كليـّــتي الحبيـــــبة

وحشتيني

بجد وحشتيني

اشتقت لكل حاجة فيكي، و كل حاجة مرتبطة بيكي

:)وحشني حتى الرخام اللي مبنية بيه

وحشتني كوريدوراتك الطوييييلة اللي كنت ساعات و أنا ماشية فيها بحس إنها ملهاش نهاية

وحشني أصحابي حبايبي ووحشتني أيامهم

وحشتني قعدتنا على الأرض بعد المحاضرات ساندين على عمود و نبدأ نخمن الناس اللي قاعدة حوالينا تجارة و لا ألسن و لا تجارة انجليزي

وحشني أيامك يا كليتي الجميلة

وحشني حتى الوقت اللي كنت بروح فيه على الكلية الصبح بدري قبل الشمس، و نسمة الهوا الباردة اللي لسة مش اتلوثت جامد تيجي تسلم عليّ قبل ما أبدأ يومي

وحشتني امتحانات المحادثة... الامتحانات "الوحيدة" غالبا اللي كنت بدخلها و أنا واثقة في نفسي جداااا..... و لحد النهاردة مفهمتش سر الثقة الزايدة اللي كانت بتتملكني ساعتها

وحشتني د. كرمة اللي كانت كل الناس بتكرهها جدا!! بس كنت بحب أوي عشقها للدراما و إحساسها بيها، كانت حد فعلا بحترم فيه حاجات كتير

وحشتني أمال الحضري اللي درستني الشعر 3 سنين من عمري

محدش كان بيفهم هنكتب إيه في امتحانها صحيح :) بس كنت بحب إحساسها هي كمان أوي

كانت شخصية لو قلت بتتنفس شعر مش هبقى بالغت.. إنسانة عايشة في عالم مش عالمنا أبدا

كتير بفتكر لما كانت بتبدأ شرح في اي قصيدة شعر، ألاقيها فردت إيديها و هي بتشرح و عاشت مع القصيدة... بتفرد إيديها و يسمو بيها الشعر و الإحساس اللي هي بتتكلم عنه... و ساعتها كنت بجد بحس إنها طايرة لفوووووق مع كلمات قصيدتها

مش هنكر إن معظم الناس كانت مش بتحبها .. وطبعا عندهم حق :) لأن حبها للشعر دة ممكن يساعدنا نفسيا ساعات لو حسيناها بجد و عشنا معاها.. لكن عمره ما كان بينفع يوم الامتحان

وحشتيني يا كليتي الحبيبة

يـــــا أول حلم كبير حققته في حياتي و بجد بحمد ربنا كتيــــــــــر عليه

:)

ياريتني أقدر أرجع أيامك تاني...على الأقل أحس إني بعمل حاجة وورايا حاجة مفيدة في حياتي

LiVing in a GIANT Maze !!

عايزة مطر بأة :((

جوايا رغبة كبيرة أوي في إني أشوف المطر

مش قادرة أصبر و مش قادرة أستناه لما يفكر ينزل

:)

وحشني الشتا بكل ما فيه...بجدمغرمة بيه

بس بقالي كام يوم مش قادرة أفكر غير في المطر

عايزاه أوي أوي أوي



إمبارح و النهاردة الجو لطيف...خلاني أتمنى الشتا ييجي بسرعة و مش يتأخر أكتر من كدة

و تكون بدايته نعمة من النعم اللي بحبها أوي أوي

:) المطر

مش عارفة !! بس بحسها نعمة ساحرة أوي لكل الناس

وكل حد بيكون ليه إحساس مختلف بيها طبعا، بس معظمنا فعلا بنحبها



المطر بالنسبة لي بحسه

فرحة وضحك من القلب للأطفال

قمة الرومانسية للعشاق

و يعني بشرى و رزق للفلاحين و المزارعين

خير و تفاؤل في كل حتة



أينعم في مصر الأحاسيس دي بتزيد شويتين و يدخل معاها حاجات تانية مرتبطة ببيوت العشوائيات المساكينو الشوارع اللي مش متساوية و البالوعات الروعة... لكن برده بيفضل مصدر سعادة و أمل للناس



لما بشوف المطر بكون حاسة إني عايزة أرجع طفلة تاني و أتصرف بكل حرية من غير ما حد يشوفني

بكون عايزة أجري تحته و أنا فاردة إيديا كأني بطير فوق أعلى سما

بحس إني عايزة أفضل أتنطط لوحدي و أنا بضحك

.................................

ساعات بحس إن نفسي أقعد تحت المطر مع حبيبي و أجرب الإحساس الجديد دة



فعلا مش عارفة :))، بس بتمنى المطرينزل قريب جااااامد، و أستمتع بكل لحظة و هو بينزل من السما



المطر كمان بيفكرني أوي بقصيدة كان "بلوجر" كتبهاو عجبتني أوي أوي ساعتها

مع إن فيه كتير أوي كتابات حلوة عن المطر بس بقيت دايما بفتكر القصيدة دي وقت نزول اي مطر
خصوصا آخر كام جملة

مش عارفة إذا كنتوا هتشاركوني رأيي دة و لا لأ بس دة عموما رأيي الشخصي و إحساس كنت عايزة أكتبه

دي القصيدة...من بلوج "قصر الرئاسة" و صاحب البلوج رئيس جمهورية نفسه

برد الشتاء

راعش بدن كل البشر

والناس بتجرى فى الشوارع

تستخبى من البلل

وانا ماشى وحدى وفى وسط الطريق

من غير صديق

تحت المطر

معرفش عايز اغتسل

من الذنوب وارجع اتوب

يمكن بدور على الامل

اوحتى بهرب من الملل

تحت المطر

ماشى وكانى طير مفرود الجناح

طاير سعيد منتشى بنور الصباح

عالى وبدور على الجاى

ناسى ايه هو الى راح

ونسيت كمان طعم الجراح
تحت المطر

بجناحى ارفرف اطير لفوق

من وهم يأسى بدأت افوق

طاير سعيد بدنيتى

فى لسانى طعم محبتى

للدنيا ولكل البشر

تحت المطر

ساكته الشوارع والبيوت

احلام كتير لناس تموت

وانا حلمى لسه بيتولد

تحت المطر

:)

.....................................................

حاجة تانية من أجمل ذكريات حياتي بفتكرها مع المطر هي أول أيام شغلي... لما كنت بدرّس أطفال صغيرين

كان المفروض الوقت دة من السنة هنعمل فيه نشاط فني "غير الأغنية طبعا" عن فصل الشتاء.. كل فصل عمل حاجة

غير التاني،بس أنا حبيت أعمل حاجة نفضل فاكرينها طول الوقت فقطعت لوحة كبييرة "نسبياطبعا"مش هملى كل

الحيطة بيها يعني :)،و قطعتها على شكل سحابة و لونها الأطفال بالألوان المائية مع بعض باللون الكحلي... بعدها جبنا

قطن و قعدنا نلزقه كلنا على سحابتنا المغيمة..... و قصيت لوحة لبني على شكل قطرات مية على أد عدد الأطفال و

كلطفل لزّق النقطة بتاعته في المكان اللي يحبه هو تحت السحابة

كانت سحابة مغيمة بس كنا بنحبها أوي،و بعدها بفترة فكّر ولد منهم إننا نحط تحتها شمسية و فعلا عملتلهم شمسية

عملاقة و بقينا أي وقت الدنيا تمطر ألاقيهم "ساعات حتى من غير استئذان" يجروا بسرعة و يقفوا تحت الشمسية

اللي فوقيها المطرفي الفصل و يفضلوا يضحكوا

:)

مشهد عمري ما هنساه طول عمري ضحكهم كلهم مع بعض و غناهم للمطر

.....................................................

المطركمان بعيش معاه أوي وبفتكر معاه كتير من أغاني فيروز

بفتكر أغنية هي مش قالت فيها أي حاجة تنم عن وجود مطر أساسا بس أنا دايما بتخيل المشهد كدة جوايا رغم اللي هي بتقوله في أغنيتها

:)

يمكن عشان أكتر أغنية بحبها؟؟ :)و الله ما أنا عارفة

المهم..... نفسي أشوف المطر قريب

أمل عندي بتمنى ربنا يحققهولي

عشان وحشني أويييييي

كيمو و أنتيموووو

قلت النهاردة عيد بأة... و بلاش من الكآبة المعهودة المرة دي :). فقررت أكتب حاجة نوع تاني و تجربة جديدة نسبيا لي

المشهد الأول

بإحدى غرف المنزل....

أم سفروتة: سفروتتي حبيبتي...تعالي عايزاكي ف موضوع كدة

سفروتة"بتكلم نفسها": حبيبتي؟؟وموضوع كدة؟؟ خلاااص عرفته :). أيــوة يا ماما خير؟

أم سفروتة: طنطك "حبوبة"جايبالك عريس. بتقول إنه كويس أوي و هو عنده 29 سنة و بيشتغل .... وكدة يعني

سفروتة: طب وإيه تاني؟ تعرفه منين و لا هو إيه المواصفات اللي عايزها بالضبط؟؟؟

أم سفروتة: لأ مش عارفة غير كدة. هي أصلا متعرفوش لكن بتقول إنه كويس أوي.. ها؟؟ قولتي إيه؟

سفروتة:امممم... طيب حاضر. هفكر و أقوللك

أم سفروتة: يعني مبدئيا موافقة عليه؟

سفروتة: آه عادي. ليه لأ؟ بس هفكر و ... تقاطعها أم سفروتة: طيب خلاص. هو جاي بكرة بالليل هنا إن شاء الله

سفروتة: نعم؟؟ بكرة؟؟؟؟؟

..........................................................................

المشهد الثاني

سفروتة في انتظار العريس و يسمع في الخلفية صوت جرس الباب

تسمع سفروتة صوت واحد بيضحك و يهزر.. لحظات و تسمع صوت تاني غير الصوت الأول!!!

سفروتة "في سرها": إيه دة؟ هو معاه حد؟؟ بس دي أول مرة ييجي! ينفع ييجي معاه حد؟؟

تخرج سفروتة و تلاقي مامتها في المطبخ فتسألها

سفروتة: ماما. إيه الأخبار؟

أم سفروتة" تضحك": دة طلع أكبر من اللي طنط قالته. هو ليه الناس مش بتتأكد من المعلومات بس؟؟

سفروتة: طيب يا ماما يعني إيه الأخبار؟ بعدين كمان دة فيه اتنين برة!! مين فيهم العريس؟؟

أم سفروتة "تضحك بشدة": أيوة صح :) عندك حق. مش عارفة ليه كدة. هههههه

سفروتة تبتسم و تعيد سؤالها: يا ماما طب أقعد فين؟ أبص لمين فيهم؟ ردي بس.... إلا أن أمها تهم بالخروج من المطبخ و سفروتة تنادي

مـامـا... يا مامـــــااااااااااا

..........................................................................

المشهد التالت: الصالون

تخرج سفروتة في خجل و هي لا تدري ما ستفعل

سفروتة "في سرها": آااه... واضح إني هقعد مع كيمو و أنتيمو. مين فيهم العريس و مين فيهم صاحبه؟!! و لا عمري هعرف إذا هم مش وضحوا كدة ف كلامهم

و تبدأ سفروتة في تعريف نفسها و هي لا تعرف لمن تنظر أو توجه كلامها

سفروتة" في سرها": أنا مش عارفة بجد أكلم مين فيهم. طب مين هسحره بنظراتي طيب؟

:p

كيـمو هادي و شكله رزين و مكسوف شوية..يمكن هو دة العريس؟؟ بس هو مش بيتكلم أبدا أبدا. لكن أنتيمه هو اللي بيتكلم و يتعرف عليّ أنا و العيلة!! هو اللي شكله واخد راحته و عايز يتكلم! أنا مش فاهمة حاجة

يمضي الوقت و تمر أكثر من نصف ساعة إلى أن تكتشف "بالصدفة" أن كيمو هو العريس فعلا

سفروتة "في سرها": لكن أنتيمه ما شــاء الله راديو شغال!! دة مش بيسيب فرصة لأي حد يتكلم!! لا كيمو و لا حتى أنا

!!!!!

و تمر الساعات ثقيلة يتخللها محاولات "فاشلة" لإسكات أنتيمه الطيب و إبعاده عن ساحة المعركة و لو لدقائق

أم سفروتة "موجهة كلامها لأنتيمه": تحب تتفضل تقعد هنا شوية معانا و نسيب سفروتة مع كيمو؟

أنتيمو: لا معلش. أنا بس دقيقة هقف في البلكونة. أصل من ساعة ما جيت و أنا عايز أشوف المنظر من البلكونة هنا بيوّري إيه

أم سفروتة "و لسان حالها بيقول هيييييييييييه..فرجت :)))" : اتفضل طبعا طبعا

لا تمض ثلاث دقائق و يعود مرة أخرى ليلتصق بكرسيه و يقتحم السؤال الدائر بسؤال "خفيف" جدا

سفروتة... كلمينا بأة عن نفسك شوية (بصيغة السؤال المحفوظة من اخواننا المذيعين اللذاذ... و في قول آخر الأطباء النفسيين). سفروتة "في سرها": إيه دة؟؟! أنا ليه فجأة كدة حسيت بأني في برنامج "كرسي الاعتراف"؟

الأكثر تشويقا في الليلة كان قصص أنتيمه :). ففي الحقيقة لم تسمع العائلة إلا صوته، و كان يقاطع كل من يتحدث و دوما هو مديرا للحوار الذي في الحقيقة.. حوار بينه و بين نفسه فقط

انتهت الليلة... و رحل كيمو و أنتيمو

أم سفروتة: ها؟ إيه يا سفروتة فيـــه؟

سفروتة" و نظرات الاذبهلال كلها على وشها": فيه؟؟ هو ميــن؟؟؟

:)))

ملحوظة هامة: اعذروني إذا كان اللي كتبته دمه تقيل أوي و فيه مبالغة... بس الحقيقة إن اللي مكتوب دة هوموقف حدث بالفعل مع حد أعرفه

يا ترى ممكن نتعلم حاجة من اللي اتكتب دة؟؟

Happy Eid

بنفضل مستنيينه طــــول السنة

و في الآخر ييجي و يمر بسرعة بسرعة من غير ما نحس بيه

ربنا يتقبل منـا جميعا رمضان

يومين تلاتة و ينتهي.... و نفضل مستنيينه لحـــــــــد السنة الجاية تاني

أعتذر إني متأخرة في الرد على التعليقات، بس حصل ظروف مش كلها كويسة الحمدلله...... بعدين كملت بأن النت قطع و بكدة انفصلت تماما عن جزء من عالمي بحبه أوي

كل سنة و الكل طيبين و مبسوطين أوي إن شاء الله

عيد سعيــــد

و عساكم من عوادة

تقبــــــــــــل الله منا و منكم

O moon!

What's wrong?? Why are you sad lovely moon?!

I'm all alone.. none cares about me.

How come?! They all love you, and each night they watch you with great delight.

Yes... People watch me every night, but they are on earth, and I'm all alone here in the dark sky.

The whole sky is covered with twinkling stars!! Don't you feel them beside you??

Indeed it is, but they just enlighten the sky... and i still feel so lonely.

What about this star beside you?

Oooh... this is my guiding star, the one I love most... but this star is not even always there.

I may have a sad face... an' I may feel so lonely.... but I'll always be there for the people let them enjoy my beauty.. and guide them through Darkness.

مشاعر سلبية وحشة جوايا

بصي.. إيه رأيك تقفي هنا و أنا هقف في الصف اللي أدامك لحد بعد صلاة العشا نبقى نشوف مكان تاني؟.. قالتها صديقتي التي أتيت معها لنصلي التراويح فوافقتها على كلامها، نظرت خلفي للحظة ثم استدرت سريعا و بداخلي رغبة في ألا أنظر خلفي مرة أخرى طوال الليلة

استكملت صديقتي حديثها مبتسمة "ها؟؟ إيه رأيك في المكان اللي اختارته ليكي؟ يجنن طبعا ومفيش زيه تاني. تقدري تقولي غير كدة؟؟". فابتسمت ابتسامة باهتة حيث إن عقلي كان في مكان آخر تماما، و أجبتها "آه. مكان فعلا مفيش زيه". . . و رحلت صديقتي لأن الصلاة كانت قد أقيمت على أن نتقابل في الاستراحة بين الصلوات

انتهى جزء من الصلاة و كان وقت الاستراحة بين الأربع الركعات الأولى و الأخيرة، وجدتني أسرع الخطى لأكون بجوار صديقتي دون أن أنطق بكلمة واحدة... ظللت بجانبها لحظات ثم أسندت رأسي على كتفها في محاولة مني للإحساس بحبها و كي أحاول نسيان ما يشغل بالي بتلك القوة ... لكني لم أستطع

كنت أحاول أن أمسح من ذاكرتي صورة أعز صديقاتي التي وجدتها تقف خلفي مباشرة.... أخطأت في التعبير الآن، فهي ليست أعز صديقاتي بل "كانت" أعز صديقاتي، لكني بالفعل لم أستطع. أخبرت صديقتي التي تجلس بجانبي بأني رأيت حبيبتي لكني بالفعل ليس بمقدوري أن أذهب لأصافحها حتى

لست غاضبة منها، و لم أكن يوما كذلك... إلا أني بالفعل حزينة لأنها اختفت من حياتي في وقت احتجت إليها فيه كثيرا و دون إبداء أية مبررات...... حاولت كثيرا كثيرا التحدث معها و فهم ما حدث إلا أني فشلت في ذلك إلى أن عرفته بعدها بأشهر......... و لم يكون سببامقنعا بالفعل الحمدلله، بل زاد من حزني في الواقع

أخبرت صديقتي أن حبيبتي بنفس المكان الذي نصلي فيه، إلا أنها لم تراني، و أنا سأقنع نفسي بأني لم أرها لأني لست أريد التحدث في اي شيء مضى و لن أحاول معها العتاب..... كانت مجرد صديقة أحببتها من كل قلبي لكن ذلك لا يتعارض مع كوني لست أريد التحدث إليها مرة أخرى

مرت دقائق ثقيلة علي كأنها ساعات عديدة، لم أستطع منع عقلي من التفكير و قلبي من التحدث معي حتى انتفضت بلا أي مقدمات و أنا أخبر صديقتي مبتسمة بأني سأذهب لألقي على حبيبتي السلام

رمضان كريم و بتاع

:)

هكذا فكرت

و هكذا فعلت

لم أندم على ذلك الحمدلله..... فقط تذكرت أننا في شهر قريب لقلب كل المسلمين، يملؤنا جميعا إحساس غامض بالراحة و السكون و الحب لكل شيء

شهر يذكرنا الله بعفوه عن الجميع إن دعوه بقلب محب..... فلماذا لا أعفو أنا عن مجرد شخصية بسيطة في حياتي؟؟

شهر يتعارف فيه الغرباء و يبتسم فيه الجميع لبعضهم البعض حتى الذين لم تقابل من قبل و ربما لن تقابلهم مرة أخرى...... فذلك ما فعلت... ذهبت لأسلم عليها و احتضنتني بشدة وسط فرحة و دهشة لوجودي أمامها........ لكني لن أعود يوما كما كنت

أحبها كثيرا، لكن يعود أبدا الحب بيننا كمان كان

Happy Ramadan

HaPpY RaMaDan to all of you

:)

طبعا أنا آخر واحدة في العالم تقول كدة بس سامحوني لأن الدنيا مش كانت مساعداني خالص

ربنا يتقبل منا و منكم صالح الأعمال إن شاء اللـــه


رمضان السنة اللي فاتت كان أسوأ رمضان عدى علي طوووول حياتي..وبجد كنت أول مرة أحس إني خارجة منه "خسرانة" فعلا!!! يارب يكون رمضان السنةدي أحلى مليون مرة من كل شهور رمضان اللي فاتت في عمرنا

وحشني أوي أوي البلوج بتاعي ووحشني ناس كتير أوي و كنت حاسة إن جزء مهم من حياتي مفقود لأني مش عارفة أتطمن عليكم... يارب يكون الكل بخير

رمضــــــان كريــــــــم

إلى لقاء قريب إن شاء الله

The picture taken from lianne1962.stumbleupon.com

سمعتهم كثيرا يقولون

أن الحب جنون

و أن أدق وصف للعاشق أنه المجنون

لم أصدقهم يوما

فربما كان حديثهم ظنون

و هم يوما لم يعلموا

معنى الحب بحق

و ما يحسه العاشقون

لم أكن يوما لأصدقهم

إلى أن جئت أنت

فعلمتني ما لم أكن لأعلم لولاك

فأصبحت أنا ذاك العاشق المجنون

أتراهم يسخرون؟؟

من حمرة وجنتي

من تلعثم كلماتي

و تردد نظرات عيني حين أراك

أتراهم يلحظون

شرودي في بحور من الأحلام

إذا ما سمعت أغنية تذكرني بك

أو طاف بخلدي بعض كلماتك

فأزيد بها عشقا لك و لقلبك الحنون

............
عندما تحدثت.. حملتني معك إلى قارب من الأحلام

تحدثت.. فأنسيتني قسوة الحياة و الأيام

تحدثت.. فجعلتني لا أدرك ما أفعل حولي.. ما يجول بخاطري و ما أقول!!

لاشك أنه قد أصابني!!! ذلك السحر الخالد.. ذلك الجنون

تحدثت أنت، و معك... نسيت من أكون

مجرد كلمات كتبتها أمام البحر في يوم من الأيام

لــو تعرفي أديش بدي طير بعيييـــد متلك يا فيروز

طيري يا طياره طيري يا ورق و خيطان

بدي ارجع بنت صغيره على سطح الجيران


علي فوق سطوح بعاد عالنسمه الخجوله

اخدوني معهن الاولاد و ردوا لي الطفوله

ضحكات الصبيان و غناني زمان

ردت لي كتبي و مدرستي و العمر اللي كان


و ينساني الزمان على سطح الجيران



لو فينا نهرب و نطير مع هالورق الطاير

تا نكبر بعد بكير شو صاير شو صاير

يا زهر الرمان ميل بهالبستان

تيتسلوا صغار الارض و يحلو الزمان

و ينساني الزمان على سطح الجيران

كلام مش مرتب..مش لاقياله عنوان دلوقتي

ماما! مشفتيش عمل إيه عشان يصالحها :)... بجد عجبني أوي أوي. كل شوية يعمل لها مفاجأة و تلاقيه في أماكن هي مش متوقعاها، و ..... و... بس أكتر حاجة عجبتني لما ملى أوضتها كلها ورد.. دايما أتخيل الحركة دي أوي أوي

ماما: آه ( و ابتسمت و قالت) كلام أفلام و تمثيليات بأة

ساعتها اتدايقت أوي من كلمة ماما :(، بس مش قدرت أكتمها جوايا فسألتها... ماما! لما كنتي بتزعلي من بابا مش كان بيجيبلك ورد ساعات؟؟؟

فسرحت و كأنها بتفتكر ذكرياتها بأة ..بعدين قالتلي أيوة طبعا حصلت أكيد

فسألتها: مرة واحدة يعني؟؟؟

قالتلي لأ طبعا. كتير

...............................

طب هو ليه الناس بتحاول تنسى الرومانسية و تتجاهلها؟؟

ليه بيحاولوا يهمشوها و يلغوها من قواميس التعامل كلها و كأنها عمرها ما كانت موجودة؟

ليه بجد؟؟؟

و ليه لما نقول "كلام أفلام" مش بنحاول نقلده و نطبقه في الواقع؟؟

مش كل اللي في الإعلام لازم نقول عليه وحش و مش ممكن نقلده.... إذا هي حاجة بتخلي أرواحنا تطير معاها و لو عرفنا إن المواقف دي حصلت مع حد في الحقيقة بنلاقي قلوبنا بترفرف في تخيل الموقف و تترسم على شفايفنا ابتسامة، يبقى ليه مش بنفكر نعمله؟؟؟

ناس كتير بتقول إني خيالية أوي لما أفكر كدة!! بس أنا طول عمري بفكر فعلا فعلا إن شريك حياتي "لو جه يعني في يوم من الأيام :)" لو هو زعل مني لا قدر الله أنا هحاول أعمل حاجات مبتكرة عشان أصالحه، و تكون اللحظة دي لحظة دايما نفتكرها و نفرح لما نفتكرها مش نزعل........ كتير أوي فكرت في موضوع إن الواحد يملى الأوضة كلها أو أي مكان عموما بالورد عشان حبيبه و تكون مفاجأة الطرف التاني لما ييجي يلاقيها أدامه.... مش شايفة إن الورد حاجة مكلفة أوي كدة!!! و لا الموضوع كله هيتطلب مجهود زيادة و لا وقت مش ممكن نلاقيه. بس متخيلين إحساس الحبيب ساعتها هيكون عامل إزاي؟

لما واحد يفكر يعمل لحبيبه مفاجأة بأي شكل بأنه يجمع الناس اللي هو بيحبها أو بأنه يعزمه في مكان هو بيحبه أوي ومش يكون قايل له من قبلها... مش دي حاجات جميلة أوي؟؟ و هيفضل الطرفين فاكرينها طول عمرهم المفروض؟؟

عارفة إن الدنيا مليانة هموم و دايما مشحونة بمشاكل و مشاغل مش بتخلص و بعد كدة عيال و مطالب أد كدة.... بس أكيد لو فكرنا في الموضوع صح أكيد لازم يبقى فيه لحظات حب

لحظات نفتكرها مع بعض لما نكبر

و لحظات تقربنا أكتر من بعض و تلغي رتم الحياة الممل شوية

لو مرة حتى على الأقل كل شهر غيرنا رتم الحياة بجد و عملنا مفاجأة رقيقة... حتى لو جوة البيت قررنا نغير الطابع العصري و استعملنا الشموع في المكان و لبسنا كلاسيك كأننا في مطعم فخم و غيرنا جو البيت كله . مش ممكن تفرق نفسيا "ولو للحظات" مع الطرفين؟

مش عارفة ليه شايفة كل اللي حواليا "أو معظمهم بالأصح" اتخلوا تماما عن الرومانسية في الحياة، و مش بأة فيه أي جديد غير لما تيجي بالصدفة

مش شرط نعمل حاجة نصرف بيها كل فلوسنا لأن مش كل حاجة بتتقدر بالفلوس و بس

مش شرط حتى إنها تكون حاجة مبتكرة مفيش بعدها... يعني إيه المشكلة لو في يوم راح واحد و مراته و اتمشوا على الكورنيش في وقت الجو حلو فيه؟ و لا راحوا اتمشوا في حدائق المنتزه براحتهم؟؟

ليه لما تبقى واحد عندها 30 سنة و لا حتى أقل تقول إحنا خلاص كبرنا على الحاجات دي؟؟؟

مش شايفة الواقع دة حاجة حلوة خالص!! و عارفة إن الدنيا مش وردية و إن كل حاجة محبطة... بس لو كان فيه جو من الحب و التجديد في العلاقة كل فترة دة أكيد هيقلل من الضغط اللي موجود بسبب الظروف و الواقع اللي حوالينا. يعني إذا كانت الدنيا لونها اسود و كحلي و بس إحنا ممكن نضيف ليها شوية ألوان خفيفة ليه لأ؟؟؟

ليه مش نتحرر من واقعنا دة شوية و نسيب مساحة للحب يتنفس، و نسيب مكان للرومانسية تعبر عن نفسها و لو بأبسط الطرق؟؟؟

بجد سؤال نفسي تشاركوني في إجابته

أعرف واحدة يوم عيد الحب صحيت من بدري أوي و راحت لفت العربية بتاعة خطيبها كلها بتل أحمر و حطت عليها ورد و بقت شكلها متغلفة زي ما تكون هدية!!! رغم هيافة الموضوع و إنها في الآخر لو فكرنا فيها بجد هي مش جابت هدية و لا حاجة.... بس مش دي حاجة هتسعد الطرف التاني و تخليه مبهور بخطيبته؟؟؟

عارفة إنه مثال أهبل شوية :$ بس دة اللي افتكرته اللحظة دي و كمان كل واحد عارف شريك حياته بيفكر إزاي و بيحب إيه و على الأساس دة المفروض يتصرف

أنا شخصيا حبيت حركة البنت أوي لأنها مش متوقعة خالص، و لما اتخيلت رد فعل خطيبها لما يشوف العربية لقيته هبكون إحساس حلو أوي... و الأهم إنه جديد

عارفة إني خرفت جامد المرة دي و حتى مش راجعت على الكلام اللي كتبته دة بس دة بجد لأني حاساه أوي و مستغرباه في الدنيا حوالي أوي. ياريــــت تقولولي فيه أمل و لا أنا بحلم زيادة؟؟؟؟

فـــيه أمل الناس تعبر عن حبها و تجدد في حياتها بطرق بسيطة في فترة بعد الخطوبة؟؟؟ و لا مجرد أحلام نادرا ما بتحصل؟؟؟؟

تالت تاج في حياتي البلوجرية... و أوحشهم بصراحة

الكمبيوتر غالبا مش قدر كتير على فراقي..... رجعت لقيته في أنفاسه الأخيرة و هيتكلم و يوصيني وصيته قبل ما يموت!! قلت ليه يعني انت مش لحقت خالص إحنا هنستهبل؟؟ فاضطريت أتخلى عنه كام يوم عشان يروح للدكتور و يرجع لي معافى "شوية" مش أوي....... في أول مرة بعد ما فاق من الغيبوبة هو و أنا...المرة دي تاج..... طبيعي بيمر على كل المدونات دلوقتي بس هعمل إيه طيب؟؟ :(. المشكلة إن فيه 4تانيين مفروض أكتبهم بس هعمل كأني مش أخدت بالي وخلاص

:$

نبدأ؟؟ طيب بسم الله

اتفضلوا معايا

أولا: هواياتي

السباحة

إني أقابل أصحابي و أعمل معاهم حاجة مفيدة

الرسم جدا جدا أو عمل أي حاجة غريبة بالكانسون و بقايا الحاجات عشان في الآخر تطلع حاجة فانتازيا تحبها بنت أختي اللي جوا قلبي

المشي بعد الفجر

العزف على البيانو و أييي حاجة متعلقة بالموسيقى بعشقها

القراءة جدا جدا بس حسب الحالة النفساوية و الجو العام

الخروجات الجديدة المجنونة مع أصحابي القريبين مني

مش عارفة إذا كانت دي تحسب هواية و لا لأ بس هي حاجة بحبها أوي و بعملها كتير جدا و هي التأمل

ثانيا: أشهر عيوبي

التـــــــــردد

إني مش بعرف أخبي اللي جوايا كويس.. يعني لو حد زعلانة منه مهما حاولت أكلمه عادي مش بعرف معظم الوقت، أو حد مش استريحتله... بجد مشكلة الحمدلله

مش دايما سهل أغير المود اللي أنا فيه... كتير بستنى اللحظات السحرية اللي بتخرجني من كل اللي مدايقني، و اللي ممكن تكون حاجات بسيطة جدا بس مع كدة مش طول الوقت بتحصل

ثالثا: حاجات بكرهها جدا

النفاق طبعا طبعا طبعا

الفراق بكل أشكاله... دة أكتر إحساس بكرهه في حياتي كلها

التكبـــــــر.... إلى مالانهاية، بجد بستغرب أوي الناس اللي بتحس نفسها حاجة لوحدها ومش فيه حد زيها، و بزعل أوي من الناس اللي بتبص للي حواليها نظرات احتقار و كأنهم أقل منهم.... شايفاه إحساس بشع بيخلي صاحبه مش يحس بأي عيوب فيه و يخليه يجرح كل اللي حواليه

بكره أوي أوي إن الناس تجرح بعضها، ودة بأة كتير أوي في مصر من كتر ما الناس بقت تشوف حواليها، و بكره أوي عدم النظافة، ودة بأة أكتر في مصر، و بكره طبعا الظلم ودة مش يختلف عليه اتنين، و مش بطيق الحر

حاجات بكرهها في شخصيتي.... إني أحس إني ضعيفة وخائرة القوى... و دة بأة إحساس بحسه كتير أوي مؤخرا، و مش بطيقني لما أكون مكسوفة :$ ... و اللي شافوني أو كلموني قريب أكيد هيفهموا قصدي للأسف.....مممممم ...كمان بكره لما أحس إني مش فاهمة اللي بيحصل حواليا

رابعا: حاجات بحبها أوي و مش بمل من تكرارها

الحب

إني أسمع ضحكة و كركرة بنت أختي اللي بحسها بنتي :) أو أي طفل تاني أكيد

إن يكون البحر هو رفيقي... سواء كنت بتفرج عليه أو جواه، دة عمري ما بمل منه مهما فضلت أدامه

إني أتفرج على الدنيا في اللحظات اللي قبل الشروق و أسمع صوت العصافير و أشوف السما الكحلي و هي بيبدأ يدخل عليها ألوان تانية بكل هدوء، و سبحان الله كل ما لون يدخل تحس إنه أحلى من اللي فات و عمرنا ما نلاقي أي نشاز في الألوان دي لحد ما تتصبغ السما كلها بالألوان المريحة و يختفي القمر و السما الكحلي معاه... بجد إحساس رائع بحسه ساعتها و بحس إن التأمل في الوقت دة هو من أحلى النعم اللي ربنا أنعم بيها علينا بس مش بنحس بيها ولا نفتكرها

إني أكلم الناس اللي بحبها و برتاح لما أتكلم معاها.... دي حاجة مش بمل منها حتى لو استمرت كتييييير

حاجة بعشقها ومش بمل منها إني أقعد في "براونيز" في اسكندرية براحتيييي و أطلب أي حاجة عشان كل حاجتهم حلوة :$.... شوية طفاسة بأة

أكل الشوكولا اللي بعشقها كمان

خامسا: سؤال بيستفزني جدا

هي أكيد كتير الحقيقة :)، بس أكتر سؤال

انت بتكتبي كدة إزاي؟؟

نفس السؤال اللي بيستفز اللي باعتلي التاج :) بس يا رب مش يزعل لأنها صدفة بحتة و أنا غيره تماااااما في أسبابي

المشكلة إنه بيكون سلسلة من الأسئلة مش واحد بس يعني بيبدأ ب"بتكتبي كدة إزاي؟" و يليه "هو انت شولة؟؟؟" و أنا قدامهم بكتب باليمين طبعا!!!! و بعدها ضحك على تريأة على نظرات اذبهلال و اندهاش بطريقة غريبة و بعدها معظم الوقت تعليق صغير... بس الغريبة إن خطك جميل

بالمناسبة السعيدة دي أحب أفتكر عمو المراقب في امتحان الفلسفة في "ثــــــــانوية عــــامة"لما جه وقف فوقي زي عمود النور "المطفي طبعا" و قرر مش يتحرك من مكانه دة.. و طبعا أنا برده شخصية سخيفة ومش بعرف أركز في اي حاجة لو حد باصصلي!! و خصوصا لو كان واقف فوقي!! و في امتحان!! و فلسفة!!! فأنا في الأول بصيت فوقي مرتين و أبتسمتله، بعدين فهمت إن دة قراره الأخير فسبت القلم و بصيتله أوي و قلتله "نعم؟؟" بابتسامة عريضة لا تنم عن أي شيء غير إني مش طايقة حضرته.... فلقيت نفس نظرة الاذبهلال اللي متعودة عليها بس الفرق إنها من راجل كبير، و لقيته بيقول "إنت إزاي كدة؟ انت ماسكة القلم غلط خالص يا بنتي!!! هو مش بيتمسك كدة!!"، فأنا ضحكت وقلتله معلش أنا عارفة و الله، حاولت و أنا صغيرة و ماما تعبت معايا أوي بس مفيش فايدة الحمدلله، فرد و قاللي "لاااا.. القلم.. و"أخد القلم مني وقاللي" بيتمسك كدة..حطي صوابعك هنا كدة... و بدأ في تعليمي الكتابة خطوة خطوة :)) فأنا ضحكت و قلتله حضرتك عندك حق"، فاداني القلم و فهمت إن الموضوع خلص!! لكن لقيته أول ما بدأت كتابة تاني قاللي لأ مش كدة و لسة هيكمل كلامه و ياخد القلم رحت ابتسمت و قلتله معلش بأة!!! أنا أصلا بمسكه كدة من صغري و خلاص متعودة، وبمسك الشوكة كمان غلط ومحدش عرف يصلحني خلاص بأة!! كمان مش هتعلم الكتابة دلوقتي في الامتحان. صح؟؟؟ فقاللي أيوة صح، بس لازم تصلحي طريقة كتابتك و تعدلي ورقتك المقلوبة دي

و مشي و سابني بس مش خلصت من وقوفه فوقي كل كام دقيقة لحد آخر الامتحان الحمدلله

و سؤال تاني.... هو انت كدة عطستي خلاص؟

سادسا: أمنيتي في الحياة

إني أقدر أحفظ القرآن كله و أعلم اللي اتعلمته للأطفال

مش أفارق الحياة غير و ماما و بابا و ربنا راضيين عني

إني أسمع الأغاني الوطنية اللي بحبها من زمان من غير ما أتحسر على بلدي... مش هقول مستقبل مشرق و رائع بس هقول على الأقل إن المصري يحس بآدميته و إن ليه تمن مرة تانية... دي أمنيتي لبلدي

إني ألاقي فارس أحلامي :) يمكن خيالية شويتين بس مش مشكلة، هابقى يمكن أتصدم ساعتها و أعمل إني مش أخدت بالي إني حلمت بكدة في يوم من الأيام...... و يمكن برحمة ربنا و دعاء الوالدين ألاقي اللي حلمت بيه و يكون زوج صالح فعلا و نكون أسرة جميلة
Why not? :)

لحد وقت قريب أوي كان حلمي إني أبقى صحفية ناجحة أوي و قلمي مش يقول غير الحق بجد.. و كنت شايفاني هكون مميزة و مش مجرد صحفية كدة و خلاص، بس يمكن دلوقتي هكتفي بأني أحلم إني أعرف أستعمل علمي و موهبتي و خبراتي البسيطة أوي في الدنيا في حاجات تفيد الناس بجد و أحس بثمرة اللي بعمله مش أكون شخصية زيي زي غيري في الدنيا. قولوا يارب

سابعا: حاجات مؤمنة بيها جدا

اممم.... هو يمكن كلام عبيط شوية بس أنا شايفاها كدة... إن الدنيا زي التفاحة اللذيذة..... جميلة أوي و ممتعة، بتلف فيها كتير و بجد تحبها، بس فيه وقت بتلاقي فيها شوية عقبات "بذر يعني"... ممكن ساعتها تفضل واقف متدايق منها و مش تكمل.. و ممكن الطبيعي إنك هتسيب العقبة دي و تكمل في الدنيا. بس هي في الآخر تفاحة.. و بتخلص و في الآخر مش بيبقى غير طعمها الحلو اللي بتفضل فاكره، و فايدتها اللي هنحسها بعد كدة إن شاء الله

تاني حاجة مؤمنة بيها جدا جدا
و عسى أن تكرهوا شيئا و هو خير لكم و عسى أن تحبوا شيئا و هو شر لكم

تالت حاجة هي الحقيقة جملة كانت في أغنية بس بفتكرها كتير أوي أوي، بتقول "ما بنعرف قيمة الاشياء ..إلا بعد ما تغيب" . مش بالضرورة غياب للأبد و مش بالضرورة غياب الأشخاص لكن فعلا كل حاجة... مش بنحس بقيمتها غير لما نفقدها شوية

ثامنا: أكتر حاجة فاشلة فيها

النوم :)
إني أمثل إني مش متدايقة لما أكون متدايقة... خصوصا أدام أصحابي القريبين مني

امممم.... مش فاكرة حاجة تانية دلوقتي

تاسعا: وظيفة بحبها

حاجات كتير أوي...منها الإذاعة سواء في راديو أو تلفزيون
بعشق التدريس لما يكون فيه ابتكار و بعد تماما عن النمطية و الغلاسة على العيال
بحب أوي خدمة العملاء و المراسلين الصحفيين و الملحنين الراقين لما يجيبوا ألحان حلوة و تستاهل، و لو كنت في يوم من الأيام دخلت علمي رياضة كنت نفسي أطلع مهندسة ديكور لأنها مهنة روعة و مليانة ابتكار و تجديد كل يوم

آااااخر حاجة

مثلي الأعلى في الحياة

جدو الله يرحمه

كنت بحبه جدا، و كان الكل كبار و شباب و أطفال مجتمعين على حبه الشديد و عمر ما حد من أهلي حس بملل عشان هيروح يزور جدي دة... كنت بحبه في طريقة معاملته اللطيفة لكل اللي حواليه، كنت بحبه في أسلوبه التربوي في تعامله مع الناس كلها... في الدروس الصغيرة و جمله البسيطة للي حواليه اللي بتكون مجرد بذور بتتزرع جوانا و بنكتشفها بعدها، كنت بحبه في إنه لما كان بيسلم عليك كنت بتحس إنك أغلى شخص في دنيته و إنك حد مميز أوي عنده و كان منتظرك بشوق... ييجي الشخص اللي بعدك تلاقيه بيسلم عليه بنفس الحرارة و الشوق دة بس بطريقة تانية عشان يحسس كل اللي حواليه إنهم فعلا ناس جميلة و تستحق الحب دة، و كل حد يحس إنه مميز بالنسبةله بطريقة غير الناس التانية
كنت بحب جدا بسمته و تفاؤله الدائم و روحه الشبابية لآخر لحظة في عمره

اللبنانيين في حبهم للحياة و صمودهم حتى في أسوأ لحظاتهم
واحدة صاحبتي أكبر مني بحوالي 10 سنين بس هي فعلا فعلا مثلي الأعلى جدا.. بس دي هكتب عنها بوست لوحدها لأني فعلا اتعلمت منها كتير و كنت نفسي أمشي على خطاها لآخر لحظة عشان أحس إني أنجزت حاجة فعلا

بهدي التاج لمين؟؟؟
إنسان مقيد
الخيط الرفيع
Blue wave
همسات دافئة
أمير الهدوء
الشارد

عصفورة من الشرق

محاولة للطيران

لم يصدق عينيه ذلك الصباح

أخذ يحرك جناحيه ببطء و ينظر إليهما

لقد شفي تماما من ذلك الجرح المؤلم في جناحه و الذي كان يمنعه من الطيران

.........................................

بدأ الطائر الصغير في التساؤل... هل بإمكاني الطيران الآن بعد أن منعني جرحي لشهور عديدة مضت؟

لم يفكر كثيرا في إجابة لسؤاله، فقد بدأ في التحليق عاليا في السماء تاركا الماضي خلفه

انطلق بحرية بين السحب... رفرف بجناحيه بقوة... يغرد بأحلى الألحان السعيدة

أحس بأن قيودا كثيرة قد كسرت، و لم يعد أسيرا لجرح كان عميقا في يوم مضى

لم يعد هناك ما يمنعه من الطيران الآن

أحس بأن الكون بأسره.. ملكا له وحده

و فكر

لكم تمنيت أن أحلق عاليا بعيدا عن كل العيون

ها أنا أحلق بحرية في تلك السماء الواسعة التي لا أرى لها نهاية

و تلك السحب الصغيرة تتحداني كي أمر خلالها و أغوص بداخلها... اطمئني أيتها السحب... فلن أضل طريقي هذه المرة

و تلك المروج الخضراء هناك تناديني..... فإليك أنا قادم

في تلك اللحظة... شعر الطائر بأن كل من حوله من الطيور ينظر إليه

لعله مجرد إحساس بداخله لأنه لم يطر منذ شهور.... لكنه نظر مرة أخرى ليجد الجميع يتوجهون بأنظارهم إليه فقط

مهلا!!! تلك ليست نظرات سعادة من أجلي!! و لا هي نظرات حقد!! ربما هي نظرات.......... و هنا، نظر الطائر إلى جسده الأبيض الصغير ببطء.. ليجد اللون الأحمر قد غطى جزءا منه

إنه ذلك الجرح اللعين

لم يلتئــم بعــد

بل عــــاد ينزف دما

زحف وقعد..وبدأ يمشي ويتدألج :)

بذلك اليوم بالتحديد

و في تلك الساعة

منذ عام..... بدأت التدوين

أراني كتبت أكثر مما توقعت... كتبت....... عن أشياء لم أكن يوما أتخيل أن أكتب عنها

عام مضى

تعلمت فيه الكثير و الكثير

ربما أكتب عما تعلمته يوما

إلا أني أردت اليوم فقط... أن أخبر الجميع أني أحبهم كثيرا

و أني لن أنسى يوما أيا ممن ساعدوني و شاركوني همومي و أحزاني... و رسموا كثيرا البسمة على وجهي عندما كنت أحتاجها بالفعل... و كانوا لي خير أخوة و أصدقاء

أحبـــكم كثيرا

و أشكركم كثيرا

يمكن مش كلكم تعرفوني أوي.. بس من خلال معرفتكم البسيطة لي طول السنة اللي فاتت ..هطلب منكم طلب صغير

عايزة كل حد يدخل مدونتي يكتبلي نصيحة، و يكتب أحسن و أوحش حاجة حسها في مدونتي

فعلا أحب أعرف رأي كل حد فيكم

اتشرفت بمعرفة كل حد فيكم أوي أوي.... و فيه ناس كتيرة اشتقت لوجودها في عالمي دة بس اختفوا :(... بجد بحبكم، و بجد دايما فاكراكم حتى اللي مش بقوا يزوروا مدونتي لأي سبب من الأسباب

ملحوظة: البوست كان مفروض أكتبه من ساعتين ونص بس مش كنت في البيت :$. أول بوست لي كان الساعة 10 بالليل الحقيقة

ملحوظة تانية مهمة: رأيكم دة......... من غير مجاملة خاااالص، و من غير ألفاظ سيئة

و جزاكم الله كل الخير

:)

بحبكم

أمام البحر

ها قد أتى الليل.. و أنا في لهفة لسماع أخباره التي قد تحملها الأمواج إلي يوما ما

كل ليلة

أنظر إلى البحر و أغيب معه في حالة من الشرود العميق

أتشوق لرسائله مع البحر و أتساءل..... هل يفكر في؟؟

هل ستأتي لي الأمواج يوما حاملة إحدى رسائله؟؟

هل من المعقول أن تصله رسائلي التي أرسلها مع البحر بشوق كل ليلة؟؟

كلما نظرت إلى ذلك البحر الأزرق الثائر أمامي غرقت في بحر من التفكير

أذوب مع خيالاتي و أحلامي أمام ذلك المشهد المليء بالسحر و الغموض

و أنا أستمع إلى أصوات الأمواج المتلاحقة التي لا تهدأ يوما

ترى... هل سيهدأ بالي؟؟ أم يظل مثل تلك الأمواج حتى آخر نفس لي؟

تحديث: مجرد خاطرة كتبتها أمام البحرلا تنطبق بالضرورة على الواقع أبدا