أن تعود إلى تلك البراءة من جديد





و فتاة تسير مبتسمة


بفستان أبيض ملائكي و عصا سحرية


بداخلها المئات من الأمنيات


تود لو أن هزة بسيطة من تلك العصا تؤتي بسحرها


و تحـقق لها الأمنيات و تبعد الزيف عن الحياة

دمـــــــــوع

دي محاولة لكتابة قصة قصيرة... قولوا رأيكم(طبعامن غير مبالغة) انتو عارفين كويس

....................................

انتهت من إعداد طبق التونة بالبصل و الخل كما تحبه حفيدتها،ولم يبق إلا بعض الإضافات البسيطة
انتقلت إلى حامل الأطباق و على وجهها ابتسامة كبيرة.. فهذا هو اليوم المخصص لزيارة حفيدتها لها كل أسبوع،و قدوصلت إليها بالفعل منذ بضع دقائق
بدأت في جمع أدوات الطعام كي تضعها على الطاولة لتناول الطعام مع حفيدتها. أخذت ستة أطباق و ملاعق و هي لا تفكر سوى في الساعات القليلة السعيدة التي ستقضيها مع حفيدتها... لكنها توقفت فجأة عندما أدركت أن عدد الأطباق الذي جمعته غير صحيح تماما!!

توقفت عن الحراك و هي تفكر كيف حدث ذلك؟ كـيف جمعت ستة أطباق كي تضعها على طاولة بيتها الهادئ؟؟ و كأنها عادت بالزمن إلى الوراء أكثر من ثمانية أعوام مضت
تذكرت أياما كان بها هذا البيت مليئا بالحياة و البهجة. تذكرت زوجها العزيز و الذي كان يجمع شمل الأسرة كلها بأوقات الطعام. تذكرت يوم وفاته و إحساسها المؤلم بالوحدة آنذاك. كانت بكل لحظة تفكر أنها ليس باستطاعتها الحياة بدونه، لم تكن تتخيل أن تستمر في الحياة بعده كل تلك الأعوام

تذكرت ابنتيها اللتان لاتراهما إلا على فترات متباعدة جدا. . ابنتها الكبرى التي لا تعلم عنها إلا القليل، فقط بعض المعلومات الأساسية بلا التي تنقلها ابنتها ذات الاثني عشر عاما إلى جدتها بلا تفاصيل عند زيارتها لها كل أسبوع.
!!ليست ابنتها الكبيرة بعيدة في السكن كل ذلك البعد حتى لا تزور أمها سوى مرات معدودة كل شهر
و ابنتها الآخرى التي لا يملأ عقلها إلا العلم. شغوفة هي بالازدياد من العلم كل لحظة و تحضير الأبحاث و حضور المؤتمرات، شغوفة لدرجةجعلتها تتناسى كل ما بالعالم من حولها
أخذت قرارا بتكريس كل حياتها للعلم إلى يوم وفاتها، و نسيت أن هناك من كرّســت كل حياتها لتربيتها هي و إخوتها...وتستحق اليوم تكريس ولو يوما واحدا لزيارتها كل أسبوع
كــان الجميع يشجعها على حب العلم و استكمال دراساتها العليا وما بعده.. لـكنهم لم يتخيلوا للحظة.. أن هذا الحب المفرط سيدفعها لشراء شقة صغيرة بجانب الجامعة لتعيش وحيدة بعالم الزئبقيات و التفاعلات الكيميائية و الدراسات المعقدة...بعيدا عن أي علاقات اجتماعية إلا نادرا
ابتسمت العجوز و هي تتذكر ابنها العزيز الذي سافر بعد زواجه إلى استراليا ولم تعد تراه إلا خلال زياراته السنوية لمصر
تستمد صبرها من الله.. ومن لقاءات باردة خالية من دفء المشاعر بينها و بين ابنها و أسرته على شاشة الكمبيوتر. لكم تشعر أحيانا برغبة في كسر هذا الجهاز العقيم الذي يريها أحباءها لكنها أبدا لا تستطيع لمسهم من خلاله
...................................
و ها هي اليوم وحيدة بين جدران منزل كبير كان يوما رمزا للسعادة و جمع شمل العائلة كلها
خانتها عيناها و خرجت دمعةحبيسة كانت بداخلها منذ زمن، كانت بمثابة إشارة استئذان تلاها شلال من الدموع على وجه السيدة العجوز
في تلك اللحظة جاء صوت حفيدتها من خلفها يتساءل "جدتي! ماذا هناك؟ ما الذي أبكاكي؟؟"
ابتسمت الجدة في حنان و قالت... لا تقلقي عزيزتي. تلك كانت..دموع البصل

Only Sometimes

Sometimes I close my eyes& dream

Other times I feel I need to scream

Sometimes I just feel safe

But soon I find myself lonely.. in a cave

. . . . . . . . . . . . .

I'm scared

really scared

Is it time to quit dreaming??

تهادوا تحابوا

الأسبوع اللي فات كنت في سيتي ستارز
دخلت من الباب المقابل لمكتبة الشروق...و أول ما دخلت لقيت زحمة أوي عندالمكتبة!! قلت يمكن يكون فيه توقيع كتاب أو حاجة ، بس تداركت بســـرعة :) إن إحنا مش شعب مثقف أساسا
كان فيه بوث لونه بنفسجي أدام المكتبة، و شوية موزعين لابسين نفس اللون، و بيوزعوا شوكولاتة ورقتها لونها إيـــــه؟؟
طبيعي بنفسجي برده
الزحمة دي كانت لأن الشوكولاتة بيتم توزيعها مجانا،و دي مش حاجة متعودين عليها أوي في مصر
غير طبعا إن اللي بيتوزع
:D
شوكولااااااتة
وقفــت كتير هناك براقب وشوش الناس و ملامحهم السعيدة. مش كان فيه حد قريب من المكان مكشر، الكل كان بيملى وشهم ابتسامة جميلة أوي و ساعات كمان ضحك
وقفت كتير و فرحت من المنظر جداجدا
بعيدا عن هدف الشركة طبعا من الحركة... بس هي حاجة جميلة أوي أوي
حتى لو الشوكولاتة صلاحيتها هتنتهي اليوم اللي بعده و لا مش عارفين يخلصوا منها
فكرت إنه حتى لو الموزعين دول بقالهم ساعات واقفين و تعبوا من الشغل... فهم برده مبسوطين،و صعب مش يقدروا يكونوا أصلا لأنهم بيبثوا الفرحة على كل اللي حواليهم
!!!و لو لقيت كل اللي حواليك قاعد يضحك.. صعب تفضل لوحدك عابس

افتكرت ساعتها مجموعة الشباب اللي راحوا ميدان التحرير و قعدوا يوزعوا على كل مار وردة :). أد إيه الفكرة بسيطة
بس بجد أد إيه بتسعد
ومش بتسعد المتلقي بس لكن بتسعد اللي بيوزع أكتر أصلا

افتكرت إن في مرة من فترة كبيرة قررت أوزع بومبوني و شوكولاتة صغيرة بس لقيت إنه مش هينفع يكون غير في مكان محدد نسبيا.... لأن أساسا البلد مش بقت فيها أمان أوي و كتير من الناس هيقلقوا ياخدوا
و بصراحة أنا أولهم لو كنت مكانهم :$

حاجات كتيرة أوي بسيطة بس ممكن تسعد كتير
ليه مش بنعملها بأة؟؟؟
ليه و انت رايح تزور صاحبك مش بتجيب له حاجة هو بيحبها؟؟ مش بنقول هدية.ومش بنقول كل مرة لازم يبقى فيه حاجة في إيدك و انت رايح
بس حاجات رمزية بتقرب المسافات أكتر
هي أصلا وصية من رسولنا –صلى الله عليه و سلم- من قبل اي حاجة تانية
تهــادوا تحــابوا
يبقى نعملها و إحنا معانا أكتر من نية كويسة
نبقى بنعمل بحاجة من كلام رسولنا محمد –ص-،و في نفس الوقت ننتهز الفرصة إنها حاجة خفيفة أوي على القلب. مش شاقة نسبيا
و في نفس الوقت نيتنا ندخل السرور على قلب اللي أدامنا...و نعبر طبعا عن اللي جوانا

زعلان من حد أو هوزعلان حتى منك اشتريله هدية... هتكسر حاجات كتير وحشة بينكو و تقربكوا لبعض أكتر. مش عشان تمنها بجد لكن عشان معناها
بتحب صاحبك أوي أو بتحب خطيبتك و مش دايما تقدر تعبّـر عن كدة؟
الهدية ليها مفعول السحر عشان هي اللي تتكلم بدالك و تقول اللي جواك
لو حد بيحب الورد أوي أوي. ليه مش تجيبله مرة ورد و انت رايحله؟؟ بجدمش هتبان تكسف أد ما هيبان أد إيه عايز تقول فاكرك و عارف إنك بتحب الورد، وعشان خاطرك جبته
لو واحد عيان.... ليه مش نتخلى عن الرسميات شوية و بدال كيلو البسبوسة والمش عارف إيه و لا علبة الشوكولاتة. تفكر في
حاجة
هو
بيحبها بجد
حاجة مميزة عنده مهما كانت بسيطة

الستات اللي دايما عايزة جوزها يدلعها و يفتكرها... ليه مش تبدئيها انت الأول المرة دي و تحسسيه بحبك؟؟
أد إيه بجد الحاجات الصغيرة دي بيكون ليها وقعها على القلب. بتفرح بجد
عبّـر عن حبك بالحاجات البسيطة و قول كنت معدي فلقيت دة و أنا عارف إنك بتحبه فافتكرتك و جبتهولك
إن شالله كيس لب و لا تين شوكي
أي حاجة بتقول إني فاكر صاحبي أو حبيبي طول الوقت،و عايز أسعده بحاجات بسيطة

تيجوا الأسبوعين الجايين نفتكر دايما وصية الرسول-صلى الله عليه و سلم- "تهادوا تحابوا"، و كل ما نكون هنشوف حد نجيب له حاجة حتى لو صغيرة جدا جدا؟؟ مش مهم تمنها بس المهم معناها...تمنها جوا قلب اللي هتهديهاله. إيه رأيكوا؟؟؟

رحـــلة صعب نسيانها :)

كانوا يومين كنت حاساني عايشة جوا حلم

بجد... بكل معنى الكلمة

هو فعلا كـــان حلم

و حلم كبير أوي كمان

:)

الحمدلله

يوم الخميس الصبح ظهر لي رحلة مفاجأة!!! مش كنت مقررة أي حاجة و لا عاملة حسابي. بس خلال ساعات قليلة كنت حضرت شنطتي الصغيرة "اللي لازم تكون خفيفةعشان الرحلة" و رحت مع أخويا على مكان التجمع

رحت جبل موسى

مع أصحاب أخويا طلعنا كلنا لفوق الجبل

مش هقول و أحكي عن التعب لأنه بصراحة لا يوصف

مشيــــــنا كتيــــــــــــــرـ و طلعنا سلالم كتيـــــــــــــــــــــــــــــــر.... بس لما توصل للقمة

بتنسى أي إحساس فات أصلا

بالعكس.. الإحساس الرائع هو إنك بتحس إن تعبك ومجهودك دة كله كان ليه لزمة

طلعت أنا و أخويا و كان معانا كشاف واحد فكنا دايما مرتبطين ببعض طول الطريق لفوق لأن من غير الكشاف........ :). من الآخر مش كنت شايفة الفرق بين الجبل و سواد السما حواليا

إحساس أكتر أكتر أكتر من رائع.... لما تبص فوقك تلاقي نجوم كتيرة جدا لدرجة تزغلل عينيك الحقيقة

:)

إحساس أكتر من رائع إنك تحس إنك قريب منها أوي، و لو مديت إيديك لفوق هتلمس النجوم دي فعلا

أخويا لما بص لفوق راح قايل

stairway to the stars

هي فعلا كدة

كل خطوة تطلعها تحس إنك قربت أكتر سبحان الله

كان فيه حاجة "مرعبة:(" بالنسبة لي

ودي يمكن الحاجة الوحيدة الوحشة في الرحلة بالنسبة لي

و هي

إحم إحم...... الجمل :). أيـــــــــــــــــــــوة. هو الجمل

طول عمري الناس تقول عليّ بحب الحيوانات أوي و متعاطفة معاهمومش بخاف منهمو بتاع....لكن إلا دة!!!! لما تكون ماشي مش شايف حاجة قدامك. وماشي في طريق مش يكفي أكتر من شخص يمشي فيه

في ظلام دامس!!!و فاهم إن كل اللي حواليك هوطوب الجبل و بس!!!! بعدين تفاجأ فجأة بأن الطوبة اللي جنبك بتتحرك

!!!!!!!!!!!!!!!!!!!!!!

دة كان الجمل

كــل شوية ألاقي واحد

على طول الجبل موجود الجمال. اللي ماشيين على الأقل هتاخد بالك منهم أوتبقى محظوظ لو الناس اللي قدامك قالت هييييي.خدوا جنب عشان فيه جمل جاي. لكن فيه صنف تاني:( قاعدين

لوحدهم

من غير لا بدو و لاحتى قرود

لوحدهم كدة!!! مش بيتحركواو لا بيطلع لهم نفس،و فجأة تلاقي راس بتتحرك جنبك

أنا كل شوية أصرخ صريخة صغيرة

:(

و مش قادرة أمسك نفسي لأن فعلا بتخض جداااااا

طبيعتي إني مش بتخض اصلا!!! و كمان طبيعتي إني ببقى بضحّـك جدا لما أتخض، بس مش بصرخ!!! إيه اللي حصل؟؟؟ معرفش

حتى جات مرة وكان حتى فيها استراحة صغيرة في حتة أوسع شوية فكان بدأ يبقى فيه نور من بعيد"شوية". و في ظل النور الخافت دة لقيت صف جمال... زينة للمكان الظاهركدة

صف يمين... صف شمال

:)

و انت عملتي إيــــه؟؟

جريـــت طبعا!! دي فيها سؤال؟

بجد جريت من غير ما أحس

وستر ربنا إن محدش من الجمال الطيبة زعل مني.و إلا كان زمانكوا بتقولوا و الله كانت بنت ساعات طيبة

:)

هانسى الحاجة الوحشة

و افتكر الكتيـــــــر الحلو

إحساس لا يوصف لما بدأنا نشوف قمةالجبل فعلا

و نعرف إننا قربنا للنهاية... للهدف اللي عايزينه من أول الرحلة

إحساس أروع و أروع لما تطلع فعلا القمة... و تشوف شروق الشمس

تستمتع بألوان السما الرائعة اللي مش بنشوف زيها كتير أبدا،وعمرها ما تكون بالصفاء دة

............................................................

إحساس بأة...... :) إحم إحم إحم كتيييييير يعني

فوق الخيال

لما في عز البرد و أنا لابسة كتير جدا أقرر لازم أقلع الجوانتي "القفازات يعني"..... عشان ألمس ال.......... :) الحاجة اللي عمري في حياتي ما شفتها غير في التلفزيون،و طبعا عمري ما لمستها

هقول عليها بس قبلها أفتكر الشروق و جماله

و الشمس و هي بتبدأ،و إحساس إن السما من عزالسواد يبدأ يظهر فيها نور شوية شوية

و إنك فووووووووق لوحدك تماما

الكل بعدماكان بينهج و فيه اللي مش طايقين نفسهم و قالوا عمرهم ما هيعملوا رحلة زي كدة تاني:)تلاقي كل الناس بأة على وشها ابتسامة فظيــــــعة،و راحة جميلة أوي أوي

في لحظة وصولي دي حسيت حاجات جميلة جدا

حبيت أوي المنظر إنك بتبص على جبال تانية أدامك لونها بني بس عليها شوية أبيض. رووووعة سبحان الله

بدأت أقرأ أول آيات في سورة الكهف لأني عارفة إن عمري ما هستشعر الإحساس دي غير يمكن بعدكتيـــــــــر أوي

كام مرة في حياتي ممكن أكون في مكان لوحدي بالطريقة دي

فوق أوي أوي كدة.... فوقي السما و بس وحاساني قريبة أوي

فجر يوم جمعة

ادعي براحتك. انت لوحدك فوووووووووووووق

يااااااه.بجد كنت حاسة إني بحلم، و اتمنيت لحظتها عمري ما أرجع هنا

................................................................

كان فيه حاجة عبيطة أوي في الموضوع:$ و هو إن أخويا قال لي و إحنا طالعين على عرض معين "مش فاكرة اسمه فبلاش إحراج"...عن لما الأكسجين بيقل، و قال لي مش تركزي معايا كمان شوية لو لقيتيني بقول كلام مش مفهوم

ضحكت أوي بس مش كنت متخيلة إن الموضوع جد أوي يعني :). بسمع عن كدة لكن عمري ما شفت

شوية و لقيت فعلا ناس بدأت تضحك من غير سبب،وشوية بدؤوا يخرفوا فعلا :)....و أنا كمان كان لحظات غباء بس بلاش أقولها أحسن

بس كانت فعلا مضحكة جدا آخر فترة دي

..............................................................

طلعت الرحلة دي من غير تردد كتير لأني كنت محتاجاها بطريـــــــــــقة.و كنت بتمنى بجد إن أقدر أغير جو، بس عمري ما تخيلت إني هغير جو بالطريقة دي

لحد دلوقتي بحاول أعيش بالذكريات و الأحاسيس دي

حاجة كمان غريبة أوي...كانت العصافير

و إحنا على القمة وقت الشروق شفنا عصفور..... صغير، لونه أسود...... عادي.وصفه يقول إنه عاااادي جدا

مش عارفة بصراحة إيه كان الغريب فيه!!!و لا قادرة لحددلوقتي أعرف إيه اللي شدنا ليه

كل الناس من غير مبالغة...كانت بتبص عليه

حتى السياح

وكأنه كائن مريخي!!! سبحان الله. فعلا مش عارفة ليه

كان عصفورعادي جدا، بس سواده جميل أوي أوي.زي ما يكون لسة مغسول حالا :). لونه اسودو فيه جزءصغير أبيض

شوية وواحنا نازلين لقيت عصفور..... أغرب من اللي قبله بالنسبة لي بس

كان لونه أحمر أوي

برده عصفور صغير عادي جدا، بس كان أحمره جميل جدا ماشاء الله

برده زي ما يكون مصبوغ كدة :). تبارك الخلاق فعلا

شوية و قعدت أضحك بأة........ لما لقيت تالت عصفور

و اللي كان لونه

................

أخضر!!! أوي

ساعتها كمان فكرت إن العصافير بالضبط زي لون الجبال اللي حواليها سبحان الله

الجبال البني العادي، جبال أحمر أوي، أسودطبعا فيه......و جبل واحد

ترابه أخضر:).اسمه جبل الدكّــة،و اللي بيقولوا إنه هو دة الجبل اللي ربنا تجلى ليه في حديثه مع سيدنا موسى و الله أعلم...... هوفعلا تراب،و صغنتوت كدة في وسط الجبال التانية :) بس أخــــــضر

مميزجداجدا :)ولون العصفور القمر

أحلى ما في الرحلة مش كان أي حاجة من اللي قلته الحقيقة

أحلى ما فيها..... :)هو اللي لمسته بإيديا

و بعد الشروق و إحنا نازلين مش صدقت نفسي لدرجة إني نمت عليه و مش ركزت في إن هدومي كلها هتبقى مية، بس المهم إنها مش فرصة كتير هتتكرر

:)

كان تلج

snow

بجد

زي ما بشوفه في الأفلام

بالليل وإحنا طالعين لما وصلنا لمنطقة كويسة فوق بدأت أشوف حاجات فاتحة جنبنا و إحنا مش فاهمين هو إيه، و لما سلطنا عليه الكشاف بدأنا نصرخ من كتر الفرحة كلنا،و كله بسرعة بص جنبه و معظم الناس مش قدرت تستحمل و لمسته

أول مرة في حياتي أشوفه

و إحنا نازلين كان خلاص الصبح

شلة أولاد قرروا يعيشوا الحياة طول و عرض و بدؤوا يعملوا كور تلج و يرموها على بعض :))) . بس المشكلة إن كان نصهم على جنب و الفريق التاني الجنب التاني.و معظم الناس كانت خلاص نزلت ومش باقي غير أنا و أخويا و بنت تانية....و في وسطهم...كان السلالم لتحت ...واللي طبعا اتضربنا فيها إحنا لأن كور التلج كانت قذائف

ودي كانت بداية معركة من الضحك مش انتهت غير بعدها بساعة تقريبا :)). بجدكان حلم

الحمدلله

بعدها بدأنا نكمل نزورمن على الجبل بس شوية قليلين اتأخروا عن الباقي عشان بناخد صور

الحمدلله كنت منهم :)،و لقيت أخويا اقترح حاجة جميلة أوي

أتأخرنا عن باقي المجموعة كتيـــــــــــــــــــــــــــــر جدا الحقيقة. بس بجدكانت تستاهل و استمتعنا أكتر منهم

اقترح نعمل

Snowman:)))))

و بدأنا كلنا في عمله و قعدنا كلنا مع بعض على التلج

و بسرعة جبت زلط صغير لعينيهوواحدة رفيعة وطويلة لمناخيره،و أعشاب جافة كانت موجودة قطعت منها عشان إيديه

وبدأنا كلنا نحاول نجمله و إحنا بنضحك على شكله

و الحقيقة كان نونو أوي أوي جدا :) بس كان جميل أوي

وكلنا حبيناه جدا لدلاجة إننا مش كنا راضيين نمشي و نسيبه

و اتصورنا معاه كتير جدا :)وواحنا ماشيين كنا حاسين إننا هنعيط

بيبي أوي :)،وتحفةجدااااا

مش نمت على التلج وبس

ومش قعدت عليه وبس

ومش شاركت في رجل التلج الصغير وبس

بس كمان طلعت حتة من التلج على الجبل و اتزحلقت عليها :))). زي ما طول عمري بحلم "في خيالي"و عمري ما فكرت في يوم إنه هيحصل في الحقيقة

كان يوم أقرب للأحلام

في كل حاجة فيه

بس مش كان فيه فرحة أكتر من لمس التلج بجد الحمدلله :)،و إحساسي إني مش نسيت الدنيا و فاتني الصلاة الحمدلله بجد

تغيير جو بمعنى الجملة اللي كتير بقولها وبسمعها.... بس مش شرط أحسها فعلا

بحمد ربنا على كل لحظة حلوة

وبحمد ربنا على الجمال الرائع اللي حوالينا

و نعمه الكتيرة جداجداجدا و جمال المناطق في مصر

بحمد ربنا على نعمة البصر اللي مش مقدرينها أبدا و كتير بيستعملوها في الغلط وهم مش مدركين قيمتها

و إنه قدّرلي أكون في رحلة زي دي في الوقت دة بالذات..... الحمدلله بجد

إحساس لا يوصف

بتمنى كل حد فيكو يحسه بجد. يـــــارب

قلت أحاول أفرحكوا معايا بدلما علطول نكد كدة :).يارب يسعد كل اللي بيقرأ

بحمدربنا أكتر و أكتر.... على أسبوع جميل أوي الحمدلله. مش متخيلة أسبوع زيه تاني قريب. بس أكيد بتمنى... لسة مش حكيت على يوم تاني في الأسبوع اللي فات دة، بس إن شاء الله هحاول قريب

سامحوني على عدم ردي على التعليقات وعارفة إنها مش حركة ظريفة ابدا ابدا بصراحة...بس عشان... :) كنت مشغولة "اول مرة اقولها و انا مبسوطة".مشغــولة

:)

ملحوظة صغيورة:الصورة دي هي بيبي التلج اللي عملناه.معلش غريب شوية بس دة مصريين أول مرة يعملوا راجل تلج يعني:)ومستعجلين عشان باقي المجموعة كمان.آل يعني

خواطـر فتاة

أيـها الزمن

ساعات حياتي البسيطة

أرجوك

تمهلي

توقفي قليلا

لا أريد لتلك اللحظات أن تمر سريعا

لكم أتمنى أن تعيدي النظر في دقاتك يا ساعة حياتي

دقــات تحيرني كثيرا في انتظامها و رتابتها أبد الدهر

لا يأتي يوم فتقرر التباطؤ أو الإسراع قليلا

أرجوك أيتها الدقائق و اللحظات

توقفي قليلا

جمدي الوقت و لو لساعة

فلا أريد للوقت أن يمضي الآن

و للحظات السعيدة أن تنتهي

توقفي

فهو معي الآن

..........

كــنت أسير وحيدة تائهة

إلى أن ظهرت أنت

أعطيت لحياتي معنى آخر منذ ذاك الوقت

أضأت لي الطريق بشموع من الحنان

و أصبحت تلك الشموع هي صديقي المخلص دوما

لا تسلبها مني الآن

...........
كــانت حياتي لوحة بيضاء.. خالية من أية رسومات أو ألوان

حيــاة خالية من الحياة

أجلس أمام تلك اللوحة لساعات

حتى سمعت وقع أقدامك من خلفي

جئت لتحمل معي فرشاة الألوان بابتسامة رقيقة

و معك أصبح لحياتي مذاق آخر

و ازدحمت بداخلها أزهى الألوان

............
كالعــصفور الصغير كنت

يتطلع كل يوم إلى السماء الزرقاء الواسعة أمامه

يحلم بالتحليق

و الاختفاء خلف السحب كل يــوم

إلى أن جئت أنت

و علمتني الطيران

Among the clouds

هل أحسست مثل ذلك الإحساس من قبل؟؟

أن تلمس السحــــاب بيديك

إذا كانت الإجابة بنعم

فـمتى كـــانت آخر مرة شعرت بذلك الإحساس؟؟؟

:)

.........................

ملحوظة: فيه حد دعا لي من قلبه بجد:)مش عارفة مين طبعابس عايزة أقول لكل اللي أعرفهم من المدونة ربنا يكرمكم ويجازيكوا خير بجد... و ادعولي بأة عشان يوم السبت فيه حدث بسيط،بس شوية قلقانة بصراحة. ادعولي ربنا يوفقني..ولو كان حلو يمكن أكتب عن اللي اتعلمته بعدها. :) شكرا بجد

مدونتي العزيزة... شكرا

لم أعـد أكتب كثيرا بمدونتي مثلما كنت أفعل. تمضي فترات طويلة دون أن أضيف إلى ذلك الجزء المهم من حياتي أي كتابات

ليس السبب هو عدم الرغبة في الكتابة، و لا أن الأفكار و الكلمات قد نفذت مني... بل الحقيقة أن بداخلي الكثير و الكثير حتى أني أعتقد أحيانا أنه ليس بمقدور عقلي استيعاب هذا الكم من التفكير و لا قلبي أن يستوعب تلك المشاعر المختلطة، و المتناقضة أحيانا كثيرة

عـارفة إن دة إحساس بيمر بكل واحد فينا عادي جدا. و بياخد وقته و يختفي في وقت من الأوقات، لكن برده أعتقد مش هيحس اللي أقصده غير اللي حس الأحاسيس الوحشة الملخبطة دي قريب

. . . . . . . . . . . . . . . . . . . . . . .

مش بحاول أبدا أعيش في دور الضحية

عارفة بجد إن المواضيع كلها عادية جدا و بسيطة... و يمكن كمان هايفة أحيان كتيرة بس معلش دة إحساسي.....و مدونتي من الأماكن القليلة أوي اللي أقدر أعبّـر فيها براحتي. في النهاية هي دنيا و مفيش داعي للدراما فيها

لأن المهم هو اللي بعدها مش الدنيا نفسها

الفترة دي حاسة إني مش عارفة أجمع نفسي كويس

:) كل جزء مني موجود في حتة مش عارفة إزاي

الحمدلله الحياة طبيعية و عايشين و بصحة و حواليا أهلي و لي بيت بيتقفل علينا بالليل و ليه سقف مش بينزل علينا مطر زي الغلابة و لا بيتكسر منه حتت الحمدلله، و ليه باب مش زي ناس بيوتها مش ليها أصلا باب...و تكون ماشي في الشارع تلاقيك خطوتين و تبقى جوا بيتهم،و بابه مقفول الحمدلله مش كل العمارة و اللي حوالينا يعرفوا أسرارنا

الحمدلله على كل نعمة حلوة

بس اليومين دول حاسة بإجهاد من كل حاجة

إجهاد يمكن ساعات بحسني مش قادرة أعمل أي حاجة منه أبدا

سفر بابا بعد ما كنت حسيت إنه خلاص مش هيسافر تاني، و رحلة البحث عن عمل اللي أول مرة في حياتي أحس بيها بجد

و إحباطات بقابلها معاها مضحكة مبكية، و أصحاب ساعات بفكر إنه لو ربنا توفاني مش هيعرفوا غير صدفة...ويمكن مش يعرفوا عمرهم

و بحث عن عمل جنبه حاجات لطيفة أمثلة إن اللي حواليك شايفينك بتتدلع و مش بتعمل حاجة أصلا

و اللي يقول أصلا هي مشبتدور على حاجةهي عايزة تقعد في البيت مستريحة!!! و اللي يقول انت ليه شكلك مكتئبة كدة ساعات؟!!! أقول لك فكرة حلوة؟؟ما تنزلي تشتغلي؟؟؟ معلش عارفة إنك حابة تقعدي. بس يعني... ليه مش بتفكر يتنزلي تشوفي شغل خفيف، أو تخرجي مع أصحابك؟؟؟و أسئلة كتيــــــر مستفزة تحسسك إنك مش عايز تتكلم أحسن

و أصحاب.... أكيد فيه كتير الحمدلله كويسين و ليهم أعذارهم أنا عارفة كدة كويس جدا......... بس فيه ناس تانية تلاقيها مش تسأل أبدا..و الحقيقة إن مش ليهم عذر أوي،و كل ما تتصل و في دماغك إنك مش هتلوم و لا أي حاجة لأن خلاص.... مش بقيت تتدايق و لا بقى يفرق معاك... تقول إن هتتصل تسأل و بس، و تضحك و تعرف أخبار حبايبك وبس

تتفاجئ في بداية المكالمة بسيناريو زعلت أوي لما لقيته اتكرر معايا أكتر من تلات أربع مرات!!! من ناس يمكن مش تعرف بعضها أصلا، وكأنهم متفقين على نفس الصيغة

تقول ياااااه!!! أنا بجد مقصرة معاكي جدا جدا جدا

عشـــان خاطري مش تكوني زعلانة

لأ حبيبتي مش زعلانة. مفيش حاجة

بس أنا مقصرة معاكي أوي :(. أنا عارفة إني وحشة... متزعليش بأة..... بحس إني ندمت إني اتصلت

خلاص يا صاحبتي أنا مش عايزة أزعل،ومش حابة أفكر إنك مقصرة... يا ستي كأن ليكي عذر و أنا مش عارفاه. ليه بس تفكريني؟؟؟ بحس إنه لازم أزعل منهم من كتر المحايلة

و في الآخر بعدها مش بسمع عنهم تاني :(...و بيفضلوا مقصرين يعني مش كان ليه لزمة الكلام دة كله

يوم بيبدأ... أحداث بسيطة جدا.. و ينتهي

رتابة مش متعودة عليها و مش عارفة إزاي فيه ناس عايشاها... و رغم إن بقالي فترة عايشاها بس حاسة إني مش قادرة

حتى المشي في الشارع و عند الجنينة اللي بستمتع بيه جدا... حاساه كله مش قادر يفرق معايا

عايزة أحس بالدفا اللي في قلوب الناس

بس فجأة بلاقيني لوحدي

. . . . . . . . . . . . . . . . . .

ساعات تانية بحس إني نفسي أبقى ماشية بين الناس بس مختفية

موجودة بس مش موجودة و محدش شايفني

مش عارفة

أنا بقيت بزعل ناس كتير مني.... و أنا مش عارفة ليه

بقيت وحشة أوي :(. بس بجد مش بقصد

ساعات بحس إني عايزة أتكلم لساعات ومش بلاقي أي حد

و ساعات تانية بلاقي كتير عايزين يكلموني بس أنا اللي مش قادرة

عايزة أساعد بس مش قادرة... عايزة أتطمن على حبيبتي روفي بس كمان مش قادرة، و في نفس الوقت هي شكلها زعلانة مني أوي و عمرها ما هتكلمني تاني

بس مش قادرة أكلمها

هي مش حاسة بي

يمكن أبقى المرة دي أنانية لأن أنا كمان كدة مش حاسة بيها.. بس بجد فعلا حاسة. بس مش قادرة أساعد

حالة اضطراب فاشل ليها وقتها و هتمشي

بس لحد ما تمشي........ على الأقل اللي هقدر أقول لهم هم المدونين اللي هيقدروا يكملوا قراءة لحد هنا... سامحوني على تقصيري معاكو في زيارة مدوناتكوا اللي بحبها أو التعليق

بتمنى بجد مش يكون حد زعلان مني لأني فعلا مش حاساني كويسة أوي الحمدلله

و مش عارفة حتى هكتب إمتى تاني

يمكن تلاقوا تدوينة بكرة علطول :)،و يمكن بعدكتير

مش عارفة. بس كل اللي أعرفه إني هاتحسن علطول إن شاء الله

و عارفة كمان إني أزعجت أي حد قرأ معايا..... بس دي فضفضة مش لاقيالها مكان

. . . . . . . . . . . . . . . . . . . . . . . . .

كل يوم بروح أفضل جنب الشباك وقت كتيــــر

و أمشي و أرجع له تاني، و كأني مستنية حد

:)

بس مش عارفة أصلا مستنية مين و لا إيه :))). بس دة اللي بيحصل

I feel a bit lonely I guess

بس هي فترة و تعدي علطـــــول إن شاء الله

سؤال في آخر الحلقة للي لسة عايشين ووصلوا للنقطة دي

هو ليه الناس مش بتقدر الناس اللي بتحبها بجد؟ يعني ليه مش بيحسوا بيهم و يهتموا إنهم يسألوا و يفضلوا معاهم و كدة؟؟ و ليه فيه ناس بتهمل أصحابها و الناس اللي بتحبها رغم تأكدهم من إن الناس التانية دي فعلا بتحبهم؟؟؟

يعني... لو لقيت حد بيحبك، مش هتفضل معاه طول عمرك؟ مش هتتعب نفسك شوية عشان هومش يزعل منك و لا تخسره؟ مش عارفة ليه معظم الناس بتصمم إنها مش تعرف قيمة اللي معاها إلا بعد فوات الأوان

ملحوظة كتبتها زمان و هكتبها تاني

أنا مش هزعل لو مش لقيت تعليقات... أيوة طبعا تعليق كل حد فيكوا بيفرق معايا جدا و بيساعدني كتير، بس اللي بكتبه مجرد فضفضة عشان أخرج شوية من اللي جوايا... و يمكن ساعات مش بيكون عليه رد

شكـــــرا لكل اخواتي اللي بيساعدوني

و لو حد زعلان مني عشان خاطري مش تزعلوا عشان مش أموت و حد شايل مني..و عشان كمان مش هحب أكيد أزعل أي حد

نفسي أكتب أكتر أصلا... بس مش قادرة

في لحظـــات

دخل فجأة دون استئذان

ضرب الباب بعنف و اتجه داخل البيت بخطوات ثابتة

انتفضت السيدة عند دخوله و ظلت تنظر إليه بتوجس..نظرة تسأله مئات الأسئلة

بنظرات حادة بادلها حوار الأعين في لحظات، ثم مضى إلى الداخل

كأنه ذئب يعرف أين تكون فريسته بالضبط

يحفظ المكان

يعرف هدفه ومتأكد منه

لم يلق بالا لما تقول بعينيها أكثر من ذلك

فقط اتجه صوب النافذة و ألقى بسلسلة مفاتيحها بعدم اكتراث، لكنه أبقى معه مفتاحا واحدا فقط.. و نظر إليها مبتسما بخبث،و مضى إلى داخل الغرف

أصوات تكسير و خراب

و أوراق تقطّـع و متعلقات تتحرك من مكانها

سلب كل شيء بالبيت... كل شيء.. كل ما وجده من متعلقات، أوراق،و أشياء للذكرى مهما كانت صغيرة

ابتسم ابتسامة كبيرة لقيامه بمهمته الغامضة

!! و نظر إليها و هي في حالة ذهول

لا تجد حولها بكل مكان تنظر إليه سوى الخراب و الدمــار

رفع يده مودعا و كأنه صديق قديم!! و على شفاه ابتسامة الانتصار

تركها في حالة يرثى لها... فهي لا تصدق ما حدث في لحظات!! كل ما حولها تم أخذه و كأنها تود لو أن تختفي مع ما تم أخذه

تركها و دموعها قد تجمدت مما يحدث حولهاو هي في قمة الانهيار

أغلق الباب بإحكام بالمفتاح.....و رحل

. . . . . . . . . . . . . . . . .

تحديث: ما أكتبه ليس بالضرورة معبرا عن تجربة عشتها أو واقع أعيشه اليوم.. ربما كانت مجرد خواطر، أحاسيس أخافها، أو حتى مشاهد أتخيلها بناء على شيء بداخلي

:) عندمـا أغضب... أخبر كعكة غريـــــــــــبة الطعم

من فترة كتيرة قرأت البوست اللي كان عند المدونة ""غادة"و اللي بحبها جدا من كتاباتها وبجد بحسها قريبة مني أوي أوي

قريبة من كلماتها و إحساسها وكل حاجة.واحدة من كتاباتها بحس إني أحب أعرفها ومش هحسها غريبة عني كتيرلو فعلا قابلتها في الحقيقة

واحدة بحب إحساسها و بحب طريقة تدوينها جدا جدا جدا من يوم ما اكتشفتها



الله أعلم طبعا بس دة إحساسي



المهم إن البوست كان بعنوان "عندما أغضب..أخبر كعكة" و لقيتني أعجبت جدا بالفكرة

طبعا مش فكرة الكعكة الكيكة نفسها لأني مش بحب الكيك أساسا:)،و لا موضوع إني أخبر كعكة لأني مش أقصى متعتي في المطبخ أبدا الحمدلله..... لكن موضوع إن لما أكون فعلا متدايقة أو مخي مشغول بحاجة.. أفكر في حاجة لذيذة و أعملها

أغير المود يعني... بس بطريقة مختلفة



الفترة الأخيرة كانت مش ظريفة شويتين الحمدلله... المهم إني قررت أعمل زيها بالضبط:)و أعمل كيك برده

و قلت لمامتي على القرار الفظيـــــع دة، و دخلت على المطبخ علطول



بصراحة كانت أول مرة "أقرر" أعمل كيك لوحدي. لأني مش من محبيه أبدا فعمري ما شدني إني أعمله مفاجأة لأهلي و لا ماما كلفتني بيه قبل كدة...يمكن عملته معاها كتير بس يومها قررت أنفذ المهمة لوحدي

وبدأت أدخل في المود و لبست مريلة المطبخ اللي جايباها لبيتي مستقبلا "آل يعني". . .و جهزت المكونات و الجهاز و كل حاجة

و بدأت في إزعاج أهل البيت الموقرين بصرت الكروان البلبلي الكناريني الرائع.. ألا و هو..... بلا فخر صوتي

و كل شوية أغني أغنية و أنا بلعب في المطبخ

.................................................................



الحمدلله مش كنت بعمل الكيكة عشان غضبانة.. بس لأني كنت في قمــــة خنقتي و ضيقي

و مش كنت عارفة أعمل حاجة تانية أغير بيها الإحساس دة

و كان كل همي هو إني أحاول أركز أد ما أقدر لأني و أنا بالحالة دي يمكن مش أعرف أركز كويس



مع البيض المخفوق بدأت أفتكر أول مرة في حياتي عملت بيض... و أد إيه كنت حاسة إنه إنجـــــاز ساعتها

و فكرت إن كل حاجة بنعملها مهما كانت صغيرة فهي في وقتها إنجاز لحد لما نعمل حاجة أكبر منها شوية



بدأت أحط الدقيق و البيكنج باودر و ساعتها افتكرت لعبة النفخ في الدقيق اللي بحبها جدا جدا جدا من صغري لكن عمري في حياتي ما جات لي الجرأة إني ألعبها لأني بقرف أي حاجة تيجي على وشي

:)

غلسة أنا عارفة



و في قمة انسجامي مع الفيلم اللي بيحصل دة لقيت مامتي دخلت المطبخ،ومش كنت لسة حطيت الكاكاو فاقترحت علي و قالت

إيه رأيك نعملها بالأناناس بدال الشيكولاتة؟؟

أنا: امممم...ماشي. مفيش مشكلة. و بسرعة رحت ناحية الدرج بتاع المعلبات لكن ماما كلمتني تاني و قالت: خلـــي بالك

شوفي العلبة اللي فيها التاريخ الأقدم و خديها. لأن كتير بنحط الحاجات بسرعة وبننسى نحط الحاجات الأقدم في متناول اليد الأول

رديت بسرعة و قلت لأ مش تخافي!! آخر مرة كنت "أنا" اللي طلعت المشتروات، و مش تقلقي خالص أنا باخد بالي من الموضوع دة

و بسرعة فتحت الدرج و بدأت أدور في التواريخ و أثبتت وجهة نظري أدام ماما و "وريتها" العلبة الأقدم في الأول إزاي

............................................

أخدت العلبة و الفتاحة و بدأت في محاولات الفتح الفاشلة

هه. واحد اتنين......مفيش فايدة.طب أفتح من هنا؟؟ طب من هنا؟؟؟

العلبة شكلها كانت محتاجة لتدخل جراحي عويص و هتاخد وقت

و هنا ماما بدأت تقلق و قالتلي أنا هعملها و انت شوفي العجينة و كمليها

قلتلها نو نوووو. أنا يا ماما هفتحها مش تقلقي

بدأت تفقد الأمل ..... فقررت هي تكمل مكونات الكيكة و بقت هي جنب الجهاز للأسف ومش بقى شغلي لوحدي

:(

و أنا لســـــــــــة مع العلبة

و بدأ وشي يحمّر و أنا بحاول فيها، و غيّـرت الفتاحة حتى.... إنها تفتح؟؟؟؟

أبـــــــــدا



مامتي حبيبتي خافت ... طبعا لأني قوية و عفية و ممكن أكسّر العلبة في غمضة عين طبعا طبعا:). هي خافت أيوة. بس خافت على العلبة الحقيقة

و صدقنا إن الموضوع فعلا في حاجة لتدخل أجنبي....... و استعننا بإدارة شقيقة تتمثل في أخويا "الصغير" وااااااااء.... عشان يفتح العلبة



مسك العلبةو بص على محاولاتي فيها

و ابتسم ابتسامته المميزة جدا

الســاحرة الســـاخرة

و قاللي هه.... كل دة بتحاولي فيها؟؟ هاتي هاتي

و بدأ هو كمان... واحد اتنين.... مفيـــــــــش

يبص عليها أوي!!! و يحاول تاني

وبدأ و هو متنرفز يقول آدي الصناعة المصرية الفاشلة!!! و لا يمكن دي كمان صيني

انتو كنتوا مسترخصين أوي فيها و لا إيه؟؟؟ و كان مش مصدق نفسه



لإحساسه الرائع بأنه توتو عضلات أحيانا

لحد ما الحمدلله بدأ بصيص من النور يوصل للي جوا العلبة

و قلنا الدنيا لسة بخير



فتح و فتح و فتح..... لنكتشف الاكتشاف المذهل

تاتاتاتــــــــــــــاااااا



بصيت أنا و أخويا في العلبة بعدما شيلنا الغطا

و أنا و أخويا في نفس واحد!!!! مشـــــــــــــــــــــــــــــروم

ميـــــن؟؟؟؟

أيوة أيوة

علبة مشــــــروم



عيب في التصنيع يعني؟؟؟ لا لا لاااا. خالص

دة عيب في التركيز

:$ :$ "$

كانت أخدت فعلا وقت كبير جدا كان فيه ممكن تكون الكيكة قربت تستوي يعني لو كانت دخلت الفرن



و أنا اتكسفت أوي بعد كلمة المشـــروم دي.....ومشيت من المطبخ بسرعة أجر أذيال الخيبة و الحمار و البقرة و كــــــل ذيل ممكن تتخيلوه

كنت هعيط أصلا من كتر الاستفزاز

و لا أنا....و لا ماما...ولا أخويا :) بص على العلبة

و ركزت في التواريخ بتاعة الصلاحية و بتاع........ومش بصيت للحظة على الصورة

دي صورة البيبي ممكن يفهمها

ييييييي

اتكسفت جـــــــامد :).و طبعا على ما قدرت أجمع نفسي من الكسوف الكسوف...... كان الموضوع خلص ومش باقي غير إن الكيكة تتحط في الفرن، و الحقيقة كانت ماما سايباهالي أحطها عشان أحس بقيمة الإنجاز اللي عملته

و من ساعتها....... :)قررت المرة الجاية أعمل بسكوت

و لا لا لا للكيك

و يا ويله اللي هيقوللي عايز كيك تاني . خصوصا لو بالأناناناناس "زي ما بنت أختي بتقولها". حرمــــــت

عندما أكون شوية زعلانة.....سآكل شوكولااااا
ملحوظة هامة: الكلام دة كتبته بعد مرور فترة كويسة على أكلهم للكيكة...و ذلك للتأكد من بقائهم على قيد الحياةو عدم توجههم إلى قسم السميّات بالقصر العيني
وشكرا

في انتظــار

قـطة ترتعش من البرد
و عجوز فقير في الطريق تعب من كثرة السرد
جسده ضئيل يرتجف مع كل هبة ريح خفيفة

و ورود ذابلة فقدت ألوانها
كـــانت يوما تسحر القلوب
هي اليوم تتمنى أن تعودكما كانت
تتمنى للثلج أن يذوب

شجر باهت اللون بلا أوراق
كـان يوما وافر الظلال و هو اليوم يشتاق
إلى يوم يعود فيه أخضر اللون كما كان

ذبول و فقدان حياة
و كثيــرون أزهقتهم قسوة الشتاء
ألوان باهتة بلا أزهار تجمّـلها

في انتظار

يتمنون للربيع أن يعــود
و معه تعود الحياة ولو قليلا و تزهر الورود

حتما سينتهي الشتاء قريبا
و من بعده يأتي الربيع

آنذاك
لن يرهقني البحث عن ورود حية لم تذبل وسط زرع تملؤه الأمطار مثلما يحدث في الشتاء
حتما... سيأتي الربيع